Read obolo Ibeb 24 Bible Online

Ibeb 24 - obolo bible

Ibeb 24

¹Ike mgbọ yi, Ebereyam îkan enenen. Okumugwem îgbana si ọmọ me oniin̄ geelek.

²Usen ge, Ebereyam onenigwen ogwu ibot usun̄ kan̄ ogwu òkidọmọ inu geelek me uwu kan̄, mè ibe, “Tap ubọk me irak owut-ukot n̄a,

³mè nyan̄a ibot nyi emi me erieen̄ Okumugwem, òrere Awaji inyọn̄ mè Awaji ijọn̄, ibe ke owu òkpodo enenwaan̄ geege me etete ebi Kenan chi, ebi emi ngọọkbe iluk, inyi gwun̄ n̄a.

⁴Ire, ke owu môsi egep kiji me ido kiji isi ido nwa inyi Ajiki gwun̄ n̄a.”

⁵Ogwu ibot usun̄ ya onenido Ebereyam ibe, “Ire nsi, mè ogwu enenwaan̄ ya ìkachieek igọgọọk emi ika inu ere keyi, ìre ǹsasa gwun̄ kwun̄ ǹgwu ǹkom m̀fo ido ya ere owu osibibe itele?”

⁶Ebereyam otataba ogwu ibot usun̄ ya ubọk me utọn̄ ibe, “Gbala chieen̄, inyi okasa gwun̄ n̄a ìgwu ìkom ìfo ama ya.

⁷Okumugwem, Awaji òkup me inyọn̄, ogwu ògwegwen emi isibi itele egep kè nte n̄a, mè ama emanbe emi, ogwu ònyanyan̄a ibot mè ichieek use ibe ke ọmọ môsa ijọn̄ ebi Kenan yi inyi bọn owot iman n̄a, ìkpolọlọ iraria ogwu osat kan̄ ibe isa owu isi, inyi owu òsi òdo nwa me ere ya ònyi gwun̄ n̄a.

⁸Ire ogwu enenwaan̄ ya ìkachieek igọgọọk owu ika inu, inyan̄a-ibot yi owu onyan̄abe înan̄a owu me ibot. Ire, kasa gwun̄ n̄a ìgwu ìkom ìfo ere ya.”

⁹Ogwu ibot usun̄ ya otatap ubọk me irak owut-ukot kè Ebereyam nte uwu kan̄, mè inyan̄a ibot inyi ibe ke ọmọ môrọ inu ogwugwu otumube inyi ọmọ.

¹⁰Ogwu ibot usun̄ ya onenititiin̄ owuwa ata inu nte uwu kan̄ okaan̄be itoon̄ me inyọn̄ akọp aligọ, mè inibene ije ije isi ama ere Nayọ olukbe me ido Aram Nayarayim.[38]

¹¹Mgbọ îrebe ama ya, isasa aligọ cha isi otu mudim òkup me agba lek ama ya, mè irọ inyi egele egwook me ijọn̄. Ema ere ere ya me agan̄ ikakwun̄ mgbọ ebibaan̄ ama ya ekinu inichibi mun̄.

¹²Ogwu ibot usun̄ ya oneniriaak uriaak ibe, “Okumugwem, Awaji kè Ebereyam nte uwu n̄a, soso rọ inyi ije n̄a ijaan̄, mè kaan̄ ejit nsan me lek nte uwu n̄a.

¹³Kpọ, mâkeke me otu mudim yi, ere nsabọn ibaan̄ ama yi ekinu inichibi mun̄,

¹⁴mè ikibeek nsabọn ibaan̄ cha ibe eche sọntiik mudim me ugọn̄ kiban̄ enyi emi ǹnwọ. Ire ikaan̄ ene geelek me lek kiban̄ òfọfọọk emi ibe, ‘Bọkọ nwọ, ke mâchibi si inyi aligọ kwun chi inwọ,’ emi mâriọọn̄ ibe ke îre ogwa ke owu ogobo isibi ibe inire nwa inyi Ajiki ogwu usun̄ kwun̄. Sa me ikeyi ke emi mbariọọn̄ ibe ke owu okaan̄ ata ejit me lek nte uwu n̄a.”

¹⁵Uriaak ya ìkatata ogwu ibot usun̄ ya me otu, Ribeka okekije inu melek ugọn̄ kan̄ me oguga kan̄. Ribeka ìre gwun̄ kè Betuwen, ogwu Nayọ ngwan̄ kè Ebereyam obonbe me owot kè Milika.

¹⁶Ribeka îjaan̄ uja enenen, mè ire obaak enenwaan̄ ikariọọn̄ge enerieen̄. Mgbọ îjebe ire otu mudim ya, ikwakwala isiki isi ichibi mun̄ ijot ugọn̄ kan̄, mè iben itoon̄ me oguga isa inene ibonije ifo.

