Read obolo Ibeb 38 Bible Online

Ibeb 38 - obolo bible

Ibeb 38

¹Me emen mgbọ cha, Juda oneninan̄a itele ebi ngwan̄ kan̄, mè isi igọọk ogwu enerieen̄ ge ogwu Adulam, ekigwen Ira, iluk.

²Me ama ya, Juda onenichichini ogwu enenwaan̄ Kenan ge, gwun̄ kè Suwa, mè imọnọ ido me lek nwa, mè inigọọk ogwu nwa ya ilaak.

³Ogwu enenwaan̄ ya oneninin̄ owot, mè iman gwun̄ enerieen̄, igwegwen gwun̄ ya Eri.

⁴Ogwu enenwaan̄ ya okpọkpọk inin̄ owot, mè iman ofifi gwun̄ enerieen̄, mè igwen ogwugwa Onan.

⁵Mgbọ ema elukbe me Kejibi, ogwu enenwaan̄ ya oninin̄ owot si, mè iman ofifi gwun̄ enerieen̄, mè igwen Siela.

⁶Juda onenido gwun̄ enenwaan̄ ge ekigwen Tema inyi Eri, adasi gwun̄ kan̄, me lek nwa.

⁷Ire, Eri îkaan̄ ijo ugwem me isi Okumugwem. Eya orọ, Okumugwem osasan̄a ugwem kan̄ isan̄a.

⁸Juda onenitumu inyi Onan ibe, “Mọnọ Tema nwa ngwan̄ kwun̄, mè bon bọn nyi ngwan̄ kwun̄ ike orọmijọn̄ okupbe, mije, owu ìre ngwan̄ ogwu olom.”

⁹Ire, Onan îriọọn̄ ibe ke gwun̄ geelek ọmọ môbonbe me owot kè Tema ìkpochieek erieen̄ kan̄. Eya orọ, mgbọ geelek îgọọkbe ogwu enenwaan̄ ya ilaak, îra ikifiat uyọ ònan̄a ọmọ me lek ifiin̄ me ijọn̄, inyi ọmọ ikabon bọn ìnyi ngwan̄ kan̄.

¹⁰Inu ya îkirọ onanaan̄ Okumugwem ejit. Okumugwem osasan̄a si ugwem kan̄.

¹¹Juda onenitumu inyi Tema nwa ogwu gwun̄ ibe, “Fo si luk me uwu nte kwun̄ kubọk nwakpa ire mgbọ Siela gwun̄ n̄a môminbe isibi.” Juda ìtumu ikọ ya me ukpook, mije, ìkikeek ibe ire Siela imọnọ Tema me lek nwa, ke môkwu si ike ebi ngwan̄ ekwaan̄be. Mije keya, Tema ofofo igọọk ogwu ute isi iluk.

¹²Ike mgbọ okije, nwa kè Juda, òrere gwun̄ enenwaan̄ kè Suwa, okwukwu. Juda okukup me ere ya ifieek ejit inyi ogwu nwa. Eya iraraka, Juda onenije isi Timina, ere ekisọp inwọọn̄ me lek arọọn̄ kan̄, ọmọ melek Ira, ogwu unene ogwu Adulam.

¹³Tema onọnọ ibe ke Juda, nte nlom kan̄, ìbonije iraka isi Timina isi isọp inwọọn̄ me lek arọọn̄ kan̄.

¹⁴Ineniwọọk ofọnti nwakpa isan̄a, mè inisa ekwut ikana ichit lek kan̄, mè ichit ire isi, inyi ekakọt ìriọọn̄ ọmọ isi, mè ifiaan̄ isi isiki ikweek irek me otu oniin̄ Enayim, ere ekije iraka isi Timina. Mije, îriọọn̄ ibe ke Siela îmin isibi ebirieen̄, ire, ke kpechieek isasa ọmọ inyi me lek nwa.

¹⁵Mgbọ Juda omun̄be Tema, ìkikeek ibe ìre ogwu òje oyet, mije îsabe ekwut ichit isi.

¹⁶Ijeje isi lek, mè ibe inu inyi ọmọ igọọk ogwugwu ilaak. Ìkariọọn̄ ibe ke îre Tema nwa ogwu gwun̄. Ogwu enenwaan̄ ya ododo ọmọ ibe, “Ìre keke ke owu obonyi emi, ire ogọọk emi ilaak?”

¹⁷Juda obebe, “Mâria gwun̄ ebot ge me lek ebot n̄a ijet owu.” Ogwu enenwaan̄ ya otutumu inyi ibe, “Emi m̀kpachieek, îtata mè owu ònyinyi emi inu ge, inyi ǹtet ǹkaan̄ mege ire mgbọ owu môriabe anam ya ijet emi.”

