Read obolo II Sam 13 Bible Online

II Sam 13 - obolo bible

II Sam 13

¹Abusolọm gwun̄ kè Debit îkaan̄ ujuja ngwan̄ enenwaan̄ ge ekigwen Tema. Ike mgbọ okije, Aminọn gwun̄ kè Debit onenima Tema ngwan̄ kè Abusolọm, mè ikaan̄ ulọk me lek.

²Ulọk Aminọn okaan̄be me lek kè Tema, gwun̄ nte kan̄ enenwaan̄, înye enenen ire lek îbotap ọmọ orukan̄ me lek. Mije, bak me lek Tema orebe obaak enenwaan̄ ikariọọn̄ge enerieen̄, ìkafet Aminọn ikọkọt irọ ọmọ inu geege me lek.

³Aminọn îkaan̄ unene ge ekigwen Jonadabu, gwun̄ kè Simeya, ngwan̄ kè Debit. Jonadabu ìre ene òriọọn̄ inu, mè ikaan̄ si ifiọk enenen.

⁴Jonadabu onenido Aminọn ibe, “Owu, gwun̄ ogwu ubọọn̄, ìre keke ore ufialek kwun̄, eyi isi kwun̄ ìkakitọtọn̄ọ ewelegwe geelek? Ìre owu òkpotumu inyi emi ni?” Aminọn onenitumu inyi ibe, “Nkaan̄ ulọk me lek kè Tema ngwan̄ kè Abusolọm gwun̄ nte n̄a.”

⁵Jonadabu oneniteme ọmọ ibe, “Kpọkpọ si siki laak me inyọn̄ mkpilaak kwun̄, mè rọ kubọk lek kwun̄ ìkanye. Mgbọ nte kwun̄ isinu ibonikpọ owu, tumu nyi ibe, ‘Soso, ria Tema ngwan̄ n̄a enenwaan̄ ibe inu inirọ inorie inyi emi ǹrie. Tumu nyi ibe inikup me isi n̄a irọ inorie ya, inyi ǹsa chieen̄ m̀mun̄, mè m̀bọkọ inorie ya me ubọk kan̄ ǹrie.’ ”

⁶Aminọn onenisi isiki ilaak me inyọn̄ mkpilaak, mè ikirọ kubọk lek kan̄ ìkanye. Ogwu ubọọn̄ onunu inikpọ ọmọ. Aminọn onenitumu inyi ibe, “Soso ria ngwan̄ n̄a enenwaan̄ Tema, inyi inikup me isi n̄a irọ nchicha inen mè inen inyi emi m̀bọkọ me ubọk kan̄ ǹrie.”

⁷Debit oraria etip ijet Tema ibe, “Si uwu kè Aminọn ngwan̄ kwun̄ enerieen̄ si rọ inorie nyi irie.”

⁸Tema oneninan̄a isi uwu ngwan̄ kan̄ Aminọn. Mgbọ ya Aminọn ìsisiki ilaak. Tema onenitọ akpa ekọkọk, mè inifuku isa irọ nchicha me isi kè Aminọn.

⁹Mgbọ Tema otembe inorie ya isan̄a, inenitap me emen alala, mè iben isi iyik inyi Aminọn, ìkachieek irerie. Ire, ibebe otutuuk ene esibi. Otutuuk ene esisibi.

¹⁰Aminọn onenibe Tema, “Sa inorie ya na me emen agwut, inyi ǹrie me ubọk kwun̄.” Tema obeben nchicha ya îtembe isa inin̄ emen agwut isi lek kè Aminọn ngwan̄ kan̄.

¹¹Mgbọ Tema osabe ijet ibe irie, ikakana Tema itet, mè itumu inyi ibe, “Ngwan̄ n̄a enenwaan̄, na mè ǹgọọk owu ǹlaak.”

¹²Tema otutumu inyi ibe, “In̄-in̄, ngwan̄ n̄a, katet emi me ubọk unye. Kpekirọ ojelek inu òkup ikeyi me Ijeren. Karọ burubut inu òkup ikeyi.

¹³Sà emi, ere owa ke mbalet isi me lek inu esip keyi? Owu si, òboyaka inikup kubọk ene ge me lek ebi burubut me Ijeren. Kpan̄asi ikeyi, si tumu nyi ogwu ubọọn̄, ke ìkpojit isasa emi inyi owu me lek nwa.”

