Read obolo II Sam 12 Bible Online

II Sam 12 - obolo bible

II Sam 12

¹Okumugwem oneniria Netan isi lek kè Debit. Netan onunu, mè inito urọk ge inyi Debit ibe, “Îkaan̄ ebirieen̄ iba ìluk me ama ge, ene ge îbọọn̄ ubọọn̄, sà ogwulọ ore ugbọọn̄.

²Ogwu òbọbọọn̄ ubọọn̄ ya îkaan̄ owuwa arọọn̄, mè ikaan̄ si eriembuuk iwa enenen,

³sà ogwu ugbọọn̄ ya okaan̄ gwun̄ arọọn̄ ge gaalek eyi îlepbe, mè ikikpukpo. Arọọn̄ ya okukup melek kan̄ melek bọn kan̄, mè ikimin. Arọọn̄ ya ìkirie inorie me ubọk ogwu enerieen̄ ya, mè ikinwọ mudim me ekpen̄ ogwu enerieen̄ ya. Ìkibeben arọọn̄ ya me ubọk ilaak. Arọọn̄ ya onenikup kubọk gwun̄ enenwaan̄ inyi ọmọ.

⁴“Ogwu ichen ge oneninu me lek ogwu òbọbọọn̄ ubọọn̄ ya, ire, ogwu òbọbọọn̄ ubọọn̄ ya otetele imọmọnọ arọọn̄ ge mè ìre eriembuuk ge me lek echi kan̄ ikpan̄ isa itet ichen kan̄. Kpan̄asi ikeya, isisi itet gwun̄ arọọn̄ ogwu ugbọọn̄ ya ikpan̄ isa itet ichen ya ònunu me lek kan̄.”

⁵Debit onanaan̄ ejit enenen me lek ogwu òbọbọọn̄ ubọọn̄ ya, mè itumu inyi Netan ibe, “Kè lek ugwem Okumugwem, ogwu òrọrọ ojelek inu òkup ikeyi, mkpa okup inyi!

⁶Ene ya ìbokpe useen̄ gwun̄ arọọn̄ ya mgbọ ini, mije îrọbe inu òkup ikeyi, ìkakaan̄ ejit nsan.”

⁷Netan onenitumu inyi Debit ibe, “Owu ore ene ya! Okumugwem, Awaji ebi Ijeren ìtumu ibe ikeyi: ‘Îre emi ntọkọ owu aran̄ me ibot irọ owu ogwu ubọọn̄ me Ijeren. Emi si nnyan̄a owu isibi me ubọk kè Sọọlu.

⁸Ǹkakana uwu kè Sọọlu nte uwu kwun̄ inyi owu, mè ikana ebi nwa nte uwu kwun̄ igbaalek inyi owu, mè iyaka otutuuk Ijeren mè Juda si itap owu me ubọk. Ire inu chi ìkaso owu, kè emi nnyi owu ofifi inu nsọkọ me lek.

⁹Keke orọ okpọbe ikọ Okumugwem isiki chieen̄, mè irọ ojelek nlilọ inu òkup ikeyi me chieen̄ kan̄? Owu okpan̄ Uraya ogwu Et, mè imọnọ ogwu nwa isa irọ eyi kwun̄. Îre owu okpan̄ Uraya me otu oge akọn̄ ebi Amọn.

¹⁰Eya orọ, mgbọ yi, mije owu okpọbe emi chieen̄ isiki, mè imọnọ nwa kè Uraya ogwu Et isa irọ nwa kwun̄, oge akọn̄ ìkposibi me uwu kwun̄.’

¹¹“Okumugwem ìtumu ibe ikeyi: ‘Emi m̀basa ene ge me ototun̄ ukan̄ kwun̄ itap owu ijo ufialek me lek. Me chieen̄ kwun̄ gaalek, mâkpulu ebi nwa kwun̄ isa inyi gwun̄ ulọk òrariaak owu me lek, inyi igọọk ema ilaak me ejit ikarek.

¹²Owu òrọ eyi kwun̄ me nlelet. Ire, emi m̀barọ inu yi me ejit ikarek, me chieen̄ otutuuk ebi Ijeren.’ ”

¹³Debit otutumu inyi Netan ibe, “Me atikọ, nrọ Okumugwem ilọ.” Netan otutumu inyi Debit ibe, “Okumugwem îben ijo kwun̄ isan̄a. Owu òkabokwu.

¹⁴Ire, mije ijo inu keyi owu orọbe, owu orọ ibe ebi ochicha Okumugwem ekpọ Okumugwem chieen̄ esiki enenen. Eya orọ, gwun̄ enerieen̄ ya ogwu enenwaan̄ ya omanbe inyi owu ìkpoluk ugwem, ìbokwukwu.”

¹⁵Netan oneninan̄a ifo uwu kan̄. Okumugwem ototo orukan̄ me lek gwun̄ ya nwa kè Uraya omanbe inyi Debit, gwun̄ ya ofafiak orukan̄ igbet mkpa.

