Read obolo II Sam 7 Bible Online

II Sam 7 - obolo bible

II Sam 7

¹Ogwu ubọọn̄ Debit oneninin̄ uwu ubọọn̄ kan̄ iluk, Okumugwem onyinyi ọmọ utelelek. Otutuuk ebi ochicha kan̄ ìluluk ikat ikana ọmọ, kpunu geege òyayaka inu ọmọ akọn̄ me lek.

²Ogwu ubọọn̄ onenitumu inyi Netan ogwu nriran ibe, “Kpọ-nu! Emi ǹkiluk me emen uwu esabe uti olik inama. Ire, okop inyan̄a-ibot Awaji ìkup me emen atanga!”

³Netan onenifọọk ogwu ubọọn̄ ibe, “Inu geelek òkup owu me ejit, rọ, ke Okumugwem òwa melek kwun̄.”

⁴Me eririeen̄ usen ya, Okumugwem onenitumu inyi Netan ibe,

⁵“Si tumu nyi ogwu ikwaan̄ n̄a Debit ibe ke emi Okumugwem m̀be ikeyi, ‘Ìre owu oboninama uwu inyi emi ǹluk ni?

⁶Bene me usen nsan̄abe ebi Ijeren isibi me Ijipiti mege inire cherekeyi, ǹkararak ìluk me emen uwu. Otutuuk mgbọ cha nkijijen̄e ikana, ǹkiluk me emen atanga mè ìyaka ire me emen akpatan̄.

⁷Karake nkijijen̄e ikana melek otutuuk ebi Ijeren, ìre îkaan̄ ogwu ibot otoko ge me etete ebi ngobobe ibe ekekpọ chieen̄ me lek ebi n̄a, ebi Ijeren, ogwu ntumube inyi ibe, “Keke orọ enyi kpesa uti olik inama uwu inyi emi?” ’

⁸“Mgbọ yi, tumu nyi Debit ogwu ikwaan̄ n̄a, ibe ke emi Okumugwem Ogwukaan̄ Inyọn̄ mè Ijọn̄ m̀be ikeyi, ‘Emi m̀mọnọ owu me ijọn̄ urie anam, me ere okikpukpo arọọn̄ mè ebot, ibe owu ònokana ogwu òbokikpulu ebi n̄a Ijeren.

⁹Ǹkukup melek kwun̄ me otutuuk jen̄ejen̄e ojijen̄ebe ikana, mè ijijaka otutuuk ebi ochicha kwun̄ isan̄a me isi kwun̄. Mgbọ keyi, mânirọ inyi erieen̄ kwun̄ imin mè itaan̄ etip kubọk erieen̄ ebi ilile me linyọn̄.

¹⁰Mâgobo ere isun̄ inyi ebi n̄a Ijeren, mè isun̄ ema me ere ya, inyi inire ere ema ebekiluk, mè ene geege ikayaka ìsisaak ema. Ebi ijo ife kpebeyaka ikitutuku ema kubọk erọbe me adasi mgbọ,

¹¹mè ikirọ si karake mgbọ ntobe ebi oyerebet ibe ekekpulu ebi n̄a, ebi Ijeren. Emi mânyi owu utelelek, ebi ochicha kwun̄ kpebeyaka itim owu akọn̄ me lek. “ ‘Emi Okumugwem mwuuk lek itumu inyi owu ibe ke mârọ inyi uwu kwun̄ isibi.

¹²Owu osikan ikem, mè ikwu ifo igọọk ebi nte nte kwun̄, mâmọnọ ene ge me lek bọn ònan̄a me owot kwun̄, isa irọ ubọọn̄ me irek kwun̄, mè irọ inyi mkpulu kan̄ ikeke inye.

¹³Îre gwun̄ kwun̄ ya oboninama uwu inyi erieen̄ n̄a. Emi mârọ inyi ogboon̄ ubọọn̄ mkpulu kan̄ ikeke inye ire mgbọ geelek.

¹⁴Emi mâre ute isa inyi ọmọ, ọmọ môrere gwun̄ isa inyi emi. Ire irọ inu ilọ, mâsa njijan̄ eyi ebilene isulu ọmọ, mâsa ebi ofifi ido isulu ọmọ osusut.

¹⁵M̀kpasan̄a imumechieen̄ n̄a me lek kan̄ mgbọ geege, kubọk nsan̄abe me lek kè Sọọlu, ogwu nsan̄abe, mè inimọnọ owu ito me irek kan̄.

