Read obolo Ibeb 4 Bible Online

Ibeb 4 - obolo bible

Ibeb 4

¹Adam onenigọọk Îfu ogwu nwa ilaak. Îfu oninin̄ owot, mè iman gwun̄ enerieen̄, mè inyi erieen̄, Ken,[7] mije Okumugwem otapbe ubọk irọ inyi ọmọ ikaan̄ enerieen̄.

²Îfu okpọkpọk iman ofifi gwun̄ enerieen̄, òrere Eben, igọọk Ken ogwu ngwan̄. Eben ìre ogwu òkikpukpo anam. Sà Ken ore ogwu òkiwop uko.

³Me ibot mgbọ irọrọkọ inu me uko, Ken onenisa usini mfut uko kan̄ inu inigwa ngwugwa inyi Okumugwem.

⁴Ikeya si, Eben onenitet okpa owot arọọn̄ kan̄ mè ebot kan̄, echi òmimiin̄ ufuk, isa inigwa ngwugwa inyi Okumugwem. Okumugwem obebele ejit me lek kè Eben melek ngwugwa kan̄.

⁵Ire, ìkabele ejit me lek kè Ken melek ngwugwa kan̄. Mije keyi, Ken onanaan̄ ejit enenen. Isi kan̄ onwenwene.

⁶Okumugwem onenido Ken ibe, “Ìre keke orọ owu ònaan̄ ejit? Sà ìre keke orọ mè isi kwun̄ inwene ikeyi?

⁷Ire owu morọ inwọn, ìre owu kpomobọkọ umin? Ire, mije owu òkarọ ìnwọn, kpọ, ijo inu òwa me otu isotu uwu kwun̄ otuun̄be ikup ikiweek itetet owu. Ire, owu, katele ibe itọ ikọ inyi owu.”

⁸Usen ge, Ken ogwegwen Eben ogwu ngwan̄ ibe inu mè ema enin̄ oron. Mgbọ ema erebe emen oron ya, Ken osusulu ogwu ngwan̄ ikpan̄.

⁹Okumugwem onenido Ken ibe, “Mọmọ Eben ngwan̄ kwun̄?” Ken ofọfọọk ibe, “Ǹkariọọn̄ ere îkupbe! Ìre emi nkisun̄ ngwan̄ n̄a ni?”

¹⁰Okumugwem ododo Ken ibe, “Ìre keke ke owu orọ ikeyi? Kpọ, ida ito eje kè ngwan̄ kwun̄ òkinan̄a me emen ijọn̄ inire emi utọn̄.

¹¹Môfieek inyi owu igak ijọn̄ ya,[8] eyi òkaka otu ibọkọ eje ngwan̄ kwun̄ me ubọk kwun̄.

¹²Owu môwop mfut me ijọn̄, ire, ijọn̄ ìkpoyaka itibi inu geege inyi owu. Owu môkana ogwu nyanya mè ogwu teeteek me linyọn̄, òkpokaan̄ isiki-efuuk.”

¹³Ken otutumu inyi Okumugwem ibe, “Osusut yi îmin enenen igak inu mbakọt ibeme.

¹⁴Cherekeyi, owu olap emi isan̄a me inyọn̄ ijọn̄, mè ilap emi isan̄a si me isi kwun̄. Emi m̀bayaka inikana ogwu nyanya mè ogwu teeteek me linyọn̄. Ene geelek òmumun̄ emi ìbokpakpan̄ emi.”

¹⁵Okumugwem ofọfọọk Ken ibe, “Ire ikeya, ene geelek òkpakpan̄ owu môbọkọ ojelek osusut kwun̄ mgbọ jaaba.” Mije keya, Okumugwem otatap Ken iman̄ me lek, inyi ene geelek òmumun̄ ọmọ ikakpan̄ ọmọ.

¹⁶Ken onanan̄a me isi Okumugwem, mè isi iluk me inyọn̄ ijọn̄ agan̄ ekigwen Nọdu,[9] eyi òkup me agan̄ mbum-ura inyi Iden.

¹⁷Ike mgbọ okije, Ken onenigọọk ogwu nwa ilaak. Ogwu nwa oninin̄ owot, mè iman gwun̄ enerieen̄ ge, ogwu enyibe erieen̄ Enọk. Ken oneninama ama ge, mè isa isan̄a gwun̄ kan̄ Enọk.

¹⁸Enọk onenibon Iradi. Iradi onenibon Meyujayen. Meyujayen onenibon Metusayen. Metusayen onenibon Lemek.

¹⁹Lemek onenido nwa iba. Ogwu adasi ore Ada, sà ogwu òso iba ore Jila.

²⁰Ada oneniman Jaban. Jaban ore adasi ene òbebene ikiluk me uwu ọfọ, mè ikikpukpo anam.

²¹Jaban onenikaan̄ ngwan̄ enerieen̄ ge ekigwen Juban. Juban ore adasi ene òbebene ikikwak uneen̄, mè ikiwut òja.

²²Jila si oneniman gwun̄ enerieen̄ ge ekigwen Tubali Ken. Tubali Ken ore adasi ene òbebene ikisa ekwe mè okwukwut itọkọ nroon̄ ikwaan̄ òkup esese esese. Tubali Ken onenikaan̄ ngwan̄ enenwaan̄ ge ekigwen Nayama.

²³Usen ge, Lemek onenikigugo lek inyi ebi nwa kan̄, Ada mè Jila, mè ikitumu inyi ema ibe, “Enyi ebi nwa kè Lemek, ìgban̄ ida n̄a, ìgban̄ utọn̄ me lek ikọ mbatumu. Ikaan̄ ogwu isak emi unan me lek, m̀bakpakpan̄, ìrere sọntiik gwun̄ enerieen̄ onyiaan̄ emi lek, m̀bakpakpan̄.[10]

²⁴Ire ene ibọkọ osusut mgbọ jaaba me useen̄ ibot kè Ken, me ibot n̄a, ìbobọkọ akọp mgbọ jaaba mè jaaba.”

²⁵Adam onenikpọk igọọk ogwu nwa ilaak. Ogwu nwa oninin̄ owot, mè iman ofifi gwun̄ enerieen̄, mè igwen Set,[11] mè ibe ke Awaji înyi ọmọ ofifi gwun̄ me useen̄ kè Eben ogwu Ken okpan̄be.

²⁶Set onenibon gwun̄ enerieen̄ ge, mè igwen Enọs. Ike mgbọ ya ke ebi ene ebene ikigwen erieen̄ Okumugwem me mgbọ ekitọbọ ebum inyi ọmọ.