Read obolo Ibeb 45 Bible Online

Ibeb 45 - obolo bible

Ibeb 45

¹Me mgbọ ya, Josefu ìkayaka ìkọt ìtet lek kan̄ ìkaan̄ me isi otutuuk ebi ikwaan̄ kan̄. Itataan̄ ukpo inyi ida ibe, “Enyi otutuuk ene, ìsibi ìnan̄a me agba lek n̄a!” Otutuuk ene enanan̄a isibi itele ọmọ mè ebi ngwan̄ gaalek. Sa me ikeyi, kpunu ene geege òkukup me ere ya mgbọ Josefu ochilibe lek kan̄ ijeen̄ ebi ngwan̄ kan̄.

²Josefu otataan̄ ukpo ito ito enenen. Ebi Ijipiti enọnọ ida ito kan̄. Etip ito ya otataan̄ isi ire uwu ogwu Fero.

³Josefu otutumu inyi ebi ngwan̄ ibe, “Emi ìre Josefu. Ìre nte n̄a ọmọ òwa si me ugwem?” Ire, ebi ngwan̄ kpekọt ifọọk ọmọ otu, mije, ukpook îtet ema enenen me isi kan̄.

⁴Josefu obebe ema, “Ìje ìriaak emi lek.” Ema ejeje iriaak. Inenitumu inyi ema ibe, “Emi ìre Josefu ngwan̄ kinyi, ogwu enyi etetbe inyam itap me Ijipiti.

⁵Mgbọ keyi, ikafieek ejit! Ikafieek lek kinyi ikọ me lek enyi etetbe emi inyam inu me ere keyi. Me atikọ, îre mije inyanyan̄a ebek ugwem ebi ene ke Awaji odasi iria emi inu me ere yi me isi kinyi.

⁶Acha iba ire eya akan̄ ojijakabe inyọn̄ ijọn̄ yi. Ìyaka inisik acha go mgbọ ebi ene kpebekọt iwop inu geege, kpebekọt si irọkọ inu geege me uko.

⁷Ire, Awaji ìdasi iria emi inu me isi kinyi, inyi ǹnensa me ikpele oniin̄ òkup ikeyi ǹnyan̄a ugwem kinyi, inyi enyi ekakwaan̄ otutuuk ìsan̄a me linyọn̄.

⁸Eyi îjeen̄ isibi ibe ke ìkare enyi eria emi inu me ere yi, ke îre Awaji oria emi inu, mè isa emi irọ ute inyi ogwu Fero, mè irọ emi ogwu ibot me otutuuk uwu ogwu Fero, mè isa emi irọ si ogwu ibot mkpulu me otutuuk ido Ijipiti.

⁹“Mgbọ yi, enyi ìgwat lek ìfon, mè ìsi ìlook nte n̄a ibe, ke emi Josefu gwun̄ kan̄ m̀be, ke Awaji îsa emi irọ ogwu ibot me otutuuk ido Ijipiti. Eya orọ, mè ogwugwu inu inigọọk emi ikup, mè ikafiat mgbọ.

¹⁰Ìtumu ìnyi ibe ke emi m̀be ke ogwugwu môluk me agan̄ Gosen, inyi ogwugwu mè ebi bọn mè bọn ebi bọn, mè ebot mè arọọn̄ kan̄ mè eriembuuk kan̄, mè otutuuk inu geelek îkaan̄be, ekup egbet emi ere me lek.

¹¹Emi mâkpukpo ogwugwu, inyi ogwugwu mè ebi uwu kan̄ mè otutuuk inu geelek îkaan̄be ekarọn̄ ugbọọri, mè ìtiteek. Mije, akan̄ yi môkup ichit ofifi acha go òkinu me isi.

¹²“Mgbọ yi, enyi me lek kinyi melek Benjamin gwun̄ nga n̄a mîsa chieen̄ kinyi imun̄ ibe, me atikọ, ke îre emi Josefu nkitumu ikọ yi melek kinyi.

