Read obolo II Sam 3 Bible Online

II Sam 3 - obolo bible

II Sam 3

¹Ebi uwu kè Sọọlu mè ebi uwu kè Debit mîtim akọn̄ ijọn̄ọ mgbọ enenen. Ebi uwu kè Debit ekpọkpọ ikinye lek, ire, lek ebi uwu kè Sọọlu okpọkpọ ikiwọ.

²Ebi nwa kè Debit enenimaan̄ bọn ebirieen̄ inyi Debit me Eburọn. Adasi gwun̄ enerieen̄ kan̄ ìre Aminọn ogwu Ayinowam ogwu Jesereli omanbe.

³Òso gwun̄ enerieen̄ iba kan̄ ìre Kileyabu ogwu Abigen, nwakpa kè Naban ogwu Kamen, omanbe. Òso gwun̄ enerieen̄ ita kan̄ ìre Abusolọm ogwu Maaka, gwun̄ kè Talimayi ogwu ubọọn̄ Gesuru omanbe.

⁴Òso gwun̄ enerieen̄ ini kan̄ ìre Adonija ogwu Agit omanbe. Òso gwun̄ enerieen̄ go kan̄ ìre Sefatiya ogwu Abitan omanbe.

⁵Sà òso gwun̄ enerieen̄ gweregwen kan̄ ore Itereyam ogwu Egila nwa kè Debit omanbe. Emaan̄ bọn ebirieen̄ gweregwen chi inyi Debit me Eburọn.

⁶Me ike mgbọ akọn̄ okitim inyi isi me etete ebi uwu kè Sọọlu melek ebi uwu kè Debit, Abina okekikeke inye melek ebi uwu kè Sọọlu.

⁷Îkaan̄ ugan kè Sọọlu ge ekigwen Rijipa, gwun̄ kè Aya. Usen ge, Isiboset onenitoon̄ Abina uraamọn ibe, “Ìre owu òjeje isi igọọk ogwu ugan kè nte n̄a ilaak?”

⁸Ikọ ya Isiboset otumube onanaan̄ Abina ejit enenen, Abina onenibe ọmọ, “Ìre emi ìre ibo òkisi ikwaan̄ inyi ebi Juda? Chereyi, emi ǹkisiki ibot inyi uwu kè Sọọlu nte kwun̄, mè ebi ngwan̄ kan̄, mè ebi unene kan̄. Ǹkaleke owu ìtap me ubọk kè Debit. Ire, owu onenitoon̄ emi uraamọn cherekeyi me lek ogwu enenwaan̄ yi.

⁹Kè Awaji isulu emi Abina osusut, mè itoon̄ urot, ire ǹkarọ ibe use eyi Okumugwem ochieekbe Debit irọ iso.

¹⁰Okumugwem ìchieek Debit use ibe ke mkpulu mônan̄a me ubọk ebi owot iman kè Sọọlu inin̄ me ubọk kè Debit, ke Debit mônene inyọn̄ ogboon̄ ubọọn̄, mè ikikpulu otutuuk Ijeren mè otutuuk Juda, ibene me Dan isi igwook me Bieseba.”

¹¹Ikọ ya otetet Isiboset ukpook enenen, ìkakọt ìfọọk Abina ikọ geege.

¹²Abina onenisan̄a ebi osat iria isi lek kè Debit, me otuchieen̄ kan̄, ibe esi edo Debit ibe, “Ìre ijọn̄ yi ìre eyi ekene ene? Gọọk emi kaan̄ mgbaan̄-nchieek, ke mâtap ubọk ikana otutuuk ido Ijeren itap owu me ubọk.”

¹³Debit ofọfọọk ibe, “Înwọn ma! Ire, sabum eji menigbaan̄ imun̄ isi mè isi, mweek ibe owu òrọ inu ge ònyi emi. Inu ya ìre ikeyi: Owu òkpomun̄ emi isi, îtata òsasa Mikali, gwun̄ enenwaan̄ kè Sọọlu, inu me isi n̄a.”

