Read obolo I Ubọọn̄ 12 Bible Online

I Ubọọn̄ 12 - obolo bible

I Ubọọn̄ 12

¹Reyobuwam onenisi Sekem, mije, otutuuk ebi Ijeren mînu me ere ya ibenirọ ọmọ ubọọn̄.

²Me ike mgbọ ya, Jerobuwam gwun̄ kè Nebat ìkup me Ijipiti ere îlibibe isi itap ibot, inyi ọmọ inwọnọ me ubọk ogwu ubọọn̄ Solomọn. Mgbọ înọbe inu chi òkimọnọ irek me Ijeren, ibabia si me Ijipiti ya.

³Eneniria ikwaan̄ igwen Jerobuwam. Ọmọ melek otutuuk ebi Ijeren enenisi itumu inyi Reyobuwam ibe:

⁴“Nte kwun̄ îsa ikpele unye ikwaan̄ ebi usun̄ ikeme eji. Mgbọ keyi, ire ofeme usini me lek ulobo akpan nte kwun̄ osabe ikeme eji isan̄a, mè irọ inyi ugwem kiji ifet, eji mêsiki ibot isi ikwaan̄ inyi owu.”

⁵Reyobuwam onenifọọk ema ibe, “Ìfon. Egwe ita isiraka, ìyaka ìnu.” Ema efofon.

⁶Ogwu ubọọn̄ Reyobuwam onenisi ido nteme me ubọk ebi ugane ebi ìkinyi Solomọn ogwu ute nteme mgbọ îkupbe me ugwem, mè ido ema ibe, “Ìre keke ke enyi eteme emi ibe emi m̀fọọk ebi ife chi?”

⁷Ebi ugane cha efọfọọk ọmọ ibe, “Ire obem lek isisi ikwaan̄ inyi ife chi cherekeyi, mè ifọọk ema me ata otu, ema mêkana ebi ikwaan̄ inyi owu mgbọ geelek.”

⁸Ire, Reyobuwam otetele nteme ebi ugane cha enyibe ọmọ, mè isi ido nteme me otu nsabọn irieen̄ ogbo kan̄, ebi melek kan̄ emiin̄be isibi, ebi ìkisi ikwaan̄ me irak kan̄,

⁹mè ido ema ibe, “Ìre keke ke enyi ebe emi m̀fọọk ife chi ìnunu inibe emi ǹrọ inyi akpan nte n̄a osabe ikeme ema ifet? Keke ore nkeek kinyi?”

¹⁰Nsabọn irieen̄ ebi otu ogbo kan̄ cha efọfọọk ọmọ ibe, “Ife chi, ebi ìnitumu inyi owu ibe, ‘Nte kwun̄ îsa ulobo akpan ikeme eji, ire, owu rọ inyi akpan kiji ifet’, inu owu obotumu inyi ema ìre ikeyi: ‘Sọntiik otubọk n̄a îlobo lek igak ebon kè nte n̄a.

¹¹Nte n̄a îsa ulobo akpan ikeme enyi, ire, emi m̀basọsọkọ inu me lek akpan nte n̄a osabe ikeme enyi. Nte n̄a ìkisa njijan̄ ikike isulu enyi osusut, ire, emi m̀bakisa eferen̄ isulu enyi osusut.’ ”

¹²Mgbọ usen ita ya osobe, Jerobuwam melek otutuuk ebi ama enenigwu ikom inu me lek kè Reyobuwam ogwu ubọọn̄, ike înyibe ema ida ibe egwu ekom enu enemun̄ ọmọ me òso usen ita.

¹³Ogwu ubọọn̄ ofọfọọk ema ikọ ya ujat ujat. Îtele nteme ebi ugane cha enyibe ọmọ,

¹⁴mè inisa nteme nsabọn irieen̄ ogbo kan̄ cha enyibe ọmọ ifọọk ebi ama ibe, “Nte n̄a îsa ulobo akpan ikeme enyi, ire, emi m̀basọsọkọ inu me lek akpan nte n̄a osabe ikeme enyi. Nte n̄a ìkisa njijan̄ ikike isulu enyi osusut, ire, emi m̀bakisa eferen̄ isulu enyi osusut.”

¹⁵Ogwu ubọọn̄ ìkagban̄ utọn̄ me lek inu ebi ama edobe, mije, îre Okumugwem orọ ibe inu ya irọ ikeya, inyi ikọ Okumugwem otumube inyi Jerobuwam gwun̄ kè Nebat, inan̄a me otu ogwu nriran Ayija ogwu Silo, irọ iso.

¹⁶Mgbọ otutuuk ebi Ijeren emun̄be ibe ke ogwu ubọọn̄ ìkagban̄ utọn̄ ìnyi ema, ema efọfọọk ọmọ ibe: “Kpasi mgbaan̄-nrọ ke eji ekaan̄ melek kè Debit? Sà ìre keke ke eji ekaan̄ melek gwun̄ kè Jesi? Ebi Ijeren, ogwu ikaan̄ uwu kan̄, ifo! Debit, kpọ uwu kwun̄ ire eya, owu ire eya!” Otutuuk ebi Ijeren ekpọkpọk iyat, mè ifon uwu kiban̄.

¹⁷Ire, Reyobuwam okekikpulu ebi Ijeren ìluk me ama echi òkup me Juda.

