Read obolo Ibeb 26 Bible Online

Ibeb 26 - obolo bible

Ibeb 26

¹Ike mgbọ ge, unye akan̄ inorie oneninin̄ me ido ere Ajiki olukbe, kubọk eyi òninin̄ me ukot kè Ebereyam. Ajiki onanan̄a me ere ya ije isi Gera, igọọk Abimelek ogwu ubọọn̄ ebi Filisia.

²Sabum mgbọ ya, Okumugwem îchichini Ajiki, mè itumu inyi ibe, “Kasi Ijipiti. Kup me inyọn̄ ijọn̄ ere mâjeen̄be owu.

³Gọọk luk sọnja mgbọ me inyọn̄ ijọn̄ yi, ke mâkup melek kwun̄, mè igbana owu, mije, îre owu mè owot iman kwun̄ ke mbanyi otutuuk ijọn̄ chi. Mârọ otutuuk inu geelek nchieekbe Ebereyam nte kwun̄ me use iso.

⁴Mârọ inyi bọn owot iman kwun̄ emumana, mè ewa kubọk ntoronyan̄ òkup me akpa isinyọn̄, mè isa otutuuk ijọn̄ chi inyi ema. Îre nan̄a me lek bọn owot iman kwun̄, ke otutuuk ido geelek me linyọn̄ ebekaan̄ ugbana,

⁵mije, Ebereyam nte kwun̄ îgban̄ utọn̄ me ida n̄a, mè ikirọ inu mweekbe, mè ikọ ntọbe, mè orọmijọn̄ n̄a, mè isun̄ otutuuk ikan n̄a.”

⁶Sa me ikeyi ke Ajiki oniluk me Gera.

⁷Ebirieen̄ ama Gera enenido Ajiki inu ofolek ogwu nwa. Itutumu inyi ema ibe ke Ribeka ìre ngwan̄ kan̄. Ajiki ìfieek owot ibe, ire ọmọ itumu ibe ke Ribeka ìre nwa kan̄, ke ebi ama ya mêkpan̄ ọmọ mije kè Ribeka, mije, Ribeka îjaan̄ uja enenen.

⁸Ajiki îluk me Gera ijọn̄ọ mgbọ. Usen ge, Abimelek ogwu ubọọn̄ ebi Filisia okekeke me otu nruruk uwu kan̄ isiki chieen̄ imun̄ Ajiki okikat Ribeka ogwu nwa,

⁹mè iniria ikwaan̄ igwen Ajiki, mè itumu inyi ibe, “Berebet, Ribeka ìre nwa kwun̄ me atikọ. Ìre keke orọ owu otumube ibe ke îre ngwan̄ kwun̄?” Ajiki ofọfọọk ibe, “M̀fefieek owot ibe ke mêkpan̄ emi mije kan̄.”

¹⁰Abimelek onenido Ajiki ibe, “Ìre keke ke orọ ikeyi? Ene ge me lek ebirieen̄ ama yi okọt ogọọk nwa kwun̄ òlaak, eyi mosa awọ initet eji.”

¹¹Abimelek oneninyi otutuuk ebi ama kan̄ ikan ibe, “Ene geelek òchachak ubọk me lek ogwu enerieen̄ yi melek ogwu nwa, ebekpakpan̄.”

¹²Ajiki îwop uko me inyọn̄ ijọn̄ ya me acha ya, mè irọkọ me efit me efit. Mije, Okumugwem îgbana ọmọ.

¹³Ajiki onenibene ikaan̄ owuwa inu, mè ikibọọn̄ ubọọn̄, mè ikana atalek ogwu òbọbọọn̄ ubọọn̄ enenen.

¹⁴Îkaan̄ owuwa urum arọọn̄ mè urum eriembuuk mè ogbogbo ebi usun̄. Mije keyi, ebi Filisia ebebene ikikaan̄ ejit mba me lek kan̄,

¹⁵mè ichit otutuuk udọn̄ mun̄ ebi usun̄ kè Ebereyam ogwu ute erọkọbe mgbọ îlukbe me ere ya.

¹⁶Usen ge, Abimelek onenitumu inyi Ajiki ibe, “Nan̄a sibi me etete kiji, mije, owu onye lek enenen igak eji.”

