Read obolo II Sam 19 Bible Online

II Sam 19 - obolo bible

II Sam 19

¹Etip onenisi ire lek kè Jowabu ibe ke ogwu ubọọn̄ òkito ito, mè ikifieek ejit mije kè Abusolọm.

²Ntim-mkpan̄ ebi akọn̄ etimbe ikpan̄ usen ya onenikana ufieejit isa inyi otutuuk ebi akọn̄. Mije, ebi akọn̄ cha mînọ ibe ke ogwu ubọọn̄ òkifieek ejit mije mkpa ogwu gwun̄.

³Usen ya, ebi ene kpeyaka ikaan̄ isi ije inin̄ ama. Eyaka ikinwenween̄ lek ije inin̄ kubọk ebi akọn̄ ìsa me isi esip ilim inan̄a me isi akọn̄ ika.

⁴Ogwu ubọọn̄ onenichit isi kan̄, mè ikito ito ya inye ida ibe, “Jei gwun̄ n̄a Abusolọm! Jei Abusolọm gwun̄ n̄a, gwun̄ n̄a!”

⁵Jowabu oneninin̄ uwu isi lek ogwu ubọọn̄, mè inibe ọmọ, “Cherekeyi, owu otap esip me isi otutuuk ebi akọn̄ kwun̄ ebi ìtitim akọn̄ me ibot kwun̄, mè inyan̄a owu isibi me mkpa, mè inyan̄a si ebek ugwem bọn kwun̄ ebirieen̄ mè bọn kwun̄ ebibaan̄, mè inyan̄a si ebi nwa kwun̄ mè ebi ugan kwun̄.

⁶Ìsibi ibe ke owu òyaka inima ebi ìchacha owu, mè inicha ebi ìmama owu. Cherekeyi, owu òkijeen̄ eji ibe ke owu òkasa ebi ibot akọn̄ kwun̄, mè ebi akọn̄ melek kiban̄ ìgwen inu geege. Mije, mmun̄ cherekeyi ibe, mebe ke Abusolọm ọmọ òwa me ugwem, mè eji otutuuk mekwaan̄ ita, ke eya kè oneme owu enenen.

⁷Mgbọ keyi, nan̄a keke sibi si tumu ikọ ukarajit nyi otutuuk ebi ikwaan̄ kwun̄. Ire òkasi, ǹkisa erieen̄ Okumugwem inyan̄a ibot ibe, me eririeen̄ cherekeyi, ke kpunu ene geege òboyaka isik melek kwun̄. Ufialek keyi mônenifieek me lek kwun̄ igak otutuuk ufialek ònunu inyi owu bene me karake ijija kwun̄ mege inire cherekeyi.”

⁸Ogwu ubọọn̄ oneninan̄a ikeke, mè inisi isiki ikweek irek me otunchit ama. Etip onenitaan̄ ikana ibe ke ogwu ubọọn̄ òwa me otunchit ama osikibe ikweek irek. Otutuuk ebi ama enenigbọọk isibi inu inikeke me isi kan̄. Me ike mgbọ ya, ebi Ijeren mîliliin̄ ifon uwu kiban̄ isan̄a.

⁹Otutuuk otoko Ijeren enenikigbini ikọ me etete kiban̄ ibe, “Ogwu ubọọn̄ înyan̄a eji isibi me ubọk ebi ochicha kiji, mè itaba eji isibi me ubọk ebi Filisia. Ire, mgbọ keyi, îlibi inan̄a me ama mije ukpook kè Abusolọm.

¹⁰Abusolọm ogwu eji ekenbe aran̄ me ibot isa irọ ubọọn̄, inyi ikikpulu eji, îkwu me isi akọn̄. Mgbọ keyi, keke orọ enyi kpesan̄a amọn itumu ikọ ofolek isasa ogwu ubọọn̄ igwu ikom ika?”

