Read obolo Ibeb 43 Bible Online

Ibeb 43 - obolo bible

Ibeb 43

¹Akan̄ ya okpọkpọ ikinye enenen ifo isi me ido Kenan.

²Mgbọ Jekọp mè ebi uwu kan̄ eriebe inorie ema elepbe me Ijipiti isan̄a, Jekọp onenitumu inyi ebi bọn ibe, “Ìnikpọk ìsi ìlep sọntiik inorie me Ijipiti ìmọnọ.”

³Juda otutumu inyi nte kiban̄ ibe, “Ogwu enerieen̄ ya ìtataba eji ubọk me utọn̄ ibe mè eji ekaje ìgbet ere ọmọ okupbe, ire eji kpesa ngwan̄ kiji ogwu uchit-owot igbaalek inu.

⁴Mgbọ keyi, ire ochieek ibe Benjamin ngwan̄ kiji igọọk eji ije, eji mêsi ilep inorie ijet owu.

⁵“Ire òkachieek, eji kpebekọt isi, mije, ene ya ìbe mè eji ekare ere ọmọ okupbe ire eji kpesa ngwan̄ kiji igbaalek inu.”

⁶Jekọp ododo ema ibe, “Enyi ejeje itumu inyi ogwu enerieen̄ ya ibe ke enyi mîkaan̄ ofifi ngwan̄ enerieen̄? Ìre keke orọ enyi etapbe emi me emen uyọrọlek òkup ikeyi?”

⁷Ema efọfọọk ibe, “Ogwu enerieen̄ ya ìkpọkpọ ikido eji owuwa ikọ ofolek ototun̄ ukan̄ kiji, mè ido eji ibe mè ìre nte kiji me ugwem ye, mè ìre eji mîkaan̄ ofifi ngwan̄ enerieen̄ ye? Eji ekekifọọk igọọk me lek ikọ îkido eji. Ìre eji mejeje ikọt iriọọn̄ ibe ke môbe eji esa ngwan̄ kiji enerieen̄ ejet ọmọ?”

⁸Juda onenitumu inyi Ijeren nte kiban̄ ibe, “Bene gwun̄ ya tap emi me ubọk, mè eji eneje esi elep inorie, inyi eji melek kwun̄ mè nsabọn kiji egat ugwem, mè ekakwaan̄.

⁹Emi ke ibot gwun̄ ya obokup me ubọk. Ikaan̄ inu òrere lek, emi ke owu obotet. Ire ǹkasa gwun̄ ya ìka ìnu, mè ìsa ìniyaka ìtap owu me ubọk me ògat ugwem, eje kan̄ itoon̄ emi me ibot ire mgbọ geelek.

¹⁰Ikarege eji efiatbe mgbọ ikeyi, ike mgbọ keyi, kè eji mîra iyaka ere ya mgbọ iba.”

¹¹Ijeren nte kiban̄ obebe ema, “Înwọn ma. Ire ikeya ke ìbokup, ìneen̄ lek, mè ìtiten̄e mfut uti inyọn̄ ijọn̄ keyi, echi ònwọnwọn ichit, ìtap me akpa kinyi ìsa ìsi ìche ìnyi ogwu ibot mkpulu ya kubọk inyinyi. Ìmọnọ aran̄ igwa lek, mè aran̄ akwọọk, mè esese chieen̄ inwan̄ mè ukwuuk uti ekisa irọ inorie itop, mè aran̄ mâa, mè ichip pisitachio mè ichip alimọn.

¹²Ìmọnọ ikpoko irek iba ìkaan̄ me ubọk, mè ìsa irek ge ìnyi me useen̄ ikpoko eyakabe itap me otu akpa kinyi mgbọ keyilọ ya. Usini mgbọ, ife cha elọlọ ubọk iben ikpoko cha itap me emen akpa kinyi.

¹³Ìsa ngwan̄ kinyi ìgbaalek ìsi lek ogwu enerieen̄ ya! Ìbene ije! Ikayaka ìfiat mgbọ ofifi.

¹⁴Kè Awaji Ogwu Òkaan̄ Unye Geelek irọ inyi ene ya ikaan̄ ejit nsan me lek kinyi, mè iria ngwan̄ kinyi keyilọ melek Benjamin, inyi egọọk enyi egwu ekom eka. Eyi n̄a, ire nsabọn n̄a ibekwaan̄ itele emi, ekwaan̄ etele emi ma!”

¹⁵Bọn kè Ijeren cha enenikpulu inyinyi cha, mè imọnọ ikpoko irek iba ikaan̄ me ubọk, mè isa Benjamin ngwan̄ kiban̄ igbaalek inan̄a isi Ijipiti, mè isi imun̄ Josefu.

¹⁶Josefu imumun̄ Benjamin melek bọn nte kan̄, igwegwen ogwu ibot ebi ikwaan̄ uwu kan̄ itumu inyi ibe, “Sa ebirieen̄ chi fo uwu, mè kpan̄ anam, mè bala sa tem inorie, ke ife chi mêgọọk emi irie inorie me ikarek chereyi.”

