Read obolo Ibeb 3 Bible Online

Ibeb 3 - obolo bible

Ibeb 3

¹Ijijinu îwa uleke me lek enenen igak otutuuk anam oron geelek Okumugwem Awaji orombe. Usen ge ijijinu osisi lek ogwu enenwaan̄ ya, mè ido ibe, “Ìre Awaji îtumu, me atikọ, ibe enyi ekarie mfut uti geege ònan̄a me emen uko yi?”

²Ogwu enenwaan̄ ofọfọọk ijijinu ibe, “In̄-in̄, eji mêkọt irie mfut ònan̄a me lek uti geelek me emen uko yi.

³Ire, mfut ònan̄a me lek uti eyi òkeke me eden̄ uko yi, Awaji ìbe eji ekarie, mè ekachachak si ubọk me lek. Mije, ire eji ichak ubọk me lek, mè irie, ke eji mêkwaan̄.”

⁴Ijijinu obebe ogwu enenwaan̄ ya, “Me atikọ, enyi kpebekwaan̄.

⁵Awaji îriọọn̄ ijaan̄ lek ibe, usen geelek enyi mêriebe mfut uti ya, ke chieen̄ kinyi môgwuku, enyi mênenikup kubọk Awaji, mè iriọọn̄ ata inu mè ijo inu. Îre eya orọ Awaji otapbe ikan ya ikwek enyi.”

⁶Ogwu enenwaan̄ ya onenikpọ, mè imun̄ ibe ke mfut uti ya îjaan̄, mè inwọn inu irerie, mè ire si mfut uti eyi môrọbe inyi ene ikaan̄ iriọọn̄-inu. Eya orọ, igbegbeme usini me lek mfut uti ya irie, mè isa si usini ijet ogwu olom. Ogwu olom obọbọkọ irie.

⁷Mgbọ yaage ema eriebe mfut uti ya, chieen̄ kiban̄ ogwugwuku. Ema emumun̄ ibe ke ema ekup njak, mè inigbeme inwan̄ uti figi igba ichim, mè isa ichit njak kiban̄.

⁸Me agan̄ ikakwun̄ usen ya, mgbọ egwe odekebe, ema enọnọ ida ukot Okumugwem Awaji okije me emen uko ya, mè ilibi isi ilet me etete uti òkup me emen uko ya, inyi Okumugwem Awaji ikamun̄ ema.

⁹Okumugwem Awaji onenikibọn̄ọ Adam, mè ikido ibe, “Ìre òkup me owa?”

¹⁰Adam ofọfọọk ibe, “Mgbọ nnọbe ida ukot kwun̄ me emen uko, ukpook îtet emi, mije ǹkup njak. Eya orọ, nlibibe ilet.”

¹¹Okumugwem ododo Adam ibe, “Ìre ekene otumu inyi owu ibe ke owu òkup njak? Ìre orie mfut ònan̄a me lek uti ya eyi ntapbe ikan ibe owu okarie?”

¹²Adam ofọfọọk ibe, “Ogwu enenwaan̄ ya owu onyibe emi ibe inigọọk emi ikup, ọmọ onyi emi mfut uti ya, nrerie.”

¹³Okumugwem Awaji onenido ogwu enenwaan̄ ya ibe, “Ìre keke ke owu orọ ikeyi?” Ogwu enenwaan̄ ya ofọfọọk Awaji ibe, “Îre ijijinu oleke emi, ke nrie mfut uti ya.”

¹⁴Mije keya, Okumugwem Awaji otutumu inyi ijijinu ibe, “Mije inu yi orọbe, môfieek inyi owu me etete otutuuk anam geelek, echi uwu mè echi oron! Owu môkisa owot owot inyiọọn̄! Achiaan̄ ijọn̄ obore inorie kwun̄ otutuuk usen geelek me ugwem kwun̄.

¹⁵Mâtap ochicha me etete kwun̄ melek ogwu enenwaan̄ ya, mè itap si me etete gwun̄ kwun̄ melek gwun̄ kan̄. Gwun̄ kan̄ mônyiaan̄ owu ibot, owu mônyiaan̄ gwun̄ kan̄ ibot ukot.”

¹⁶Inenitumu inyi ogwu enenwaan̄ ya ibe, “Me atikọ, mârọ unaan̄ uman gwun̄ kwun̄ imin enenen. Sa me ikpele ujat ke owu obokiman bọn. Ulọk kwun̄ ìbokikup me lek nlom kwun̄, nlom kwun̄ obokikpulu owu.”

¹⁷Adam ke îtumu inyi ibe, “Mije owu ogban̄be utọn̄ inyi nwa kwun̄, mè irie mfut uti eyi ntapbe ikan ibe owu okarie, “Môfieek inyi ijọn̄ mije kwun̄. Sa me kwulukwulu ke owu obokọt ikisan̄a inorie me ijọn̄ irie otutuuk ugwem kwun̄.

¹⁸Ijọn̄ ìbokitibi ukpak ukpak mè abọm egbe abọm egbe inyi owu. Mfut uti oron mè inwan̄ oron ke obokirie.

¹⁹Sa me egwurugwu isi kwun̄ ke owu obokikọt ikaan̄ inorie ikirie, mege ire mgbọ owu môkwube, mè ikpọk ikana achiaan̄ ijọn̄, mije, achiaan̄ ijọn̄ ke esa irom owu. Mfuun̄ ke owu ore, mfuun̄ si ke owu obogwu ikom ikana.”

²⁰Adam[5] onenisan̄a nwa kan̄ erieen̄, Îfu,[6] mije Îfu ore nga otutuuk ebilene.

²¹Okumugwem Awaji onenisa ikpa anam irọ ekwut isa ikwun Adam melek Îfu ogwu nwa.

²²Eya iraraka, Okumugwem Awaji onenitumu ibe, “Ogwu ene yi ìyaka inikup kubọk eji ekupbe. Îriọọn̄ ata inu mè ijo inu. Môkọt ichak ubọk me lek mfut uti òkinyi ene ugwem, mè igbeme irie, mè iluk ugwem ire mgbọ ikakaan̄ge itata!”

²³Eya orọ, Okumugwem Awaji olalap Adam isibi me emen uko ya, inyi isi ikiwop mfut me ijọn̄, òrere ere mfuun̄ esabe irom ọmọ onan̄abe.

²⁴Awaji ilalap Adam mè Îfu isibi me emen uko Iden, itoto ebi mbem emen inyọn̄ me agba isi uko ya agan̄ mbum-ura, mè oge akọn̄ òkimumen ukan̄ me otu mè ikigba iyak me ubọk kiban̄, isa ikibem oniin̄ ekije isi lek uti ya òkinyi ene ugwem.