¹¹Ogwu ubọọn̄ Debit oneniria etip ijet Jadọk mè Abiata, ebi ngwugwa ibe esi edo-nu ebi ugane otoko kè Juda ibe, “Ìre keke orọ enyi ebeje udun̄ me inu ofolek isasa ogwu ubọọn̄ igwu ikom ika inu uwu kan̄ mè irek ubọọn̄ kan̄, me ere enyi eriọọn̄be ibe ke otitọt otutuuk ebi Ijeren ekitọt îre utọn̄ ogwu ubọọn̄ me ere îkupbe?

¹²Enyi ìre ebi ngwan̄ n̄a, mè ire si akpalek yaage mè ukwuuk yaage melek n̄a. Enyi ebejeje inire ebi òje udun̄ me inu ofolek isasa ogwu ubọọn̄ igwu ikom ika inu ama?”

¹³Ogwu ubọọn̄ obebe elook si Amasa ibe, “Ìre owu òkafat ìre akpalek ge mè eje ge melek n̄a? Kè Awaji isulu emi osusut, mè itoon̄ urot, ire ǹkasa owu ìto me ibot urum akọn̄ n̄a me irek kè Jowabu bene me mgbọ keyi fo isi.”

¹⁴Sa me ikeyi, Debit onwenwene ejit otutuuk ebi otoko kè Juda. Ema otutuuk egbagbaan̄ isa me ida ge iria etip ijet ogwu ubọọn̄ ibe, “Gwu kom ka, owu melek otutuuk ebi kwun̄!”

¹⁵Ogwu ubọọn̄ onenikije ika, mè ije inire agba okwaan̄ Jodan. Ebi otoko kè Juda egbugbuku isibi inu me Giligan inibọkọ ogwu ubọọn̄ itap, mè inisa ọmọ isaba okwaan̄ Jodan itoon̄.

¹⁶Simei gwun̄ kè Gera ogwu otoko kè Benjamin, ònan̄a me ama Bayurim ogwagwat lek igọọk ebi otoko kè Juda inan̄a isibi isi ibọkọ ogwu ubọọn̄ Debit itap.

¹⁷Simei îsa obop ebirieen̄ ebi otoko kè Benjamin, mè isa si Siba, ogwu ikwaan̄ uwu kè Sọọlu, melek akọp mè bọn ebirieen̄ go kè Siba, igbaalek ije. Ema otutuuk esasa ekot ekot ilibi isi ire okwaan̄ Jodan sabum ogwu ubọọn̄ onire.

¹⁸Mgbọ ekisa ebi uwu ogwu ubọọn̄ isaba okwaan̄ ya itoon̄, mè ikirọ inu geelek îweekbe, Simei gwun̄ kè Gera onenirọn̄ inyana me ijọn̄ me isi ogwu ubọọn̄ mgbọ ogwu ubọọn̄ obosaba okwaan̄ ya,

¹⁹mè ikitumu inyi ibe, “Ogwukaan̄ n̄a, soso kafuk ijo inu n̄a ìtoon̄ emi me ibot. Kakekeek si ijo inu emi ogwu usun̄ kwun̄ nrọbe owu ogwukaan̄ n̄a, ogwu ubọọn̄, me usen ya owu onan̄abe isibi me Jeruselem. Ogwu ubọọn̄, nye lek san̄a inu ya me ejit kwun̄.

²⁰Emi ogwu usun̄ kwun̄ nriọọn̄ ibe ke nrọ owu ijo inu. Ire, me cherekeyi, nsibi inu kubọk adasi ogwu otoko kè Josefu, inenibọkọ ogwukaan̄ n̄a, ogwu ubọọn̄ itap.”

²¹Abisai gwun̄ kè Seruya onenibe, “Ìre ìkafat ìgbe ibe ekpan̄ Simei me lek inu yi îrọbe, eyi îgbobe ogwu Okumugwem otọkọbe aran̄ me ibot?”

