Read obolo Ibeb 8 Bible Online

Ibeb 8 - obolo bible

Ibeb 8

¹Awaji ìkawuuk Nuwa mè ebi melek kan̄, mè otutuuk anam oron mè anam uwu cha ògọgọọk ọmọ ikup me emen uji ọfọ ya. Awaji onenirọ inyi efet iwut me linyọn̄. Mun̄ ile ya onenibene ikirak.

²Ikpele ogbuuruk geelek òkup me irak ijọn̄ ochichit. Otu nruruk akpa isinyọn̄ si ochichit. Ibot ofefieek.

³Mun̄ ya okekirak sọnja sọnja me linyọn̄, mè irak ifet me òso efit usen mè akọp go.

⁴Me òso akọp mè usen jaaba me emen onyan̄ jaaba, uji ọfọ ya onenirak itoon̄ me inyọn̄ ogoon̄ me Ararat.

⁵Mun̄ ya okpọkpọ ikirak mege inin̄ me emen akọp onyan̄. Me okpa usen me akọp onyan̄ ya, inyọn̄ ogoon̄ owowolo.

⁶Akọp usen ini iraraka itoon̄ me lek, Nuwa onenichili otu nruruk òkup me lek uji ọfọ ya,

⁷mè iniria amaan̄ ge isibi ibe isi ikpọ-nu ike linyọn̄ okupbe. Amaan̄ ya okpọkpọ ikiwulu ikana mege ire mgbọ mun̄ orakbe isan̄a me otutuuk lek ijọn̄. Ìkayaka ìka.

⁸Mije keya, Nuwa oneniria ekerekwukwu ge isibi ibe isi ikpọ-nu mè ìre mun̄ ya îrak isan̄a me lek ijọn̄.

⁹Ire, ubọk ekerekwukwu ya ikamun̄ge ere ìbosọọk, mije mun̄ ojotbe otutuuk ere, igwugwu ikom ika igọọk Nuwa me emen uji. Nuwa onyanyana ubọk isibi, mè itet itap me emen uji.

¹⁰Nuwa onenikup ofifi usen jaaba isọkọ me lek, mè inikpọk iria ekerekwukwu ya si isibi.

¹¹Ekerekwukwu ya ogwugwu ikom ika me otu ikakwun̄, mè isa inwan̄ uti olifu ge îgbemebe ayaya ikaan̄ me otu ika. Nuwa osasa me ikeya iriọọn̄ ibe ke mun̄ îta irak ijọn̄.

¹²Nuwa okpọkpọk ikup si ofifi usen jaaba isọkọ, mè ikpọk iria ekerekwukwu ya isibi. Ire, mgbọ keyi, ekerekwukwu ya ìkayaka ìka.

¹³Me adasi usen me adasi onyan̄, me acha Nuwa osobe efit acha gweregwen mè ge, mun̄ ile ya îta irak isan̄a kpai. Nuwa onenibene ochichit uji ọfọ ya isan̄a, mè ikpọ, mè imun̄ ibe ke mun̄ ya îta irak isan̄a me inyọn̄ ijọn̄.

¹⁴Me òso akọp usen iba mè jaaba, me òso onyan̄ iba me emen acha yaage ijọn̄ îchat isan̄a.

¹⁵Awaji onenitumu inyi Nuwa ibe,

¹⁶“Nan̄a me emen uji ọfọ ya sibi ijọn̄, owu mè nwa kwun̄, mè bọn ebirieen̄ kwun̄ mè ebi nwa kiban̄.

¹⁷San̄a otutuuk inu geelek òkifuuk efuuk, ògọgọọk owu ikup me uji ya, sibi. San̄a chieen̄ unọn geelek, mè anam, mè otutuuk inu geelek òkinyinyọnọ me ijọn̄, sibi, inyi ema ebene ekemumana, mè ejot otutuuk linyọn̄.”

¹⁸Nuwa onanan̄a me uji ya isibi, ọmọ melek ogwu nwa, mè bọn ebirieen̄ kan̄, mè ebi nwa kiban̄.

¹⁹Otutuuk chieen̄ anam geelek, mè otutuuk chieen̄ inu geelek òkinyinyọnọ me ijọn̄, mè chieen̄ unọn geelek, mè otutuuk inu geelek òkifuuk efuuk me linyọn̄, onanan̄a me emen uji ọfọ ya isibi. Chieen̄ geelek ìje me urum eyi kiban̄.

²⁰Nuwa oneninama ntook ngwugwa inyi Okumugwem, mè inititen̄e usini me etete chieen̄ anam geelek òtatana me isi Awaji, mè ititen̄e si usini me etete chieen̄ unọn geelek òtatana me isi Awaji, mè inisa ema igwa ngwugwa ewọwọp iriọk me inyọn̄ ntook ya inyi Okumugwem.

²¹Okumugwem onọnọ utop olu ngwugwa ya, mè itumu ifieek me ejit kan̄ ibe, “Emi m̀kpabayaka ifieek otu inyi ijọn̄ ofifi mije ebilene, bak me lek ekiket ejit ebilene ìkire gaalek ijo ijo bene me ijija kiban̄. M̀kpayaka ikpọk isan̄a ugwem otutuuk inu geelek òkifuuk efuuk me linyọn̄ isan̄a ubọk nrọbe mgbọ keyi.

²²“Mege isi ire mgbọ linyọn̄ môtabe, mgbọ iwowop mè mgbọ irọrọkọ môkikup; mgbọ utọọk mè mgbọ uyok môkikup; mgbọ ura mè mgbọ ibot, mè eririeen̄ mè ikarek, môkikup. Ema kpekaan̄ itata.”