Read obolo Ibeb 5 Bible Online

Ibeb 5 - obolo bible

Ibeb 5

¹Mfufuk owot iman kè Adam ìje ikeyi: Me mgbọ Awaji orombe ebilene, ìrom ema me mbet kan̄.

²Awaji ìrom ema enerieen̄ mè enenwaan̄. Mgbọ îrombe ema, îgbana ema, mè igwen ema ebilene.

³Mgbọ Adam osobe efit acha mè akọp ita, inenibon gwun̄ enerieen̄ ge òbet lek kan̄, mè ikup kubọk kan̄, mè inyi erieen̄ Set.

⁴Adam îluk efit acha jeeta bene me mgbọ îbonbe Set. Me etete mgbọ ya, îbon si ofifi bọn ebirieen̄ mè ebibaan̄.

⁵Otutuuk otu ifuk acha Adam olukbe ugwem ìre efit acha onaan̄ge mè akọp ita. Adam onenikwu.

⁶Mgbọ Set osobe efit acha mè go, inenibon Enọs.

⁷Set îluk efit acha jeeta mè jaaba bene me mgbọ îbonbe Enọs. Me etete mgbọ ya, îbon si ofifi bọn ebirieen̄ mè ebibaan̄.

⁸Otutuuk otu ifuk acha Set olukbe ugwem ìre efit acha onaan̄ge mè akọp mè iba. Set onenikwu.

⁹Enọs îluk akọp acha onaan̄ge sabum înibon Keyinan.

¹⁰Enọs îluk efit acha jeeta mè akọp mè go bene me mgbọ îbonbe Keyinan. Me etete mgbọ ya, îbon si ofifi bọn ebirieen̄ mè ebibaan̄.

¹¹Otutuuk otu ifuk acha Enọs olukbe ugwem ìre efit acha onaan̄ge mè go. Enọs onenikwu.

¹²Mgbọ Keyinan osobe akọp acha jaaba, inenibon Mayalalen.

¹³Keyinan îluk efit acha jeeta mè akọp ini bene me mgbọ îbonbe Mayalalen. Me etete mgbọ ya, îbon si ofifi bọn ebirieen̄ mè ebibaan̄.

¹⁴Otutuuk otu ifuk acha Keyinan olukbe ugwem ìre efit acha onaan̄ge mè akọp. Keyinan onenikwu.

¹⁵Mgbọ Mayalalen osobe akọp acha gweregwen mè go, inenibon Jaredi.

¹⁶Mayalalen îluk efit acha jeeta mè akọp ita bene me mgbọ îbonbe Jaredi. Me etete mgbọ ya, îbon si ofifi bọn ebirieen̄ mè ebibaan̄.

¹⁷Otutuuk otu ifuk acha Mayalalen olukbe ugwem ìre efit acha jeeta mè akọp onaan̄ge mè go. Mayalalen onenikwu.

¹⁸Mgbọ Jaredi osobe efit acha mè akọp gweregwen mè iba, inenibon Enọk.

¹⁹Jaredi îluk efit acha jeeta bene me mgbọ îbonbe Enọk. Me etete mgbọ ya, îbon si ofifi bọn ebirieen̄ mè ebibaan̄.

²⁰Otutuuk otu ifuk acha Jaredi olukbe ugwem ìre efit acha onaan̄ge mè akọp gweregwen mè iba. Jaredi onenikwu.

²¹Mgbọ Enọk osobe akọp acha gweregwen mè go, inenibon Metusela.

²²Enọk îluk ijaan̄ melek Awaji efit acha ita bene me mgbọ îbonbe Metusela. Me etete mgbọ ya, îbon si ofifi bọn ebirieen̄ mè ebibaan̄.

²³Otutuuk otu ifuk acha kè Enọk ìre efit acha ita mè akọp gweregwen mè go.

²⁴Enọk îluk ijaan̄ melek Awaji. Eya orọ, Awaji obeben ọmọ ifo. Ebilene kpeyaka imun̄ ọmọ.

²⁵Mgbọ Metusela osobe efit acha mè akọp jeeta mè jaaba, inenibon Lemek.

²⁶Metusela îluk efit acha jaaba mè akọp jeeta mè iba bene me mgbọ îbonbe Lemek. Me etete mgbọ ya, îbon si ofifi bọn ebirieen̄ mè ebibaan̄.

²⁷Otutuuk otu ifuk acha Metusela olukbe ugwem ìre efit acha onaan̄ge mè akọp gweregwen mè onaan̄ge. Metusela onenikwu.

²⁸Mgbọ Lemek osobe efit acha mè akọp jeeta mè iba, inenibon gwun̄ enerieen̄ ge,

²⁹mè inyi erieen̄, Nuwa,[12] mije ìbe ke ogwugwu obonikat ema ejit me lek ikwaan̄ kiban̄ mè kwulukwulu ema ekimun̄ mije Awaji ofieekbe otu inyi ijọn̄.

³⁰Lemek îluk efit acha go mè akọp onaan̄ge mè go bene me mgbọ îbonbe Nuwa. Me etete mgbọ ya, îbon si ofifi bọn ebirieen̄ mè ebibaan̄.

³¹Otutuuk otu ifuk acha Lemek olukbe ugwem ìre efit acha jaaba mè akọp jaaba mè jaaba. Lemek onenikwu.

³²Mgbọ Nuwa orakabe efit acha go, inenibon Sem, mè Am, mè Jefet.