Read obolo II Sam 14 Bible Online

II Sam 14 - obolo bible

II Sam 14

¹Jowabu, ogwu ogwu uga orebe Seruya, oneniriọọn̄ ibe ke òkilọk ogwu ubọọn̄ imumun̄ Abusolọm.

²Ineniria ene isi Tekowa isi igwen enenwaan̄ ge òriọọn̄ inu, mè initeme ogwu enenwaan̄ ya ibe, “Fiaan̄ rọ kubọk òkifieek ejit, mè tap ofọnti ufieejit me lek, kaken aran̄ utop olu, mè rọ kubọk enenwaan̄ òkup me ufieejit ijọn̄ọ mgbọ mije ogwu kan̄ òkwukwu,

³mè je si lek ogwu ubọọn̄, mè tumu ikọ mbatumu inyi owu nyi ogwu ubọọn̄.” Jowabu oneniteme ogwu enenwaan̄ Tekowa ya otutuuk inu îweekbe ibe itumu inyi ogwu ubọọn̄.

⁴Mgbọ ogwu enenwaan̄ Tekowa ya orebe isi ogwu ubọọn̄, igegele igwook me ijọn̄, mè inikana isi ikwuun̄ isasa imin ọmọ, mè inibe ọmọ, “Ogwu ubọọn̄, soso tap ubọk nyi emi!”

⁵Ogwu ubọọn̄ onenido ọmọ ibe, “Ìre keke ore ufialek kwun̄?” Ogwu enenwaan̄ ya onenifọọk ibe, “Me atikọ, emi ìre nwakpa. Nlom n̄a îkwu.

⁶Emi ogwu usun̄ kwun̄ enenwaan̄ ǹkaan̄ bọn ebirieen̄ iba. Usen ge, ema ene iba enenikiwut ifan̄a me oron uko, mè itim etim. Kpunu ogwu òteteek ema. Ge osusulu ge ikpan̄.

⁷Mgbọ keyi, otutuuk ebi uwu enenitet emi ibe emi ǹsan̄a ogwu òsusulu ogwu ngwan̄ ikpan̄ ǹsibi ǹnyi ema, mè ekpan̄ me useen̄ ogwu ngwan̄ îkpan̄be, mè esa me ikeya esan̄a ogwu òrie akpa egbaalek. Sa me ikeya, kpunu ogwu òboyaka isik. Erieen̄ nlom n̄a mè owot iman kan̄ mônenichep isan̄a dìp dìp me linyọn̄.”

⁸Ogwu ubọọn̄ onenikat ogwu enenwaan̄ ya ejit ibe, “Je fo, ke mâkpọ chieen̄ me lek ikọ yi inyi owu.”

⁹Ogwu enenwaan̄ Tekowa ya onenitumu inyi ogwu ubọọn̄ ibe, “Ogwukaan̄ n̄a, ogwu ubọọn̄, inu geelek oborọ mije ikọ yi ìbotoon̄ emi me ibot, mè itoon̄ si me ibot ebi uwu nte n̄a. Ìkpotoon̄ me ibot ogwu ubọọn̄ mè irek mkpulu kan̄.”

¹⁰Ogwu ubọọn̄ onenifọọk ọmọ ibe, “Ikaan̄ ogwu isan̄a amọn itumu ikọ ge inyi owu mije ikọ yi, sa ene ya na me isi n̄a, ke ìkpoyaka isisaak owu ofifi.”

¹¹Ogwu enenwaan̄ ya onenitumu inyi ogwu ubọọn̄ ibe, “Ire ikeya, ogwu ubọọn̄, soso, gwen Okumugwem Awaji kwun̄, inyi ogwu uwu ogwu ògbegbe isasan̄a useen̄ eje ene ikayaka ìkpan̄ ene ìfo isi, inyi ekakpan̄ gwun̄ n̄a enerieen̄.” Ogwu ubọọn̄ onenifọọk ọmọ ibe, “Kè lek ugwem Okumugwem, ukut ijeek ge ikeyi ìkponan̄a me ibot gwun̄ kwun̄ irọn̄ me ijọn̄.”

