Read obolo II Sam 23 Bible Online

II Sam 23 - obolo bible

II Sam 23

¹Echichi ìre òta ikọ Debit otumube: “Udọk udọk ikọ ònan̄a me otu kè Debit gwun̄ kè Jesi, udọk udọk ikọ ogwu enerieen̄ Awaji obenebe ifo inyọn̄, ogwu Awaji kè Jekọp otọkọbe aran̄ me ibot, ukama ukama ogwu òkọt okwa Ijeren:

²Ekwukwu Okumugwem îtumu ikọ itibi emi; ikọ kan̄ òwa me otu n̄a.

³Awaji ebi Ijeren îtumu ikọ, Ewuuk ebi Ijeren ìtumu inyi emi ibe ikeyi: ‘Ogwu òkikpulu ebi ene me ata irọrọ; ogwu òkikpulu me ukpook Awaji,

⁴ìbet lek utoon̄ ewelegwe mgbọ ura okibum, me ewelegwe eyi kpunube oduku inyọn̄ me isinyọn̄; ìbet lek utoon̄ òkitoon̄ mgbọ ibot orepbe isan̄a, eyi òkirọ inyi mbubet itibi isibi me ijọn̄.’

⁵Îre ikeya ke uwu n̄a okup melek Awaji. Mije, inyan̄a-ibot mgbọ geelek ke înyan̄a inyi emi; òrere inyan̄a-ibot eyi kpebekọt igwak, kpebekọt si inwene. Ìbokpọkpọ ikinyan̄a emi isibi mgbọ geelek, mè ikirọ otutuuk inu geelek òkup emi me uyọt inyi emi.

⁶Ire me lek ebi ijo ife, ebegbọgbọ ema ifiin̄ kubọk ukpak, echi kpekikọt isa ubọk ikpulu.

⁷Ene geelek òbogbọ ukpak, ìbosa orọk okwukwut mè ujọn̄ọ ukut otunwa igbọ; ere egbọbe igwook, ere keya ke etap ukan̄ iwọp.”

⁸Erieen̄ ebi usọ akọn̄ kè Debit ire echi: Josebu-Basebet[20] ogwu Takemọn,[21] ọmọ ore ogwu ibot me lek Ikpele Ebi Usọ Akọn̄ Ita ebi ìkup ọkpọkpọ. Ọmọ ore si Adino ogwu Ejino.[22] Îre ọmọ osa otunwa kan̄ ikpan̄ efit ene jeeta me efe edim ge.

⁹Ogwu ògọgọọk ọmọ ìre Elieja gwun̄ kè Dodo ogwu Ayoyi. Ọmọ me lek ilile ebi usọ akọn̄ cha ìkekeke melek kè Debit mgbọ ge ebi Filisia etimbe akọn̄ me lek ebi Ijeren. Ebi Ijeren elilim,

¹⁰ire, ọmọ okekeke inye, mè ikpan̄ ebi Filisia mege ubọk kan̄ owọbe, mè igọm ikam me lek ibot oge akọn̄. Okumugwem onyinyi ebi Ijeren ikpele ntim-mkpan̄ usen ya. Mgbọ ebi akọn̄ Ijeren egwube ikom inu me lek kè Elieja me isi akọn̄, akọn̄ îta. Mfum gaalek ke ema enisoon̄.

¹¹Ogwu òso ita ìre Sama gwun̄ kè Age ogwu Arari. Mgbọ ebi akọn̄ Filisia enube inititiin̄ me Leyi me emen uko ewopbe lentin ijot, ebi akọn̄ Ijeren elilim, kpekọt ikeke ida ebi Filisia.

¹²Ire, Sama okekeke me eden̄ uko ya, mè itim akọn̄ me lek ebi Filisia, ìkachieek ibe ejijaka uko ya. Okumugwem onyinyi ebi Ijeren ikpele ntim-mkpan̄.

¹³Me ibot mgbọ irọkọ-uko, ene ita me lek akọp ebi ibot akọn̄ ita kè Debit cha eneninu me lek kè Debit me agba lek ǹkororok òkup me Adulam. Ike mgbọ ya, usini ebi akọn̄ Filisia mîrieen̄ akọn̄ me iteke Refayim.

¹⁴Mgbọ ya Debit ìkup me emen okwukwek akọn̄, sà ebi akọn̄ Filisia etitiin̄ me Beteleyem.

¹⁵Mgbọ ya, ulọk ama onenimin enenen me emen kè Debit, inenikinina lek ibe, “Jei, mudim ònan̄a me udọn̄ mun̄ òkup me agba lek otunchit ama Beteleyem ke manwọ mgbọ keyi isa isiki ebek!”