¹⁷Ogwu ibot usun̄ ya olilibi isi ikweek ọmọ, mè ibeek ibe, “Soso tele mè ǹtuun̄ sọntiik mun̄ me otu ugọn̄ kwun̄ ǹsa ǹsiki ebek.”

¹⁸Ribeka ofefeme ugọn̄ mun̄ ya ikaan̄ me ubọk mgbọ yaage, mè ibe, “Ogwu nte, na nwọ.”

¹⁹Mgbọ înyibe ogwu enerieen̄ ya mun̄ isan̄a, itutumu inyi ibe, “Mâsi ichibi si ijet otutuuk anam kwun̄, inyi ema enwọ ejot.”

²⁰Igwagwat lek ikana mun̄ òsisik me emen ugọn̄ kan̄ igwook me emen okwa anam okisa inwọ mun̄ me ere ya inyi anam cha, mè igwu ikom ilibi isi ichibi ofifi inigwook. Ikeya ke Ribeka ochibi mun̄ iso otutuuk anam cha.

²¹Ogwu ibot usun̄ ya okpọkpọ iriaan̄ otu, mè iruk chieen̄ ikikpọ mè ìre Okumugwem îrọ mè ije kan̄ ijaan̄, mè ìre ìkarọ.

²²Mgbọ otutuuk anam cha onwọbe mun̄ ijot, ogwu ibot usun̄ ya onenimọnọ unye otu ewe asi inwọm alata araran̄ inwaan̄ Ribeka me otu inwọm, mè imọnọ si unye otu ewe asi ebek ubọk alata araran̄ iba itap ọmọ me ebek ubọk,[39]

²³mè inido Ribeka ibe, “Bak-nu, ìre owu ìre gwun̄ kè ekene? Ìre irek môsibi me uwu nte kwun̄ inyi emi mè ebi melek n̄a enelaak ewele egwe?”

²⁴Ribeka ofọfọọk ibe, “Emi ìre gwun̄ kè Betuwen, gwun̄ enerieen̄ ogwu Milika omanbe inyi Nayọ.

²⁵Eji mîkaan̄ mbubet mè inorie anam iwa enenen, mè ikaan̄ si agwut ere enyi mêkọtbe ilaak iwele egwe.”

²⁶Ogwu enerieen̄ ya ogegele ibot isiki, mè itọbọ ebum inyi Okumugwem,

²⁷mè itumu ibe, “Itọn̄ ikup inyi Okumugwem Awaji kè Ebereyam nte uwu n̄a, ogwu ìkawuuk ata ejit kan̄ mè atikọ kan̄ me lek kè nte uwu n̄a. Eyi n̄a, Okumugwem ìkatele emi me oniin̄. Îsa emi inire uwu ngwan̄ nte uwu n̄a.”

²⁸Ribeka olilibi ifo, mè isi ikpa otutuuk inu cha inyi ebi uwu ogwu uga.

²⁹Ribeka îkaan̄ ngwan̄ enerieen̄ ge òrere ugane kan̄, ekigwen Leban. Leban olilibi ekot ekot isibi isi lek ogwu enerieen̄ ya me otu mudim,

³⁰me mgbọ yaage îmun̄be asi inwọm alata araran̄ òkup me otu inwọm ogwu ngwan̄, melek asi alata araran̄ òkup me ebek ubọk, mè inọ otutuuk ukpatu ofolek ogwu enerieen̄ ya. Leban osisi imun̄ ogwu enerieen̄ ya me otu mudim ya okekebe iriaak aligọ kan̄ cha,

³¹mè itumu inyi ibe, “Okumugwem îgbana owu! Na mè efo uwu. Keke orọ okekebe ibia me ere keyi? Nra inen̄e uwu isun̄ iban owu, mè inen̄e si irek isun̄ inyi ebi kè aligọ kwun̄.”

³²Ogwu ibot usun̄ ya onenigọọk Leban ifo uwu. Ema efefeme otutuuk inu aligọ cha obemebe, mè isi isa mbubet mè inorie anam ijet anam cha, mè isa mun̄ ijet ogwu enerieen̄ ya mè ebi melek kan̄ esa egwọk ukot.

³³Eneniyik inorie inyi ema. Ire, ogwu ibot usun̄ ya obebe ke ọmọ môdadasi ikpa ibot ije kan̄ sabum ọmọ ònorie inorie. Leban obebe ikpa ma.

³⁴Ogwu enerieen̄ ya onenitumu ibe, “Emi ìre usun̄ kè Ebereyam.

