Read obolo Ibeb 46 Bible Online

Ibeb 46 - obolo bible

Ibeb 46

¹Ijeren, òrere Jekọp, onenikpulu ebi uwu kan̄ mè otutuuk inu îkaan̄be isa igbaalek inan̄a isi Ijipiti. Mgbọ îrebe Bieseba, igwagwa ngwugwa inyi Awaji kè Ajiki nte kan̄.

²Me eririeen̄ usen ya, Awaji ogwegwen ọmọ me emen ilaak, “Jekọp! Jekọp!” Jekọp ochechieek.

³Awaji otutumu inyi ibe, “Emi nre Awaji kè nte kwun̄. Katet ukpook isisi Ijipiti. Mije, emi mârọ inyi owot iman kwun̄ ikana ikpele ido me ere ya.

⁴Mâgọọk owu igbaan̄ ije isi Ijipiti, mè iyaka isa owot iman kwun̄ igwu ikom ika inu inyọn̄ ijọn̄ yi. Mgbọ mkpa kwun̄ isikem, îre Josefu me lek kan̄ obobieen̄ owu ikaan̄[86] mgbọ owu môtọbọbe.”

⁵Bọn kè Ijeren enenitap nte kiban̄ mè asa nsabọn kiban̄ mè ebi nwa kiban̄ me emen uji ekpirikpo ogwu Fero oriabe ibe esa enetap nte kiban̄.

⁶Ema mîkpulu si otutuuk anam kiban̄, mè otutuuk inu geelek ema ekaan̄be me ido Kenan isa ikaan̄ me ubọk ifo Ijipiti. Ikeyi ke Jekọp osa otutuuk bọn owot iman kan̄ isa igbaalek ije.

⁷Îsa bọn ebirieen̄ kan̄, mè bọn bọn kan̄ ebirieen̄, mè bọn ebibaan̄ kan̄, mè bọn bọn kan̄ ebibaan̄, mè otutuuk ebi kan̄ geelek isa igbaalek inan̄a ifo Ijipiti.

⁸Erieen̄ bọn kè Ijeren, òrere Jekọp, ìgọgọọk nte kiban̄ inan̄a inu me Ijipiti ìre: Ruben, adasi gwun̄ kè Jekọp,

⁹melek bọn ebirieen̄ kè Ruben, ìrere Anọk, mè Palu, mè Ejirọn, mè Kami.

¹⁰Simiọn melek bọn ebirieen̄ kan̄, ìrere Jemuwen, mè Jamin, mè Oyadi, mè Jakin, mè Sowari, mè Sawulu ogwu îbonbe me owot ogwu enenwaan̄ Kenan ge.

¹¹Libai melek bọn ebirieen̄ kan̄, ìrere Gasiọn, mè Koyat, mè Merari.

¹²Juda melek bọn ebirieen̄ kan̄, ìrere Eri mè Onan, mè Siela, mè Pereji, mè Jera, igbaalek Ejirọn mè Amulu bọn ebirieen̄ kè Pereji. (Ire, Eri mè Onan mîkwaan̄ me ido Kenan).

¹³Isaka melek bọn ebirieen̄ kan̄, ìrere Tola, mè Puwa, mè Jasubu,[87] mè Simiron.

¹⁴Jebulọn melek bọn ebirieen̄ kan̄, ìrere Seredi, mè Elọn, mè Jayalen.

¹⁵Ebiba ere bọn ebirieen̄ ebi Jekọp okaan̄be me owot kè Lia me Padan Aram. Kpefuk gwun̄ kan̄ enenwaan̄ ekigwen Daina igbaalek. Otutuuk bọn owot iman kè Lia, ebirieen̄ mè ebibaan̄, enenire akọp ene ita mè ita.

¹⁶Gadi melek bọn ebirieen̄ kan̄, ìrere Sifiọn, mè Agi, mè Suni, mè Esibon, mè Eri, mè Arodi, mè Areli.

¹⁷Ase melek bọn ebirieen̄ kan̄, ìrere Imina, mè Isiba, mè Isibi, mè Beria, mè ngwan̄ kiban̄ enenwaan̄ ekigwen Sera, igbaalek bọn kè Beria, ìrere Eberi mè Malikien.

