Read obolo II Sam 21 Bible Online

II Sam 21 - obolo bible

II Sam 21

¹Me ukot mkpulu kè Debit, akan̄ oneninin̄ me ido Ijeren acha ita. Debit onenisi ido ida Okumugwem. Okumugwem onenibe, “Îre mije kè Sọọlu, melek uwu kan̄, òrere uwu ebi ìfiat eje ene. Îre mije îkpan̄be ebi Gibiọn.”

²Ogwu ubọọn̄ onenigwen ebi Gibiọn ititiin̄, mè initumu ikọ melek kiban̄. (Ebi Gibiọn kpere ebi Ijeren, ema ìre ebi ìsisik me owot iman ebi Amọ. Ebi Ijeren mîwuuk lek inyan̄a ibot inyi ema ibe ke kpebekpan̄ ema. Ire, Sọọlu osasa mije uga ulọk îkaan̄be me lek Ijeren mè Juda iweek ikpakpan̄ ema isan̄a.)

³Debit onenido ebi Gibiọn ibe, “Ìre keke ke enyi eweek ibe emi ǹrọ ǹnyi enyi me useen̄ inu Sọọlu orọbe enyi? Keke ke mbarọ isa irọ esuuk, inyi enyi egbana ebi eyi Okumugwem?”

⁴Ebi Gibiọn enenifọọk ọmọ ibe, “Eji kpekaan̄ unen idodo Sọọlu mè ìre ebi uwu kan̄ ibe enekpe eji alata okuket mè ìre alata araran̄. Eji kpekaan̄ si unen itetet ogwu Ijeren geege ikpan̄ mije inu yi.” Debit onenido ema ibe, “Ire ikeya, keke ke enyi ebe emi ǹrọ ǹnyi enyi ni?”

⁵Ema efọfọọk ogwu ubọọn̄ ibe, “Ogwu enerieen̄ ya ogwu òjijijaka eji, mè ichep eji, mè itutuku eji isan̄a me otutuuk okike ijọn̄ ido Ijeren,

⁶eji ekiweek ibe enyi eji ene jaaba me etete ebi owot iman kan̄, inyi eji ekpan̄, mè ekpulu ewele me isi Okumugwem me Gibiya, ama ebi kè Sọọlu, ogwu Okumugwem ogobobe.” Ogwu ubọọn̄ onenibe, “Mâsa ema inyi enyi.”

⁷Ogwu ubọọn̄ onenitele Mefiboset gwun̄ kè Jonatan, gwun̄ gwun̄ kè Sọọlu, mije inyan̄a-ibot eyi Debit mè Jonatan gwun̄ kè Sọọlu egbaan̄be inyan̄a me isi Okumugwem.

⁸Ogwu ubọọn̄ onenitet Aramọni mè Mefiboset, bọn ebirieen̄ iba ebi Rijipa gwun̄ kè Aya omanbe inyi Sọọlu, mè bọn ebirieen̄ go Merabu gwun̄ kè Sọọlu omanbe inyi Adiriyen gwun̄ kè Bajilai ogwu Meyola,

⁹mè isa ikana inyi ebi Gibiọn. Ema ebọbọkọ, mè isa isi ijeen̄ ikpan̄ me otu ọfọkọ me inyọn̄ ogoon̄ me isi Okumugwem. Ife cha ene jaaba egbagbaan̄ ikwaan̄ me ere ya me mgbọ ekirọkọ uko, me mgbọ ekibene irọrọkọ akpa balì.

¹⁰Rijipa, gwun̄ enenwaan̄ kè Aya onenimọnọ ekwut ufieejit isi iwele me inyọn̄ ewuuk ge me ere ya, mè ikup ikikpọ nkwukwu ife cha. Îkup ikeya ibene me mgbọ ebenebe ikirọkọ uko mege isi ire mgbọ aya otu ibot obenebe ikirep igwook me lek nkwukwu ife cha. Ìkachieek ibe ebi kè ofut òwulu me inyọn̄ egbet lek me ikarek, ìkachieek si ibe ebi kè anam oron egbet lek me eririeen̄.

