Read obolo II Sam 24 Bible Online

II Sam 24 - obolo bible

II Sam 24

¹Okumugwem onenikpọk inaan̄ ejit me lek ebi Ijeren, mè irọ ibe Debit itap ema ufialek me lek. Okumugwem ìtọ inyi Debit ibe, “Si fuk otu ifuk ebi Ijeren mè Juda.”

²Ogwu ubọọn̄ onenitumu inyi Jowabu ogwu ibot akọn̄ kan̄[28] ibe, “Je kana otutuuk otoko ebi Ijeren, bene me Dan si re Bieseba, mè fuk otutuuk ebirieen̄ ebi akọn̄, inyi ǹriọọn̄ otu ifuk kiban̄.”

³Ire, Jowabu ofọfọọk ogwu ubọọn̄ ibe, “Kè Okumugwem Awaji kwun̄ imumana otu ifuk ebi akọn̄ chi efit mgbọ, mè chieen̄ ogwukaan̄ n̄a, ogwu ubọọn̄, imun̄. Ire, ǹdo owu nu! Ìre mije keke ke oborọ inu yi?”

⁴Ire, ikọ ogwu ubọọn̄ okeke inye. Jowabu mè ebi ibot akọn̄ enanan̄a me isi ogwu ubọọn̄ isibi, mè isi ifuk otu ifuk ebirieen̄ ebi akọn̄ me Ijeren.

⁵Ema enenisaba okwaan̄ Jodan, mè inigwugwuun̄ uwu ọfọ kiban̄ me agba lek ama Aroweri, me agan̄ osiki ama ya, me emen iteke òkup me inyọn̄ ijọn̄ ebi otoko kè Gadi. Ema eneninan̄a me ere ya ije isi ire Jajeri.

⁶Ema enenisi ire Giliadi, mè agba ijọn̄ Tatim Odisi, mè isi ire Dan Jan, mè ikana isi Sidọn,

⁷mè inire Taya ama mgban akọn̄, mè otutuuk ama ebi Ifi mè ama ebi Kenan. Ema enenije isi ire Bieseba me emen èwê agan̄ osiki Juda.

⁸Ikeyi ke ema ejijen̄e ikana me otutuuk inyọn̄ ijọn̄ Ijeren, mè inigwu ikom ika inu Jeruselem. Ije ya ìben ema onyan̄ onaan̄ge mè akọp usen iba.

⁹Jowabu onenisa otu ifuk ebirieen̄ ebi mêkọtbe isi akọn̄ initumu inyi ogwu ubọọn̄. Me Ijeren ke ekaan̄ efit obop ebirieen̄ jeeta ebi mêkọtbe iben oge isibi isi akọn̄, sà Juda ke ekaan̄ efit obop ebirieen̄ go.

¹⁰Ejit kè Debit onenitip ọmọ oyerebet enenen mije ifuk-ene ya îfukbe. Itutumu inyi Okumugwem ibe, “Inu yi nrọbe îlọ enenen. Mgbọ keyi, Okumugwem, soso ben nrọ-nlọ keyi san̄a emi, ogwu usun̄ kwun̄, me ibot. Îre atalek burubut inu ke nrọ.”

¹¹Me ofit iwele kan̄, sabum Debit onibolo chieen̄, Okumugwem onyinyi Gadi ogwu òkiben nriran inyi Debit etip ibe,

¹²“Si tumu nyi Debit ibe ke Okumugwem ìbe ikeyi: ‘Inu ita ke mbanyi owu. Kpọ ge gobo. Geelek ogobobe, eya ke mbarọ owu.’ ”

¹³Gadi onenije isi lek kè Debit, mè itumu inyi ibe, “Eyi owa onwọn owu me lek? Ìre akan̄ ininin̄ ido kwun̄ acha ita?[29] Sà ìre ebi ochicha kwun̄ ilililaba owu ikana ere onyan̄ ita? Sà ìre ijo orukan̄ igwogwook ichit lek ebi ido kwun̄ usen ita? Mgbọ keyi, keek inu ofolek, mè tumu fieek eyi ònwọnwọn owu me lek, inyi mâben isi itumu inyi ogwu òraria emi inu.”

