Read obolo II Sam 17 Bible Online

II Sam 17 - obolo bible

II Sam 17

¹Ayitofen onenitumu inyi Abusolọm ibe, “Nyi emi unye, inyi ǹgobo akọp mè obop ebi akọn̄ iba, mè ǹsa ǹsibi ǹgọọk Debit me eririeen̄ cherekeyi.

²Mâsi isoon̄ ọmọ mgbọ keyi lek kan̄ owọbe, efuuk otabe ọmọ si me emen, mè iriki ọmọ itap ukpook me lek. Otutuuk ebi akọn̄ kan̄ mêlilim ibubeek, mânenikpan̄ ọmọ gaalek,

³mè ikpulu otutuuk ebi melek kan̄ cha isa ika ijet owu. Mgbọ mâsabe otutuuk ene cha ika inu, unan geege ìkposak me lek ene geege, ilọ me lek ogwu ene ya ogwu owu okiweek.”

⁴Otitọt kè Ayitofen ya oneninwọn me lek kè Abusolọm melek ebi ugane Ijeren.

⁵Ire, Abusolọm onenibe, “Ìgwen si Usai ogwu Arak, mè eji enọ-nu ekiket kan̄ me lek inu yi.”

⁶Mgbọ Usai onube, Abusolọm onenibe ọmọ, “Ikeyi mè ikeyi ke Ayitofen oteme eji. Ìre eji erọ ike îbe eji erọ? Ire ìkatat, owu yaka nyi eji ekiket eyi kwun̄ nu.”

⁷Usai ofọfọọk Abusolọm ibe, “Nteme Ayitofen onyibe mgbọ keyi ìkatat.

⁸Owu oriọọn̄ ogwu nte kwun̄ orebe, mè iriọọn̄ si ojelek ife ìkup melek kan̄. Owu oriọọn̄ ibe ke ema ìre ebi usọ akọn̄, ebi ìkitim akọn̄ me ujat ejit kubọk ibo nriọk ekpulube ebi bọn isan̄a me lek. Ògak ge, nte kwun̄ ìre ogwu òriọọn̄ ukot akọn̄ enenen. Ìkakaan̄ mgbọ igọgọọk ebi akọn̄ kan̄ igbaan̄ ilaak me ere ge.

⁹Ike mgbọ keyi, nte kwun̄ îra ilet me emen udọn̄ ere ge, mè ìre me ofifi ere geelek. Ire ọmọ inidasi ibene akọn̄ me lek ebi kwun̄, ìbotataan̄ ikana ibe ke mîra ikpan̄ ogbogbo me lek ebi akọn̄ kè Abusolọm igwook.

¹⁰Mgbọ ya, ikerere ogwu akọn̄ kwun̄ ogwu òkita ukpook me lek itim akọn̄ kubọk egbe àtat, ukpook ìbotetet enenen. Mije, otutuuk ebi Ijeren mîriọọn̄ ibe ke nte kwun̄ ìre ogwu usọ akọn̄, mè iriọọn̄ si ibe ke ebi melek kan̄ ìre egbe me isi akọn̄.

¹¹“Eya orọ, nteme nkaan̄be ìre ikeyi: Gwen otutuuk ebi Ijeren, ìwa kubọk achiaan̄ agba awaji, titiin̄, ibene me Dan me agan̄ inyọn̄ isi ire Bieseba me osiki, mè owu me lek kwun̄ gaalek je me isi sa ema sibi si akọn̄ ya.

¹²Sa me ikeya, ere geelek eji mêmun̄be ọmọ, eji mêkakana ichit ọmọ kubọk mbat agan̄ egwe ogwook me ijọn̄, mè ikpan̄ ọmọ mè otutuuk ebi kan̄ isan̄a. Ene geege me etete kiban̄ ìkponwọnọ.

¹³Ire ilibi inin̄ uga ama ge isi ilet, otutuuk Ijeren mêsa olik initobo ama ya, mè itaba otutuuk ama ya isi igwook me emen iteke, ire lek, okpọkọ ewuuk ama ya ge ikeyi ìkpoyaka isik.”

¹⁴Abusolọm mè otutuuk ebi Ijeren ekekitumu ibe, “Nteme kè Usai ogwu Arak înwọn igak eyi kè Ayitofen.” Inu yi ìrọ ikeya, mije, Okumugwem ìweek ifafiat ata nteme kè Ayitofen, inyi ọmọ isa me ikeya itap Abusolọm me ufialek.

¹⁵Usai oneniben nteme Ayitofen onyibe Abusolọm melek ebi ugane Ijeren mè eyi ọmọ onyibe si isi ikpa inyi Jadọk mè Abiata,

¹⁶mè inibe ema, “Ngwa, ikafiat mgbọ! Ìria ogwu osat ibe isi itumu inyi Debit ibe ikakup me agba lek okolo ya me ere ijọn̄ ijọn̄ me emen èwê me eririeen̄ yi. Ìtumu ìnyi ibe ikalọlọ isasa eririeen̄ yi isaba okwaan̄ Jodan itoon̄ me agan̄ keyilọ. Ire ìkare ikeya, ke ebi akọn̄ kè Abusolọm mêmeen̄ ogwu ubọọn̄ mè otutuuk ebi melek kan̄ isan̄a kpai.”

