Read obolo Ibeb 44 Bible Online

Ibeb 44 - obolo bible

Ibeb 44

¹Josefu oneninyi ogwu ibot ikwaan̄ uwu kan̄ ida ibe, “Tap inorie jot akpa otutuuk ebirieen̄ cha, ike geelek ema ebekọt ibeme, mè yaka ikpoko kiban̄ tap me otu akpa kiban̄ me ge me ge.

²Ben ekpen̄ n̄a, eyi alata okuket ya, tap me otu akpa ogwu ijija ya gbaalek ikpoko îsabe ikpe ewe inorie îlepbe.” Ogwu enerieen̄ ya orọrọ ubọk Josefu otumube.

³Me ofit iwele kan̄, me okpatu ewelegwe, enenitutuun̄ ebi ngwan̄ kè Josefu cha mè inyinya akpan kiban̄ itap me oniin̄. Ema ebebene ikije ifo.

⁴Ema inanan̄a isibi me emen ama ya, kpejeje ijọn̄ọ ere, Josefu otutumu inyi ogwu ibot ikwaan̄ kan̄ ibe, “Libi gọọk ife cha me oniin̄. Osilibi isoon̄, do ema ibe mè ìre keke orọ ebibi esabe ijo inu ikpe ewe ata inu?

⁵Mè ìre keke orọ mè ema echiin̄ ekpen̄ nte uwu kwun̄ okisa inwọ miin̄, mè ikisa itet ǹcha? Tumu nyi ibe ke inu yi ema erọbe îfieek lek enenen.”

⁶Ogwu ibot ikwaan̄ ya olilibi igọọk ife cha, mè isoon̄ ema me oniin̄, mè itumu ikọ nte uwu kan̄ otumube cha inyi ife cha.

⁷Ife cha efọfọọk ibe, “Iyak ogwu nte, ìre keke orọ mè owu òtumu ojelek ikọ òkup ikeyi? Lei! Eji ebi usun̄ kwun̄ kpebekọt irọ ojelek inu òkup ikeya.

⁸Kpọ, ikpoko eji emun̄be me otu akpa kiji me adasi mgbọ eji enube, eji mîsa ikaan̄ me ubọk inan̄a me ido Kenan ijet enyi. Ìre keke môrọ inyi eji eyaka enechiin̄ alata okuket mè ìre alata araran̄ me uwu kè nte uwu kwun̄?

⁹Ogwu geelek oweekbe ekpen̄ yi imun̄ me ubọk, ebekpakpan̄, mè ebi ìsisik ekana usun̄ enyi nte uwu kwun̄.”

¹⁰Ogwu ibot ikwaan̄ ya obebe, “Înwọn ma, emi nchieek ubọk enyi etumube. Ire, ogwu geelek mêweekbe ekpen̄ ya imun̄ me ubọk môkana usun̄ inyi emi. Ebi ìsisik mêfon me utelelek, mije, ema kperọ inu geege ilọ.”

¹¹Otutuuk kiban̄ ebeben akpa kiban̄ iyik me ijọn̄ me ene me ene, mè ikitọn̄ọ otu.

¹²Ogwu ibot ikwaan̄ ya okekichili akpa cha ikiweek me ntuun̄ me ntuun̄, ibene me lek eyi ogwu adasi isi ire lek eyi ogwu mgburudun̄, mè iniweek ekpen̄ ya imun̄ me otu akpa kè Benjamin.

¹³Otutuuk kiban̄ esasa me ufieejit itaba ofọnti òkup me lek kiban̄ igwak isan̄a, mè ikpulu akpa inorie kiban̄ itoon̄ me inyọn̄ inyinya akpan kiban̄, mè igwu ikom ika inu Ijipiti.

¹⁴Juda mè ebi ngwan̄ enenire uwu kè Josefu, mè inimun̄ Josefu me uwu. Ema enanan̄a irọn̄ me ijọn̄ me isi kan̄.

¹⁵Josefu ododo ema ibe, “Ìre kpasi inu ke enyi erọ ikeyi? Ìre enyi kperiọọn̄ ibe ke ene òkup kire emi mâkọt itet ǹcha, mè iweek inu geelek isibi?”

¹⁶Juda ofọfọọk ibe, “Ogwu nte, ìre keke ke eji ebeyaka itumu? Kpunu ikọ geege eji ebekọt itumu isa inyan̄a lek kiji. Ìre eji ebejeje ijeen̄ ibe ke ubọk kiji îtana? Awaji îkpọk mbum ijo inu eji erọbe. Mgbọ keyi, eji otutuuk ìre ebi usun̄ kwun̄, eji melek ogwu eweekbe ekpen̄ ya imun̄ me ubọk.”

