Read obolo I Ubọọn̄ 11 Bible Online

I Ubọọn̄ 11 - obolo bible

I Ubọọn̄ 11

¹Ogwu ubọọn̄ Solomọn îma ogbogbo ebibaan̄ ebi ofifi ido enenen. Isan̄a me lek gwun̄ ogwu Fero, îdo si ebibaan̄ ebi Mowabu, mè ebi Amọn, mè ebi Edọm, mè ebi Sidọn, mè ebi Et.

²Ebibaan̄ chi ìre ebi ido Okumugwem otababe ebi Ijeren ubọk me utọn̄ ofolek ibe, “Ikado ebibaan̄ ido chi me lek nwa, ikasasa si bọn kinyi ebibaan̄ ìche olom ìnyi ema, inyi ema ekagwu ejit kinyi ìkana ìgọọk awaji kiban̄ cha.” Ire, îre ebibaan̄ ido chi ke Solomọn osi isa lek ichim iriaak me lek, mè ikima.

³Solomọn îkaan̄ efit ebibaan̄ jaaba, ìrere bọn ebi ubọọn̄, me lek nwa, mè inikaan̄ si efit ebibaan̄ ita me lek ugan. Ebi nwa kan̄ chi egwugwu ejit kan̄ ikom.

⁴Mgbọ Solomọn okanbe, ebi nwa kan̄ cha egwugwu ejit kan̄ ikana igọọk ofifi awaji cha. Ìkayaka ìtoon̄ ejit òjot òjot me lek Okumugwem Awaji kan̄, kubọk Debit ogwu ute orọbe.

⁵Solomọn onenikitọbọ ebum inyi Asitoret, òrere uman awaji ebi Sidọn, mè Molek, òrere òchichaka awaji ebi Amọn.

⁶Sa me ikeyi, Solomọn orọrọ ijo inu me isi Okumugwem. Ìkayaka ìgọọk Okumugwem òjot òjot, kubọk ogwu ute Debit orọbe.

⁷Solomọn oneninama isi yọk inyi Kemos, òchichaka awaji ebi Mowabu, mè Molek, òchichaka awaji ebi Amọn, me inyọn̄ ogoon̄ ge òkup me agan̄ mbum-ura Jeruselem.

⁸Înama si isi yọk ikeya iso inyi otutuuk ebi nwa kan̄ ebi ofifi ido cha, inyi ema ekesa ewọp nsensi mè ekegwa ngwugwa enyi awaji kiban̄.

⁹Okumugwem onanaan̄ ejit inyi Solomọn, mije îsan̄abe ejit isan̄a me lek Okumugwem, Awaji ebi Ijeren, ogwu òsisibi ichichini melek kan̄ mgbọ iba,

¹⁰mè itaba ọmọ ubọk me utọn̄ ofolek inu yi, ibe ikatọbọ ebum ìnyi ofifi awaji geege. Ire, Solomọn ìkarọ ida Okumugwem.

¹¹Okumugwem onenitumu inyi Solomọn ibe, “Mije owu okiluk ugwem ikeyi, òkayaka ìkisun̄ inyan̄a-ibot n̄a, òkayaka ìkirọ orọmijọn̄ n̄a ubọk nnyibe owu ida ibe owu òkorọ, emi m̀bagwagwak mkpulu ido isan̄a owu me ubọk, mè isa ikana inyi ene ge me lek ebi ikwaan̄ kwun̄.

¹²Ire, mije kè Debit nte kwun̄, m̀kpagwak mkpulu ya isan̄a owu me ubọk me ògat ugwem kwun̄. Îre me ubọk gwun̄ kwun̄ ke mbagwak mkpulu ya isan̄a.

¹³Ire, m̀kpagwak otutuuk mkpulu ido ya isan̄a, mâtele otoko ge inyi gwun̄ kwun̄, mije kè Debit ogwu usun̄ n̄a, mè mije Jeruselem, ama ngobobe inyi lek n̄a.”

¹⁴Okumugwem onenisan̄a Adadi ogwu Edọm isibi, inyi inikana ogwu oriara inyi Solomọn. Adadi ìre ogwu owot iman ogwu ubọọn̄ Edọm.

¹⁵Îkaan̄ mgbọ ge Debit otimbe akọn̄ me lek ebi Edọm. Mgbọ Jowabu ogwu ibot akọn̄ Ijeren osibe Edọm ibosi ifuun̄ ebi ìkwakwaan̄ me akọn̄ ya, ikpakpan̄ otutuuk ebirieen̄ ama ya isan̄a.

