Read obolo II Sam 2 Bible Online

II Sam 2 - obolo bible

II Sam 2

¹Sọnja mgbọ iraraka, Debit onenido Okumugwem ibe, “Ìre mâkọt ije inene ifo ama ge me etete ama ebi Juda isi iluk?” Okumugwem ofọfọọk ibe, “Iin̄, owu môkọt.” Debit okpọkpọk ido Okumugwem ibe, “Ìre ama owa ke mbasi iluk?” Okumugwem ofọfọọk ibe, “Si Eburọn.”

²Debit onanan̄a isi Eburọn isi iluk, mè isa ebi nwa iba kan̄, Ayinowam ogwu Jesereli, melek Abigen ogwu nwakpa kè Naban ogwu Kamen, igbaalek.

³Debit îsa si ebi akọn̄ kan̄ igbaalek isi Eburọn, ogwu ikup melek ototun̄ ukan̄ kan̄. Ema eluluk me emen ama cha òkukup ikana Eburọn.

⁴Ebi otoko kè Juda enenisibi inu me Eburọn, mè initọkọ Debit aran̄ me ibot, inyi inire ogwu ubọọn̄ òbokikpulu otoko kè Juda. Me ere ya, enenikpa inyi Debit ibe ke îre ebirieen̄ ebi ama Jabes òkup me agan̄ Giliadi eben nkwukwu kè Sọọlu ifuun̄.

⁵Debit oneniria ebi ene isi lek ebi ama Jabes me Giliadi ibe esi etọn̄ ema ibe, “Kè Okumugwem igbana enyi, mije ata ejit keyi enyi ekaan̄be me lek kè Sọọlu ogwu nte uwu kinyi, mè iben nkwukwu kan̄ ifuun̄.

⁶Mgbọ yi, kè Okumugwem ikaan̄ ata ejit me lek kinyi, mè irọ atikọ kan̄ me lek kinyi. Emi me lek n̄a, mâkaan̄ si ata ejit me lek kinyi, mije inu yi enyi erọbe.

⁷Eya orọ, ìnye lek, mè ìkat ejit, mije, Sọọlu nte uwu kinyi îra ikwu. Mgbọ keyi, ebi otoko kè Juda mîra itọkọ emi aran̄ me ibot, inyi emi ǹnenre ogwu ubọọn̄ kiban̄.”

⁸Me ike mgbọ ya, Abina gwun̄ kè Neri, ogwu ibot ebi akọn̄ kè Sọọlu, osasa Isiboset, gwun̄ kè Sọọlu isaba okwaan̄ Jodan, isi Mayanayim,

⁹mè irọ ọmọ ubọọn̄ ibe ikikpulu Giliadi, mè Asuri,[1] mè Jesereli, mè Iferem mè Benjamin, mè ikikpulu si otutuuk ido Ijeren.

¹⁰Isiboset ìre akọp acha ini mgbọ erọbe ọmọ ubọọn̄ ibe ikikpulu Ijeren, ikpukpulu acha iba. Ire, ebi otoko kè Juda esasa Debit irọ ubọọn̄ kiban̄.

¹¹Debit okukup me Eburọn ikikpulu otoko kè Juda acha jaaba mè onyan̄ gweregwen.

¹²Abina gwun̄ kè Neri melek usini ebi akọn̄ kè Isiboset gwun̄ kè Sọọlu eneninan̄a me Mayanayim isi Gibiọn.

¹³Jowabu, ogwu ogwu uga orebe Seruya, mè usini ebi akọn̄ kè Debit eneninan̄a isibi, mè isi ichichini ema me agba lek udọn̄ mun̄ me Gibiọn. Ema agan̄ iba esisiki ikweek me agba lek udọn̄ mun̄ ya, ukpa ge me agan̄ ge, ukpa ge me agan̄ ge.

¹⁴Abina onenitumu inyi Jowabu ibe, “Eji enetumu enyi usini nsabọn irieen̄ kiji agan̄ iba ibe enetọ ubọk ekpọ, inyi eji ekpọ-nu.” Jowabu obebe, “Înwọn! Ema enetọ ubọk ekpọ ma!”

¹⁵Nsabọn irieen̄ cha enanan̄a ikeke, efufuk akọp mè ene iba isibi me agan̄ ebi otoko kè Benjamin melek ebi kè Isiboset gwun̄ kè Sọọlu, mè ifuk si akọp mè ene iba isibi me agan̄ kè Debit.

