Read obolo Ibeb 50 Bible Online

Ibeb 50 - obolo bible

Ibeb 50

¹Josefu ojijibi lek kan̄ itọbọ me inyọn̄ nkwukwu ogwu ute, mè ikana ogwu ute ikat, mè ikito ito.

²Ineninyi ebi ofia ida ibe enesi ikwaan̄ me lek nkwukwu kè nte kan̄, inyi ikafiat. Ebi ofia cha enenisi ikwaan̄ me lek kè Ijeren nte kè Josefu.

³Ikwaan̄ ya îben ema akọp usen ini, òrere otu ifuk usen ekisa isi ikwaan̄ me lek nkwukwu ene. Ebi Ijipiti etoto ito mkpa kan̄ akọp usen jaaba.

⁴Mgbọ otu ifuk usen ufieejit osobe, Josefu onenitumu inyi ebi ibot ikwaan̄ uwu ogwu Fero ibe, “Ire enyi ima emi, soso, ìsi ìlook ogwu Fero ibe,

⁵mgbọ nte n̄a omun̄be ibe ke ọmọ mônikwu, ke îrọ ibe emi ǹnyan̄a ibot ǹnyi ọmọ ibe ke mâben nkwukwu kan̄ isi ifuun̄ me udọn̄-ufuun̄ ọmọ orọkọbe inyi lek kan̄ me ido Kenan. Eya orọ, mgbọ yi, emi mâniben nte n̄a isi ifuun̄. Nsifuun̄ isan̄a, mâyaka ika inu Ijipiti.”

⁶Ogwu Fero ofọfọọk ọmọ ibe, “Si fuun̄ nte kwun̄, ubọk onyan̄abe ibot inyi.”

⁷Josefu onanan̄a isi Kenan isi ifuun̄ ogwu ute. Otutuuk ebi ibot ikwaan̄ ogwu Fero, bene me lek ebi isi ene me uwu ogwu Fero re lek ebi isi ene me otutuuk ido Ijipiti, egọgọọk Josefu isi ifuun̄ ogwu ute.

⁸Otutuuk ototun̄ ukan̄ kè Josefu, mè otutuuk ototun̄ ukan̄ ebi ngwan̄ kan̄, mè otutuuk uwu ogwu ute mîgbuku si igọọk isi. Asa nsabọn kiban̄ mè arọọn̄ kiban̄ mè eriembuuk kiban̄ gaalek esik me inyọn̄ ijọn̄ Gosen.

⁹Usini ene elibi me uji akọn̄, sà usini ene elibi me inyọn̄ inyinya. Ebi ìsisi ifuun̄ Jekọp mîwa enenen.

¹⁰Mgbọ ema erebe ere ekigen̄ akpa me ama Atadi me usaba agan̄ okwaan̄ Jodan, ema eninin̄ uwu ito, mè ikup me ere ya itaan̄ ukpo ito ito enenen. Josefu okukup me ere ya ifieek ejit usen jaaba inyi nte kan̄.

¹¹Mgbọ ebi Kenan ìluk me ere ya emun̄be ojelek uga ito mkpa ene ife chi etobe me ere igen̄ akpa me Atadi ya, ema ebebe, “Iyak! Ukot lek ito mkpa ene keyi ebi Ijipiti etobe îfieek ene ejit enenen!” Mije keya ke enyi ere ya òkup me usaba okwaan̄ Jodan erieen̄, Eben Mijirayim.[94]

¹²Sa me ikeyi, ke bọn ebirieen̄ kè Jekọp erọ otu ikọ nte kiban̄ iso.

¹³Bọn kè Jekọp ebeben nkwukwu nte kiban̄ isa isi ido Kenan isi ifuun̄ me ǹkororok òkup me ijọn̄ ama Makipela me agba lek ama Mamire, eyi Ebereyam ogbaan̄be ijọn̄ mè ọmọ ilep me ubọk kè Efurọn ogwu Et, isa irọ ijọn̄ ifuun̄-ene.

