Read obolo Ibeb 30 Bible Online

Ibeb 30 - obolo bible

Ibeb 30

¹Mgbọ Rechen omun̄be ibe ke ọmọ ìkaman gwun̄ geege ìnyi Jekọp, inenikaan̄ ejit mba me lek kè Lia ogwu ngwan̄, mè initumu inyi Jekọp ogwu olom ibe, “Rọ inyi emi m̀man bọn. Ire ìkare ikeya, mâkwu.”

²Jekọp onanaan̄ ejit inyi Rechen, mè ibe, “Ìre emi ìre Awaji ogwu òrọrọ inyi owu okaman gwun̄?”

³Rechen otutumu inyi Jekọp ogwu olom ibe, “Kpọ Biliya ogwu usun̄ n̄a ire ogwu, gọọk laak, inyi iman gwun̄ itoon̄ emi me inyọn̄ ukot, ufuna emi ǹnan̄a me lek ogwu usun̄ ya ǹkaan̄ bọn eyi n̄a.”

⁴Rechen osasa Biliya ogwu usun̄ kan̄ enenwaan̄ inyi Jekọp ogwu olom me lek nwa. Jekọp ogọgọọk Biliya ilaak.

⁵Biliya oninin̄ owot, mè iman gwun̄ enerieen̄ inyi Jekọp.

⁶Rechen otutumu ibe, “Awaji îfieek unen oyerebet inyi emi, mè inọ ida ito n̄a, mè inyi emi gwun̄ enerieen̄.” Eya orọ, igwegwen gwun̄ ya Dan.[56]

⁷Biliya ogwu usun̄ enenwaan̄ kè Rechen okpọkpọk inin̄ owot, mè iman ofifi gwun̄ enerieen̄ inyi Jekọp.

⁸Rechen otutumu ibe, “Nga nyan̄anyan̄a ile ke nnyinyan̄a melek ngwan̄ n̄a, mè igak ọmọ.” Eya orọ, igwegwen gwun̄ ya Nafitali.[57]

⁹Mgbọ Lia omun̄be ibe ọmọ ìkayaka ìman gwun̄, inenimọnọ Jilipa, ogwu usun̄ kan̄ enenwaan̄ isa inyi Jekọp ogwu olom me lek nwa.

¹⁰Jilipa oneniman gwun̄ enerieen̄ inyi Jekọp.

¹¹Lia otutumu ibe, “Jei, nkaan̄ atisi!” Mije keya, igwegwen gwun̄ ya Gadi.[58]

¹²Jilipa ogwu usun̄ enenwaan̄ kè Lia okpọkpọk iman gwun̄ enerieen̄ òso iba inyi Jekọp.

¹³Lia otutumu ibe, “Ejit îbele emi enenen! Me atikọ, ebibaan̄ geelek mêkigwen emi ogwu ubelejit.” Eya orọ, igwegwen gwun̄ ya Ase.[59]

¹⁴Me ibot mgbọ ekirọkọ akpa wit me uko, Ruben onenigọọk isi uko usen ge, mè imun̄ uti manderek[60] me oron, mè isa usini ika ijet Lia ogwu uga. Rechen onenimun̄ manderek cha, mè ibeek Lia ibe, “Soso che usini me lek manderek cha gwun̄ kwun̄ osabe ika nyi emi.”

¹⁵Lia otutumu inyi Rechen ibe, “Ke owu keyi otet emi olom ibọkọ. Ìre eya ìkaso owu? Ìre oyaka inu mgbọ keyi ibonitet emi manderek gwun̄ n̄a si ibọkọ?” Rechen ofọfọọk Lia ibe, “Ire oche manderek gwun̄ kwun̄ inyi emi, mâtele ibe nlom n̄a inigọọk owu ilaak me eririeen̄ chereyi me useen̄ manderek ya.”

¹⁶Eya orọ, mgbọ Jekọp onan̄abe me uko ikije ika me agan̄ ikakwun̄ usen ya, Lia ojeje ikweek ọmọ, mè itumu inyi ibe, “Owu òbonigọọk emi ilaak me eririeen̄ chereyi, mije, nsa manderek gwun̄ n̄a inwene owu me ubọk kè Rechen.” Jekọp ogọgọọk Lia ilaak me eririeen̄ usen ya.

¹⁷Awaji onọnọ uriaak kè Lia. Lia oninin̄ owot, mè iman gwun̄ enerieen̄ òso go inyi Jekọp.

¹⁸Lia onenibe, “Awaji îkpe emi ata mkpukpe inan̄a me lek ogwu usun̄ enenwaan̄ n̄a nsabe inyi nlom n̄a.” Mije keya, igwegwen gwun̄ ya Isaka.[61]

¹⁹Lia okpọkpọk inin̄ owot, mè iman gwun̄ enerieen̄ òso gweregwen inyi Jekọp,

²⁰mè ibe, “Awaji înyi emi uche unye otu ewe! Mgbọ keyi, nlom n̄a môbene ikimin emi, mije, ke mman ibot bọn ebirieen̄ gweregwen inyi ọmọ.” Mije keya, igwegwen gwun̄ ya Jebulọn.[62]

²¹Ike mgbọ okije, Lia oneniman gwun̄ enenwaan̄, mè igwen Daina.

²²Awaji onenikeek Rechen, mè inọ uriaak kan̄, mè inichili ọmọ owot.

²³Rechen oneninin̄ owot, mè iman gwun̄ enerieen̄, mè ibe, “Awaji îsan̄a emi esip me isi.”

²⁴Rechen ogwegwen gwun̄ ya Josefu,[63] mije, ìbe mè Okumugwem inyi ọmọ ofifi gwun̄ enerieen̄ igbaalek.

