Read obolo II Sam 16 Bible Online

II Sam 16 - obolo bible

II Sam 16

¹Mgbọ Debit ojebe ikwala inan̄a me inyọn̄ ibot ogoon̄ Olifu igele isiki sọnja, Siba, ogwu ikwaan̄ kè Mefiboset, onenichichini melek kan̄, mè isa inyinya akpan iba ebọpbe inu ikweek-irek me inyọn̄, mè isa si efit owut fituru iba, mè efit nchicha gerep, mè efit nchicha figi, mè ogbokot miin̄ ge igbaalek inu.

²Ogwu ubọọn̄ onenido Siba ibe, “Sa ogbogbo inu kechi ye?” Siba ofọfọọk ibe, “Inyinya akpan chi ìkup inyi ebi uwu ogwu ubọọn̄ isasa ije ije, sà fituru cha mè nchicha gerep melek nchicha figi cha okup inyi ebi akọn̄ irerie, sà miin̄ ya okup inyi ebi geelek efuuk otabe me owot inwọnwọ me emen èwê.”

³Ogwu ubọọn̄ oneniyaka ido Siba ibe, “Sà gwun̄ nte uwu kwun̄ ìkup me owa?” Siba ofọfọọk ibe ke ọmọ òwa me Jeruselem okupbe, mije, ìkikeek ibe, usini mgbọ, cherekeyi, ke ebi uwu kè Ijeren mêniyaka irek mkpulu nte nte kan̄ inyi ọmọ.

⁴Ogwu ubọọn̄ onenitumu inyi Siba ibe, “Ire ikeya, inu geelek Mefiboset okaan̄be îkana inire echi kwun̄.” Siba ofọfọọk ibe, “Ntọbọ ibot inyi owu. Kè ata ejit kwun̄, owu ogwukaan̄ n̄a, ogwu ubọọn̄, ikup me lek n̄a!”

⁵Mgbọ ogwu ubọọn̄ Debit okije igbet Bayurim, enerieen̄ ge ogwu uwu kè Sọọlu oneninan̄a me ama ya isibi ikweek ọmọ. Erieen̄ kan̄ ìre Simei gwun̄ kè Gera. Ibebene ikigbo Debit ike îkisibi inu.

⁶Ubọk geelek otutuuk ebi akọn̄ mè ebi ikwaan̄ ewakbe ikana ogwu ubọọn̄ Debit me ulom mè ujit ikibem ọmọ, Simei oteteen̄ ewuuk isa ikitọbọ ọmọ mè ebi melek kan̄.

⁷Simei okekigbo Debit, mè ikitiik ibe, “Je sibi, je sibi! Owu òkpan̄ ene keyi! Owu ene ikike keyi!

⁸Owu ofiat eje ebi uwu kè Sọọlu isan̄a, mè ibọkọ irek mkpulu kan̄ ikikpulu. Mgbọ keyi, Okumugwem îyaka otutuuk eje ene cha initoon̄ owu me ibot. Okumugwem îra ibọkọ irek mkpulu ya isan̄a owu me ubọk, mè iniyaka isa inyi Abusolọm, gwun̄ kwun̄ enerieen̄. Owu òfiat eje ene keyi, ijo inu kwun̄ îra iweek owu imun̄!”

⁹Abisai, gwun̄ ogwu enenwaan̄ ekigwen Seruya, onenibe ogwu ubọọn̄ “Nkwukwu ibo yi ìbojeje inikitiik ogwukaan̄ n̄a, ogwu ubọọn̄ ikeyi? Soso, tele mè ǹsaba ǹgọọk, mè ǹsi m̀fieek ọmọ ebek!”