¹⁶Ikpele Ebi Usọ Akọn̄ Ita cha esisi ibum itibi orieen̄ akọn̄ ebi Filisia ya, mè iraka isi ichibi mudim me udọn̄ mun̄ òkup me agba lek otunchit ama Beteleyem, mè iben isa ika ijet Debit. Ire, Debit ìkachieek inwọnwọ mudim ya. Kpan̄asi ikeya, ibeben igwook me ijọn̄ inyi Okumugwem, kubọk ngwugwa miin̄ egwogwook,

¹⁷mè itumu ibe, “Okumugwem gwak fiin̄! Kachieek ibe emi ǹrọ ojelek inu òkup ikeya! Emi m̀kpakọt inwọ mbet lek mudim keyi! Eyi ìre eje ebi ife chi ebi ìchechieek mkpa isi ichibi mudim yi!” Debit ìkachieek inwọnwọ mudim ya. Uyeke uyeke inu òkup ikechi ke Ikpele Ebi Usọ Akọn̄ Ita chi ekirọ.

¹⁸Abisai gwun̄ enerieen̄ Seruya omanbe, òrere ngwan̄ kè Jowabu, ore ogwu ibot me lek Ikpele Ebi Usọ Akọn̄ Ita cha. Îsa otunwa kan̄ ikpan̄ efit ebi akọn̄ ita, mè isa me ikeya ikaan̄ erieen̄ òtataan̄ etip kubọk Ikpele Ebi Usọ Akọn̄ Ita cha.

¹⁹Ọmọ ke enyi umin igak otutuuk Ikpele Ebi Usọ Akọn̄ Ita cha.[23] Inenikana ogwu ibot inyi ema. Ire, ìkakup me otu ifuk Ikpele Ebi Usọ Akọn̄ Ita cha.

²⁰Benaya gwun̄ kè Jeyoyada, ogwu Kabijen, ìre ikpele ogwu usọ akọn̄, ogwu òrọrọ owuwa inu òtaan̄ etip me isi akọn̄. Îre ọmọ okpan̄ ebi akọn̄ Mowabu iba eriọọn̄be erieen̄. Ofifi si, usen ge ibot awo okirep, igọgọọk egbe àtat ge inin̄ emen udọn̄, mè ikpan̄ egbe àtat ya me emen udọn̄ ya.

²¹Me ike mgbọ ge si, îkpan̄ ikpele ogwu Ijipiti ge òkup mgbugbo mgbugbo. Ubọk geelek ogwu Ijipiti ya okaan̄be otunwa me ubọk, Benaya okakaan̄ ibet gaalek me ubọk isa ije inin̄ ọmọ lek, mè itet otunwa kan̄ ya ibọkọ, mè isa ikpan̄ ọmọ.

²²Uyeke uyeke inu òkup ikechi ke Benaya gwun̄ kè Jeyoyada okirọ, mè isa me ikeya ikaan̄ erieen̄ me etete Ikpele Ebi Usọ Akọn̄ Ita cha.

²³Sa me ikeya, ikakaan̄ umin enenen igak otutuuk Akọp Ebi Usọ Akọn̄ Ita cha. Ire, kpefuk ọmọ itap me otu ifuk ebi Ikpele Ebi Usọ Akọn̄ Ita cha. Debit onenisa ọmọ ito me ibot ebi akọn̄ ìkibem ọmọ.

²⁴Erieen̄ ebi ofifi ene me lek Akọp Ebi Usọ Akọn̄ Ita cha ìre: Asayen ngwan̄ kè Jowabu, mè Eliyanan gwun̄ kè Dodo ogwu Beteleyem,

²⁵mè Sama ogwu Arọdu, mè Elika ogwu Arọdu,

²⁶mè Eles ogwu Palet, mè Ira gwun̄ kè Ikes ogwu Tekowa,

²⁷mè Abieja ogwu Anatọt, mè Mebunai[24] ogwu Usa,

²⁸mè Salimọn ogwu Ayoyi, mè Mayarai ogwu Netofa,

²⁹mè Elebu[25] gwun̄ kè Bayana ogwu Netofa, mè Itai gwun̄ kè Ribai ogwu Gibiya òkup me agan̄ ebi otoko kè Benjamin,

³⁰mè Benaya ogwu Piraton, mè Idai[26] ogwu ònan̄a me iteke Gayas,

³¹mè Abi-Alibọn ogwu Araba, mè Ajimabet ogwu Bariyum,

³²mè Eliaba ogwu Sayalibọn, mè bọn ebirieen̄ kè Jasen, mè Jonatan,

³³mè Sama ogwu Arari, mè Ayiam gwun̄ kè Sarari[27] ogwu Arari,

³⁴mè Elifelet gwun̄ kè Ayasibai ogwu Maaka, mè Eliyam gwun̄ kè Ayitofen ogwu Gilo,

³⁵mè Ejiro ogwu Kamen, mè Payari ogwu Araba,

³⁶mè Igan gwun̄ kè Netan ogwu Soba, mè Bani ogwu otoko kè Gadi,

³⁷mè Selek ogwu Amọn, mè Nayarai ogwu Bierot, ogwu òkiben nroon̄ akọn̄ kè Jowabu, ogwu ogwu uga orebe Seruya,

³⁸mè Ira ogwu Itiri, mè Garebu ogwu Itiri,

³⁹mè Uraya ogwu Et. Ema otutuuk ìre akọp ene ita mè jaaba.