²⁵Mgbọ Rechen omanbe Josefu isan̄a, Jekọp onenitumu inyi Leban ogwu ute-nwa ibe, “Mgbọ yi, tele mè ǹgwu ǹkom m̀fo ama kiji mè ido kiji.

²⁶Nyi emi ebi nwa n̄a mè bọn n̄a ebi nsibe ikwaan̄ inyi owu me ibot kiban̄, mè ǹsa ǹgwu ǹkom m̀fo. Owu oriọọn̄ kwulukwulu nkwukwulube inyi owu.”

²⁷Ire, Leban ofọfọọk ibe, “Ire inu n̄a ineme owu, soso kafo. Mije, nsi ido ido-inu, mè iweek iriọọn̄ ibe ke îre mije kwun̄ ke Okumugwem ogbana emi.

²⁸Eya orọ, tumu mkpukpe geelek obobọkọ, ke mâkpe owu.”

²⁹Jekọp onenifọọk ọmọ ibe, “Owu me lek kwun̄ omun̄ ikwaan̄ nsibe inyi owu, mè imun̄ si ubọk anam kwun̄ omumanabe, mè iwa me irak ubọk n̄a.

³⁰Sabum nnube, arọọn̄ kwun̄ ìre inen mè inen gaalek. Ire, emi inunu inigọọk owu ikup, Okumugwem orọrọ inyi arọọn̄ kwun̄ imumana enenen, mè igbana si owu me inu geelek emi nchakbe ubọk me lek. Ìre mgbọ owa ke mbasa ibọm mbọm eyi lek n̄a isa ikpukpo ebi uwu n̄a?”

³¹Leban okpọkpọk ido Jekọp ibe, “Keke ke mbakpe inyi owu?” Jekọp ofọfọọk ọmọ ibe, “Ǹkaweek inu geege. Ire, ire owu ochieek irọrọ inu ge gaalek inyi emi, mâkup ikikpukpo anam kwun̄, mè ikikpọ chieen̄ me lek.

³²Inu ya ìre ikeyi: Chieek ibe emi ǹje ǹnin̄ etete otutuuk anam kwun̄ chereyi, mè ǹteen̄ arọọn̄ mè ebot geelek òkup lek nyen̄enyen̄e mè ìre ntọọk ntọọk, mè bọn arọọn̄ geelek òrere ofifit, ǹsibi, mè echa ire mkpukpe n̄a.

³³Eya môjeen̄ ata irọrọ n̄a me mgbọ òkup me isi. Mgbọ geelek owu mônube inikpọ mkpukpe n̄a, mè imun̄ arọọn̄ mè ebot geelek eyi ìkakup lek nyen̄enyen̄e mè ìre ntọọk ntọọk, mè bọn arọọn̄ geelek eyi ìkare ofifit, owu môriọọn̄ ibe ke ǹchichiin̄.”

³⁴Leban obebe, “Înwọn. Emi nchieek ikeya ubọk owu otumube.”

³⁵Usen yaage, Leban osisi isan̄a otutuuk orie ebot geelek òkakaan̄ ngwugwat me lek, mè echi òkup lek ntọọk ntọọk, mè echi òkakaan̄ okuket me lek, mè otutuuk ofifit bọn arọọn̄ geelek, isa itap me ubọk bọn kan̄ ebirieen̄.

³⁶Ọmọ mè ebi bọn esasa anam cha ije ije usen ita inan̄a me ere ya, inyi anam kecha ekup ejọn̄ọ ere me lek anam echi òkup me ubọk kè Jekọp. Jekọp okekikpukpo anam kè Leban echi òsisik.

³⁷Mgbọ Jekọp omun̄be inu Leban orọbe, inenisi isọp otu agọọk njijoon̄ uti pọpula, mè alimọn, mè pelen, mè ininwuun̄ ikpọk isan̄a me usini ere me lek uti cha, inyi ekemun̄ okuket akpalek uti cha, mè itele ikpọk me usini ere.

³⁸Inenikpulu uti cha, òkup lek ngwugwat ngwugwat, imaan̄ me emen otutuuk okwa ekisa itap mun̄ inyi anam inwọ, inyi anam cha ekemun̄ uti cha mgbọ ema ekinu ininwọ mun̄. Orie anam cha ìkitoon̄ echi uman mgbọ ema ekinu ininwọ mun̄.

³⁹Mije orie arọọn̄ cha okitoon̄ echi uman me isi uti cha, uman ebot cha îra ikimaan̄ bọn òkup lek ngwugwat ngwugwat mè ìyaka ire nyen̄enyen̄e mè ìyaka ire ntọọk ntọọk.

⁴⁰Jekọp osasan̄a bọn arọọn̄ isun̄ esese, mè isun̄ arọọn̄ mè ebot iyaka isi ikikpọ arọọn̄ kè Leban echi òkup ngwugwat ngwugwat mè echi ofifit. Sa me ikeyi ke îtitiin̄ anam òsibi esese isun̄ inyi lek kan̄. Ìkachieek ibe igwugwa me etete anam kè Leban.

⁴¹Mgbọ geelek anam echi ònyenye lek isibetoon̄ lek kiban̄, Jekọp îra ikpulu uti cha itap me emen okwa inwọ mun̄ cha me isi kiban̄, inyi ema etọọn̄ lek kiban̄ me agba lek uti cha.

⁴²Ire, ìkakitap uti cha me emen mun̄ me isi anam echi ikanyege lek. Sa me ikeya, otutuuk anam echi ònyenye lek orere echi kè Jekọp. Echi ikanyege lek orere echi kè Leban.

⁴³Jekọp onenibọọn̄ ubọọn̄ enenen, mè ikaan̄ ogbogbo anam, mè owuwa ebi usun̄ ebirieen̄ mè ebibaan̄, mè owuwa aligọ mè inyinya akpan.