¹⁷Ogwu ibot ikwaan̄ ya orọrọ ike Josefu otumube, mè isa ife cha isi itap me uwu kè Josefu.

¹⁸Ukpook otetet ife cha enenen. Ema ekekitumu ibe, “Îre mije ikpoko cha eyi ife chi eyakabe itap me emen akpa kiji me mgbọ keyilọ ya ke etet eji initap me uwu. Ene yi ìkiweek irọrọ eji nnaan̄, mè isa eji irọ ebi usun̄, mè ibọkọ eji inyinya akpan kiji.”

¹⁹Eya orọ, ema ejeje isi lek ogwu ibot ikwaan̄ uwu kè Josefu me otu isotu,

²⁰mè itumu inyi ibe, “Ogwu nte, eji mînu ere yi adasi mgbọ inilep inorie.

²¹Me oniin̄ eji ekije ifo, mgbọ eji erebe ere eji ebelaak iwele egwe, mè ichili otu akpa kiji, eji eyaka inimun̄ ikpoko eji esabe ikpe ewe inorie me otu akpa kiji. Ogwu ichili otu akpa kan̄, òmun̄ otutuuk otu ifuk ikpoko kan̄. Eya orọ, eji mîsa ikpoko ya ikaan̄ me ubọk inu mgbọ keyi ibesa ijet owu.

²²Eji kperiọọn̄ ogwu òyayaka ikpoko cha itap me otu akpa kiji. Eyi eji enube yi, eji mîsa si ofifi ikpoko eji ebesa inilep inorie eyi mgbọ keyi ikaan̄ me ubọk inu.”

²³Ogwu ibot ikwaan̄ uwu kè Josefu obebe ema, “Esuuk ikup melek kinyi! Ikatet ukpook, mije, môre Awaji kinyi mè Awaji nte kinyi oche ikpoko itap me otu akpa cha inyi enyi. Me atikọ, emi mbọkọ ikpoko enyi esabe ilep inorie me ere yi mgbọ ya.” Ene ya osisi isan̄a Simiọn isibi ijet ema.

²⁴Ogwu ene ya onenisa ema isi itap me uwu kè Josefu, mè inyi ema mun̄ egwọk ukot, mè inyi si inyinya akpan kiban̄ inorie.

²⁵Ema ekekineen̄ inyinyi cha ema esabe inu ibesa iniche inyi Josefu isun̄ iban mgbọ Josefu môkabe me ikarek, mije, ema mînọ ibe ke îre me uwu ya ke ema eberie inorie.

²⁶Mgbọ Josefu okabe, ema esasa inyinyi cha iche inyi, mè itọbọ ibot me ijọn̄ inyi.

²⁷Josefu onenido ema ibe, “Lek kinyi ye? Sà nte kinyi, ogwu ugane ya, ogwu enyi etumube ikọ ofolek mgbọ keyilọ ya ye? Ìre ọmọ òwa si me ugwem?”

²⁸Ema enenigele igwook, mè itọbọ ibot me ijọn̄ inyi ọmọ, mè ifọọk ibe, “Ogwu usun̄ kwun̄, nte kiji, òwa me unye-lek.”

²⁹Josefu onenibene chieen̄ itoon̄ me lek kè Benjamin, gwun̄ nga kan̄, mè inido ema ibe, “Ìre ogwugwu ore ngwan̄ kinyi ogwu ijija ogwu enyi etumube ikọ ofolek inyi emi mgbọ keyilọ ya?” Inenitumu inyi Benjamin ibe, “Gwun̄ n̄a, Awaji ikaan̄ ejit nsan me lek kwun̄.”

³⁰Josefu ìkayaka ìkọt ìtet lek kan̄, mije ngwan̄ kan̄. Igwagwat lek inan̄a ikeke ije inan̄a ifo emen agwut, mè ikup me ere ya ito ito.

³¹Inenisa mun̄ igwọk isi, mè itet lek inye, mè inan̄a isibi inu, mè ibe esa inorie enu.

³²Eneniyik inorie kè Josefu me esese ikasi, mè iyik eyi ebi ngwan̄ kan̄ me esese ikasi, mè iyik si eyi ebi Ijipiti ìgọgọọk ema irie inorie ya esese, mije, ebi Ijipiti kpekigọọk ebi Iburu igbaan̄ irie inorie. Eya ìre mbuban inu me lek ebi Ijipiti.

³³Esun̄ ebi ngwan̄ kè Josefu cha me isi kè Josefu me onineen̄, ibene me lek ogwu adasi isi ire lek ogwu mgburudun̄. Mgbọ ema emun̄be inu ya, ikeke ema chieen̄ enenen, ema ekekiriraan̄ chieen̄ ikikpọ lek kiban̄.

³⁴Enenichibi inorie me inyọn̄ ikasi kè Josefu inyi ema. Inorie kè Benjamin îwa mgbọ go igak eyi ebi ngwan̄ geelek. Ema otutuuk efefet lek igọọk Josefu irie mè inwọ ike efuuk kiban̄ okọtbe.