Read obolo Ibeb 49 Bible Online

Ibeb 49 - obolo bible

Ibeb 49

¹Jekọp oneniria ikwaan̄ igwen otutuuk bọn ebirieen̄ kan̄. Mgbọ enube, ibebe ema, “Ìgbaan̄ ìtitiin̄, inyi ǹtumu inu òborọ enyi me mgbọ òkup me isi ǹnyi enyi.

²“Enyi bọn ebirieen̄ kè Jekọp, ìjujuk ìriaak, ìgban̄ ikọ emi Ijeren nte kinyi mbatumu inyi enyi.

³“Ruben, owu ore adasi gwun̄ n̄a, mè unye n̄a, mè ire si adasi mfut mgbọ nsabọn irieen̄ n̄a. Irek umin kwun̄, ọmọ obene ichit! Unye kwun̄, ọmọ omin ichit!

⁴Owu òkup kubọk ogbururu onin̄ okwaan̄. Ire, owu òkpoyaka ire ogwu òmimin ichit ofifi, mije, owu ogọọk nwa nte kwun̄ ilaak, mè ifiat inyọn̄ mkpilaak kè nte kwun̄.

⁵“Simiọn mè Libai ìre ngwan̄, ema ekisa oge akọn̄ kiban̄ irọ ene inu afa.

⁶Awaji ikachieek ibe emi ǹgọọk ema ǹkup ǹtọt otitọt, Awaji ikachieek ibe emi ǹgọọk ǹnin̄ ogbo kiban̄, mije, ema mîkpan̄ ene me unaan̄-ejit, mè ifaan̄ ukot anam me ikpak, ubọk òneme ema.

⁷Môfieek inyi uyok-ejit kiban̄, mije, ìkup afa afa, môfieek inyi ijo unaan̄-ejit kiban̄, mije, ìkup ikpak ikpak. Emi mâyiyala ema ikana otutuuk inyọn̄ ijọn̄ ido kè Jekọp, mè itọọn̄ ema ikana ere okpọkọ okpọkọ me etete ebi Ijeren.

⁸“Owu Juda, ebi ngwan̄ kwun̄ mêtọn̄ owu. Owu môkitet ebi ochicha kwun̄ me ebek ikwuk isi me ijọn̄. Otutuuk bọn kè nte kwun̄ mêtọbọ ibot inyi owu.

⁹Juda, owu ìre gwun̄ egbe àtat, gwun̄ n̄a, owu okpan̄ anam kwun̄, mè isa ika, mè inisiki ilaak me ijọn̄ ikitaka kubọk uman egbe àtat. Ìre ekene obonye ejit ije inisisaak egbe àtat me ike mgbọ òkup ikeya?

¹⁰Okuba ubọọn̄ ìkponan̄a me ubọk kè Juda; îre bọn owot iman kan̄ ebekikpulu, mege ire mgbọ ogwukaan̄ okuba ya mônube, ogwu otutuuk ido geelek ebekisiki ibot inyi.

¹¹Juda môkitobo inyinya akpan kan̄ me lek olik gerep, môtobo bọn inyinya akpan kan̄ me lek olik gerep òjajaan̄ lek ichit. Miin̄ gerep kan̄ môwa enenen, ire lek ọmọ môkijiin̄ ofọnti kan̄ me emen igwọk, môkigwọk ofọnti kan̄ me emen miin̄ gerep òkinin̄ eje eje.

¹²Juda môkaan̄ miin̄ iwa enenen, mè ikinwọ ibaan̄ ada me chieen̄; ọmọ môkaan̄ mun̄ ebe iwa enenen, mè ikinwọ ire lek ejeek kan̄ môkitana okuket.

¹³“Jebulọn, môkiluk me agba awaji, atasuk kan̄ môre ere mgba-uji inyi owuwa uji ile, okike ijọn̄ kan̄ mônyana isi ire Sidọn.

¹⁴“Isaka ìre inyinya akpan ònyenye lek enenen, mè ikilaak inyana me ijọn̄ me etete akpan iba.[90]

¹⁵Ire, isimun̄ ibe ke ere isiki-efuuk ya înwọn, mè imun̄ ibe ke ijọn̄ ere ya îjaan̄, îra irak udun̄ ibene, mè isa oguga irak akpan cha. Sa me ikeya, îra ikana ogwu usun̄ òkisi ikwaan̄ òbọp.

