Read obolo I Ubọọn̄ 10 Bible Online

I Ubọọn̄ 10 - obolo bible

I Ubọọn̄ 10

¹Etip kè Solomọn mè mgbaan̄-nrọ îkaan̄be melek erieen̄ Okumugwem onenitaan̄ ire utọn̄ ogwu ubọọn̄ enenwaan̄ Sieba. Ineninan̄a inu Jeruselem ibonisa uyọt uyọt idodo iroon̄ Solomọn ikpọ.

²Ogwu ubọọn̄ enenwaan̄ ya onenire Jeruselem melek ogbogbo inu ubọọn̄ òwawa enenen. Îsa ebi kè aligọ etoon̄be owuwa inu ekisa irọ inorie itop, mè alata araran̄ òwawa enenen, mè ewuuk unye otu ewe, isa igbaalek inu. Mgbọ îchichinibe Solomọn, itutumu otutuuk ikọ, mè ido otutuuk idodo òkup ọmọ me ejit isan̄a kpai.

³Solomọn ofọfọọk otutuuk idodo kan̄ isan̄a. Kpunu inu geege òyọyọt ogwu ubọọn̄ me lek ikpakpa iwele inyi.

⁴Ogwu ubọọn̄ enenwaan̄ Sieba onenimun̄ otutuuk iriọọn̄-inu kè Solomọn, mè imun̄ si uwu ubọọn̄ înamabe,

⁵mè imun̄ esese chieen̄ inorie òyiyik me inyọn̄ ikasi inorie kan̄, mè ubọk edọmọbe irek ìkweek inyi ebi ibot ikwaan̄ kan̄, mè imun̄ si ebi ikwaan̄ kan̄ ìkibeen̄ inorie melek mbala-lek kiban̄, mè ebi ìkitọkọ miin̄ inyi ebi ene, mè imun̄ si ngwugwa ewọwọp iriọk echi îkiwọp me Uwu Mbuban Okumugwem. [7] Otutuuk inu cha îmun̄be ogwogwook ọmọ mbiribọ me lek, ìkayaka ìkọt ìsan̄a amọn.

⁶Inenitumu inyi ogwu ubọọn̄ Solomọn ibe, “Inu geelek nkupbe me ido n̄a inọ ofolek inu owu okọtbe irọ, melek iriọọn̄-inu kwun̄, otutuuk cha ìre atikọ.

⁷Ǹkachieek inu cha nnọbe mege ire mgbọ nnube, mè inisa chieen̄ n̄a gaalek imun̄. Me atikọ, inu nnọbe ìkasoso ìkike iba me lek inu nnube inisa chieen̄ n̄a imun̄. Iriọọn̄-inu kwun̄ mè ubọọn̄ owu obọọn̄be îsaba enenen iraka inu nnọbe ofolek kwun̄.

⁸Kpọ uga ubelejit òkup inyi otutuuk ebi kwun̄! Kpọ uga ubelejit òkup inyi ebi ikwaan̄ kwun̄ chi ebi ìkisi ikwaan̄ me isi kwun̄ mgbọ geelek, mè ikinọ iriọọn̄-inu kwun̄!

⁹Itọn̄ ikup inyi Okumugwem Awaji kwun̄, ogwu òkakaan̄ ikpele ulọk me lek kwun̄, mè itoon̄ owu me inyọn̄ ogboon̄ ubọọn̄ Ijeren. Mije imumechieen̄ Okumugwem okaan̄be me lek ebi Ijeren ire mgbọ geelek, ke îrọ owu ogwu ubọọn̄, inyi owu ònokokpulu ema me unen oyerebet mè ata irọrọ.”

¹⁰Ogwu ubọọn̄ enenwaan̄ Sieba oneniche obop kilo alata araran̄, mè inu ekisa irọ inorie itop òwawa enenen, mè ebi kè ewuuk unye otu ewe, inyi ogwu ubọọn̄. Inu ekisa irọ inorie itop cha ogwu ubọọn̄ enenwaan̄ ya ochebe inyi Solomọn îwa enenen, ire lek, mbet kan̄ ìkayaka ìkup mgbọ geege.

¹¹(Uji ile kè Iram cha osasa alata araran̄ inan̄a me Ofiri inu, mè isa si uti junipa òwawa enenen, melek owuwa ewuuk unye otu ewe, inan̄a me Ofiri ika inu.

¹²Ogwu ubọọn̄ onenisa uti cha irọ otitop ekisa ije inin̄ Uwu Mbuban Okumugwem, mè echi ekisa ije inin̄ uwu ogwu ubọọn̄, mè isa si irọ uneen̄ ile mè uneen̄ ija inyi ebi ìkikọt okwa. Mege inire chereyi, kperarak imun̄ otu ifuk uti junipa òwawa ikeya, kperarak ilep si otu ifuk òkup ikeya isa inu me Ijeren.)

¹³Ogwu ubọọn̄ Solomọn onyinyi ogwu ubọọn̄ enenwaan̄ Sieba otutuuk inu geelek îweekbe, ike îdobe, mè ikpọk iche si uche ònan̄a me ubọk ogwu ubọọn̄ ogbogbo inyi ọmọ. Ogwu ubọọn̄ enenwaan̄ ya onenigwu ikom ifo ido kan̄, ọmọ mè ebi ikwaan̄ kan̄.