¹³Ìsi ìkpa umin emi nkaan̄be me Ijipiti ìnyi nte n̄a, mè ìtumu si otutuuk inu enyi esabe chieen̄ kinyi imun̄ ofolek n̄a ìnyi, mè ìsa nte n̄a ìjet emi ugwat ugwat.”

¹⁴Josefu onenikana Benjamin gwun̄ nga kan̄ ikat, mè iyaka ibot imaan̄ me oguga kan̄, mè isa chieen̄ ichit me lek ito. Benjamin okakana ọmọ ikat, mè ikito ito si.

¹⁵Inenikat si otutuuk ebi ngwan̄ kan̄ kechilọ me ge me ge, mè ito ito si me oguga kiban̄. Mgbọ îkatbe ema isan̄a, ema enenigọọk ọmọ ikpa ukpatu.

¹⁶Mgbọ etip orebe uwu ogwu Fero ibe ke ebi ngwan̄ kè Josefu mînu, ejit îbele ọmọ mè ebi ikwaan̄ kan̄ enenen.

¹⁷Ogwu Fero onenibe Josefu, “Tumu nyi ebi ngwan̄ kwun̄ ibe ekpulu inorie etoon̄ me inyọn̄ inyinya akpan kiban̄, mè esa esi ido Kenan,

¹⁸esi esa nte kwun̄ mè otutuuk ebi uwu kinyi eka ejet emi me Ijipiti. Emi mânyi ema ijọn̄ ònwọnwọn ichit me ido Ijipiti, ere ata inorie ìkpokinan ema.

¹⁹“Tumu si nyi ema ibe esa owuwa uji ekpirikpo me Ijipiti esi Kenan esi etap nsabọn kiban̄ mè ebi nwa kiban̄, mè nte kwun̄ esa eka enu.

²⁰Tumu nyi ema ibe ekama lek ìsisaak lek me lek inu nroon̄ uwu kiban̄. Mije, inu geelek òjajaan̄ ichit me otutuuk ido Ijipiti ìre eyi kiban̄.”

²¹Bọn kè Ijeren erọrọ si ikeya. Josefu onyinyi ema owuwa uji ekpirikpo, ike ogwu Fero onyibe ida, mè inyi si ema inorie ema mêriebe me oniin̄,

²²mè inyi otutuuk kiban̄ aya ofọnti ge ge, inyi ema esa enwene lek. Ire, Benjamin ke înyi aya ofọnti go, mè inyi si efit ikpoko alata okuket ita.

²³Inenikpulu inu ònwọnwọn ichit me ido Ijipiti itoon̄ ijot inyọn̄ akọp inyinya akpan ibe esa enyi nte kan̄, mè ikpulu si fituru mè esese chieen̄ inorie itoon̄ ijot inyọn̄ ofifi akọp uman inyinya akpan inyi ogwu ute môriebe me oniin̄ ije kan̄.

²⁴Inenitutuun̄ ebi ngwan̄ cha itap me oniin̄, ema enanan̄a. Mgbọ ekije inan̄a, itutumu inyi ema ibe, “Soso, ikabaak ibaak me oniin̄.”

²⁵Ebi ngwan̄ kè Josefu enanan̄a me Ijipiti ifo igọọk Jekọp nte kiban̄ me ido Kenan.

²⁶Mgbọ ema erebe uwu, ema etutumu inyi nte kiban̄ ibe, “Josefu òwa me ugwem! Me atikọ, Josefu ore ogwu ibot mkpulu me otutuuk ido Ijipiti.” Ikọ yi ogwogwook Jekọp mbiribọ me lek. Ìkakọt ìchieek ibe ke îre atikọ.

²⁷Ire, mgbọ înọbe etip Josefu oriabe ibe elook ọmọ, mè isa chieen̄ imun̄ otutuuk uji ekpirikpo cha Josefu oriabe ibe esa enetap ọmọ eka, efuuk onenibene ikinin̄ ọmọ emen.

²⁸Jekọp, òrere Ijeren, onenitumu ibe, “Îjot emi owot! Josefu gwun̄ n̄a òwa me ugwem! Emi mâsi imun̄ ọmọ sabum mkpa ònoben emi.”