Read obolo Ibeb 27 Bible Online

Ibeb 27 - obolo bible

Ibeb 27

¹Ajiki îkan enenen, chieen̄ kan̄ ìkayaka ìkimọọn̄ inu. Usen ge, inenigwen Isọ ogwu gwun̄ ogwu ugane ibe, “Gwun̄ n̄a!” Isọ ochechieek.

²Itutumu inyi ibe, “Mgbọ keyi nra ikan. Ǹkariọọn̄ usen mbakwu.

³Mgbọ yi, mọnọ ogbaan̄ mè oraan̄ kwun̄, mè nin̄ oron si week anam oron ge sook nyi emi,

⁴mè sa na tem inorie òtotop eyi nkima nyi emi ǹrie, inyi m̀gbana owu, sabum ǹkwu.”

⁵Ribeka îkup inọ mgbọ Ajiki okitumu ikọ ya inyi Isọ ogwu gwun̄. Isọ onanan̄a inin̄ oron ota, isi iweek anam ìbosa initem inorie ya inyi ogwu ute.

⁶Ribeka oneniben ikọ ya isi ikpa inyi Jekọp ogwu gwun̄ ibe, “Kpọ, nnọ nte kwun̄ otumube inyi Isọ ngwan̄ kwun̄ ibe,

⁷isi isook anam isa initem inorie eyi ọmọ okima inyi ọmọ irie, mè ọmọ igbana ogwugwu me isi Okumugwem, sabum ọmọ ònokwu.

⁸Mgbọ yi, gwun̄ n̄a, gban̄ utọn̄ me lek ikọ mbatumu inyi owu.

⁹Si me ere ekisun̄ anam, si tet ekem ekem ebot iba òjajaan̄ lek sa jet emi, mè ǹsa ǹtem inorie òtotop ǹnyi nte kwun̄, ubọk nte kwun̄ okima.

¹⁰Nsitem isan̄a, owu môben ijet nte kwun̄ irie, mè igbana owu sabum môkwube.”

¹¹Jekọp onenitumu inyi ogwu uga ibe, “Lek kè Isọ ngwan̄ n̄a ìkup inwọọn̄ inwọọn̄, ire, lek n̄a ìrọrọt.

¹²Ire nte n̄a itet emi ubọk me lek, ìbokup kubọk emi ìre ogwu ofiaan̄ òbonirọ nte n̄a inu ochak. Sa me ikeyi, ìbore ufieek-otu ke mbasa inyi lek n̄a, kpan̄asi mbabọkọ ugbana.”

¹³Ogwu uga ofọfọọk ibe, “Gwun̄ n̄a, tele mè ufieek-otu ya ikeme emi. Je si tet ebot cha jet emi ubọk ntumube inyi owu.”

¹⁴Jekọp osisi itet ebot cha isa ijet Ribeka ogwu uga. Isasa item inorie òtotop eyi Ajiki nte kè Jekọp okima.

¹⁵Ribeka oneninin̄ uwu isi imọnọ ofọnti kè Isọ eyi òjajaan̄ ichit, eyi òkup ọmọ me ubọk, mè isa itap Jekọp ogwu gwun̄ ogwu ijija,

¹⁶mè inisa ikpa ebot cha îkpan̄be ikana ichit ubọk iba kè Jekọp mè ọkọt ebek kan̄ ere òrọrọt,

¹⁷mè iniben inorie ya melek fituru îtembe, itap me ubọk kè Jekọp ogwu gwun̄.

¹⁸Jekọp oneniben inorie ya ijet ogwu ute, mè igwen ogwu ute, “Nte n̄a!” Ogwu ute ochechieek, mè ibe, “Gwun̄ n̄a, owu ìre ekene?”

¹⁹Jekọp ofọfọọk ogwu ute ibe, “Îre emi Isọ, adasi gwun̄ kwun̄. Nrọ inu otumube ibe emi ǹrọ. Soso bene lek kweek irek, mè rie inorie nsookbe anam isa item, mè gbana emi.”