¹⁸Juda onenido ibe, “Ìre keke ke oweek ibe emi ǹnyi owu òtet òkaan̄ ni?” Ogwu enenwaan̄ ya ofọfọọk Juda ibe, “Ǹkiweek uti iman̄ òriọọn̄ kwun̄ melek asi ebek òje me lek, mè mkpat òkup owu me ubọk.” Juda ochechieek, mè inyi ogwu enenwaan̄ ya otutuuk inu cha îdobe, mè igọọk ilaak. Ogwu enenwaan̄ ya oninin̄ owot inan̄a me ubọk kè Juda.

¹⁹Tema onenije ifo, mè isi isan̄a ekwut cha îsabe ichit lek kan̄ isan̄a, mè ikpọk imọnọ ofọnti nwakpa itap.

²⁰Me mgburudun̄, Juda onenisa gwun̄ ebot ya inyi Ira, ogwu unene ogwu Adulam, ibe isa ijet ogwu enenwaan̄ ya, mè ibọkọ inu cha ọmọ onyibe isa ika ijet ọmọ. Ire, mgbọ Ira orebe ere ya, ìkamun̄ ogwu enenwaan̄ ya.

²¹Idodo ebirieen̄ ìluk me ere ya ibe, “Ìre ogwu enenwaan̄ òje oyet ya òkup me otu oniin̄ Enayim yi ìkup me owa?” Ebirieen̄ cha efọfọọk ibe ke kpunu enenwaan̄ òje oyet geege òrarak ikikup me ere ya.

²²Ira ogwugwu ikom ifo, mè isi ilook Juda ibe ke ọmọ ìkakọt ìweek ogwu enenwaan̄ ya ìmun̄. Ògak ge, ke ebirieen̄ ama ya ebe ke kpunu enenwaan̄ òje oyet geege òrarak ikikup me ere ya.

²³Juda otutumu inyi Ira ibe, “Kayaka ìsisaak lek, tele mè ogwu enenwaan̄ ya ikpulu inu cha isak, inyi eji ekakana inu ochak me isi ebi ene. Awọ ìkatet emi, mije, nria gwun̄ ebot ya ijet ogwu enenwaan̄ ya. Ire, owu òkakọt ìweek ọmọ ìmun̄.”

²⁴Onyan̄ ita iraraka, ebi ene enenilook Juda ibe, “Tema, nwa gwun̄ kwun̄ îje oyet, mè iben owot.” Juda onanaan̄ ejit, mè inyi ida ibe esi esa ogwugwu enu, inyi enewọp ekpan̄.

²⁵Mgbọ ekisa Tema isibi inu, iraria etip ijet nte ogwu olom, mè isa inu cha îbọkọbe igbaalek, ibe, “Ìsa ìjeen̄, mè ìtumu ìnyi ibe ke îre ogwukaan̄ inu chi otap emi owot me lek.” Îtumu si ibe etumu enyi ibe, “Riọọn̄ ubọk kpọ-nu, mè ìre owu môkọt iriọọn̄ ogwukaan̄ uti iman̄ òriọọn̄ yi, mè asi ebek òje me lek, melek mkpat yi?”

²⁶Juda omumun̄ ibe ke inu cha ìre echi kan̄, mè ibe, “Ogwu enenwaan̄ ya ìre ogwu ata irọrọ igak emi, mije, ǹkachieek isasa ọmọ inyi Siela gwun̄ n̄a.” Juda ìkayaka ìgọọk ogwu enenwaan̄ ya ìlaak ofifi.

²⁷Mgbọ isoso ogwu enenwaan̄ ya me lek, eweweek imun̄ ibe ke îre bọn iba ke ìboman.

²⁸Mgbọ ìboman nsabọn cha, ene ge me lek kiban̄ osasan̄a ubọk ge isibi. Ogwu ofia uman osasa eri eje eje itobo me ebek ubọk gwun̄ ya, mè ibe ke ogwugwa odasi isibi.

²⁹Ire, gwun̄ ya otataba ubọk kan̄ itap. Mgbọ yaage, ogwu ngwan̄ onanan̄a isibi. Ogwu ofia uman ya obebe ogwu ngwan̄ ya, “Kpasi ibubum isibi ke owu obum isibi ikeyi!” Mije keya ke egwen gwun̄ ya Pereji.[80]

³⁰Me mgburudun̄, ogwu ngwan̄ ogwu etobobe eri eje eje me ebek ubọk ya oneninan̄a isibi. Egwegwen ọmọ Jera.[81]