¹⁴Ire, Aminọn ìkachieek igbagban̄ inu Tema okitumu. Mije ubọk kan̄ onyebe igak eyi kè Tema, itetet me ubọk unye igọọk ilaak.

¹⁵Aminọn onenicha Tema enenen. Ichacha îchabe Tema mgbọ keyi îgak imama îmabe Tema me adasi mgbọ. Aminọn onenitumu inyi Tema ibe, “Nan̄a keke, je sibi me ere yi!”

¹⁶Tema obebe ọmọ, “In̄-in̄! Irerieen̄ emi isibi ikeyi îfieek igak nlilọ inu ya orọbe emi.” Ire, Aminọn ìkaweek igbagban̄ ikọ kan̄.

¹⁷Igwegwen ogwu ikwaan̄ kan̄ itumu inyi ibe, “San̄a ogwu enenwaan̄ yi sibi to me oyet, mè gon afọn̄ kwek.”

¹⁸Ogwu ikwaan̄ kè Aminọn osasan̄a Tema isibi, mè igon afọn̄ ikwek. Tema ìtap ujuja ofọnti esabe esese inu unye otu ewe ibala, mije, ikeyi ke bọn ogwu ubọọn̄, ebi kperiọọn̄ ebirieen̄, ekibala lek.

¹⁹Tema otataba ofọnti ya òkup ọmọ me lek igwak, mè ikpulu ntọn̄ igwook me ibot, mè ibene ubọk iba itoon̄ me ibot, mè ikitaan̄ ukpo ito ito ije ifo.

²⁰Abusolọm ogwu ngwan̄ onenido ọmọ ibe, “Ìre ngwan̄ kwun̄ Aminọn îtet owu igọọk ilaak? Ire ikeya, ngwan̄ n̄a enenwaan̄, riaan̄ ere, ke ngwan̄ kwun̄ ke îre. Katatap si inu yi me ejit.” Tema onenigọọk ogwu ngwan̄ Abusolọm isi iluk me uwu kan̄, mè ikifieek ejit kubọk ogwu inyọn̄ otutbe.

²¹Mgbọ Debit ogwu ubọọn̄ onọbe otutuuk inu yi òrọrọ, inanaan̄ ejit enenen.

²²Ire, Abusolọm okpọkpọ iriaan̄ otu, ìkasan̄a amọn ìnyi Aminọn, mè ìre ata mè ìre ijo. Ire, ichacha Aminọn mije Aminọn orọbe Tema ogwu ngwan̄ inu esip.

²³Mgbọ acha iba orakabe, mgbọ ebi ikwaan̄ kè Abusolọm ekisọp inwọọn̄ me lek arọọn̄ kan̄ me Baali-Asọru, me agba lek okike ijọn̄ ebi otoko kè Iferem, Abusolọm onenigween̄ bọn ebirieen̄ ogwu ubọọn̄ ibe enu me ere ya.

²⁴Abusolọm osisi itumu inyi ogwu ubọọn̄ ibe, “Emi ogwu usun̄ kwun̄ mânisi isọp inwọọn̄ me lek arọọn̄ n̄a. Ìre môneme ogwu ubọọn̄ mè ebi ikwaan̄ kan̄, inenigọọk ikup me orirọ ya?”

²⁵Ogwu ubọọn̄ ofọfọọk Abusolọm ibe, “In̄-in̄, gwun̄ n̄a, otutuuk kiji ekagbaan̄ ìnan̄a ìsi, inyi ulobo ichen ikakeme owu enenen.” Ikpọkpọ ikibeek si ogwu ubọọn̄, ire, ogwu ubọọn̄ ìkaweek isisi. Kpan̄asi keya, ogwu ubọọn̄ ogbagbana ọmọ.

²⁶Abusolọm oyayaka inibeek ogwu ubọọn̄ ibe, “Ire owu òkposi, soso tele ibe ngwan̄ n̄a Aminọn igọọk eji isi irọ orirọ yi ma.” Ogwu ubọọn̄ onenido Abusolọm ibe, “Keke orọ obe Aminọn igọọk owu isi orirọ ya?”