¹⁷Josefu obebe, “Lei! Emi m̀kpakọt irọ ojelek inu òkup ikeya. Ogwu emun̄be ekpen̄ ya me ubọk gaalek obokana usun̄ inyi emi. Enyi ebi ìsisik, ìfon ìgọọk nte kinyi me esuuk.”

¹⁸Juda ojeje iriaak me lek kè Josefu, mè itumu inyi ibe, “Soso ogwu nte, nye lek gban̄ utọn̄ me lek ikọ mbatumu. Kanaan̄ ejit ìnyi emi ogwu usun̄ kwun̄. Emi nriọọn̄ ibe ke owu òkup kubọk ogwu Fero.

¹⁹Ogwu nte, îre owu odo eji ebi usun̄ kwun̄ me adasi mgbọ eji enube ibe mè ìre nte kiji òwa me ugwem? Mè ìre eji mîkaan̄ ofifi ngwan̄ enerieen̄?

²⁰Eji efọfọọk owu ibe ke nte kiji òwa me ugwem, ke ogwugwu îkan enenen, ke eji mîkaan̄ ngwan̄ enerieen̄ ijija ge ogwu nte kiji obonbe me ukan, ke ogwu ngwan̄ ogwu ọmọ melek kan̄ erebe uga ge îkwu, ke ọmọ gaalek oyaka inisik, ke nte kiji îma ọmọ enenen.

²¹“Owu onenibe mè eji ebi usun̄ kwun̄ esa gwun̄ yi enu, inyi owu òrieen̄ chieen̄ me lek.

²²Eji enenifọọk owu ibe ke gwun̄ ya ìkpokọt itele ogwu ute, mije, ire itele, ke ogwu ute môkwu.

²³Ire, owu otutumu ibe ire eji kpesa ngwan̄ kiji yi inu, ke owu òkponyi eji isi.

²⁴Mgbọ eji erebe uwu, eji ebeben otutuuk ikọ owu otumube ikpa inyi nte kiji.

²⁵“Sọnja mgbọ iraraka, nte kiji onenibe eji egwu ekom esi Ijipiti esi elep sọntiik inorie.

²⁶Eji etutumu inyi nte kiji ibe ke eji kpebekọt isi, îtata mè ngwan̄ kiji ogwu ijija ìgọgọọk eji isi, ke eji kpebekọt ire ere owu okupbe ire ngwan̄ kiji ogwu ijija ìkagọọk eji ìje.

²⁷“Nte kiji, ogwu usun̄ kwun̄, onenitumu inyi eji ibe ke eji mîriọọn̄ ibe ke nwa kan̄ ìman ibot bọn ebirieen̄ iba gaalek inyi ọmọ,

²⁸ke ene ge me lek înan̄a itele ọmọ. Akat keya ke ọmọ ìkayaka ìmun̄ ogwugwu, ke ìkpolọlọ anam ochim ikpan̄.

²⁹Ire eji iyaka inimọnọ ogwu òsisik yi isan̄a me agba lek kan̄, mè ire ikaan̄ inu òrọrọ gwun̄ ya me lek, ke eji mêrọ inyi ọmọ isa isọọn̄ ibot kan̄ ifieek ejit ikwu ifo ama ekwukwu.

³⁰“Mgbọ keyi, ugwem kè nte kiji, ogwu usun̄ kwun̄, ìkup me lek gwun̄ yi. Eya orọ, ire eji ifo isi imun̄ nte kiji, mè ire gwun̄ yi ìkakup melek kiji,

³¹mè nte kiji imun̄ ibe ke gwun̄ yi ìkagọọk eji ìka, nte kiji môkwu. Sa me ikeya, eji ebi usun̄ kwun̄ mêrọ inyi nte kiji isa isọọn̄ ibot kan̄ ifieek ejit ikwu ifo ama ekwukwu.

³²Sabum eji enikọt inu, îre emi ogwu usun̄ kwun̄ nsa ugwem n̄a ichieek use inyi nte n̄a me ibot gwun̄ yi, ibe ire ǹkasa gwun̄ yi ìkaan̄ me ubọk ìka ìjet nte n̄a, mè eje gwun̄ yi itoon̄ emi me ibot ire mgbọ geelek.

³³“Eya orọ, mgbọ keyi, soso, ogwu nte, emi ogwu usun̄ kwun̄ mâbia me ere keyi me useen̄ gwun̄ ya, mè ikana usun̄ inyi owu, mè gwun̄ yi igọọk ebi ngwan̄ ifo.

³⁴Ìre emi m̀bajeje ikọt igwu ikom ifo, ire gwun̄ yi ìkagọọk emi ìje? In̄-in̄, emi m̀kpakọt isa chieen̄ imun̄ ojelek ufieejit ile òkup ikeyi okikeme nte n̄a.”