³⁵Okumugwem îgbana Ebereyam nte uwu n̄a, mè irọ inyi ibọọn̄ ubọọn̄ enenen. Nte uwu n̄a îkaan̄ owuwa arọọn̄ mè eriembuuk, mè alata okuket, mè alata araran̄, mè ebi usun̄ ebirieen̄ mè ebibaan̄, mè owuwa aligọ mè inyinya akpan.

³⁶Sera nwa nte uwu n̄a îman gwun̄ enerieen̄ ge inyi nte uwu n̄a me mgbọ nte uwu n̄a okanbe isan̄a. Nte uwu n̄a okakana otutuuk inu geelek îkaan̄be itap ogwu gwun̄ ya me ubọk.

³⁷Nte uwu n̄a îrọ inyi emi ǹnyan̄a ibot, me erieen̄ Okumugwem, ibe ke m̀kpado enenwaan̄ geege me etete ebi Kenan ebi ọmọ ogọọkbe iluk inyi ogwu gwun̄.

³⁸Ire, mè emi ǹsi me egep kè nte kan̄ me ido ere emanbe ọmọ ǹsi ǹdo nwa ǹnyi gwun̄ kan̄.

³⁹“Ndodo nte uwu n̄a ibe ire ogwu enenwaan̄ ya ijit igọgọọk emi ika inu ye?

⁴⁰“Nte uwu n̄a ofọfọọk ibe ke Okumugwem, ogwu ọmọ okitọbọ ebum inyi môria ogwu osat kan̄ ibe isa emi ije, mè irọ inyi ije n̄a ijaan̄, inyi emi ǹsi ǹdo nwa me etete ebi uwu kè nte kan̄ me egep kiban̄ ǹjet gwun̄ kan̄.

⁴¹Ire emi nsi ire egep kiban̄, mè ire ife cha ijit inyinyi emi enenwaan̄, ke îre mgbọ keya ke emi mânwọnọ me lek inyan̄a-ibot eyi emi nnyan̄abe.

⁴²“Mgbọ nnube inire otu mudim ama yi me chereyi, nriaak uriaak ibe, ‘Okumugwem Awaji kè Ebereyam nte uwu n̄a, soso rọ mè ije yi nnube ijaan̄.’

⁴³Ntumu me emen uriaak ya ibe ke m̀bakeke me otu mudim yi. Ire ikaan̄ gwun̄ enenwaan̄ ònunu ibonichibi mun̄, mè ire ndo ibe itele mè ǹtuun̄ sọntiik mun̄ me otu ugọn̄ kan̄,

⁴⁴mè ire gwun̄ enenwaan̄ ya ibe emi, ‘Bọkọ nwọ, ke mâsi ichibi si inyi aligọ kwun̄ inwọ,’ ke mâriọọn̄ ibe ke ogwugwa ore nwa eyi Okumugwem ogobobe isibi inyi gwun̄ nte uwu n̄a.

⁴⁵“Ǹkarariaak uriaak ya ìsan̄a me emen ejit n̄a, Ribeka okekije inu melek ugọn̄ me oguga, mè ikwala isiki isi ichibi mun̄. Nnenibeek ibe, ‘Soso che sọntiik mudim nyi emi ǹnwọ.’

⁴⁶“Igwagwat lek ifeme ugọn̄ mun̄ ya ikaan̄ me ubọk, mè ibe emi ǹnwọ, ke ọmọ môsi ichibi si inyi aligọ n̄a cha inwọ. Nnwọnwọ mudim ya. Mgbọ nnwọbe isan̄a, isisi ichibi si inyi otutuuk aligọ n̄a.

⁴⁷“Nnenido ọmọ ibe ìre ogwugwu ìre gwun̄ kè ekene ye? “Ifọfọọk ibe ke ọmọ ìre gwun̄ kè Betuwen, gwun̄ enerieen̄ ogwu Milika omanbe inyi Nayọ. “Nnenimọnọ asi inwọm inwaan̄ ọmọ me otu inwọm, mè imọnọ asi ebek ubọk itap ọmọ me ebek ubọk,

⁴⁸mè igele ibot isiki, mè itọbọ ebum inyi Okumugwem, mè itọn̄ Okumugwem, Awaji kè Ebereyam nte uwu n̄a, ogwu òsasa emi ije me ata oniin̄, inyi ǹnendo gwun̄ ngwan̄ nte uwu n̄a ǹnyi gwun̄ nte uwu n̄a me lek nwa.

⁴⁹Mgbọ keyi, ire enyi mêkaan̄ ata ejit, mè irọ atikọ inyi nte uwu n̄a, ìtumu ìnyi emi. Ire enyi kpeberọ, ìtumu si ìnyi emi, inyi ǹriọọn̄ agan̄ nkekebe.”

