Read obolo Ibeb 35 Bible Online

Ibeb 35 - obolo bible

Ibeb 35

¹Awaji onenitumu inyi Jekọp ibe, “Nan̄a, je fo Beten si luk, mè nama ntook me ere ya nyi emi. Emi nre Awaji ogwu òchichichini owu mgbọ owu olibibe inan̄a me lek kè Isọ ngwan̄ kwun̄.”

²Jekọp onenititiin̄ ebi uwu kan̄, mè ebi melek kan̄, mè itumu inyi ema ibe, “Mgbọ keyi, ìsan̄a otutuuk awaji ebi ofifi ido geelek ìsan̄a me etete kinyi, mè ìgwọk lek kinyi, mè ìnwene ofọnti me lek,

³mè ìbem lek, mè eji enenan̄a me ere yi eje esi Beten, inyi ǹsi ǹnama ntook ǹnyi Awaji ogwu ònọ emi ida me usen uyọrọlek n̄a, mè ikup melek n̄a me otutuuk ere geelek nsibe.”

⁴Ema enenikana otutuuk awaji ebi ofifi ido òkup me ubọk kiban̄, mè otutuuk mkputọn̄ òkup me utọn̄ kiban̄, inyi Jekọp. Ibọbọkọ, mè iben ifuun̄ me irak ebon ilip ge òkup me ama Sekem ya.

⁵Jekọp mè otutuuk ebi kan̄ ejijibi ije. Awaji oneniria uga ukpook itap me lek otutuuk ebi ama òkukup ikana ere cha. Mije keya, ife cha kpeben akọn̄ geege igọọk Jekọp mè ebi kan̄.

⁶Jekọp mè otutuuk ebi melek kan̄ ejeje inire ama ekigwen Luju, òrere Beten, me ido Kenan.

⁷Ineninama ntook me ere ya, mè igwen ere ya Eli Beten,[73] mije, îre ere ya ke Awaji osibi ichichini ọmọ mgbọ îkilibi inwọnọ Isọ ngwan̄ kan̄.

⁸Dibọra, ogwu enenwaan̄ òkpọkpọ chieen̄ me lek kè Ribeka, onenikwu me ere ya, ebeben ifuun̄ me irak ebon ilip ge òkup me osiki Beten. Eya orọ egwenbe ere ya Alọn Bakut.[74]

⁹Awaji okpọkpọk isibi ichichini Jekọp mgbọ keyi înan̄abe me Padan Aram igwu ikom ika inire Beten, mè igbana ọmọ,

¹⁰mè initumu inyi ọmọ ibe, “Erieen̄ kwun̄ ìre Jekọp. Ire, kpebeyaka ikigwen owu Jekọp ofifi. Erieen̄ kwun̄ ìboyaka inire Ijeren.” Ikeya ke Awaji osa inyi ọmọ erieen̄, Ijeren.

¹¹Awaji onenitumu inyi Jekọp ibe, “Emi nre Awaji Ogwu Òkaan̄ Unye Geelek. Mumana, mè wa me otu ifuk. Bọn kwun̄ mêkana ido, mè ìyaka ire owuwa ido. Owuwa me etete bọn kwun̄ mêre ebi ubọọn̄.

¹²Ijọn̄ nnyibe nte nte kwun̄ Ebereyam mè nte kwun̄ Ajiki, owu ke mbasa ijọn̄ ya inyi. Owu osikwu, bọn owot iman kwun̄ ere ebi ìbekaan̄ ijọn̄ ya.”

¹³Mgbọ Awaji otumube ikọ ya isan̄a me ere ya, inanan̄a itele Jekọp.

¹⁴Jekọp obebene ewuuk ge igwuun̄ me ere ya Awaji otumube ikọ melek kan̄, mè igwook miin̄ melek aran̄ me lek ewuuk ya.

¹⁵Jekọp ogwegwen ere ya Awaji okupbe itumu ikọ melek kan̄, Beten.[75]

¹⁶Ema eneninan̄a me ere ya ikije ifo Efarata. Me oniin̄ ije kiban̄, ema kpejeje igbet Efarata, uman otetet Rechen uyọt uyọt.

¹⁷Mgbọ uman ya onyebe enenen, ogwu ofia uman otutumu inyi Rechen ibe, “Kafieek owot, ke îre ofifi gwun̄ enerieen̄ ke owu oboman.”

¹⁸Rechen osasa me chieen̄ mkpa iman gwun̄ enerieen̄ ito, mè igwen Benoni.[76] Ire, ogwu ute ogwegwen gwun̄ ya Benjamin.[77]

¹⁹Rechen okwukwu. Ebeben ifuun̄ me agba oniin̄ ekije isi Efarata, òrere Beteleyem.

²⁰Jekọp obeben ewuuk ge igwuun̄ me ere efuun̄be Rechen. Ewuuk ya ke ekisa iriọọn̄ udọn̄-ufuun̄ kè Rechen mege inire chereyi.

²¹Jekọp, òrere Ijeren, onenije inyi isi, mè iraka Migidan Ederi, mè igwuun̄ uwu ọfọ kan̄, mè iluk.

²²Usen ge, mgbọ ema ekupbe me inyọn̄ ijọn̄ ya, Ruben osisi igọọk Biliya, ugan ogwu ute ilaak. Jekọp onọnọ. Jekọp ìbon akọp mè bọn ebirieen̄ iba.

²³Bọn ebirieen̄ Lia omanbe ìre Ruben, adasi gwun̄ kè Jekọp, mè Simiọn, mè Libai, mè Juda, mè Isaka, mè Jebulọn.

²⁴Bọn ebirieen̄ Rechen omanbe ìre Josefu, mè Benjamin.

²⁵Bọn ebirieen̄ Biliya, ogwu usun̄ enenwaan̄ kè Rechen omanbe ìre Dan, mè Nafitali.

²⁶Bọn ebirieen̄ Jilipa ogwu usun̄ enenwaan̄ kè Lia omanbe ìre Gadi, mè Ase. Ebibi ere bọn ebirieen̄ kè Jekọp ebi emaan̄be inyi Jekọp me Padan Aram.

²⁷Jekọp onenika igọọk Ajiki ogwu ute me Mamire me ama Kiriat Ariba, òrere Eburọn. Ebereyam îluk me ere yi mgbọ îkupbe me ògat ugwem. Ere yi si ke Ajiki oluk.

²⁸Ajiki îluk ugwem efit acha mè akọp jeeta.

²⁹Ajiki îkan ijaan̄ lek, mè irie ugwem kan̄ ijot, mè inikwu igọọk ebi nte nte kan̄. Ebi bọn, Isọ mè Jekọp, ebeben ọmọ ifuun̄.