Read obolo Ibeb 25 Bible Online

Ibeb 25 - obolo bible

Ibeb 25

¹Ebereyam îdo si ofifi nwa ekigwen Ketura.

²Ketura oneniman Jimiran, mè Jokisan, mè Medan, mè Midian, mè Isebak, mè Suwa inyi Ebereyam.

³Jokisan onenibon Sieba, mè Dedan. Bọn kè Dedan ere nte ebi Asuru, mè nte ebi Letus, mè nte ebi Lewum.

⁴Midian onenibon Efa, mè Eferi, mè Anọk, mè Abida, mè Elida. Ebibi ere bọn owot iman kè Ketura.

⁵Ebereyam ìdọmọ ibe ke îre Ajiki obokaan̄ otutuuk inu ọmọ okaan̄be mgbọ ọmọ môkwube.

⁶Ire, Ebereyam îkup me ògat ugwem kan̄ iche si owuwa inu inyi bọn ebi ugan kan̄, mè iria ema ifon ido òkup me agan̄ mbum-ura, inyi ema ekagọọk Ajiki ìgbaan̄ ìluk.

⁷Otutuuk otu ifuk acha ugwem kè Ebereyam ìre efit acha mè akọp jaaba mè go.

⁸Îkan ijaan̄ lek, mè irie ugwem kan̄ ijot, sabum înikwu igọọk ebi nte nte kan̄.

⁹Bọn kan̄, Ajiki mè Isimen, ebeben ọmọ isi ifuun̄ me ǹkororok òkup me Makipela me agba lek Mamire, me inyọn̄ ijọn̄ kè Efurọn gwun̄ kè Sowari ogwu Et,

¹⁰eyi Ebereyam olepbe me ubọk ebi Et. Ere ya ke efuun̄ Ebereyam mè Sera ogwu nwa.

¹¹Mgbọ Ebereyam okwube iraka, Awaji ogbagbana Ajiki gwun̄ kan̄. Me ike mgbọ ya, Ajiki ìkiluk me agba lek Bie Layai Rọi.

¹²Eyi ìre mfufuk owot iman kè Isimen gwun̄ Ega ogwu Ijipiti, usun̄ kè Sera, omanbe inyi Ebereyam.

¹³Erieen̄ bọn kè Isimen, ibene me lek ogwu adasi, ìre Nebayot, mè Keda, mè Adiben, mè Mibisam,

¹⁴mè Misima, mè Duma, mè Masa,

¹⁵mè Adadi, mè Teyima, mè Jetu mè Nafis, mè Kedema.

¹⁶Ebibi ere bọn kè Isimen me erieen̄ me erieen̄, me ama me ama, me ntuun̄ me ntuun̄ ubọk ema elukbe. Ema chi ere ebi ibot mkpulu me akọp mè otoko iba kiban̄.

¹⁷Isimen îluk efit acha mè akọp ita mè jaaba, mè inikwu igọọk ebi nte nte kan̄.

¹⁸Bọn owot iman kan̄ eluk ibene me Abila isi ire Suru, me agba lek ido Ijipiti, me agan̄ mbum-ura me oniin̄ ekije isi ido Asuru. Ema eluk me agba lek otutuuk ebi ngwan̄ kè Isimen me ochicha chieen̄.

¹⁹Eyi ìre mfufuk owot iman kè Ajiki gwun̄ kè Ebereyam. Ebereyam obon Ajiki.

²⁰Mgbọ Ajiki osobe akọp acha ini, idodo Ribeka ngwan̄ kè Leban me lek nwa. Betuwen ogwu Aram òluk me Padan Aram ore nte kè Ribeka mè Leban.

²¹Ajiki oneniriaak ikpele uriaak me lek kè Ribeka ogwu nwa, mije ikamange gwun̄. Okumugwem onọnọ uriaak kè Ajiki, mè irọ inyi Ribeka inin̄ owot.

²²Mgbọ owot ominbe me lek kè Ribeka, nsabọn ìkup ọmọ me owot ekekibieen̄ lek kiban̄ unye unye. Ribeka osasa me ufieek-owot itumu ibe, “Ìre keke okirọ emi ikeyi?” Isisi ido Okumugwem inu òrọrọ inyi owot ikirọ ọmọ ikeya.

²³Okumugwem otutumu inyi ibe, “Ido iba okup owu me owot; ebi ido iba ìbenan̄a me owot kwun̄ isibi mêche lek kiban̄. Ido ge mônye lek igak ido ge; ogwu ugane obokisi ikwaan̄ inyi ogwu ijija.”

²⁴Mgbọ onyan̄ osobe me lek kè Ribeka, imaman bọn ebirieen̄ iba.

²⁵Mgbọ emanbe nsabọn cha, ogwu òdadasi isibi ìkup otutuuk lek araran̄, mè itibi inwọọn̄ ijot otutuuk lek. Eya orọ, egwegwen ọmọ Isọ.[41]

²⁶Mgbọ ogwu òso iba osibibe, ìtetet ibot ukot ogwu adasi ikaan̄ me ubọk isa igbaalek isibi. Mije keya, egwegwen ọmọ Jekọp.[42] Ajiki ìre akọp acha gweregwen mgbọ Ribeka omanbe nsabọn cha.

²⁷Nsabọn iba cha enenimiin̄ isibi. Isọ okakana atalek ogwu ota, ogwu òkima ininin̄ oron mgbọ geelek. Sà Jekọp ore ogwu ìkakirọ inu unye unye, mè ikima ikukup me uwu mgbọ geelek.

²⁸Ajiki ìma Isọ, mije îkikpan̄ anam oron ijet ọmọ itaka. Ire, Ribeka ìma Jekọp.

²⁹Usen ge, Jekọp onenitem usun̄ mfut lentin. Isọ onanan̄a me oron ota ika, mè uraafiọọn̄ me owot,

³⁰mè inibeek ibe, “Che inorie araran̄ isi ya nyi emi ǹsa ǹtet owot, ke uraafiọọn̄ mônikpan̄ emi.” Ikeya ke esa ikigwen Isọ, Edọm.[43]

³¹Jekọp ofọfọọk ibe, “M̀kpanyi owu, îtata owu ònyanyam irek adasi gwun̄ owu orebe inyi emi.”

³²Isọ obebe, “Kpọ, emi gwu mânikwu. Ìre kpasi oruru ke irek adasi gwun̄ okaan̄ inyi emi?”

³³Jekọp obebe Isọ, “Nyan̄a ibot nyi emi mgbọ keyi ibe ke owu mônyi emi irek adasi gwun̄.” Isọ onyanyan̄a ibot inyi Jekọp, mè isa me ikeya inyam irek adasi gwun̄ ọmọ orebe inyi Jekọp, ngwan̄ kan̄ ogwu ijija.

³⁴Jekọp ototolek inichibi usun̄ lentin ya inyi Isọ, mè inyi si fituru igbaalek. Isọ orerie, mè inwọ miin̄ itoon̄ me inyọn̄, mè inan̄a ikeke ije isibi. Ikeya ke Isọ osa ikpọ irek adasi gwun̄ ọmọ orebe isiki chieen̄.