Read obolo II Sam 6 Bible Online

II Sam 6 - obolo bible

II Sam 6

¹Debit onenikpọk igwen ebi ìriọọn̄ ukot akọn̄ me Ijeren ititiin̄, ema akọp obop ebi akọn̄ ita.

²Debit onenisa otutuuk ebi akọn̄ melek kan̄ isi ama Bayala me Juda[4] isisi iben okop inyan̄a-ibot Awaji, eyi ekigwen erieen̄ kan̄ ibak erieen̄ Okumugwem Ogwukaan̄ Inyọn̄ mè Ijọn̄, ogwu òkweek irek me etete ebi mbem emen inyọn̄ iba ìkup me inyọn̄ okop ya.

³Ema eneniben okop inyan̄a-ibot ya me uwu kè Abinadap òkup me inyọn̄ orioon̄, mè isa itap me emen ayaya uji ekpirikpo ge. Uja mè Ayio, bọn kè Abinadap, ekekisa ayaya uji ekpirikpo ya ikije.

⁴Enenikisa okop inyan̄a-ibot ya inan̄a me uwu kè Abinadap me inyọn̄ orioon̄ ya ikikwala isiki. Ayio okekije me agan̄ isi uji ya.

⁵Debit melek otutuuk ebi Ijeren enenikibele ejit,[5] mè ikidimi okwa, mè ikijop, mè ikikwak uneen̄ ile, mè uneen̄ ija, mè ekpete, mè otọkọrikọ, mè mkpamkpa isa igbaalek ikinwọọn̄ unwọọn̄ me isi Okumugwem.

⁶Mgbọ ema ejebe inire ere igen̄ akpa me Nakọn, eriembuuk ge me lek ebi kè eriembuuk ìkitaba uji ekpirikpo ya otọtọbọ ukot, mè ibonan̄a irọn̄. Uja onyanyana ubọk itet okop inyan̄a-ibot ya, inyi ikanan̄a ìrọn̄.

⁷Okumugwem onanaan̄ ejit enenen ikeme Uja, mije îfetbe lek irọ inu ikanyige ọmọ ulibi. Eya orọ, isusulu Uja ito me ijọn̄, ikwukwu mgbọ yaage me ere ya, me agba lek okop inyan̄a-ibot Awaji.

⁸Debit onanaan̄ ejit me lek unaan̄-ejit Okumugwem òbubum ikeme Uja. Mije keya ke egwen ere ya Pereji Uja[6] mege inire chereyi.

⁹Debit otetet ukpook enenen me lek Okumugwem usen ya, mè ibe, “Okop inyan̄a-ibot Okumugwem ìbonijeje ika inu me lek n̄a ni?”

¹⁰Mije keya, Debit ìkayaka ìweek isasa okop inyan̄a-ibot Okumugwem ika inu me ama ile kè Debit. Kpan̄asi ikeya, isasa isi isun̄ me uwu kè Obedi-Edọm ogwu Gat.

¹¹Okop inyan̄a-ibot Okumugwem obabia me uwu kè Obedi-Edọm ogwu Gat onyan̄ ita. Okumugwem ogbagbana Obedi-Edọm melek otutuuk ebi uwu kan̄.

¹²Enenikpa inyi Debit ibe ke Okumugwem îgbana otutuuk ebi uwu kè Obedi-Edọm, mè igbana si otutuuk inu geelek îkaan̄be, mije okop inyan̄a-ibot Awaji òkup me uwu kan̄. Debit onenisi iben okop inyan̄a-ibot ya me uwu kè Obedi-Edọm isa ika inu ama ile kè Debit me ubelejit.

¹³Mgbọ ekisa okop inyan̄a-ibot Okumugwem ije me oniin̄, ebi ìbeben okop ya isije ukot gweregwen, Debit îra igwu orie eriembuuk ge mè gwun̄ eriembuuk ge egwookbe imin ufuk isa igwa ngwugwa inyi Okumugwem.

¹⁴Debit ìtobo ekwut lilin̄ ekisa irọ mgbidim ofọnti ikwaan̄ ebi ngwugwa me ebon, isa ikijop okwa me isi Okumugwem, me otutuuk efuuk kan̄.

¹⁵Ikeyi ke Debit melek otutuuk ebi Ijeren esa okop inyan̄a-ibot Okumugwem ika, mè ikitaan̄ ukpo unwọọn̄, mè ikiwut otita.

¹⁶Ike ekisa okop inyan̄a-ibot Okumugwem ikinin̄ ama ile kè Debit, Mikali, gwun̄ kè Sọọlu, okukup me otu nruruk imun̄ Debit ogwu ubọọn̄ okiwulu ikana, mè ikijop okwa me isi Okumugwem, inu ya osasak me chieen̄ kan̄, ikpọkpọ ogwu ubọọn̄ chieen̄ isiki me emen ejit kan̄.

¹⁷Ema enenisa okop inyan̄a-ibot Okumugwem ya inu, mè iben isi iyik me emen atanga Debit ogwuun̄be isun̄ inyi, mè igwa ngwugwa ewọwọp iriọk mè ngwugwa esuuk inyi Okumugwem.

¹⁸Mgbọ Debit ogwabe ngwugwa ewọwọp iriọk mè ngwugwa esuuk cha isan̄a, inenigbana otutuuk ene me erieen̄ Okumugwem Ogwukaan̄ Inyọn̄ mè Ijọn̄,

¹⁹mè iniche inorie inyi otutuuk ebi Ijeren, mè ichon iso otutuuk utut ene cha me ene me ene, ebirieen̄ mè ebibaan̄. Ìnyi ene geelek owut fituru ge, mè nchicha mfut asaak ge, mè nchicha gerep ge. Otutuuk ene enenifon uwu kiban̄.

²⁰Debit onenije ifo uwu kan̄ ibosi igbana ebi uwu kan̄. Mikali gwun̄ kè Sọọlu, onanan̄a me uwu isibi inu inikweek ọmọ, mè ikibe, “Cherekeyi, ogwu ubọọn̄ ebi Ijeren înyi lek kan̄ umin enenen, mè iwọọk ofọnti isan̄a me lek me isi ebi usun̄ ebibaan̄ mè ebi ikwaan̄ kan̄, kubọk ebi kpenọ lek ekijop okwa njak njak me isi ebi ene!”

²¹Debit ofọfọọk ọmọ ibe, “Îre me isi Okumugwem ogwu ògogobo emi, kpan̄asi nte kwun̄ melek otutuuk ebi uwu nte kwun̄, mè irọ emi ogwu ubọọn̄ Ijeren, ebi eyi Okumugwem, ke njop okwa. Iin̄, m̀bakpọkpọ ikinwọọn̄ unwọọn̄ me isi Okumugwem.

²²Iin̄, mâkpọkpọ ikifiin̄ umin n̄a igak ikeya, mè ikisiki lek me chieen̄ n̄a gaalek. Ire me lek ebi usun̄ ebibaan̄ cha otumube, ema ebekimimin emi.”

²³Mije keyi, Mikali gwun̄ enenwaan̄ kè Sọọlu ìkakaan̄ gwun̄ geege mege ire usen mkpa kan̄.