²⁰Ajiki ododo ogwu gwun̄ ibe, “Gwun̄ n̄a, òjeje igwat lek imun̄ anam isook ikeyi?” Jekọp ofọfọọk ibe, “Okumugwem Awaji kwun̄ otap ubọk inyi emi.”

²¹Ajiki otutumu inyi Jekọp ibe, “Gwun̄ n̄a, je gbet emi lek nu, inyi ǹtet owu ubọk me lek m̀kpọ, mè owu ìre Isọ gwun̄ n̄a me atikọ, mè okare.”

²²Jekọp ojeje igbet lek kè Ajiki ogwu ute. Ajiki otetet ọmọ ubọk me lek, mè itumu ibe, “Ida ìre ida kè Jekọp. Ire, ubọk ìre ubọk kè Isọ.”

²³Ajiki ìkakọt ìriọọn̄ ibe ke îre Jekọp, mije ubọk kan̄ okupbe inwọọn̄ inwọọn̄ kubọk ubọk kè Isọ. Eya orọ, igbagbana Jekọp.

²⁴Ajiki ododo ọmọ ibe, “Tumu-nu atikọ, ìre owu ìre Isọ gwun̄ n̄a?” Jekọp obebe, “Iin̄, emi ìre Isọ gwun̄ kwun̄.”

²⁵Ajiki otutumu inyi Jekọp ibe, “Ben inorie osabe anam ya item jet emi ǹrie, mè m̀gbana owu.” Jekọp obeben inorie ya inyi Ajiki ogwu ute. Irerie. Isasa miin̄ ijet. Inwọnwọ.

²⁶Ajiki obebe, “Gwun̄ n̄a, je gbet emi lek, na nyi emi ejit.”

²⁷Jekọp ojeje iriaak, mè ikana ogwu ute ikat. Ajiki onọnọ olu ofọnti òkup me lek, mè iriọọn̄ ibe ke îre olu ofọnti kè Isọ, mè inigbana ọmọ ibe, “Me atikọ, olu lek gwun̄ n̄a ìdun̄u kubọk olu uko, eyi Okumugwem ogbanabe.

²⁸Kè Awaji irọ inyi mbat ònan̄a me inyọn̄ irep igwook me emen uko kwun̄, mè ijọn̄ uko kwun̄ itibi mfut iwa enenen, mè akpa kwun̄ ito mfut ogbogbo, mè uko gerep kwun̄ isibi miin̄ iwa enenen inyi owu.

²⁹Kè Awaji irọ inyi owuwa ido ekesi ikwaan̄ enyi owu, mè ebi owuwa ido eketọbọ ibot me ijọn̄ enyi owu. Owu môre ogwu ibot inyi ebi ngwan̄ kwun̄, kè otutuuk bọn owot iman kè nga kwun̄ ekegele ibot esiki enyi owu. Ogwu ifieek otu inyi owu, Awaji môfieek otu inyi ene ya; ogwu igbana owu, Awaji môgbana si ene ya.”

³⁰Mgbọ yaage Ajiki ogbanabe Jekọp isan̄a, Jekọp onan̄abe me isi ogwu ute isibi, Isọ ogwu ngwan̄ onanan̄a me oron ota ika,

³¹mè inibala anam îsabe ika isa item inorie òtotop eyi ogwu ute okima, mè iben ijet ogwu ute, mè ibe, “Nte n̄a, bene lek kweek, mè rie inorie emi gwun̄ kwun̄ nsookbe anam isa item, mè gbana emi.”

³²Ajiki ogwu ute ododo ibe, “Owu ìre ekene?” Ifọfọọk ibe, “Emi ìre Isọ, adasi gwun̄ kwun̄.”

³³Ajiki oririki, mè ikiran. Uga mbiribọ ogwogwook ọmọ me lek. Idodo ibe, “Ìre ekene ire ene ya ogwu òsosook anam isa item inorie ijet emi ni? Nrerie inorie ya isan̄a me ubọk, mè igbana ene ya ire eyi owu onube. Me atikọ, mgbana ene ya isan̄a, kpebekọt inwene.”