²²Debit ofọfọọk ibe, “Enyi bọn kè Seruya, ìre keke ke emi melek kinyi egbaan̄ ikaan̄? Cherekeyi, enyi mîkana ebi ochicha inyi emi! Ìre îgbe ibe ekpan̄ ene me Ijeren chereyi? Cherekeyi ke nriọọn̄ ibe ke emi nre ogwu ubọọn̄ me Ijeren.”

²³Ogwu ubọọn̄ onenibe Simei, “Owu òkpokwu.” Ineninyan̄a ibot igbaalek inyi Simei.

²⁴Mefiboset, gwun̄ gwun̄ kè Sọọlu îgọọk inan̄a isibi inu inibọkọ ogwu ubọọn̄ itap. Bene me usen ogwu ubọọn̄ onan̄abe isibi me Jeruselem, mege inire usen ya ogwu ubọọn̄ okabe me utelelek, Mefiboset ìkakpọ chieen̄ me lek ukot kan̄, ìkakwọkọ ifet me otu, ìkagwọk ofọnti òkup ọmọ me lek.

²⁵Mgbọ Mefiboset onan̄abe me Jeruselem inu, ogwu ubọọn̄ onenido ibe, “Mefiboset, keke orọ òkagọọk emi ìje?”

²⁶Mefiboset ofọfọọk ibe, “Ogwukaan̄ n̄a, ogwu ubọọn̄, ogwu ikwaan̄ n̄a ofiaan̄ emi. Emi ogwu usun̄ kwun̄ ntumu ibe ke mânen̄e inyinya akpan n̄a isun̄, inyi mâsa ilibi igọọk ogwu ubọọn̄ ije, mije, emi ogwu usun̄ kwun̄ ìre akọọk.

²⁷Ire, Siba osasa emi ogwu usun̄ kwun̄ inifiat me isi ogwukaan̄ n̄a, ogwu ubọọn̄. Iin̄, ogwukaan̄ n̄a, ogwu ubọọn̄, owu òkup kubọk ogwu osat Awaji. Inu geelek òneneme owu irọrọ, rọ.

²⁸Mije, inu òkukup inyi otutuuk ebi uwu nte nte n̄a me ubọk ogwukaan̄ n̄a, ogwu ubọọn̄, ìre mkpa gaalek. Kpan̄asi ikeya, owu òyaka ìninyi emi ogwu usun̄ kwun̄ irek ibe ǹkengọọk ǹkweek irek ǹrie inorie me lek ikasi inorie kwun̄. Ìre kpasi unen ke nyaka ikaan̄ inenikibeek ofifi inu me ubọk ogwu ubọọn̄?”

²⁹Ogwu ubọọn̄ onenibe ọmọ, “Kayaka ìtumu ikọ ìwa! Nra itumu ifieek ibe ke owu mè Siba mêche ijọn̄ uko kè Sọọlu.”

³⁰Mefiboset ofọfọọk ogwu ubọọn̄ ibe, “Tele inyi ọmọ gaalek ikpulu otutuuk isak. Eyi nsabe chieen̄ n̄a imun̄ ogwukaan̄ n̄a, ogwu ubọọn̄ okabe inu uwu kan̄ me utelelek, eya gaalek îso emi.”

³¹Bajilai ogwu Giliadi înan̄a si me Rogelim inu ibonigọọk isa ogwu ubọọn̄ isaba okwaan̄ Jodan isi iban me uwu kan̄.

³²Bajilai îkan enenen, îso akọp acha jeeta. Otutuuk mgbọ ogwu ubọọn̄ okupbe me Mayanayim, îre ọmọ okikpọ ogwu ubọọn̄ owot, mije, ọmọ ìre ogwu òbọbọọn̄ ubọọn̄ enenen.

³³Ogwu ubọọn̄ onenibe Bajilai, “Na gọọk emi saba okwaan̄ Jodan, mè na si gọọk emi kup me Jeruselem, ke mâkpọ owu chieen̄ me lek.”

³⁴Ire, Bajilai ofọfọọk ogwu ubọọn̄ ibe, “Acha inen oyaka inisisik inyi emi me ugwem, eyi mbanigọọk owu ogwu ubọọn̄ ifo Jeruselem?