¹⁶Debit okekibeek Awaji mbeek me ibot gwun̄ ya, mè inin̄ ijin-otu, mè ikisiki ilaak me ijọn̄ me emen agwut kan̄ owuwa eririeen̄.

¹⁷Ebi ugane uwu kan̄ eninin̄ igọọk ibesi ijibi ọmọ ibene isan̄a me ijọn̄, ire Debit ojijit. Ìkachieek si igọgọọk ema irie inorie.

¹⁸Me òso usen jeeta kan̄, gwun̄ ya okwukwu. Ire, ukpook otetet ebi ikwaan̄ kè Debit isisi itumu inyi Debit ibe ke gwun̄ ya îkwu. Ema ekekitumu ibe, “Mgbọ gwun̄ ya okupbe me ògat ugwem, eji mîtumu ikọ inyi igak, ìkachieek igbagban̄. Mgbọ keyi, ìre kpasi otu ke eji ebesa itumu inyi ibe ke gwun̄ ya îkwu? Môkọt itap unan me lek kan̄.”

¹⁹Debit onenimun̄ ebi ikwaan̄ kan̄ ekinunuun̄ ikọ me etete kiban̄, mè initet ibot iriọọn̄ ibe ke gwun̄ ya îra ikwu. Inenido ema ibe, “Ìre gwun̄ ya îkwu?” Ema efọfọọk ọmọ ibe, iin̄, ke îkwu.

²⁰Debit onanan̄a ikeke me ijọn̄ ere îlaakbe, mè isi iken mun̄, mè ichiọọk aran̄ me isi, mè inwene ofọnti me lek, mè inan̄a ije isi Uwu Mbuban Okumugwem isi itọbọ ebum. Mgbọ îtọbọbe ebum isan̄a, igwugwu ikom ika inu uwu kan̄, mè inido ibe enyi ọmọ inorie. Eyiyik inorie inyi, irerie.

²¹Ebi ikwaan̄ kan̄ enenibe ọmọ, “Ìre kpasi inu ke owu okirọ ikeyi? Mgbọ gwun̄ ya okupbe me ògat ugwem, owu ojin otu, mè ikito ito. Ire, gwun̄ ya ikwukwu, owu onanan̄a ikeke, mè ibọkọ inorie irie!”

²²Debit ofọfọọk ema ibe, “Mgbọ gwun̄ ya okupbe me ògat ugwem, njin otu, mè ito ito. Mije, ǹkikeek ibe, usini mgbọ ke Okumugwem môto emi nsan, mè irọ inyi igat ugwem.

²³Ire, mgbọ keyi, gwun̄ ya îkwu. M̀bajeje iyaka ijin otu? Ìre mâkọt irọ inyi iyaka igwu ikom inigat ugwem ni? Îre emi mbafo igọọk ọmọ, ọmọ ìkpogwu ikom ika igọọk emi.”

²⁴Debit onenikat Batiseba nwa kan̄ ejit, mè inigọọk ilaak, ininin̄ owot, mè iman gwun̄ enerieen̄. Debit onyinyi gwun̄ ya erieen̄ Solomọn. Okumugwem omama gwun̄ ya,

²⁵mè iniria Netan ogwu nriran ibe isi inyi gwun̄ ya erieen̄, Jedidiya.[13]

²⁶Jowabu onenisi itim akọn̄ me Raba, ama ibot ebi Amọn, mè ibọkọ ama ya,

²⁷mè iniria ene ibe esi elook Debit ibe, “Nra itim akọn̄ me Raba, mè ibọkọ ibot mun̄ ama ya.

²⁸Mgbọ keyi, titiin̄ ebi akọn̄ ìsisik, mè sa si kpa mbin kana ama ya, mè bọkọ, inyi emi nkasi ìbọkọ ama ya, mè ìsa erieen̄ n̄a ìgwen ama ya.”

²⁹Debit otititiin̄ otutuuk ebi akọn̄, mè isa isibi isi itim akọn̄ me Raba, mè ibọkọ ama ya.

³⁰Debit osasan̄a okpibot ubọọn̄ me ibot ogwu ubọọn̄ kiban̄.[14] Esa akọp kilo alata araran̄ ita mè go irom okpibot ubọọn̄ ya, mè isa owuwa ewuuk unye otu ewe inwunwan̄ me lek. Eneniben okpibot ya ikwuun̄ Debit me ibot. Debit îkpulu si owuwa inu efumbe me akọn̄ me ama ya isa igbaalek ika.

³¹Inenitap ebi ama ya me usun̄, mè idọmọ usini kiban̄ ibe ekesa ojijọọk okwukwut mè otuban okwukwut mè orọk okwukwut ekerọ unye ikwaan̄. Sà usini kiban̄ ke îbe ekebot okpungwu inama uwu. Ikeyi ke Debit otap ebi îkpulube me akọn̄ me otutuuk ama ile ebi Amọn cha me unye ikwaan̄. Debit mè otutuuk ebi kan̄ enenigwu ikom ika inu Jeruselem.