¹⁸Ogwu ubọọn̄ Reyobuwam oneniria Adoram ogwu ibot òkikpọ chieen̄ me lek ikwaan̄ òbọp, ibe isi itumu ikọ melek ebi Ijeren, ire, ebi Ijeren eteteen̄ ewuuk isa itọbọ Adoram ikpan̄. Ogwu ubọọn̄ Reyobuwam ogwagwat lek iwulu inin̄ uji akọn̄ kan̄, mè ilibi ifo Jeruselem.

¹⁹Îre sa me ikeya ke ebi Ijeren agan̄ inyọn̄ efieek inan̄a me lek uwu kè Debit mege inire chereyi.

²⁰Mgbọ ebi Ijeren enọbe ibe ke Jerobuwam înan̄a me Ijipiti ika, eneniria etip igwen ọmọ inu me isi otutuuk ebi ido Ijeren, mè inirọ ọmọ ogwu ubọọn̄ ebi Ijeren. Îtata otoko kè Juda gaalek osik me irak mkpulu uwu kè Debit.

²¹Mgbọ Reyobuwam onube inire Jeruselem, itititiin̄ otutuuk ebi ìriọọn̄ ukot akọn̄ me otoko kè Juda mè otoko kè Benjamin, efit mè akọp obop ene jeeta, isasa isi itim akọn̄ me lek ebi Ijeren, inyi ọmọ isa me ikeya iyaka ikpọk ikaan̄ otutuuk ebi Ijeren agan̄ inyọn̄ me irak mkpulu kan̄.

²²Ire, Awaji onenitumu inyi Semaya ogwu ikwaan̄ Awaji ibe ikeyi:

²³“Tumu nyi Reyobuwam gwun̄ kè Solomọn ogwu ubọọn̄ Juda, mè tumu si nyi otutuuk ebi otoko kè Juda mè ebi otoko kè Benjamin, mè otutuuk ebi ene ibe:

²⁴‘Okumugwem ìtumu ibe ikeyi: Ikalululuk ìsi ìtim akọn̄ me lek ebi ngwan̄ kinyi, ebi Ijeren. Ìgwu ìkom! Ogwu ikaan̄ uwu kan̄, ifo! Mije, otutuuk inu chi òkimọnọ irek ìnan̄a me ubọk n̄a.’ ” Ema egbagban̄ utọn̄ me lek ikọ Okumugwem, mè igwu ikom ifon, ike Okumugwem onyibe ida.

²⁵Jerobuwam oneninama ama ile Sekem me inyọn̄ ijọn̄ ogoon̄ ogoon̄ ebi otoko kè Iferem, mè iluk me ere ya. Inanan̄a me ere keya isi inama Penien.

²⁶Jerobuwam onenikikeek ibe, “Usini mgbọ, mkpulu yi môkọt ikpọk ikana inin̄ ubọk ebi uwu kè Debit.

²⁷Ire ife chi ikinan̄a isi igwa ngwugwa me Uwu Mbuban Okumugwem me Jeruselem, ema mêkọt inwene ejit ikana igọọk nte uwu kiban̄ Reyobuwam ogwu ubọọn̄ Juda, mè itet emi ikpan̄, mè igwu ikom igọọk ogwu ubọọn̄ Reyobuwam.”

²⁸Igọọk me nteme îbọkọbe me otu ebi nteme kan̄, inenirọ eriembuuk alata araran̄ iba, mè initumu inyi ebi kan̄ ibe, “Môkisisaak enyi enenen ikekinan̄a me ere keyi ikije isi Jeruselem isi ikitọbọ ebum inyi Awaji. Ebi Ijeren, kpọ awaji kinyi cha ire echi, echi òsasa enyi inan̄a me Ijipiti isibi.”

²⁹Ibeben ge iyik me Beten, mè iniben ge keyilọ isi iyik me Dan.

³⁰Inu yi onenirọ inyi ebi Ijeren erọ ikpele ijo inu. Usini kiban̄ ekekije isi igwook me Dan isi ikitọbọ ebum me isi ge me etete mkpọmfaka cha.

³¹Jerobuwam oneninama isi-ijọn̄ me inyọn̄ owuwa ogoon̄, mè inititen̄e si ebi ikike, ebi kpere ebi otoko kè Libai, isa irọ ebi ngwugwa.

³²Jerobuwam onenito ijọk ge me òso akọp mè usen go me emen òso onyan̄ jeeta me acha, kubọk ijọk Uwu Nlak eyi ekikaan̄ me Juda, mè ikigwa ngwugwa me inyọn̄ ntook me Beten inyi mkpọmfaka eriembuuk cha îrọbe. Îto si ebi ngwugwa me Beten, ibe ekesi ikwaan̄ me isi-ijọn̄ cha înamabe me inyọn̄ ogoon̄.

³³Me òso akọp mè usen go me òso onyan̄ jeeta me acha, usen ọmọ gaalek osun̄be, Jerobuwam onenigwa ngwugwa me inyọn̄ ntook înamabe me Beten. Sa me ikeyi ke îsan̄a ayaya ijọk mfaka isibi inyi ebi Ijeren, mè inene inyọn̄ ntook ngwugwa ya isi igwa ngwugwa.