³⁵Mgbọ keyi, emi ìre akọp acha jeeta. Ìre mâkọt imun̄ esese òkup me lek ata inu mè ijo inu? Ìre emi ogwu usun̄ kwun̄ mâkọt iyaka ikinọ utop inorie, mè ìre utop miin̄? Ìre mâkọt ikinọ utop ida okwa ebirieen̄ mè ebibaan̄ ekikọt? Emi ogwu usun̄ kwun̄ m̀kpakọt inisi ikana ofifi ulobo akpan inyi ogwukaan̄ n̄a, ogwu ubọọn̄!

³⁶Emi ogwu usun̄ kwun̄ mâsa owu isaba okwaan̄ Jodan itoon̄, mè isa owu iban sọnja itap me oniin̄, mè igwu ikom. Emi ǹkagbe ogwu ogwu ubọọn̄ obokpe ojelek mkpukpe ubọk ikwaan̄ keya inyi.

³⁷Tele inyi emi ogwu usun̄ kwun̄ ǹgwu ǹkom m̀fo, inyi ǹsi ǹkup me ama kiji ǹkwu me agba lek udọn̄-ufuun̄ kè nte n̄a mè eyi nga n̄a. Ire, kpọ ogwu usun̄ kwun̄ Kimiyam gwun̄ n̄a enerieen̄ ire eyi. Ọmọ môgọọk owu ogwukaan̄ n̄a, ogwu ubọọn̄, isaba itoon̄, mè isi ikup melek kwun̄. Ikaan̄ inu òneme owu, sa ọmọ rọ.”

³⁸Ogwu ubọọn̄ onenibe, “Iin̄, Kimiyam môgọọk emi isaba. Ikaan̄ inu òneme owu, eya ke mbarọ inyi. Owu si, inu geelek oweekbe me ubọk n̄a, mârọ inyi owu.”

³⁹Otutuuk ene enenisaba okwaan̄ Jodan itoon̄, ogwu ubọọn̄ onenisaba si itoon̄. Ineninyi Bajilai ejit, mè igbana si ọmọ. Bajilai onenigwu ikom ifo ama kiban̄.

⁴⁰Ogwu ubọọn̄ onenisaba isi ire Giligan, ọmọ melek Kimiyam. Otutuuk urum akọn̄ ebi Juda mè okpọkọ urum akọn̄ ebi Ijeren esasa ọmọ iban isaba.

⁴¹Ìkafiin̄, otutuuk ebi Ijeren ekekinu me lek ogwu ubọọn̄, mè ikido ibe, “Ebi otoko kè Juda, ebi ngwan̄ kiji gaalek, ejeje inichiin̄ owu isun̄ inyi lek kiban̄ gaalek, mè inisa owu ogwu ubọọn̄ mè ebi uwu kwun̄ melek otutuuk ebi akọn̄ kwun̄ igbaalek isaba okwaan̄ Jodan?”

⁴²Otutuuk otoko kè Juda efọfọọk ebi Ijeren ibe, “Eji erọ ikeyi mije ogwu ubọọn̄ ìre gwun̄ kiji. Eya ìjeje inaan̄ enyi ejit? Ìre îkaan̄ inu ogwu ubọọn̄ enyi emun̄be eji me otu? Sà ìre îkaan̄ inu kan̄ echi eji ekpulube inyi lek kiji?”

⁴³Ebi Ijeren enenifọọk ebi Juda ibe, “Eji mîkaan̄ unen me lek ogwu ubọọn̄ akọp mgbọ. Ofifi si, eji mîkaan̄ unye me lek kè Debit igak enyi. Enyi ejeje ikpọ eji chieen̄ isiki? Ìkafat ìre eji edasi ikitumu ikọ ofolek isasa ogwu ubọọn̄ kiji ika?” Ire, me emen gọlọgọlọ yi, otu ikọ ebi Juda onyenye igak eyi ebi Ijeren.