¹⁶Jowabu mè otutuuk ebi Ijeren melek kan̄ ekukup me ere ya onyan̄ gweregwen, mè ikpan̄ otutuuk ebirieen̄ isan̄a me Edọm.

¹⁷Me ike mgbọ ya, Adadi ìre sọn̄ gwun̄ enerieen̄. Ọmọ melek usini ebi Edọm, ebi ìkisi ikwaan̄ inyi ogwu ute, elilibi ifo Ijipiti isi ilet.

¹⁸Ema enan̄a me Midian isi Paran, mè isa usini ebirieen̄ me Paran igbaalek isi Ijipiti isi imun̄ ogwu Fero, ogwu ubọọn̄ Ijipiti. Ogwu Fero onyinyi Adadi uwu ibe iluk, mè inyi ijọn̄, mè inyi si inorie igbaalek.

¹⁹Ogwu Fero onenima Adadi enenen, mè isa ogwu ugot kan̄, òrere ngwan̄ ogwu ubọọn̄ enenwaan̄ Tapenes, nwa kan̄, inyi Adadi me lek nwa.

²⁰Ngwan̄ enenwaan̄ kè Tapenes oneniman gwun̄ enerieen̄ ge, egwenbe Genubat, inyi Adadi. Tapenes omọmọnọ gwun̄ ya ikpukpo isibi me uwu ubọọn̄, imimin isibi melek bọn ogwu Fero.

²¹Adadi onenikup me Ijipiti inọ ibe ke Debit îkwu ifo igọọk ebi nte nte kan̄, ke Jowabu ogwu ibot akọn̄ si îkwu. Inenisi itumu inyi ogwu Fero ibe, “Soso tele mè m̀fo ido kiji.”

²²Ogwu Fero onenido Adadi ibe, “Eyi okiweek ifofo ido kinyi, ìre keke onan owu me ere keyi okupbe melek n̄a?” Adadi ofọfọọk ibe, “Kpunu inu geege ònanan emi, ire, tele mè m̀fo!”

²³Awaji onenisan̄a si ofifi ogwu oriara isibi inyi Solomọn, erieen̄ kan̄ ìre Rejọn gwun̄ kè Eliada, ogwu òlilibi inan̄a me irak ubọk ogwu ute-uwu, Adadeja, ogwu ubọọn̄ Soba.

²⁴Mgbọ Debit otimbe ikpan̄ Adadeja me Soba, Rejọn ìtititiin̄ owuwa ebi òkpaka, mè ikana ogwu ibot inyi ema. Ọmọ mè ebi kan̄ elilim ifo Damasikọs isi iluk, mè inikana ebi mkpulu me ere ya.

²⁵Rejọn onenikana ogwu oriara inyi ebi Ijeren otutuuk mgbọ Solomọn okikpulu, mè ikitap ufialek me Ijeren igbaalek echi Adadi okitap. Rejọn okukup me Aram ikikpulu, mè icha ebi Ijeren ijo ijo.

²⁶Ubọk yaage si, Jerobuwam, gwun̄ kè Nebat, onenikpaka ibot inyi ogwu ubọọn̄. Jerobuwam ìre ogwu otoko kè Iferem ònan̄a me Sereda, mè ire si ene ge me lek ebi ikwaan̄ kè Solomọn. Ogwu uga ìre ogwu nwakpa ge ekigwen Seruwa.

²⁷Ikeyi ke mkpaka-ibot eyi Jerobuwam okpakabe inyi ogwu ubọọn̄ omọnọ irek. Solomọn îtọm ijọn̄ agan̄ mbum-ura ama Jeruselem ibene, mè ikikpọk inama mgban agan̄ òfafiat me lek ama kè Debit ogwu ute.

²⁸Jerobuwam ìre gwun̄ enerieen̄ ònyenye lek, mè ikaan̄ efuuk. Mgbọ Solomọn omun̄be ubọk gwun̄ enerieen̄ yi, Jerobuwam, okirọ ikwaan̄ kan̄ ijaan̄, inenisa ọmọ irọ ogwu ibot inyi otutuuk ebi unye ikwaan̄ otoko kè Josefu.