¹⁶“Dan môkisibi oyerebet inyi ebi kan̄, kubọk otoko ge me etete otoko ebi Ijeren.

¹⁷Dan môre ulu òkup me agba oniin̄, ọmọ môre ijo ulu òkup me oniin̄, eyi òkitọk ibot ukot inyinya, ogwu òlibi me inyọn̄ îra iwaka irọn̄ udun̄ udun̄.

¹⁸“Jei Okumugwem, unyan̄a kwun̄ ke nkikpọ chieen̄!

¹⁹“Ire Gadi, urum ebi enun̄unun̄ afa mênu initim etim me lek kan̄; ire, Gadi môgwu ikom, mè ililaba ema isan̄a.

²⁰“Ase môkisan̄a ogbogbo inorie me ijọn̄ uko kan̄, inorie uko kan̄ ìre eyi òbokigbe ebi ubọọn̄ irerie.

²¹“Nafitali ìre ogaan̄ etọn̄ọbe itele, eyi òkimaan̄ ujuja bọn.[91]

²²“Josefu ìre olik gerep òkito owuwa mfut, ọmọ ìre ata olik gerep òtibi me agba mun̄, eyi agọọk kan̄ okisan inene lek agba uwu.[92]

²³Ebi ochicha kan̄ mîsa akọn̄ ililaba ọmọ; mîsa me ujat ejit isook ọmọ me oraan̄.

²⁴Ire, ọmọ otetet ogbaan̄ kan̄ ikaan̄ inye, ubọk kan̄ onyenye ikup, mije, unye kan̄ ìnan̄a me ubọk Awaji Ilile kè Jekọp, òrere ogwu Òkpukpo Arọọn̄, mè Ewuuk Ikput Lek kè Ijeren.

²⁵Unye kwun̄ ìnan̄a me ubọk Awaji kè nte kwun̄, ogwu òkitap ubọk inyi owu, mè ubọk Ogwu Òkaan̄ Unye Geelek, ogwu òkigbana owu; ogwu òkinyi owu ugbana eyi ibot inan̄a me isinyọn̄, mè ugbana eyi mun̄ òkinan̄a me udọk udọk ogbuuruk irak ijọn̄ igbuk isibi, mè ugbana eyi ogbogbo bọn mè anam.

²⁶Ugbana eyi emi nte kwun̄ nkigbana owu îmin enenen; îmin igak ugbana eyi òkinan̄a me lek ogoon̄ ukot ikaan̄, mè imin si igak ata inu geelek ònan̄a me lek orioon̄ ukot oka mgbọ,[93] Kè otutuuk ugbana chi ikup inyi owu, Josefu, owu ogwu òsisibi isi me etete ebi ngwan̄ kwun̄.

²⁷“Benjamin ìre ibo oron uraafiọọn̄ otetbe inin̄ lek, ìkisa ewelegwe itaka anam îchimbe ikpan̄, mè ikisa ikakwun̄ iche inu îfumbe.”

²⁸Otutuuk kè ebi ere akọp mè otoko iba kè Ijeren. Ikeya ke nte kiban̄ otumu ikọ inyi ema, mè igbana ema. Ìgbana ema me ene me ene, ubọk îgbebe ema ene ge ge.

²⁹Jekọp oneninyi ebi bọn ida ibe, “Mgbọ yi, emi mânikwu ifo igọọk ebi kiji. Ìfuun̄ emi me ere efuun̄be ebi nte n̄a me emen ǹkororok òkup me ijọn̄ kè Efurọn ogwu Et.

³⁰Ǹkororok ya ìkup me ido Kenan, me emen uko me Makipela, me agba lek ama Mamire, òrere ijọn̄ Ebereyam obọkọbe Efurọn ogwu Et ilep isa irọ ijọn̄ ifuun̄-ene.

³¹Ere ya ke efuun̄ Ebereyam mè Sera ogwu nwa, mè ifuun̄ si Ajiki mè Ribeka ogwu nwa. Ere ya si ke mfuun̄ Lia.

³²Ebereyam ìbọkọ ijọn̄ ya melek ǹkororok òkup me inyọn̄ ijọn̄ ya me ubọk ebi Et ilep.”

³³Mgbọ Jekọp onyibe bọn ebirieen̄ kan̄ nteme isan̄a, ibebene ukot kan̄ iba itoon̄ me inyọn̄ mkpilaak, mè iyaka lek imaan̄, mè itọbọ, mè ikwu ifo igọọk ebi nte kan̄.