¹⁴Mgbọ Josefu ofuun̄be ogwu ute isan̄a, ọmọ melek ebi ngwan̄ mè otutuuk ebi ìgọgọọk ọmọ isi ifuun̄ ogwu ute enenigwu ikom ika inu Ijipiti.

¹⁵Mgbọ ebi ngwan̄ kè Josefu emun̄be ibe ke nte kiban̄ îkwu, ema ekekitumu ibe, “Usini mgbọ Josefu môkọt ikaan̄ ijo ejit me lek kiji, mè ikpe eji useen̄ otutuuk ijo inu eji erọbe ọmọ.”

¹⁶Eya orọ, ema eraria etip ijet Josefu ibe, “Sabum nte kwun̄ onikwu, înyi eji ida ibe,

¹⁷mè eji etumu enyi owu ibe ke ọmọ ìbe mè owu òtele otutuuk ijo inu mè inu ikpak eji ebi ngwan̄ kwun̄ erọbe owu mije ufialek eji etapbe owu me emen, ònyi eji. Eya orọ, mgbọ yi, eji bọn usun̄ Awaji kè nte kwun̄ mîriaak owu ibe, soso nye lek tele ijo kiji nyi eji.” Mgbọ ema etumube ikọ yi inyi Josefu, Josefu ototo ito.

¹⁸Ebi ngwan̄ kan̄ cha enunu me isi kan̄, mè initọbọ ibot me ijọn̄ inyi Josefu, mè itumu inyi ọmọ ibe, “Mgbọ yi, eji ìre ebi usun̄ kwun̄.”

¹⁹Josefu otutumu inyi ema ibe, “Ikatet ukpook, emi ǹkare Awaji.

²⁰Me atikọ, enyi eben me ejit irọrọ emi ijo inu. Ire, Awaji îrọ inyi ijo inu ya ikana ata inu, mè isa me ikeya inyan̄a ebek ugwem owuwa ene, kubọk îkupbe chereyi.

²¹Mgbọ yi, ikatet ukpook. Emi me lek n̄a mâkpukpo enyi melek nsabọn kinyi.” Sa me ikeyi, Josefu okakat ebi ngwan̄ ejit, mè itumu ikọ isiki ema ejit.

²²Josefu oluluk me Ijipiti, ọmọ mè otutuuk ebi uwu nte kan̄. Ọmọ îluk efit acha mè akọp sabum înikwu.

²³Josefu îkup me ugwem imun̄ bọn mè bọn bọn kè Iferem, mè imun̄ si bọn kè Makiri gwun̄ kè Manasi. Eman bọn kè Makiri chi itoon̄ Josefu me inyọn̄ ukot.

²⁴Usen ge, Josefu onenitumu inyi ebi ngwan̄ ibe, “Sọnja mgbọ, emi mâkwu. Ire, Awaji ìkpolọlọ itatap ubọk inyi enyi, mè isa enyi isibi inan̄a me ido Ijipiti yi ifo ido eyi înyan̄abe ibot ibe ke ọmọ môsa inyi Ebereyam mè Ajiki mè Jekọp.”

²⁵Josefu onenitumu inyi bọn kè Ijeren ibe, “Me atikọ, Awaji môtap ubọk inyi enyi, mè isan̄a enyi isibi me inyọn̄ ijọn̄ yi. Ìnyan̄a ibot ìnyi emi mgbọ keyi, ibe, mgbọ geelek enyi mêbefo, ke enyi mêkpulu ukwuuk n̄a isa ikaan̄ me ubọk ifo ido ya.” Ema enyanyan̄a ibot inyi ọmọ ubọk îtumube.

²⁶Josefu onenikwu mgbọ îsobe efit acha mè akọp. Esisi ikwaan̄ me lek nkwukwu kan̄, inyi ikajọ, mè iben itap me emen okop ifuun̄-ene isun̄ me Ijipiti.