⁵⁰Leban mè Betuwen efọfọọk ibe, “Inu yi ìnan̄a me ubọk Okumugwem. Eji kpekaan̄ otu geege ebetap.

⁵¹Kpọ Ribeka ire ogwa, mọnọ sa fo, mè isi ire nwa inyi gwun̄ kè nte uwu kwun̄, ike Okumugwem odọmọbe.”

⁵²Mgbọ ogwu ibot usun̄ kè Ebereyam ya onọbe ikọ ya ema etumube, igegele ibot isiki me ijọn̄ inyi Okumugwem,

⁵³mè inisan̄a owuwa inu inyinyi echi alata araran̄ mè echi alata okuket isibi, mè isan̄a si esese chieen̄ inu ekisa ibala lek isa iche inyi Ribeka, mè iche si owuwa inu unye otu ewe inyi ogwu ngwan̄ enerieen̄ mè ogwu uga.

⁵⁴Ọmọ mè ebi melek kan̄ etotolek inirie inorie, mè inwọ miin̄, mè ilaak me uwu ya iwele egwe. Mgbọ ema enan̄abe ikeke me ewelegwe, ogwu enerieen̄ ya onenitumu inyi Betuwen mè Leban ibe enetutuun̄ ọmọ etap me oniin̄, inyi ọmọ ifo igọọk nte uwu kan̄.

⁵⁵Ire, ngwan̄ kè Ribeka mè ogwu uga ebebeek ogwu enerieen̄ ya ibe, “Soso, tele mè Ribeka igọọk eji ikup, ikerere akọp usen, sabum owu ònosa ofo.”

⁵⁶Ire, ogwu ibot usun̄ ya obebe ema, “Ikayaka ìfiat emi mgbọ, ke Okumugwem îrọ inyi ije n̄a ijaan̄ isan̄a. Ìnitutuun̄ emi ìtap me oniin̄, inyi m̀fo ǹgọọk nte uwu n̄a.”

⁵⁷Ema enenibe, “Ngwa, eji enegwen Ribeka edo ejit kan̄.”

⁵⁸Ema enenigwen Ribeka isi mè isi, mè ido ibe, “Ìre owu môgọọk ogwu enerieen̄ yi ifo?” Ribeka ofọfọọk ibe ke ọmọ môgọọk ifo.

⁵⁹Ebi uwu ya etututuun̄ Ribeka ngwan̄ kiban̄ mè ogwu enenwaan̄ òkpọkpọ ọmọ chieen̄ me lek, melek ogwu ibot usun̄ kè Ebereyam mè ebi melek kan̄ itap me oniin̄.

⁶⁰Ema enenigbana Ribeka, mè itumu ibe, “Ngwan̄ kiji enenwaan̄, mumana me obop me obop me uwu nlom kwun̄! Bọn owot iman kwun̄ eketim ekpan̄ ebi ochicha kiban̄!”

⁶¹Ribeka mè ebi usun̄ kan̄ ebibaan̄ eneneen̄ lek isan̄a, mè inene inyọn̄ aligọ cha, mè igọọk ogwu ibot usun̄ kè Ebereyam ya inin̄ oniin̄ ifo. Sa me ikeya ke ogwu ibot usun̄ kè Ebereyam omọnọ Ribeka isa ifo.

⁶²Me ike mgbọ ya, Ajiki oneninan̄a me èwê agan̄ osiki, ere îkiluk, inu me Bie Layai Rọi[40]

⁶³Me agan̄ ikakwun̄ usen ya, Ajiki onanan̄a me emen ama ya ije isibi isi emen nsisaan̄ oron ibosi ikup ikeek ekiket, mè ikup me ere ya ibene chieen̄ imun̄ owuwa aligọ okije inu.

⁶⁴Ike ebi ije cha ekije igbet, Ribeka obebene si chieen̄ imun̄ Ajiki okekebe, mè inan̄a me inyọn̄ aligọ kan̄ isibi ijọn̄,

⁶⁵mè inido ogwu ibot usun̄ kè Ebereyam ya ibe, “Ìre ekene ire ogwa òkije me emen nsisaan̄ oron ikweek eji?” Ogwu usun̄ ya ofọfọọk ibe, “Îre nte uwu n̄a.” Ribeka omọmọnọ ekwut ichit-lek isa ichit lek kan̄.

⁶⁶Ogwu ibot usun̄ ya onenikpa otutuuk inu ọmọ orọbe inyi Ajiki.

⁶⁷Ajiki onenisa Ribeka ifo uwu ọfọ kè Sera ogwu uga. Ema ene iba ekakana olom mè nwa. Ajiki omama Ribeka enenen. Ribeka okakana ogwu ukarajit inyi Ajiki, mije, nga kè Ajiki îkwu.