¹²Ogwu enenwaan̄ ya onenibe, “Ogwukaan̄ n̄a, ogwu ubọọn̄, soso tele mè emi ogwu usun̄ kwun̄ enenwaan̄ ǹtumu ikọ ge ǹnyi owu.” Ogwu ubọọn̄ ofọfọọk ibe, “Tumu ma.”

¹³Ogwu enenwaan̄ ya onenitumu ibe, “Ìre keke orọ owu orọbe ojelek inu òkup ikeyi ikeme ebi eyi Awaji? Ikọ yi owu ogwu ubọọn̄ otumube, îtip owu oyerebet. Mije, owu ogwu ubọọn̄ òkatele ibe gwun̄ kwun̄ enerieen̄ òlilibi ekot ebek ugwem kan̄ iyaka igwu ikom ika.

¹⁴Mun̄ isigak ene igbuku igwook me ijọn̄, kpekikọt iyaka ikwọọk. Ikeya si, eji otutuuk ene ebekwakwaan̄ ita. Awaji ìkakisan̄a ugwem ene ikeya. Kpan̄asi ikeya, ìkisasan̄a oniin̄ isibi, inyi ogwu erieen̄be isan̄a ikakup ìjọn̄ọ ere me lek kan̄.

¹⁵“Mgbọ yi, ebi kiji mîtap emi ukpook me emen. Îre mije keya ke nnu ibanitumu ikọ melek ogwukaan̄ n̄a, ogwu ubọọn̄. Emi ogwu usun̄ kwun̄ nnenikeek ibe ke mânu initumu ikọ melek ogwu ubọọn̄. Usini mgbọ, ke ogwu ubọọn̄ môrọ inu ogwu usun̄ kan̄ môtumube.

¹⁶Usini mgbọ si, ke ogwu ubọọn̄ mônyan̄a ogwu ikwaan̄ kan̄ isibi me ubọk ogwu òkiweek ibe emi mè gwun̄ n̄a enerieen̄ ekayaka ìkaan̄ uche me lek ìrot Awaji onyibe eji.

¹⁷“Mgbọ keyi, emi ogwu usun̄ kwun̄ ǹkibeek ibe kè ikọ otu kwun̄, ogwukaan̄ n̄a, ogwu ubọọn̄, irọ, inyi emi ogwu usun̄ kwun̄ ǹkaan̄ esuuk. Mije, owu ogwukaan̄ n̄a, ogwu ubọọn̄, òkup kubọk ogwu osat Awaji me irọriọọn̄ ata inu mè ijo inu. Kè Okumugwem Awaji kwun̄ ikup melek kwun̄.”

¹⁸Ogwu ubọọn̄ oneniyaka ibe ogwu enenwaan̄ ya, “Mâdo owu idodo ge, kalet emi inu geege me lek.” Ogwu enenwaan̄ ya obebe, “Ogwukaan̄ n̄a, ogwu ubọọn̄, ikaan̄ inu obodo emi, do ma.”

¹⁹Ogwu ubọọn̄ onenido ibe, “Tumu-nu, ìre ubọk kè Jowabu ìkafat ìkup me lek otutuuk inu chi owu okirọ melek n̄a?” Ogwu enenwaan̄ ya ofọfọọk ibe, “Ogwukaan̄ n̄a, ogwu ubọọn̄, kè lek kwun̄. Kpukpunu inu ebeyaka itap mè ìre isan̄a me lek ikọ owu ogwukaan̄ n̄a, ogwu ubọọn̄ otumube. Me atikọ, îre Jowabu ogwu ikwaan̄ kwun̄ oria emi, mè itumu ikọ chi otutuuk itap emi, ogwu usun̄ kwun̄, me otu.

²⁰Jowabu ogwu ikwaan̄ kwun̄ ìrọ inu yi, inyi ọmọ isa me ikeyi inwene ubọk inu okupbe mgbọ keyi. Ogwukaan̄ n̄a, ogwu ubọọn̄, îkaan̄ iriọọn̄-inu kubọk iriọọn̄-inu ogwu osat Awaji, mè iriọọn̄ otutuuk inu òkirọ me inyọn̄ ijọn̄ yi.”

²¹Ogwu ubọọn̄ onenitumu inyi Jowabu ibe, “Înwọn, nchieek, mârọ inu yi. Si sa gwun̄ enerieen̄ ya, Abusolọm, ka.”