¹⁷Ajiki onanan̄a me emen ama Gera isibi isi iluk me iteke ijọn̄ Gera,

¹⁸mè iyaka igwu ikom isi ichili otutuuk udọn̄ mun̄ kè nte kan̄ cha, echi ebi Filisia echitbe mgbọ nte kan̄ okwube iraka, mè ikpọk inyi ema erieen̄ cha, echi nte kan̄ onyibe ema.

¹⁹Usen ge, ebi usun̄ kè Ajiki enenirọkọ udọn̄ ge me iteke ijọn̄ ere ema elukbe ya, mè ichichini me lek ata mudim.

²⁰Ire, ebi Gera, ebi ìkikpukpo anam, enunu inigọọk ebi ìkikpukpo anam kè Ajiki inyinyan̄a udọn̄ mun̄ ya, ibe ke îre eyi kiban̄. Gọlọgọlọ oninin̄. Ajiki ogwegwen udọn̄ mun̄ ya Esek,[44] mije ife cha egọọkbe ọmọ igugọlọ.

²¹Ebi usun̄ kè Ajiki enenirọkọ ofifi udọn̄ mun̄. Ebi ama Gera egọgọọk ema inyinyan̄a udọn̄ mun̄ keya si. Ajiki ogwegwen udọn̄ mun̄ ya Sitina.[45]

²²Ajiki otetele ere keya, mè isi irọkọ ofifi udọn̄ mun̄. Ibaak geege ìkasibi me lek udọn̄ mun̄ keya. Eya orọ, Ajiki ogwegwen udọn̄ mun̄ keya Reyobot,[46] mije, ìtumu ibe ke Okumugwem înyi ema ere òwewele ita ema lek, inyi ema emumana me inyọn̄ ijọn̄ ya.

²³Ajiki oneninan̄a me ere keya ije ifo Bieseba.

²⁴Me ikakwun̄ usen ya, Okumugwem osisibi ichichini ọmọ, mè itumu inyi ibe, “Emi ìre Awaji kè Ebereyam nte kwun̄. Katet ukpook, mije, emi òwa melek kwun̄. Mâgbana owu, mè irọ inyi bọn owot iman kwun̄ emumana, mè ewa, mije kè Ebereyam ogwu usun̄ n̄a.”

²⁵Ajiki oneninama ntook me ere ya, mè itọbọ ebum inyi Okumugwem, mè igwuun̄ uwu ọfọ kan̄ si me ere ya. Ebi usun̄ kan̄ erọrọkọ udọn̄ mun̄ me ere ya.

²⁶Usen ge, Abimelek onenisa Ayujat ogwu nteme kan̄, mè Fikolu ogwu ibot akọn̄ kan̄ igbaalek inan̄a me Gera inu me lek kè Ajiki.

²⁷Ajiki ododo ema ibe, “Ìre keke oyaka isa enyi inu me lek n̄a? Ke mbe enyi echacha emi, mè ilap emi isan̄a me etete kinyi.”

²⁸Ema efọfọọk ibe, “Eji mîmun̄, me atikọ, ibe ke Okumugwem îkeke inyi owu. Eya orọ, eji ekiweek ibe owu melek kiji egbaan̄ enyan̄a ibot,

²⁹inyi owu okarọ eji ijo inu geege, kubọk eji ekarọge owu ijo inu geege si. Eji mîkaan̄ ata ejit me lek kwun̄, mè itele inyi owu òfo me esuuk. Mgbọ yi, Okumugwem îgbana owu.”

³⁰Ajiki onenito ijọk inyi ema. Ema ererie, mè inwọ, mè ilaak iwele egwe.

³¹Me okpatu ewelegwe, ema enanan̄a ikeke, mè igọọk Ajiki igbaan̄ inyan̄a ibot. Ajiki onenisa ema iban. Ema efofon me esuuk.

³²Me usen yaage, ebi usun̄ kè Ajiki enenikpa inyi Ajiki nte uwu kiban̄ ibe ke ema mîmun̄ mun̄ me emen udọn̄ ge ema ekirọkọ.

³³Ajiki ogwegwen udọn̄ mun̄ ya Siba.[47] Mije keya, mege inire chereyi, ekigwen ama ya Bieseba.[48]

³⁴Mgbọ Isọ osobe akọp acha ini, idodo ebibaan̄ ebi Et iba me lek nwa. Ogwu adasi ìre Judit gwun̄ kè Beri, sà ogwu òso iba ore Basemat gwun̄ kè Elọn.

³⁵Ebibaan̄ iba chi Isọ odobe enenikana inu uga ufieejit inyi Ajiki mè Ribeka enenen.