¹⁶Uwu kwun̄ mè irek mkpulu kwun̄ ìbokekeke inye isi ire mgbọ geelek me isi n̄a.[7] Ogboon̄ ubọọn̄ kwun̄ ìbokekeke isi ire mgbọ geelek!’ ”

¹⁷Netan oneniben otutuuk ikọ cha Okumugwem otumube melek otutuuk inu cha îchilibe ijeen̄ ọmọ ikpa inyi Debit.

¹⁸Ogwu ubọọn̄ Debit onenisi inin̄ emen atanga ere okop inyan̄a-ibot ya okupbe, mè isiki ikweek me isi Okumugwem, mè itumu ibe, “Jei Ogwukaan̄-ene Okumugwem, ìre ekene ene ke emi nre, sà ìre kpasi ife ke ebi ototun̄ ukan̄ n̄a ere, eyi owu okpukpobe emi mege inire mgbọ keyi?

¹⁹Ire, otutuuk kechi ìyaka inikup kubọk sọntiik inu gaalek me chieen̄ kwun̄, jei Ogwukaan̄-ene Okumugwem. Owu okpọkpọk initumu si ikọ ofolek ònu-me-isi ebi uwu ogwu usun̄ kwun̄ igbaalek! Ìre ikeyi ke owu okirọ inu melek ebilene, jei Ogwukaan̄-ene Okumugwem?

²⁰Ìre keke ke emi Debit mbayaka itumu inyi owu? Mije, owu, Ogwukaan̄-ene Okumugwem, oriọọn̄ emi ogwu usun̄ kwun̄ isan̄a.

²¹Otutuuk ikpele inu chi owu orọbe, owu òbak me lek ikọ kwun̄ irọ, mè irọ si igọọk me nkeek kwun̄, mè isa inijeen̄ emi ogwu usun̄ kwun̄.

²²“Eya orọ, owu omin enenen, jei Ogwukaan̄-ene Okumugwem! Mije, kpunu ogwu òbet lek kwun̄. Kpunu ofifi Awaji ilọ me lek kwun̄, igọọk me lek inu eji esabe utọn̄ kiji inọ.

²³Ìre kpasi ido obet lek ebi kwun̄ Ijeren, òrere ido ge gaalek me otutuuk linyọn̄ keyi, eyi Awaji onan̄abe isibi isi ifaka isibi inyi lek kan̄, inyi enekana ebi kan̄, mè isa me ikeya ikaan̄ erieen̄ òtataan̄ etip? Owu orọ ikpele uyeke uyeke inu mije kiban̄ me mgbọ orieen̄be ebi ofifi ido melek awaji kiban̄ isan̄a me isi ebi kwun̄ ebi owu ofakabe isibi me Ijipiti inyi lek kwun̄.

²⁴Owu osan̄a ebi kwun̄, ebi Ijeren, isun̄ inyi lek kwun̄, inyi ema enere ebi kwun̄ ire mgbọ geelek. Owu Okumugwem onenire si Awaji kiban̄.

²⁵“Mgbọ yi, soso Okumugwem Awaji, rọ ikọ cha otumube òfo me lek ogwu usun̄ kwun̄ melek ebi uwu kan̄ so mege ire mgbọ geelek. Rọ so ike owu otumube,

²⁶inyi erieen̄ kwun̄ imin, mè itaan̄ etip ire mgbọ geelek. Mgbọ ya, ebi ene mênenikitumu ibe, ‘Okumugwem Ogwukaan̄ Inyọn̄ mè Ijọn̄ ore Awaji òkikpulu me Ijeren!’ Mgbọ ya, uwu ogwu usun̄ kwun̄ Debit mônenikeke inye me isi kwun̄.

²⁷“Mije, owu Okumugwem Ogwukaan̄ Inyọn̄ mè Ijọn̄, Awaji ebi Ijeren, ochili ibook inyi emi ogwu usun̄ kwun̄ ibe ke owu môrọ inyi uwu n̄a isibi. Eya otap emi ogwu usun̄ kwun̄ efuuk me emen, inyi ǹkọt ǹriaak uriaak keyi ǹnyi owu.

²⁸Mgbọ yi, Ogwukaan̄-ene Okumugwem, owu ore Awaji! Ikọ kwun̄ si îgbe utoon̄-ejit. Îre owu ochieek use irọrọ ata inu kechi geelek inyi ogwu usun̄ kwun̄.

²⁹Mgbọ keyi, soso gbana uwu ogwu usun̄ kwun̄, inyi bọn owot iman kan̄ ekeke enye me isi kwun̄ ire mgbọ geelek. Mije, îre owu Ogwukaan̄-ene Okumugwem otumu ikọ yi. Inan̄a me lek ugbana kwun̄ ke uwu ogwu usun̄ kwun̄ obokaan̄ ugbana isi ire mgbọ geelek.”