¹⁶Ema enanan̄a isibi ikeke, ogwu ikup òtet ogwu melek kan̄ me ibot, mè osa oge akọn̄ kan̄ òchim ogwa me agba nkan̄. Ema otutuuk ene ekwakwaan̄ irurọn̄ọ. Mije keya ke egwen ere ya me Gibiọn, Ijọn̄ Oge Akọn̄.[2]

¹⁷Akọn̄ ya onyenye enenen me usen ya. Ebi akọn̄ kè Debit etitim ikpan̄ Abina mè otutuuk ebi akọn̄ Ijeren.

¹⁸Bọn ebirieen̄ ita kè Seruya, ìrere Jowabu, mè Abisai, mè Asayen, me ere ya si ekupbe. Asayen ìkifet ukot ilibi ekot kubọk òsô.

¹⁹Ibebene ikilibi igọọk Abina, ìkayaka chieen̄ ìkpọ agan̄ ulom mè ìyaka ire agan̄ ujit.

²⁰Abina oyayaka chieen̄ me udun̄, mè igwen ọmọ, “Asayen, ìre owu ke îre?” Ichechieek, mè ibe, “Iin̄, emi ke îre!”

²¹Abina obebe ọmọ, “Kayaka ìgọọk emi. Kana fo agan̄ ulom kwun̄, mè ìyaka ire agan̄ ujit kwun̄, mè tet ene geelek me etete nsabọn irieen̄ cha bọkọ nroon̄ akọn̄ kan̄.” Ire, Asayen okpọkpọ itet lek inye ikigọọk Abina.

²²Abina okpọkpọk itumu inyi Asayen ibe, “Gwu kom me udun̄ n̄a! Òjeje ikiweek mkpa me ubọk n̄a ikeyi? Ire mkpan̄ owu mgbọ keyi, ìre m̀bajeje ikọt ikpọ Jowabu ngwan̄ kwun̄ me okwut isi?”

²³Ire, Asayen ojijit, mè itet lek inye ikigọọk Abina. Abina osasa edim otunwa kan̄ ichim Asayen me lek owot, igwọgwọt itibi isibi me udun̄. Asayen orọrọn̄ me ere ya, mè ikwu mgbọ yaage. Ebi geelek isije ire ere Asayen orọn̄be ikwu ilaak ya, mîra ichak ikeke.

²⁴Ire, Jowabu mè Abisai ekpọkpọ itet lek inye ikigọọk si Abina. Mgbọ ura onimbe, ema enenire lek orioon̄ Ama, eyi òkup me agba lek ama Giya, me lek oniin̄ ekije isi emen èwê Gibiọn.

²⁵Ebi otoko kè Benjamin egbugbuku isibi inu inikput Abina udun̄, mè inigbaan̄ ititiin̄ ikeke me inyọn̄ orioon̄ ge me ere ya.

²⁶Abina onenitaan̄ ukpo itumu inyi Jowabu ibe, “Ìre eji ebekpọkpọ ikitim akọn̄ isi ire mgbọ geelek ni? Ìre òkafat ìriọọn̄ ibe ke akọn̄ yi môtap ujat ejit mè ochicha me etete kiji? Ìre mgbọ owa ke owu obotumu inyi ebi kwun̄ ibe etele irerieen̄ eji ebi ngwan̄ kiban̄ ikana ere ni?”

²⁷Jowabu ofọfọọk Abina ibe, “Kè lek Awaji òkup me ugwem, mebe ìkare ikọ chi otumube, kè ebi n̄a erieen̄ enyi ebi ngwan̄ kiban̄ ekana ere mege ewele egwe iyakwut.”

²⁸Jowabu oneniwut otita, otutuuk ebi akọn̄ kiban̄ eyayaka ikeke, kpeyaka ililaba ebi Ijeren ikana ere, kpeyaka itim si akọn̄ ifo isi.

²⁹Abina mè ebi melek kan̄ enenije otutuuk eririeen̄ ya isaba iteke ijọn̄ Araba, mè isaba okwaan̄ Jodan, mè ije otutuuk ewelegwe ofit iwele kan̄, mè inire Mayanayim.

³⁰Jowabu onenitele irerieen̄ Abina, mè inigwu ikom ika. Mgbọ îtitiin̄be ebi akọn̄ kan̄ me ere ge, inenimun̄ ibe, isan̄a me lek Asayen, ke akọp mè ene onaan̄ge me lek ebi akọn̄ kè Debit mîkwaan̄ me akọn̄.

³¹Ire, ebi akọn̄ kè Debit mîkpan̄ efit ene ita mè akọp gweregwen me lek ebi otoko kè Benjamin mè ofifi ebi akọn̄ kè Abina.

³²Jowabu mè ebi melek kan̄ ebeben nkwukwu kè Asayen isa isi ifuun̄ me udọn̄-ufuun̄ ogwu ute me Beteleyem, mè ininan̄a ije otutuuk eririeen̄ ya, mè inire Eburọn me otu ewelegwe ofit iwele kan̄.