¹⁴Debit oneniria osat isi lek kè Isiboset, gwun̄ kè Sọọlu, ibe, “Nyi emi Mikali, nwa n̄a, ogwu nsabe efit lek ebirieen̄ ebi Filisia ikpe me ibot.”

¹⁵Isiboset oraria ibe esi ebọkọ Mikali me ubọk ogwu olom, Palitien, gwun̄ kè Layis.

¹⁶Ogwu olom okekito ito igọọk ọmọ me udun̄ mege isi ire ama Bayurim. Abina obebe ọmọ, “Gwu kom fo!” Igwugwu ikom ifo.

¹⁷Abina onenititiin̄ ebi ugane Ijeren, mè itumu inyi ema ibe, “Karake usen, enyi ekiweweek ibe Debit inire ogwu ubọọn̄ kinyi!

¹⁸Mgbọ keyi, irek îsibi inyi enyi. Mije, Okumugwem ìtumu inyi Debit ibe, ‘M̀basa me ubọk kè Debit ogwu ikwaan̄ n̄a inyan̄a ebi n̄a, Ijeren, isibi me ubọk ebi Filisia mè ubọk otutuuk ebi ochicha kiban̄ geelek.’ ”

¹⁹Abina îtumu si ikọ melek ebi otoko kè Benjamin, mè ije isi itumu ikọ melek kè Debit me Eburọn, mè ikpa otutuuk inu ebi Ijeren mè otutuuk ebi otoko kè Benjamin eweekbe inyi Debit.

²⁰Abina melek akọp ebi akọn̄ iba kan̄ enenichichini melek kè Debit me Eburọn. Debit ototo ijọk inyi Abina mè ebi melek kan̄.

²¹Abina onenitumu inyi Debit ibe, “Tele mè ǹje ǹsi ǹtitiin̄ otutuuk ebi Ijeren ǹnyi owu, ogwukaan̄ n̄a, ogwu ubọọn̄, inyi ema enekaan̄ mgbaan̄-nchieek melek kwun̄, inyi owu ònokpulu ema ike ejit kwun̄ onemebe.” Debit oraria Abina isibi me utelelek.

²²Ìkafiin̄, Jowabu melek ebi akọn̄ kè Debit ekekinan̄a me ere ema esibe enun̄unun̄ ika, melek ogbogbo inu ema ekpulube me akọn̄. Me ike mgbọ ya, Abina ìkayaka ìkup melek kè Debit me Eburọn, mije, Debit îra iwuwuuk lek iria ọmọ itap me oniin̄ ije me utelelek.

²³Mgbọ Jowabu mè otutuuk ebi akọn̄ kan̄ ekabe inire, enenikpa inyi ibe ke Abina, gwun̄ kè Neri, înu inimun̄ ogwu ubọọn̄, ogwu ubọọn̄ otututuun̄ itap me oniin̄. Inanan̄a ije ifo me utelelek.

²⁴Jowabu osisi ido ogwu ubọọn̄ ibe, “Ìre kpasi inu ke orọ ikeyi? Abina înu inimun̄ owu. Òjeje itele ibe inan̄a ije ifo? Me atikọ, îra ifo ma!

²⁵Owu oriọọn̄ ibe ke Abina gwun̄ kè Neri ìnu inenifiaan̄ owu, inyi ọmọ isa me ikeya iriọọn̄ otutuuk ukot ije kwun̄ mè otutuuk inu owu okirọ.”

²⁶Jowabu onanan̄a itele Debit, mè isi iria ene ibe esi esa Abina egwu ekom enu. Ife cha esisi itut Abina me agba lek udọn̄ mun̄ òkup me Sira, mè isa igwu ikom ika. Ire, Debit ìkariọọn̄.