¹¹Mgbọ ukpatu inu yi Rijipa gwun̄ enenwaan̄ kè Aya, ogwu ugan kè Sọọlu, orọbe orebe utọn̄ kè Debit,

¹²Debit onenisi ibọkọ ukwuuk kè Sọọlu mè ukwuuk kè Jonatan ogwu gwun̄ me ubọk ebi Jabes Giliadi. (Ebi Jabes Giliadi enwenween̄ lek isi ikpulu nkwukwu ife chi me oyet ama me Bet San, ere ebi Filisia ebenbe ema ijeen̄ me otu ọfọkọ mgbọ ekpan̄be ema isan̄a me inyọn̄ ogoon̄ Gilibowa.)

¹³Debit obọbọkọ otutuuk ukwuuk kè Sọọlu mè ukwuuk kè Jonatan ogwu gwun̄, mè inikpulu si ukwuuk ene jaaba cha ebi Gibiọn ejeen̄be ikpan̄ me otu ọfọkọ, isa igbaalek ika.

¹⁴Enenisa ukwuuk kè Sọọlu mè echi kè Jonatan ogwu gwun̄ isi ifuun̄ me udọn̄-ufuun̄ kè Kis nte kè Sọọlu, me Sela, me ijọn̄ ebi otoko kè Benjamin, mè irọ otutuuk inu igọọk me ike ogwu ubọọn̄ onyibe ida. Mgbọ eya orakabe, Awaji onenibene ikifọọk uriaak ofolek ijọn̄ ido Ijeren.

¹⁵Akọn̄ onenikpọk ibene me etete ebi Filisia mè ebi Ijeren. Debit onenisa ebi akọn̄ kan̄ isibi isi itim akọn̄ me lek ebi Filisia, mè itim akọn̄ ya mege efuuk otata ọmọ me emen.

¹⁶Ogwu akọn̄ ebi Filisia ge ekigwen Isibi-Benobu, ogwu owot iman ebi kè Rafa, onenikiriak lek ibe ke ọmọ môkpan̄ Debit. Ekwe esabe irọ ibot otunwa kè Isibi-Benobu îlobo iso kilo ita mè okpọkọ, ọmọ si îken lek akọn̄ iso, mè ijeen̄ aya oge akọn̄.

¹⁷Ire, Abisai gwun̄ kè Seruya onunu initap ubọk inyi Debit, mè ikpan̄ ogwu Filisia ya. Ebi akọn̄ kè Debit eneninyan̄a ibot inyi Debit ibe, “Owu òkpoyaka igọọk eji isibi isi akọn̄ ofifi, inyi owu okakwu, mè ìsa me ikeya ìrọ inyi mkpukan̄ ebi Ijeren iniin̄.”

¹⁸Ike mgbọ okije, ebi Ijeren ekpọkpọk itim ofifi akọn̄ me lek ebi Filisia me Gobu. Me emen akọn̄ keyi, Sibekai ogwu Usa onenikpan̄ Safu, ene ge me lek ebi owot iman kè Rafa.

¹⁹Me emen ofifi akọn̄ ebi Ijeren etimbe melek ebi Filisia me Gobu, Eliyanan, gwun̄ kè Jare-Oregim, ogwu Beteleyem, onenikpan̄ Golayat ogwu Gat[19] ogwu ukot otunwa kan̄ ominbe ikup kubọk ulobo uti ilọk-ekwut.

²⁰Me ofifi akọn̄ etimbe me Gat, îkaan̄ ene ge òmimin, mè ijọn̄ọ itet inyọn̄, mè ikaan̄ otubọk gweregwen gweregwen me ubọk agan̄ ge, mè ikaan̄ si otukot gweregwen gweregwen me ukot agan̄ ge. Otutuuk otubọk kan̄ mè otukot kan̄ onenisibi akọp iba mè ini. Ọmọ si ìre ogwu owot iman kè Rafa.

²¹Mgbọ ene yi okigigam ebi Ijeren, Jonatan gwun̄ kè Simeya ngwan̄ kè Debit, okpakpan̄ ọmọ ifiin̄.

²²Ebi ene ini chi ìre ebi owot iman kè Rafa me Gat. Debit mè ebi akọn̄ kan̄ ekpakpan̄ ema isan̄a.