²⁷Mije Abusolọm okpọkpọ itet lek inye ikibeek, ogwu ubọọn̄ onenichieek ibe Aminọn igọọk ema isi, ọmọ melek otutuuk bọn ebirieen̄ ogwu ubọọn̄.

²⁸Abusolọm oneninyi ebi ikwaan̄ kan̄ ida ibe, “Ìgban̄! Aminọn isinwọ miin̄ isa, mè ikibele ejit, mè emi nsibe enyi esulu ọmọ eto me ijọn̄, ìkpọkpọ ìsulu ọmọ ìkpan̄. Ikafieek owot, îre emi ntọ inyi enyi. Ìnye lek! Ikafieek owot!”

²⁹Ebi ikwaan̄ kè Abusolọm erọrọ Aminọn inu nte uwu kiban̄ onyibe ema ida ibe erọ. Otutuuk bọn ogwu ubọọn̄ enanan̄a ikeke, mè inene inyọn̄ bọn inyinya mgbidim ukot kiban̄, mè ililiin̄ ifon.

³⁰Ema me oniin̄ mgbọ Debit obọkọbe etip ibe, “Abusolọm îkpan̄ otutuuk bọn ebirieen̄ ogwu ubọọn̄ isan̄a kpai. Ene geege ìkasik.”

³¹Ogwu ubọọn̄ onanan̄a ikeke, mè igwak ofọnti me lek, mè isiki ilaak me ijọn̄ ikifieek ejit. Otutuuk ebi ikwaan̄ kan̄ etataba ofọnti òkup ema me lek igwak si, mè inikeke igba nte uwu kiban̄.

³²Jonadabu gwun̄ kè Simeya ngwan̄ kè Debit onenitumu inyi Debit ibe, “Ogwu nte, kagban̄ eyi ebe ke mîkpan̄ otutuuk bọn ebirieen̄ ogwu ubọọn̄ isan̄a. Îre Aminọn gaalek okwu. Karake usen Aminọn orọbe Tema ngwan̄ kè Abusolọm inu esip, Abusolọm îwuuk lek iben inu yi me ejit ikeme Aminọn.

³³Eya orọ, ogwukaan̄ n̄a, ogwu ubọọn̄, kagban̄ eyi ekibe ke mîkpan̄ otutuuk bọn ebirieen̄ ogwu ubọọn̄ isan̄a. Îre Aminọn gaalek okwu.”

³⁴Abusolọm olilibi ichep. Ogwu akọn̄ òkibem ere onenibene chieen̄ ikpọ agan̄ ichep-ura, mè imun̄ owuwa ene ekikwala isibi me agba lek ogoon̄ ikinu. Inenisi itumu inyi ogwu ubọọn̄ ibe, “Mmun̄ owuwa ebirieen̄ ekigbọọk me oniin̄ agba lek ogoon̄ òkifo Oronayim ikinu.”[15]

³⁵Jonadabu otutumu inyi ogwu ubọọn̄ ibe, “Kpọ, bọn ebirieen̄ ogwu ubọọn̄ mîka. Ike emi ogwu usun̄ kwun̄ ntumube inyi owu, ikeya si ke îrọ iso.”

³⁶Ikọ ya ìkatata me otu kè Jonadabu, bọn ebirieen̄ ogwu ubọọn̄ ekakana inin̄ uwu, mè ikitaan̄ ukpo ito ito. Ogwu ubọọn̄ mè otutuuk ebi ikwaan̄ kan̄ si egọgọọk ito ito enenen.

³⁷Eyi Abusolọm olibibe ya, ìlibi isi lek kè Talimayi gwun̄ kè Amiyudu, ogwu ubọọn̄ ido Gesuru,[16] isi ikup. Ire, Debit ogwu ubọọn̄ okekifieek ejit inyi ogwu gwun̄ Aminọn usen geelek.

³⁸Abusolọm olilibi ifo Gesuru, mè iluk me ere ya acha ita.

³⁹Mgbọ ogwu ubọọn̄ Debit ofieekbe ejit inyi ogwu gwun̄ Aminọn isan̄a, ejit kan̄ oyayaka ibene ikiweek imumun̄ Abusolọm.