²⁹Usen ge, Jerobuwam onan̄abe me Jeruselem ikije inin̄ oniin̄, Ayija ogwu nriran ònan̄a me Silo onenije ichichini ọmọ me oniin̄, melek aya ofọnti inyọn̄ me lek. Ema ene iba gaalek ekije me lek oniin̄ ya mgbọ ya.

³⁰Ayija otataba aya ofọnti inyọn̄ îtapbe me lek igwak akọp mè okpọkọ iba,

³¹mè initumu inyi Jerobuwam ibe, “Bọkọ akọp okpọkọ nyi lek kwun̄, mije îre ikeyi ke Okumugwem, Awaji ebi Ijeren otumu ibe, ‘Mânigwak mkpulu ido isan̄a me ubọk kè Solomọn, mè isa akọp otoko inyi owu.

³²Ire, mije ogwu usun̄ n̄a Debit, melek si mije Jeruselem, ama ngobobe inyi lek n̄a me otutuuk otoko ebi Ijeren, mâtele otoko ge inyi ọmọ.

³³M̀barọ inu yi mije Solomọn mè ebi kan̄ mîjit emi itele, mè isi ikitọbọ ebum inyi Asitoret awaji ebi Sidọn, mè Kemos, awaji ebi Mowabu, mè Molek, awaji ebi Amọn. Ema mîjit ijeje me oniin̄ n̄a, kpeyaka ikirọ inu òtatat emi me chieen̄. Kpeyaka ikirọ orọmijọn̄ n̄a, kpeyaka ikisun̄ si ikan n̄a, kubọk ogwu ute Debit orọbe.

³⁴“ ‘Ire, m̀kpabọkọ otutuuk mkpulu isan̄a me ubọk kè Solomọn, mije, mwuuk lek irọ ọmọ ogwu mkpulu otutuuk ugwem kan̄ bak me lek ogwu ute Debit ogwu usun̄ n̄a, ogwu ngobobe inyi lek n̄a, ogwu òrọrọ ikọ ntọbe, mè irọ si orọmijọn̄ n̄a.

³⁵M̀babọkọ mkpulu ya me ubọk ogwu gwun̄, mè ikana akọp otoko inyi owu.

³⁶Ogwu gwun̄ ke mbasa otoko ge inyi, inyi ebi owot iman kè Debit ogwu usun̄ n̄a ekekpulu[8] mgbọ geelek me isi n̄a me Jeruselem, ama ngobobe inyi Erieen̄ n̄a.

³⁷Ire me lek kwun̄, Jerobuwam, m̀bamọmọnọ owu isa irọ ubọọn̄, inyi owu òkokpulu ike ejit kwun̄ oweekbe. Owu môre ogwu ubọọn̄ otutuuk Ijeren.

³⁸Ire ogban̄ utọn̄ inyi emi, mè ikirọ inu geelek mânyibe owu ida ibe owu òrọ, mè ikije me oniin̄ n̄a, mè ikirọ inu òtatat emi me chieen̄, mè ikirọ orọmijọn̄ n̄a, mè ikọ geelek ntọbe, kubọk ogwu usun̄ n̄a Debit orọbe, mâkup melek kwun̄, mè inama irek ubọọn̄ inyi owu kubọk nrọbe inyi Debit, mè isa Ijeren ikana inyi owu òkokpulu.

³⁹Mâsulu ebi owot iman kè Debit osusut mije ijo inu Solomọn orọbe. Ire, osusut ya ìkpokup ire mgbọ geelek.’ ”

⁴⁰Solomọn oneniweek ikpakpan̄ Jerobuwam, ire, Jerobuwam olilibi ifo Ijipiti isi ikup melek kè Sisak, ogwu ubọọn̄ Ijipiti, mè ikup me ere ya mege ire mgbọ Solomọn okwube.

⁴¹Otutuuk ofifi inu òrọrọ me ukot mkpulu kè Solomọn, mè otutuuk inu geelek îrọbe, mè inu geelek ofolek iriọọn̄-inu kan̄, egege otutuuk iso me emen ikpa mfufuk usen me usen kè Solomọn.

⁴²Solomọn ìkup me Jeruselem ikpulu otutuuk Ijeren akọp acha ini.

⁴³Inenikwu ifo igọọk ebi nte nte kan̄, efufuun̄ ọmọ me ama kè Debit ogwu ute. Ogwu gwun̄, Reyobuwam, onenikana ubọọn̄ me irek kan̄.