Read obolo Ibeb 28 Bible Online

Ibeb 28 - obolo bible

Ibeb 28

¹Ajiki oneniria ikwaan̄ igwen Jekọp, mè igbana Jekọp, mè ininyi ọmọ ida ibe, “Mun̄ ibe ke owu òkado nwa me ido Kenan.

²Mgbọ yi, nan̄a je si me uwu kè Betuwen nte nga kwun̄ me Padan Aram, si do enenwaan̄ ge me etete bọn ebibaan̄ kè Leban, ngwan̄ nga kwun̄.

³Kè Awaji Ogwu Òkaan̄ Unye Geelek igbana owu, mè irọ inyi owu òmumana, mè òwa enenen, mè òkana nte owuwa ido.

⁴Kè Awaji igbana owu mè bọn owot iman kwun̄, ubọk îgbanabe Ebereyam. Kè Awaji isa ijọn̄ yi, eyi owu olukbe me inyọn̄ mgbọ keyi kubọk ogwu ichen, eyi înyibe Ebereyam, inyi owu mè bọn owot iman kwun̄ me ìrot.”

⁵Ajiki oneniria Jekọp isibi. Jekọp onanan̄a isi Padan Aram, isi igọọk Leban, gwun̄ kè Betuwen ogwu Aram, iluk. Leban ìre ngwan̄ kè Ribeka nga kè Jekọp melek Isọ.

⁶Isọ oneninọ ibe ke Ajiki îgbana Jekọp, mè iria Jekọp isi Padan Aram ibe isi ido nwa, mè inyi ida ibe ikado enenwaan̄ geege òrere ogwu Kenan,

⁷mè inọ si ibe ke Jekọp îgban̄ utọn̄ me lek ikọ ogwu ute mè ogwu uga, mè inan̄a ije isi Padan Aram.

⁸Mgbọ ya ke Isọ oniriọọn̄ ibe ke nte kan̄ Ajiki ìkama ebibaan̄ ebi Kenan.

⁹Eya orọ, inenije isi lek kè Isimen gwun̄ kè Ebereyam, mè isi ido gwun̄ enenwaan̄ kè Isimen ge ekigwen Mayalat, ngwan̄ kè Nebayot, igbaalek nwa echi îwuukbe lek ikaan̄.

¹⁰Jekọp oneninan̄a me Bieseba ije isi Aran.

¹¹Me oniin̄ kan̄, mgbọ îrebe ere ge, egwe onenigak ọmọ ifit. Ineniben ewuuk ge me lek ewuuk òkup me ere ya isa ibene ibot, mè isiki ilaak.

¹²Inenimumun̄ ilaak ubọk obeek ge okekebe me ijọn̄, mè ijọn̄ọ isi ichak me isinyọn̄. Ebi osat Awaji ekekije inene mè ikije isibi me lek.

¹³Okumugwem onenisibi ikeke me agba lek kan̄,[50] mè itumu inyi ọmọ ibe, “Emi ìre Okumugwem Awaji kè Ebereyam nte nte kwun̄, mè Awaji kè Ajiki. Ijọn̄ yi, eyi owu olaakbe me inyọn̄, owu mè bọn owot iman kwun̄ ke mbasa inyi.

¹⁴Bọn owot iman kwun̄ mêwa kubọk achiaan̄ òkup me ijọn̄, mè ijot inyọn̄ ijọn̄ yi ibene me agan̄ mbum-ura isi ichak me agan̄ ichep-ura, mè ibene me agan̄ inyọn̄ isi ichak me agan̄ osiki. Otutuuk ido geelek me linyọn̄ yi ebekaan̄ ugbana inan̄a me lek kwun̄ mè bọn owot iman kwun̄.

¹⁵Kpọ, emi òwa melek kwun̄. Mâbem owu me otutuuk ere geelek owu môsibe, mè isa owu igwu ikom ika inu me inyọn̄ ijọn̄ keyi. M̀kpatele owu kubọk ge, isi ire mgbọ mârọbe otutuuk use nchieekbe owu iso.”

¹⁶Jekọp obobolo chieen̄ me ilaak ya, mè ibe, “Berebet, Okumugwem me ere yi, ire, emi ǹkariọọn̄.”

¹⁷Ukpook otetet Jekọp. Itutumu ibe, “Jei, ere yi îkaan̄ ukpook enenen! Ere yi ìkalọlọ uwu Awaji! Me atikọ, otunchit emen inyọn̄ ire eyi!”

¹⁸Me ata otu ewelegwe, Jekọp onanan̄a ikeke me ilaak, mè ibene ewuuk ya îsabe ibene ibot igwuun̄ isasa ikeek inu ya òrọrọ, mè itọkọ aran̄ igwook me inyọn̄ ewuuk ya isasa irọ inyi ikup mbuban,

¹⁹mè igwen ere ya Beten.[51] Ire, adasi erieen̄ ere ya ìre Luju.

²⁰Jekọp oneninyan̄a ibot ibe, “Ire Awaji ikup melek n̄a, mè ibem emi me oniin̄ ije yi nkije, mè inyi emi inorie ǹrie, mè inyi emi ofọnti ǹtap,

²¹mè isa emi igwu ikom ika inu uwu nte n̄a me esuuk, Okumugwem môkana Awaji n̄a.

²²Ewuuk yi mbenebe igwuun̄ me ere yi môkana uwu Awaji. Me emen otutuuk inu geelek Awaji mônyibe emi, mâyaka irek ge me akọp irek inyi ọmọ.”