²²Jowabu ogegele igwook me ijọn̄, mè ikana isi ichit, mè itọbọ ibot inyi ogwu ubọọn̄, mè ibe, “Awaji igbana owu, ogwu ubọọn̄! Cherekeyi ke emi ogwu ikwaan̄ kwun̄ nriọọn̄ ibe ke owu onwọn melek n̄a, mije ke owu ogwukaan̄ n̄a, ogwu ubọọn̄, ochieek irọrọ mbeek n̄a.”

²³Jowabu oneninan̄a ije isi Gesuru, mè isi isa Abusolọm ika inu Jeruselem.

²⁴Ire, ogwu ubọọn̄ otutumu ibe, “Ije iraka isi uwu kan̄, ikanu ìnimun̄ emi isi mè isi.” Ikeya si, Abusolọm ojeje isi ge iraka isi uwu kan̄, mè ikup me ere ya, ìkakisi ìsi ìmun̄ ogwu ubọọn̄ isi mè isi.

²⁵Me otutuuk Ijeren, kpunu ogwu ebi ene ekitọn̄ enenen kubọk Abusolọm, me lek uja îjaan̄be. Bene me ibot kan̄ si re ukot kan̄, kpunu ìroon̄ geege. Otutuuk inu ìsoso ikup me lek kan̄.

²⁶Ìkisọp ijeek ibot kan̄ me mgbọ me mgbọ. Mgbọ geelek ijeek kan̄ isitibi imin, mè isisọp, mè iben itọ me inyọn̄ ewuuk itọ-inu, ulobo ijeek kan̄ ìkire kilo iba mè okpọkọ, igọọk me lek ubọk itọ-inu ogwu ubọọn̄.

²⁷Abusolọm ìbon bọn ebirieen̄ ita mè gwun̄ enenwaan̄ ge ekigwen Tema. Tema îjaan̄ uja enenen.

²⁸Abusolọm îluk me Jeruselem otuuk kè acha iba, ìkamun̄ ogwu ubọọn̄ isi mè isi.

²⁹Abusolọm oneniria ikwaan̄ igwen Jowabu ibe inu inyi ọmọ iria ikwaan̄ me lek ogwu ubọọn̄. Ire, Jowabu ojijit inunu. Abusolọm okpọkpọk iria ikwaan̄ òso mgbọ iba igwen Jowabu, Jowabu ìkachieek si inunu.

³⁰Abusolọm onenitumu inyi ebi ikwaan̄ kan̄ ibe, “Enyi mîriọọn̄ ibe ke ijọn̄ uko kè Jowabu ìkup me agba lek eyi n̄a. Akpa balì kan̄ òwa me ere ya otibibe ijot. Ìsi ìsi ìtap ukan̄ ìtaka uko ya ìsan̄a.” Ebi ikwaan̄ kè Abusolọm enenisi itap ukan̄ me uko ya.

³¹Jowabu oneninan̄a ije isi uwu kè Abusolọm isi ido ibe, “Keke orọ ebi ikwaan̄ kwun̄ esibe isi itap ukan̄ me uko n̄a?”

³²Abusolọm ofọfọọk Jowabu ibe, “Kpọ, nria ikwaan̄ igwen owu ibe owu ònu, inyi ǹria owu ǹsi lek ogwu ubọọn̄. M̀be owu òsi òdo ogwu ubọọn̄ ibe ìre mije keke ke nnan̄a me Gesuru ika? Kè ònwọn emi me lek mebe ke mbia me Gesuru! Mgbọ keyi, ǹkiweek imumun̄ ogwu ubọọn̄ isi mè isi. Ire ikaan̄ ikan nlọbe, ikpan̄ emi, mè eya iraka.”

³³Jowabu oneniben otutuuk ikọ chi isi ikpa inyi ogwu ubọọn̄. Ogwu ubọọn̄ oraria ikwaan̄ igwen Abusolọm. Abusolọm oneninu me isi ogwu ubọọn̄, mè igele igwook, mè ikana isi ichit me ijọn̄ me isi ogwu ubọọn̄. Ogwu ubọọn̄ okakana Abusolọm ikat, mè ibọkọ ọmọ itap.