¹⁸Akọp mè ibot bọn gweregwen kechi ke Jekọp okaan̄ me owot kè Jilipa ogwu usun̄ enenwaan̄ ogwu Leban osabe inyi Lia ogwu gwun̄.

¹⁹Bọn ebirieen̄ kè Rechen nwa kè Jekọp ìre Josefu mè Benjamin.

²⁰Josefu onenibon bọn ebirieen̄ iba ekigwen Manasi mè Iferem me Ijipiti me owot kè Asenat gwun̄ kè Pọtifera ogwu òban yọk me Eliopolis.[88]

²¹Benjamin melek bọn ebirieen̄ kan̄, ìrere Bela, mè Bekeri, mè Asiben, me Gera, mè Nieman, mè Eyi, mè Ros, mè Mupim, mè Upim, mè Aridi.

²²Akọp mè ebirieen̄ ini kechi ke Jekọp okaan̄ inan̄a me owot kè Rechen.

²³Dan melek gwun̄ enerieen̄ ge kan̄, òrere Usim.

²⁴Nafitali melek bọn ebirieen̄ kan̄, ìrere Jajien, mè Guni, mè Jeseri, mè Silem.

²⁵Ibot bọn ebirieen̄ jaaba kechi ke Jekọp okaan̄ me owot kè Biliya ogwu usun̄ enenwaan̄ Leban osabe inyi Rechen ogwu gwun̄.

²⁶Otutuuk bọn, mè bọn bọn kè Jekọp ebi ìgọgọọk ọmọ inu Ijipiti, isan̄a me lek nwa ebi bọn, ìre akọp ene gweregwen mè gweregwen.

²⁷Bọn Josefu obonbe me Ijipiti ìre ibot ebirieen̄ iba. Otutuuk otu ifuk bọn owot iman kè Jekọp ìgọgọọk Jekọp inu Ijipiti ìre akọp ene jaaba.

²⁸Jekọp oraria Juda ibe idasi ije isi ido Josefu oniin̄ ike ema mêsabe ije isi ire Gosen. Mgbọ ema erebe agan̄ Gosen ya,

²⁹Josefu oninin̄ uji akọn̄ kan̄ anam okitaba ije, mè ikọp isi ichichini nte kan̄ me Gosen. Josefu ibebene chieen̄ itoon̄ me lek ogwu ute, ililibi inin̄, mè ikana ogwu ute ikat, mè iyaka ibot imaan̄ me oguga ogwu ute, mè ifiat mgbọ ito ito enenen.

³⁰Ijeren otutumu inyi Josefu ibe, “Mgbọ keyi nsabe chieen̄ n̄a imun̄ owu, mè imun̄ ibe ke owu òwa me ugwem, nneen̄ lek ikwukwu.”

³¹Josefu onenitumu inyi ebi ngwan̄ mè otutuuk ebi uwu nte kan̄ cha ibe, “Mânisi irọ inyi ogwu Fero iriọọn̄ ibe ke enyi ebi ngwan̄ n̄a, mè otutuuk uwu nte n̄a ebi ìluk me ido Kenan, mîka inu me lek n̄a.

³²Mâtumu si inyi ogwu Fero ibe ke enyi ìre ebi òkpukpo anam, ke enyi mîsa ebot mè arọọn̄ mè eriembuuk kinyi mè otutuuk inu geelek enyi ekaan̄be igbaalek inu.

³³Ire ogwu Fero igwen enyi ido ibe mè ìre keke ore ukot mbọm kinyi,

³⁴ìfọọk ibe ke enyi ìre ebi òkpukpo anam bene me akat ke enyi erebe nsabọn, ubọk ebi nte nte kinyi erebe me ukot eyi kiban̄. Sa me ikeya, ogwu Fero môchieek ibe enyi eluk me inyọn̄ ijọn̄ Gosen ya, mije, ene geelek òkikpukpo anam ìre mbuban inu me lek ebi Ijipiti.”