²⁷Abina ogwugwu ikom ika inu Eburọn, Jowabu onenisa ọmọ ije ida ibọkọ ifo agan̄ otunchit, kubọk ìbosi itumu ikọ melek kan̄ me nlelet. Me ere ya, Jowabu osasa oge ichim Abina me lek owot, ikwukwu. Jowabu ìkpan̄ Abina me useen̄ Abina okpan̄be Asayen ngwan̄ kan̄.

²⁸Mgbọ Debit onọbe inu ya òrọrọ, itutumu ibe, “Me isi Okumugwem, mege ire mgbọ geelek, ubọk n̄a mè ubọk otutuuk ebi ido n̄a ìtatana, eji kpekaan̄ ubọk me lek eje kè Abina gwun̄ kè Neri.

²⁹Kè eje kè Abina ikana itoon̄ me ibot kè Jowabu mè itoon̄ si me ibot otutuuk ebi uwu nte kè Jowabu! Me ukot geelek me owot kè Jowabu, mêkifiak orukan̄ inya òkpọkpọ ikilut mè orukan̄ inyakpa. Kè ebi owot iman kan̄ ekesa mkpat etọkọ, ekpọkpọ ekekpan̄ ema me akọn̄, inorie otu ikinan ema.”

³⁰Jowabu mè Abisai ogwu ngwan̄ ekpan̄ Abina mije kè Asayen ngwan̄ kiban̄ ogwu Abina okpan̄be me akọn̄ me Gibiọn.

³¹Debit otutumu inyi Jowabu mè otutuuk ebi melek kan̄ ibe, “Ìtaba ofọnti kinyi ìgwak, mè ìtap ofọnti ufieejit, mè ìto ito ufieejit ìsa ìkije me isi nkwukwu kè Abina.” Ogwu ubọọn̄ Debit okekije me udun̄ igọọk m̀kpata emaan̄be Abina me inyọn̄.

³²Enenifuun̄ Abina me Eburọn. Ogwu ubọọn̄ Debit otataan̄ ukpo ikito ito me otu udọn̄-ufuun̄ kè Abina. Otutuuk ene egọgọọk si ikito ito.

³³Ogwu ubọọn̄ onenikọt okwa ito inyi Abina ibe, “Ìre ìjeje igbe ibe Abina ikwu mkpa kubọk ogwu welewele?

³⁴Kpebọp owu ubọk, kpetatap owu mkpọn me ukot. Ubọk ene okikwu mkpa uwuuk-lek me ubọk ebi afa, ikeya ke owu okwu.” Otutuuk ene eyayaka ikpọk igwook si me lek ito me ibot kè Abina.

³⁵Sabum egwe usen ya onifit, otutuuk ene enunu inikikat Debit ejit ibe ibọkọ inorie irie. Ire, Debit onyanyan̄a ibot ibe, “Kè Awaji isulu emi osusut, mè itoon̄ urot, ire nchak fituru mè ìre ofifi inorie me otu sabum ura ònochep!”

³⁶Otutuuk ene etetet ibot me lek ikọ ya îtumube, itotop ema me lek enenen. Me atikọ, inu geelek ogwu ubọọn̄ orọbe ìkpọkpọ ikibele otutuuk ebi ene ejit.

³⁷Sa me ikeya, otutuuk ebi Juda mè otutuuk ebi Ijeren erọriọọn̄ ibe ke mkpa kè Abina gwun̄ kè Neri ìkanan̄a me ubọk kè Debit.

³⁸Ogwu ubọọn̄ onenikitumu inyi ebi ibot ikwaan̄ kan̄ ibe, “Ìre enyi kperiọọn̄ ibe ke îre ogwu ibot mè ogwu ilile onan̄a me etete ebi Ijeren ikwu cherekeyi?

³⁹Cherekeyi, emi ogwu ubọọn̄ ogwu etọkọbe aran̄ me ibot, lek îwọ emi. Bọn ebirieen̄ kè Seruya chi mînye lek enenen isaba iraka emi ubọk. Okumugwem obokpe ebi ìrọ ijo inu chi mkpukpe igọọk me ubọk ikwaan̄ kiban̄.”