¹⁴Debit onenibe Gadi, “Inu yi îyọt emi me lek enenen. Tele mè eji erọn̄ enin̄ me ubọk Okumugwem, mije, ejit nsan kan̄ îmin. Kachieek ibe emi ǹrọn̄ ǹnin̄ me ubọk ebilene.”

¹⁵Okumugwem oraria ijo orukan̄ itap me Ijeren bene me ewelegwe usen ya mege ire mgbọ îsun̄be. Akọp obop ene jaaba ekwakwaan̄ me emen orukan̄ ya, ibene me Dan isi ire Bieseba.

¹⁶Ire, me mgbọ ogwu osat Awaji obonijijaka Jeruselem, ufialek ya ebi ene ekibọkọ onenifieek Okumugwem me lek. Itutumu inyi ogwu osat ya òkigwook ebi ene ijo orukan̄ me lek ibe, “Îkem! Tet ubọk kaan̄!” Me ike mgbọ ya, ogwu osat Okumugwem ya ìkup me ere igen̄ akpa kè Arawuna ogwu Jebus.

¹⁷Mgbọ Debit omun̄be ogwu osat Awaji ya okikpan̄ ebi ene, itutumu inyi Okumugwem ibe, “Îre emi nrọ ijo inu, mè irọ inu ikatatge. Ife chi ìre arọọn̄ ikike! Ìre keke ke ema erọ ni? Sulu emi osusut, mè sulu si ebi uwu n̄a gbaalek.”

¹⁸Me usen yaage, Gadi onunu initumu inyi Debit ibe, “Je si nama ntook ngwugwa nyi Okumugwem me ere igen̄ akpa kè Arawuna ogwu Jebus.”

¹⁹Debit onanan̄a ije, ike Okumugwem onyibe Gadi ida ibe initumu inyi ọmọ.

²⁰Mgbọ Arawuna obenebe chieen̄ imun̄ ogwu ubọọn̄ melek ebi ibot ikwaan̄ kan̄ ekije inu, ijeje isi ikweek ọmọ, mè igele igwook me ijọn̄ me isi kan̄, mè ikana isi ikwuun̄.

²¹Arawuna onenibe, “Keke orọ owu ogwukaan̄ n̄a, ogwu ubọọn̄, ònu me lek n̄a, ogwu usun̄ kwun̄?” Ogwu ubọọn̄ onenifọọk ibe, “Ǹnu inenilep ere igen̄ akpa kwun̄, inyi ǹsa ǹnama ntook ngwugwa ǹnyi Okumugwem, inyi ijo orukan̄ yi ita ebi ene me lek.”

²²Arawuna otutumu inyi Debit ibe, “Ikaan̄ inu geelek òneneme owu ogwukaan̄ n̄a, ogwu ubọọn̄, mọnọ sa si gwa ngwugwa nyi Okumugwem. Kpọ eriembuuk mêsabe igwa ngwugwa ewọwọp iriọk ire eyi. Kpọ uti ibak-ijọn̄ melek ogbugboon̄ ekisa igba anam iba itobo ikam ire echi, kpulu sa rọ iye ebesa igwa ngwugwa.

²³Otutuuk inu chi ke emi Arawuna nsa inyi owu, ogwu ubọọn̄.” Arawuna otutumu si inyi ogwu ubọọn̄ ibe, “Kè Okumugwem Awaji kwun̄ ibọkọ ngwugwa kwun̄.”

²⁴Ogwu ubọọn̄ otutumu inyi Arawuna ibe, “In̄-in̄, m̀balelep inu chi me ubọk kwun̄, mè ikpe ewe. Emi m̀kpagwa ngwugwa ewọwọp iriọk inyi Okumugwem Awaji n̄a eyi ǹkakpe ikpoko geege me lek.” Debit onenilep ere igen̄ akpa ya melek eriembuuk ya me akọp ikpoko alata okuket go.

²⁵Debit onanama ntook ngwugwa inyi Okumugwem me ere ya, mè inigwa ngwugwa ewọwọp iriọk melek ngwugwa esuuk me ere ya. Okumugwem onọnọ uriaak ekiriaak me ibot ido ya, ijo orukan̄ ya ofefieek me Ijeren.