³⁴Isọ inọnọ ogwu ute otumube ikeya, itataan̄ ukpo unye unye, mè ito ito enenen, mè itumu inyi ogwu ute ibe, “Jei, nte n̄a, nriaak owu, gbana emi! Soso gbana emi si, jei, nte n̄a!”

³⁵Ire, ogwu ute ofọfọọk ibe, “Ngwan̄ kwun̄ îsa ofiaan̄ inibọkọ ugbana kwun̄.”

³⁶Isọ obebe, “Jei, mkpọ si egwenbe ọmọ Jekọp.[49] Òso mgbọ iba ire eya îfiaan̄be emi ibọkọ irek n̄a. Adasi mgbọ, îfiaan̄ emi ibọkọ irek adasi gwun̄, mè iyaka inibọkọ si ugbana n̄a mgbọ keyi.” Isọ onenitumu inyi ogwu ute ibe, “Jei nte n̄a, ìre owu òkasik kubọk sọntiik ugbana geege ìnyi emi ni?”

³⁷Ajiki ofọfọọk Isọ ibe, “Nrọ ngwan̄ kwun̄ ogwu ibot inyi owu. Otutuuk bọn ogwu uga mêkisi ikwaan̄ inyi ọmọ. Uko kan̄ môkisibi inorie mè miin̄ enenen. Ìre keke oyaka inisik eyi mâsabe inyi owu ni?”

³⁸Isọ orariaak ogwu ute ibe, “Jei nte n̄a, ìre ugbana ge gaalek ke okaan̄ ni? Soso gbana emi si ma!” Isọ obebene ida ikitaan̄ ukpo ito ujat ito.

³⁹Ajiki ogwu ute onenifọọk ọmọ ibe, “Owu òboluk me ere ijọn̄ ìkakitibi inu, mè ere mbat ònan̄a me inyọn̄ ìkpokirep igwook me ijọn̄.

⁴⁰Oge akọn̄ kwun̄ ke obokisa inyan̄a lek kwun̄, mè ikisi ikwaan̄ inyi ngwan̄ kwun̄. Ire, mgbọ òkinu owu môtimbe etim me lek kan̄, mè isan̄a lek kwun̄ isibi me irak ubọk kan̄.”

⁴¹Bene me mgbọ ya, Isọ ochacha Jekọp mije ugbana ogwu ute ogbanabe Jekọp. Itutumu ifieek me ejit kan̄ ibe ke mgbọ nte kan̄ obokwu òkigbet. Nte kan̄ isikwu, ke ọmọ môkpan̄ Jekọp ngwan̄ kan̄.

⁴²Mgbọ ebi ene esabe ikọ yi isi ikpa inyi Ribeka, Ribeka ogwegwen Jekọp gwun̄ kan̄ ogwu ijija, mè itumu inyi ibe, “Kpọ, Isọ ngwan̄ kwun̄ òkitọt ibe ke ọmọ môkpan̄ owu.

⁴³Mgbọ yi, gwun̄ n̄a, gban̄ utọn̄ me lek inu yi mbatumu. Gwat lek libi gọọk ngwan̄ n̄a Leban me Aran,

⁴⁴mè luk melek ngwan̄ n̄a me ere ya re mgbọ ejit ngwan̄ kwun̄ môsikibe.

⁴⁵Mgbọ ejit ngwan̄ kwun̄ isisiki, mè isiwuuk inu ya owu orọbe, mâlook ikwaan̄ ijet owu ibe owu òka ònu. Ìkanwọn ibe enyi ene iba ekwaan̄ etele emi usen yaage.”

⁴⁶Ribeka onenisi itumu inyi Ajiki ibe, “Ijo ugwem ebibaan̄ ebi Et chi Isọ odobe îjot emi owot. Ire Jekọp inido ebi Et si, ugwem môyọt emi me lek iluluk.”