Read obolo II Sam 20 Bible Online

II Sam 20 - obolo bible

II Sam 20

¹Me Giligan, îkaan̄ ogwu otoko kè Benjamin ge òkimalek itap ufialek, ekigwen Sieba gwun̄ kè Bikiri. Ogwu ufialek yi oneniwut otita, mè ikitaan̄ ukpo itumu ibe, “Eji kpekaan̄ uche geege me lek kè Debit, kpekaan̄ si ìrot geege me lek gwun̄ kè Jesi! Ebi Ijeren! Ogwu ikaan̄ uwu kan̄, ifo!”

²Otutuuk ebi Ijeren eyayat itele Debit, mè inikana igọọk Sieba gwun̄ kè Bikiri. Ire, otutuuk ebi otoko kè Juda, ekekeke ichat melek ogwu ubọọn̄ kiban̄, mè isa ọmọ ije ibene me okwaan̄ Jodan mege isi ire Jeruselem.

³Mgbọ Debit okabe inire uwu kan̄ me Jeruselem, ikpukpulu akọp ebi ugan kan̄ cha, ebi îjuukbe itele ibe ekekpọ chieen̄ me lek uwu kan̄, isi itap me ofifi uwu, mè ito ebi ene ibe ekebem ema. Îkinyi ema inu geelek ema eweekbe, ire, ìkayaka ìgọọk ema ìlaak. Ikeyi ke echit ema mege ire usen mkpa kiban̄. Ema eluk ugwem kubọk ebi nwakpa.

⁴Ogwu ubọọn̄ onenitumu inyi Amasa ibe, “Gwen ebirieen̄ ebi Juda titiin̄ nyi emi sabum usen ita chereyi. Owu si gọọk na.”

⁵Amasa onenikijijen̄e ikana ikigween̄ ebi Juda. Ire, ìkakọt ìtitiin̄ ema ìsoon̄ usen ogwu ubọọn̄ onyibe ọmọ.

⁶Debit onenitumu inyi Abisai ibe, “Sieba gwun̄ kè Bikiri mônikana ikpele ufialek inyi eji igak eyi Abusolọm orebe. Mgbọ keyi, sa ebi akọn̄ nte uwu kwun̄ si tim ọmọ akọn̄ me lek, inyi ikasi ìnin̄ usini ama mgban akọn̄, mè ìlibi ìlọ eji chieen̄.”

⁷Abisai onenikpulu ebi akọn̄ kè Jowabu, mè ebi Keret, mè ebi Pelet, igbaalek otutuuk ebi ìriọọn̄ ukot akọn̄ isa inan̄a me Jeruselem isibi isi ikiweek Sieba gwun̄ kè Bikiri. Ọmọ ore ogwu ibot akọn̄ inyi ema otutuuk.

⁸Mgbọ ema erebe lek ikpele ewuuk òkup me Gibiọn, Amasa onenichichini ema. Jowabu îkwaan̄ nroon̄ akọn̄ kan̄ iso, mè itap àwurukù akọn̄ eyi irak, mè isa fanti itobo, mè ijeen̄ oge akọn̄ kan̄ òkup me emen ogan me ebon. Mgbọ îkije, oge ya owọwọọk isibi me emen ogan irọn̄ me ijọn̄.

⁹Jowabu onenitumu inyi Amasa ibe, “Ngwan̄ n̄a enerieen̄, inu ìkukup?” Inenisa ubọk ulom itet Amasa me lek ifet otu, mè itaba ọmọ iriaak, ikiweek inyinyi ọmọ ejit.

¹⁰Amasa ìkariọọn̄ ibe ke Jowabu îkaan̄ oge akọn̄ me ubọk. Jowabu osasa oge akọn̄ ya ichim Amasa me owot mgbọ ge gaalek, otutuuk nkat òkup ọmọ me owot ogbugbuku isibi igwook me ijọn̄. Amasa okwukwu. Jowabu mè Abisai ogwu ngwan̄ enenikijijen̄e ikana iweek Sieba gwun̄ kè Bikiri.

¹¹Ene ge me lek ebi akọn̄ kè Jowabu onenikeke me agba lek nkwukwu kè Amasa, mè itumu ibe, “Ogwu geelek òchechieek inyi Jowabu, mè ikeke si inyi Debit, ene ya igọọk Jowabu!”

¹²Amasa me ijọn̄ me eden̄ oniin̄ olaakbe me emen eje kan̄. Ogwu geelek òjeje initoon̄ me lek, îra ichak ikeke. Mgbọ ogwu akọn̄ òtutumu ikọ ya omun̄be ikeya, inenitaba nkwukwu kè Amasa isan̄a me ejit oniin̄ ya isi itap me emen oron, mè isa ofọnti iwele ichit.