¹⁷Mgbọ ya, Jonatan mè Ayimaji ekup me En Rogen, mije, ema kpeweek ibe ene geege imun̄ ema ekije inin̄ emen ama Jeruselem. Ogwu usun̄ enenwaan̄ ge onenisa etip ya isi ilook ema, inyi ema esa esi elook ogwu ubọọn̄ Debit.

¹⁸Ire, gwun̄ enerieen̄ ge omumun̄ ema, mè iben isi ikpa inyi Abusolọm. Ema ene iba egwagwat lek ije isi uwu ogwu enerieen̄ ge me Bayurim. Ogwu enerieen̄ yi îkaan̄ udọn̄ mudim ge me oyet egep kan̄. Ema ekwakwala inin̄ emen udọn̄ mun̄ ya isi ikup.

¹⁹Nwa ogwukaan̄ uwu ya onenimọnọ inu iwele ichit otu udọn̄ mun̄ ya, mè iben akpa ibot ibot iyiyala me inyọn̄ inu îwelebe ichit udọn̄ ya, inyi ene geege ikariọọn̄ ibe ke udọn̄ mun̄ me ere ya.

²⁰Mgbọ ebi ikwaan̄ kè Abusolọm enube inire ere ya, mè imun̄ ogwu enenwaan̄ ya me uwu, enenido ọmọ ibe, “Mọmọ Ayimaji mè Jonatan?” Ogwu enenwaan̄ ya ofọfọọk ema ibe, “Mmun̄ ema elibibe iraka, mè isaba okolo itoon̄.” Ebi ikwaan̄ kè Abusolọm eweweek ebirieen̄ iba chi igak, kpekọt iweek imun̄. Egwugwu ikom ifo Jeruselem.

²¹Mgbọ ema efonbe, Jonatan mè Ayimaji eneninan̄a me emen udọn̄ mun̄ ya isibi, mè inisi ilook ogwu ubọọn̄ Debit nteme Ayitofen onyibe Abusolọm, mè ibe igwat lek inan̄a ije isaba okolo ya.

²²Debit mè otutuuk ebi melek kan̄ enanan̄a ije isaba okwaan̄ Jodan. Sabum egwe oniwele, otutuuk ene mîsaba okwaan̄ Jodan itoon̄ me usaba agan̄, ene geege ìkasik.

²³Mgbọ Ayitofen omun̄be ibe ke kpebọkọ nteme kan̄ itap, inenene inyọn̄ inyinya akpan kan̄, mè igwu ikom ifo ama kiban̄, mè isi idọmọ uwu kan̄ isun̄ me irek, mè itap olik me ebek ikpan̄ lek, mè ikwu. Ebeben isi ifuun̄ me udọn̄-ufuun̄ ogwu ute.

²⁴Debit onenire ama Mayanayim. Mgbọ ya si, Abusolọm onenisaba okwaan̄ Jodan itoon̄, ọmọ melek otutuuk ebi Ijeren.

²⁵Abusolọm onenisa Amasa irọ ogwu ibot akọn̄ Ijeren, me irek kè Jowabu. Amasa ìre gwun̄ ogwu enerieen̄ Ijeren ge ekigwen Jeteri obonbe me owot kè Abigen, ogwu Nayas, ngwan̄ enenwaan̄ kè Seruya nga kè Jowabu, omanbe.

²⁶Otutuuk ebi Ijeren melek Abusolọm enenigwugwuun̄ uwu ọfọ me ido Giliadi, mè initap efuuk.

²⁷Mgbọ Debit orebe Mayanayim, Sobi gwun̄ kè Nayas, ogwu ama Raba me ido Amọn, mè Makiri gwun̄ kè Amien, ogwu ama Lo-Deba, mè Bajilai ogwu ama Rogelim me ido Giliadi,

²⁸enenisa owuwa ekwut mkpilaak, mè owuwa alala irie inu, mè ebi kè otin̄ ibat, mè akpa wit mè akpa balì echi ekọkọk mè echi ewọwọp, mè ngọdi mè mfut lentin mè akpa ekakala,

²⁹mè aran̄ akwọọk, mè njijin mun̄ ebe eriembuuk, mè arọọn̄ mè ebot, mè okpukpuk mun̄ ebe eriembuuk isa ijet Debit mè ebi melek kan̄ erie. Ema mîriọọn̄ ibe ke uraafiọọn̄ îtaka Debit mè ebi melek kan̄, ke lek îwọ ema, ke ebek si îrak ema me emen èwê.