Read obolo II Sam 4 Bible Online

II Sam 4 - obolo bible

II Sam 4

¹Mgbọ Isiboset gwun̄ kè Sọọlu onọbe ibe ke Abina îkwu me Eburọn, efuuk otata ọmọ me emen, urimi oninin̄ si me otutuuk Ijeren.

²Me ike mgbọ ya, Isiboset îkaan̄ ebirieen̄ iba ìrere ebi ibot inyi ebi enun̄unun̄ afa. Ene ge ke ekigwen Bayana, sà ogwugwulọ ke ekigwen Rekabu. Ema ìre bọn kè Rimọn ogwu ama Bierot me otoko kè Benjamin. Emọnọ Bierot kubọk ama ebi otoko kè Benjamin,

³mije, ebi Bierot elilibi isi itap ibot me Gitayim, mè iluk me ere ya kubọk ebi ichen mege inire chereyi.

⁴(Jonatan gwun̄ kè Sọọlu îkaan̄ gwun̄ enerieen̄ ge òrere akọọk me ukot agan̄ iba. Ọmọ ìre gwun̄ acha go mgbọ Sọọlu mè Jonatan ekwaan̄be me isi akọn̄ me Jesereli. Mgbọ etip mkpa kiban̄ onire ama, ogwu òkikpọ ọmọ chieen̄ me lek obeben ọmọ isa ilibi me uran-lek, igagak inan̄a irọn̄ me ijọn̄, mè ikana akọọk. Erieen̄ gwun̄ ya ìre Mefiboset.)

⁵Usen ge, Rekabu mè Bayana, bọn kè Rimọn ogwu Bierot, eneninan̄a ije isi uwu kè Isiboset, mè isi ire uwu ya me ejit ikarek mgbọ Isiboset okilaak isiki efuuk eyi ikarek me emen agwut.

⁶Ema ekpọkpọ ije iraka isi inin̄ agan̄ emen emen uwu ya kubọk ebesi ikpulu akpa wit, mè isa oge akọn̄ ichim Isiboset me lek owot, ikwukwu. Rekabu mè Bayana ogwu ngwan̄ enenifiọọk isibi, mè ifon.

⁷Ema eraraka inin̄ emen agwut ya, mè isi imun̄ Isiboset olaakbe me inyọn̄ mkpilaak me emen agwut, mè ichim ikpan̄, mè ifieek ebek, mè iben ibot kan̄ isa ikaan̄ me ubọk ije otutuuk eririeen̄ ya, me oniin̄ emen iteke agba okwaan̄ Jodan.

⁸Ema enenisa ibot kè Isiboset ijet Debit me Eburọn, mè ibe ọmọ, “Kpọ ibot kè Isiboset gwun̄ kè Sọọlu ogwu ochicha kwun̄ ya, ogwu òweweek isasan̄a ugwem kwun̄, ire eyi. Chereyi, Okumugwem îra ikpe Sọọlu mè ebi owot iman kan̄ useen̄ inu ema erọbe owu, ogwu nte, ogwu ubọọn̄.”

⁹Debit onenifọọk Rekabu mè Bayana ogwu ngwan̄, bọn kè Rimọn ogwu Bierot ibe, “Kè lek ugwem Okumugwem ogwu ònyanyan̄a emi isibi me emen otutuuk ufialek n̄a!

¹⁰Mgbọ ogwu enerieen̄ ge onube initumu inyi emi ibe ke Sọọlu îkwu, mè ikeek ibe ke îre ata etip ke ọmọ osa ijet emi, ǹtetet ọmọ inyi ibe ekpan̄ me Sikilagi. Mkpukpe nsabe ikpe ọmọ ire eya me lek ata etip kan̄ îsabe inu!

¹¹Eyi kinyi ofieek ichit! Enyi, ebi afa kechi, enyi esi imun̄ ogwu ikalọge inu geege osikibe ilaak me inyọn̄ mkpilaak kan̄ me emen uwu kan̄, mè itet ikpan̄. Ìre enyi ekikeek ibe ke emi m̀kpado eje kan̄ me ubọk kinyi, mè isan̄a enyi isan̄a me linyọn̄ keyi?”

¹²Debit onyinyi ebi kan̄ ida, ekpakpan̄ ema, mè ifieek ubọk iba kiban̄ mè ukot iba kiban̄, mè iben ekirikit kiban̄ ijeen̄ me otu ọfọkọ, mè ibene igwuun̄ me agba òkpuku mun̄ òkup me Eburọn. Ire, ebeben ibot kè Isiboset ifuun̄ me udọn̄-ufuun̄ kè Abina me Eburọn.