¹³Mgbọ esan̄abe nkwukwu kè Amasa isan̄a me eden̄ oniin̄, otutuuk ebi akọn̄ enenikiraka igọọk Jowabu isi ikiweek Sieba gwun̄ kè Bikiri.

¹⁴Sabum mgbọ ya, Sieba îsa ata mgbọ ije ikana otutuuk otoko ebi Ijeren, mè isi ire ama Aben Bet Maaka, mè otutuuk agan̄ ebi Beri. Otutuuk kiban̄ enenigbaan̄ ititiin̄, mè inigọọk ọmọ.

¹⁵Otutuuk ebi akọn̄ kè Jowabu enunu, mè inikpa mbin akọn̄ ikana ama Aben Bet Maaka, mè Sieba me emen. Ebi akọn̄ kè Jowabu enanama obubot mbin akọn̄ ichak me lek ama ya, obubot ya okekeke me lek mgban ama ya. Ema ekekigoon̄ mgban ama ya, inyi igbugbọ.

¹⁶Mgbọ ema ekigoon̄ mgban ama ya, ogwu enenwaan̄ ge òkakaan̄ iriọọn̄-inu okukup me emen ama ya, mè ikitaan̄ ukpo itumu ibe, “Ìgban̄! Ìgban̄! Ìsi ìtumu ìnyi Jowabu ibe inu me ere keyi, inyi ǹtumu ikọ melek kan̄.”

¹⁷Jowabu onenije igbet lek ogwu enenwaan̄ ya, ogwu enenwaan̄ ya onenido ọmọ ibe, “Owu ore Jowabu?” Jowabu ochechieek ibe, “Iin̄, emi ke îre.” Ogwu enenwaan̄ ya onenibe, “Gban̄ inu emi ogwu usun̄ kwun̄ mbatumu inyi owu.” Jowabu obebe ọmọ, “Emi gwa ǹkigban̄.”

¹⁸Ogwu enenwaan̄ ya onenitumu ibe, “Me ukot ikaan̄, ekitumu ibe, ‘Ìsi ìdo ebi Aben.’ Ikeya si, isido si me otu ebi Aben, ikọ îra ita.

¹⁹Ama kiji ìre ama esuuk me Ijeren, mè ire si ama ògbegbe utoon̄-ejit me otutuuk Ijeren. Ìre enyi ekiweek inenigwak ama òrere uga me otutuuk Ijeren? Keke orọ enyi ebenijijaka ìrot Okumugwem?”

²⁰Jowabu onenifọọk ọmọ ibe, “Awaji gwak fiin̄! Emi m̀kpajijaka ama, m̀kpachechep si ama kinyi. Awaji gwak fiin̄!

²¹Ìkare otitọt kiji ire eya. Îkaan̄ enerieen̄ ge ekigwen Sieba, gwun̄ kè Bikiri, ònan̄a me inyọn̄ ijọn̄ ogoon̄ ogoon̄ ebi otoko kè Iferem. Ogwu enerieen̄ yi îbene ikirọ ikeme Debit ogwu ubọọn̄. Ìsan̄a ọmọ gaalek ìsibi ìnyi eji, ke eji mêje inan̄a itele ama kinyi.” Ogwu enenwaan̄ ya onenibe Jowabu, “Ire ikeya, mêtọp ibot kan̄ isaba mgban ito inyi owu.”

²²Ogwu enenwaan̄ ya onenisa me nteme iriọọn̄-inu kan̄ ije ikana me lek ebi ama, ema etetet Sieba gwun̄ kè Bikiri ifieek ebek, mè iben ibot kan̄ itọp isaba mgban inyi Jowabu. Jowabu oneniwut otita, ebi akọn̄ kan̄ eyayat itele ama ya, mè igwu ikom ifon ama kiban̄. Jowabu si ogwugwu ikom isi lek ogwu ubọọn̄ me Jeruselem.

²³Jowabu ore ogwu ibot otutuuk ebi akọn̄ Ijeren; Benaya gwun̄ kè Jeyoyada ore ogwu ibot inyi ebi akọn̄ ebi Keret mè ebi akọn̄ ebi Pelet;

²⁴Adoram[18] ore ogwu ibot inyi ebi ìkisi ikwaan̄ òbọp; Jiosefat gwun̄ kè Ayiludu ore ogwu òkige mfufuk;

²⁵Sieba ore ogwu uti ikpa; Jadọk mè Abiata ere ebi ngwugwa;

²⁶sà Ira ogwu Jairi ore ogwu ngwugwa kè Debit.