¹⁰Debit ogwu ubọọn̄ onenibe Abisai, “Ìre eyi owa ogbaan̄ enyi, bọn kè Seruya, me lek melek n̄a? Ire ikigbo emi mije Okumugwem otumube inyi ọmọ ibe, ‘Si gbo Debit,’ ìre ekene ene obokọt igban ọmọ, mè inikido ibe, ‘Òjeje ikirọ inu ikeyi?’ ”

¹¹Debit onenitumu inyi Abisai mè otutuuk ebi ibot ikwaan̄ kan̄ ibe, “Ire gwun̄ n̄a gaalek, ogwu ònan̄a me lek n̄a isibi, ikiweek ikpakpan̄ emi, sà ogwu otoko kè Benjamin yi ye? Ìjuuk ọmọ ìtele, inyi ikigbo! Îre Okumugwem obe ikigbo emi.

¹²Usini mgbọ, Okumugwem môkọt isa me ikeyi imun̄ ufialek n̄a, mè inisa ata inu iyaka ikpe emi me irek ogbo nkibọkọ cherekeyi.”

¹³Debit mè ebi melek kan̄ ekekije ije kiban̄ inyi isi me oniin̄, Simei okekije eyi kan̄ me agba ogoon̄ me usaba agan̄, mè ikigbo ema, mè ikigwọ achiaan̄ itọọn̄ igwook ema me lek.

¹⁴Ogwu ubọọn̄ mè otutuuk ebi melek kan̄ enenire ere ema ebesi, efuuk otata ema me emen. Inenisiki ikweek me ere ya, mè itap efuuk.

¹⁵Abusolọm mè otutuuk ebirieen̄ Ijeren melek kan̄ enenire Jeruselem, Ayitofen melek kiban̄.

¹⁶Usai ogwu Arak, unene kè Debit, onenije isi lek kè Abusolọm, mè itọp ọmọ amọn ibe, “Ogwu ubọọn̄, luk ugwem jọn̄ọ! Ogwu ubọọn̄, luk ugwem jọn̄ọ!”

¹⁷Abusolọm onenido Usai ibe, “Ìre imumechieen̄ okaan̄be me lek unene kwun̄ ire eyi? Keke orọ òkagọọk ogwu unene kwun̄ ìje?”

¹⁸Usai ofọfọọk Abusolọm ibe, “In̄-in̄, ìkare ikeya! Ene geelek Okumugwem ogobobe, otutuuk ebi ife chi echechieek si melek kan̄, otutuuk Ijeren si ebọbọkọ itap, ogwugwa ke emi nkeke inyi, ọmọ si ke mbagọọk ikup.

¹⁹Ògak ge, ekene ke mbasi ikwaan̄ inyi, ire ìkare gwun̄ nte uwu n̄a? Ubọk nsibe ikwaan̄ inyi nte kwun̄, ubọk yaage si ke mbasi ikwaan̄ inyi owu ogwu gwun̄.”

²⁰Abusolọm onenitumu inyi Ayitofen ibe, “Ìnyi eji nteme! Keke ke eji eberọ?”

²¹Ayitofen onenibe, “Ebi ugan nte kwun̄ cha, ebi îjuukbe itele ibe ekup ekekpọ chieen̄ me lek uwu ogwu ubọọn̄, si gọọk ema otutuuk laak. Otutuuk ebi Ijeren mêneninọ, mè imun̄ ibe ke owu orọ nte kwun̄ inu eyi òborọ ibe imọnọ owu kubọk ogwu ochicha. Ejit otutuuk ebi ìkekeke melek kwun̄ môneninye me lek kwun̄.”

²²Eneninama atanga me inyọn̄ uwu inyi Abusolọm, igọgọọk otutuuk ebi ugan ogwu ute cha ilaak me emen atanga ya me isi otutuuk ebi Ijeren.

²³Me emen mgbọ ya, nteme geelek Ayitofen onyibe, ìkibet lek ikọ ònan̄a me otu Awaji me lek kan̄. Ikeya ke otutuuk nteme kè Ayitofen geelek okikup, mè ìre me lek kè Debit mè ìre me lek kè Abusolọm.