¹⁴Acha geelek, Solomọn ìkibọkọ akọp obop kilo alata araran̄ ita,

¹⁵kpefuk otutuuk ikpoko òkinan̄a me ubọk ebi uga mbit mè ebi ewe geelek, mè echi òkinan̄a me ubọk ebi ubọọn̄ Arebia, mè echi òkinan̄a me ubọk ebi ibot mkpulu me otutuuk agan̄ geelek me ido Ijeren.

¹⁶Ogwu ubọọn̄ Solomọn onenisa alata araran̄ ebọn̄be iwele irom efit ikpele agbọ iba. Alata araran̄ esabe irom agbọ cha ge ge îlobo iraka kilo jaaba.

¹⁷Îsa si alata araran̄ ebọn̄be iwele irom efit asabọn agbọ ita. Alata araran̄ esabe irom agbọ cha ge ge îlobo iso kilo iba. Ogwu ubọọn̄ onenikpulu ema isi iyiyik me emen Uwu Ubọọn̄ eyi Oron Lebanọn.

¹⁸Ogwu ubọọn̄ onenisa oduuk eniin̄ irọ ikpele ogboon̄ ubọọn̄ ge, mè isa atalek alata araran̄ ekalabe ijaan̄ ichọkọ ichit lek.

¹⁹Ekinene otitop gweregwen isi ikweek irek me inyọn̄ ogboon̄ ubọọn̄ ya. Inyọn̄ agan̄ udun̄ kan̄ ìkana okokop. Mîrom egbe àtat iba iyik me agba ubọk ogboon̄ ubọọn̄ ya agan̄ iba, ge okeke me agan̄ ge, ge okekeke me agan̄ keyilọ.

²⁰Akọp mè egbe àtat iba okeke me lek otitop gweregwen cha, egbe àtat iba me lek otitop ge, ge me ibot agan̄ ge, ge me ibot agan̄ keyilọ. Kperarak irom mbet lek ogboon̄ ubọọn̄ òkup ikeya inyi ogwu ubọọn̄ geege me otutuuk ido geelek me linyọn̄.

²¹Otutuuk ekpen̄ miin̄ geelek ogwu ubọọn̄ Solomọn okaan̄be, esa alata araran̄ irom. Otutuuk nroon̄ uwu òkup me Uwu Ubọọn̄ eyi Oron Lebanọn, esa atalek alata araran̄ ekalabe ijaan̄ irom. Kpunu nroon̄ alata okuket geege me uwu ubọọn̄ ya, mije, kpemọnọ alata okuket kubọk inu unye otu ewe me ukot kè Solomọn.

²²Ogwu ubọọn̄ Solomọn îkaan̄ owuwa uji ile mbit òkigọọk uji ile mbit echi kè Iram ikikọp me emen awaji ikisi inyam ewe me Tasis. Acha ita geelek, uji ewe chi îra ikika, mè ikisa alata araran̄, mè alata okuket, mè oduuk eniin̄, igbaalek ebi kè nriọk mè mkpinyọn̄ ika inu.

²³Ogwu ubọọn̄ Solomọn onenimin enenen igak otutuuk ebi ubọọn̄ geelek me linyọn̄ me iriọọn̄-inu mè ibọbọọn̄ ubọọn̄.

²⁴Otutuuk ebi linyọn̄ ekekiweek imumun̄ Solomọn isi mè isi, inyi ema enọ iriọọn̄-inu kan̄ eyi Awaji onyibe ọmọ.

²⁵Me acha me acha, ebi ene mîra ikinu. Ogwu inu, osa uche nroon̄ alata okuket, mè echi alata araran̄, mè ofọnti, mè nroon̄ akọn̄, mè inu ekisa irọ inorie itop, mè ebi kè inyinya, mè ebi kè inyinya mgbidim ukot, òkaan̄ me ubọk ònu.

²⁶Ikeyi ke Solomọn onititiin̄ uji akọn̄ mè inyinya akọn̄ ijot ere. Îkaan̄ obop mè efit uji akọn̄ ini, mè akọp mè obop inyinya akọn̄ iba. Îsun̄ usini me ama uji akọn̄ kan̄ cha, mè isun̄ usini me agba lek kan̄ me Jeruselem.

²⁷Ogwu ubọọn̄ îrọ ibe alata okuket ikpọkpọ iwa ijot ere me Jeruselem kubọk ewuuk ikike, mè irọ si uti olik iwa ijot ere kubọk uti sikamọ ikike òkitibi ikana otutuuk orioon̄ ebon ogoon̄ me Juda.

²⁸Inyinya kè Solomọn, ekilep inan̄a me Ijipiti mè Silisia. Ebi mbit ogwu ubọọn̄ ekilep ema me Silisia me unen otu ewe.

²⁹Me Ijipiti, ema ekilep uji akọn̄ ge efit ikpoko alata okuket gweregwen, mè ilep si inyinya ge efit ikpoko alata okuket mè akọp go, mè isa isi ikinyam inyi ebi ubọọn̄ Et mè Aram.