Read obolo Ibeb 9 Bible Online

Ibeb 9 - obolo bible

Ibeb 9

¹Awaji onenigbana Nuwa mè ebi bọn mè itumu inyi ema ibe, “Ìmumana mè ìwa me otu ifuk, mè ìjot linyọn̄.

²Ukpook kinyi mè urimi ònan̄a me lek kinyi môkigwook me lek otutuuk anam geelek òkup me linyọn̄, mè otutuuk unọn òwulu me inyọn̄ geelek, mè otutuuk inu geelek òkinyinyọnọ me ijọn̄, mè otutuuk irin̄ geelek òkup me okwaan̄. Ubọk kinyi ke nkana ema otutuuk itap, ibe enyi ekekpulu.

³Ike mwuukbe lek isa uti geelek òkititibi inyi enyi ibe enyi ekerie, ikeya si ke nsa otutuuk inu geelek òkifuuk efuuk mè ikije ikana me ijọn̄ inyi enyi, ibe enyi eketaka.

⁴“Ire, ikataka anam geege mè eje kan̄, òrere ugwem kan̄, me emen.

⁵Me atikọ, m̀badodo eje kinyi, òrere ugwem kinyi, me ubọk inu geelek môkpan̄be enyi. Mâdo eje kinyi me ubọk otutuuk anam, mè ido si me ubọk ebilene. Me ubọk ene geelek òkpan̄ ene ke mbado eje ogwu ebilene ogbo kan̄. M̀kpalọlọ idodo eje ene.

⁶“Ikaan̄ ogwu ikpan̄ ene ogbo kan̄, ene si obokpan̄ ọmọ, mije, emi Awaji ǹrom ene me mbet n̄a.

⁷Ire enyi, m̀be enyi, ìmumana mè ìwa me otu ifuk, mè ìjot otutuuk linyọn̄.”

⁸Awaji onenitumu si inyi Nuwa mè ebi bọn ibe,

⁹“Mgbọ keyi, emi nnyan̄a ibot melek kinyi mè bọn owot iman kinyi geelek,

¹⁰melek otutuuk inu geelek òkifuuk efuuk echi òkup melek kinyi, òrere ebi kè unọn geelek, mè anam uwu geelek, mè otutuuk anam oron geelek, mè otutuuk inu geelek ògọgọọk enyi inan̄a me uji ọfọ ya isibi ijọn̄.

¹¹Nnyan̄a ibot melek kinyi ibe ke emi m̀kpayaka isa mun̄ ile ifiat ugwem inu geelek òkifuuk efuuk ugwem. Kpunu mgbọ geege mun̄ ile oboyaka ikpọk ichep linyọn̄ ofifi.”

¹²Awaji onenitumu inyi ema ibe, “Inyan̄a-ibot, eyi òkup inyi emi melek kinyi, melek inu chi geelek òkifuuk efuuk echi òkup melek kinyi, môkup ire mgbọ geelek. Inu ijejeen̄ eyi mbasa irọ inyan̄a-ibot yi inye ìre ikeyi:

¹³Nra isun̄ egop ubọọn̄ n̄a me emen oduku inyọn̄. Eyi òbokup kubọk iman̄ òriọọn̄ eyi inyan̄a-ibot yi òkup inyi emi melek linyọn̄.

¹⁴Mgbọ geelek nsititiin̄ oduku inyọn̄ me akpa isinyọn̄, mè egop ubọọn̄ yi isisibi ikeke me emen oduku inyọn̄ ya,

¹⁵emi mâkikeek inyan̄a-ibot yi eyi òkup inyi emi melek kinyi mè otutuuk inu geelek òkifuuk efuuk ugwem. Kpunu mgbọ geege mun̄ oboyaka ikpọk ibaak ikana mun̄ ile inifiat ugwem inu geelek òkifuuk efuuk.

¹⁶Mgbọ geelek egop ubọọn̄ ya osibibe me emen oduku inyọn̄, emi mâmun̄, mè ikeek inyan̄a-ibot yi òbokup ire mgbọ geelek, eyi emi Awaji nnyan̄abe melek ebilene mè inu geelek òkifuuk efuuk me linyọn̄.

¹⁷“Egop ubọọn̄ yi ore iman̄ òriọọn̄ eyi inyan̄a-ibot eyi nnyan̄abe melek kinyi mè otutuuk inu geelek òkifuuk efuuk me linyọn̄.”

¹⁸Bọn kè Nuwa ebi ìgọgọọk inan̄a me uji ọfọ ya isibi ìre Sem, mè Am, mè Jefet. Am ore nte kè Kenan.

¹⁹Ema ene ita chi ere bọn ebirieen̄ kè Nuwa. Îre nan̄a me owot kiban̄ ke otutuuk ebilene emumana ijot otutuuk linyọn̄.

²⁰Nuwa ìre ogwu òkiwop uko. Inenibene ikiwop uko gerep.

²¹Usen ge, Nuwa onwọnwọ miin̄ îsabe gerep irọ. Miin̄ ya osasa ọmọ. Ilalaak njak me emen uwu ọfọ kan̄.

²²Am, nte kè Kenan, oninin̄ uwu ya, mè inimun̄ nte kan̄ njak, mè igwu ikom isibi isi ikpa inyi ebi ngwan̄ kan̄ iba kechilọ me oyet.

²³Ebi ngwan̄ iba cha, Sem mè Jefet, emọmọnọ ekwut ge iwele itoon̄ isaba oguga kiban̄, mè isa ije udun̄ udun̄ inin̄ emen uwu ya, mè isa isi iwele ichit njak nte kiban̄. Ema kpemun̄ nte kiban̄ njak.

²⁴Mgbọ Nuwa obolobe chieen̄ me ilaak miin̄ ya, mè ininọ inu Am, gwun̄ kan̄ ogwu ijija, orọbe ọmọ,

²⁵itutumu ibe, “Môfieek inyi Kenan! Usun̄ ògak usun̄ ke ọmọ obore inyi ebi ngwan̄ kan̄.”

²⁶Nuwa îtumu si ibe, “Itọn̄ ikup inyi Okumugwem, Awaji kè Sem! Kè Kenan ikana usun̄ inyi Sem.

²⁷Kè Awaji irọ inyi Jefet imumana iwa, mè iluk me uwu ọfọ echi kè Sem, mè Kenan ikana usun̄ inyi ọmọ.”

²⁸Bene me mgbọ mun̄ ile ya orakabe, Nuwa îluk ofifi efit acha ita mè akọp go.

²⁹Otutuuk otu ifuk acha ugwem kè Nuwa onenire efit acha onaan̄ge mè akọp go. Nuwa onenikwu.