Read obolo I Ubọọn̄ 13 Bible Online

I Ubọọn̄ 13 - obolo bible

I Ubọọn̄ 13

¹Ogwu ikwaan̄ Awaji ge oneninan̄a me ido Juda inu me Beten, igọọk me ida Okumugwem onyibe ọmọ, mè inimun̄ Jerobuwam okekebe me inyọn̄ ntook ibogwa ngwugwa,

²mè itaan̄ ukpo ifieek otu inyi ntook ya, igọọk me ida Okumugwem onyibe ọmọ, ibe, “Jei ntook! Owu ntook! Okumugwem ìtumu ibe ikeyi, ‘Kpọ, mêman gwun̄ enerieen̄ ge me owot iman kè Debit, ogwu erieen̄ kan̄ môrebe Josaya. Ọmọ môgwu ebi ngwugwa isi-ijọn̄ chi isa igwa ngwugwa me inyọn̄ kwun̄. Mêwọp ukwuuk ebilene me inyọn̄ kwun̄.’ ”

³Ogwu ikwaan̄ Awaji ya onyinyi inu òriọọn̄ me usen yaage ibe, “Eyiyi ore inu Okumugwem onyibe ibe esa eriọọn̄ ikọ kan̄: Ntook ya môtọbọ ibum, ntọn̄ òkup me inyọn̄ môgbugbuku ifiin̄.”

⁴Mgbọ ogwu ubọọn̄ Jerobuwam onọbe ufieek-otu ya ogwu ikwaan̄ Awaji ofieekbe inyi ntook ya me Beten, ikukup me inyọn̄ ntook ya inyana ubọk ida ogwu ikwaan̄ Awaji ya, mè ibe, “Ìtet ene ya!” Ire, ubọk kan̄ ya înyanabe ida ogwu ikwaan̄ Awaji ya ochachiaak ikam ikeya, ìkayaka ìkọt ìtaba ìgba lek.

⁵Ntook ngwugwa ya otọtọbọ ibum, ntọn̄ òkup me inyọn̄ ogbugbuku igwook me ijọn̄, igọọk me lek inu òriọọn̄ eyi ogwu ikwaan̄ Awaji ya onyibe, ike Okumugwem otumube.

⁶Ogwu ubọọn̄ oneniriaak ogwu ikwaan̄ Awaji ya ibe, “Soso, beek Okumugwem Awaji kwun̄, mè riaak uriaak me ibot n̄a ibe ubọk n̄a iyaka ikup kubọk adasi mgbọ.” Ogwu ikwaan̄ Awaji onenibeek Okumugwem mbeek me ibot kan̄, ubọk ogwu ubọọn̄ olọlọkọ, mè iniyaka ikup kubọk adasi mgbọ.

⁷Ogwu ubọọn̄ onenitumu inyi ogwu ikwaan̄ Awaji ya ibe, “Na, na gọọk emi si uwu n̄a si bọkọ sọn̄ inorie rie, inyi mâche sọntiik uche inyi owu.”

⁸Ire, ogwu ikwaan̄ Awaji ya ofọfọọk ogwu ubọọn̄ ibe, “Ikerere òbonyi emi ìkike iba inu ubọọn̄ kwun̄, m̀kpagọọk owu isi uwu kwun̄, m̀kparie inorie geege, m̀kpanwọnwọ si mudim geege me ere keyi.

⁹Mije, Okumugwem ìnyinyi emi ida ibe, ‘Kalululuk ìrie inorie geege, kanwọnwọ si mudim me ere ya, ikaan̄ oniin̄ ojebe isi ere ya, kaje oniin̄ keya ìka.’ ”

¹⁰Ogwu ikwaan̄ Awaji ya onenije me ofifi oniin̄ ifo, ìkayaka ìje me oniin̄ îjebe inu Beten.

¹¹Me ike mgbọ ya, îkaan̄ ogwu nriran ge, ugane, òluk me Beten. Bọn ebirieen̄ kan̄ enunu iniben otutuuk inu cha ogwu ikwaan̄ Awaji ya orọbe me usen ya me Beten ikpa inyi. Mîkpa si inu ogwu ikwaan̄ Awaji ya otumube inyi ogwu ubọọn̄ inyi nte kiban̄.

¹²Nte kiban̄ onenido ema ibe ìre oniin̄ agan̄ owa ke îje inin̄. Bọn ebirieen̄ kan̄ cha enenijeen̄ ọmọ oniin̄ ogwu ikwaan̄ Awaji ya ònan̄a me Juda ojebe inin̄.

¹³Ogwu nriran ogwu ugane ya onenitumu inyi ebi bọn ibe, “Ìtoon̄ inu ikweek irek me inyọn̄ inyinya akpan ìnyi emi.” Etotoon̄ inu ikweek irek me inyọn̄ anam ya inyi, inenene,

¹⁴mè ilibi igọọk ogwu ikwaan̄ Awaji ya, mè isi imun̄ ọmọ osikibe ikweek me irak ilip ge ikitap efuuk, mè inido ọmọ ibe, “Ìre owu ore ogwu ikwaan̄ Awaji ya ònan̄a me Juda inu?” Ifọfọọk ibe, “Iin̄, îre emi.”

¹⁵Ogwu nriran ya onenibe ọmọ, “Na, na gọọk emi si uwu, mè si bọkọ sọn̄ inorie rie.”

¹⁶Ogwu ikwaan̄ Awaji ya onenibe, “M̀kpakọt igọọk owu igwu ikom ije, m̀kparie inorie geege, m̀kpanwọnwọ si mudim me ubọk kwun̄ me ere keyi,

¹⁷mije, Okumugwem ìtutumu inyi emi ibe, ‘Kalululuk ìrie inorie geege, kanwọnwọ si mudim me ere ya, ikaan̄ oniin̄ ojebe isi, kaje oniin̄ yaage ìka.’ ”

¹⁸Ogwu nriran ogwu ugane ya onenifọọk ọmọ ibe, “Emi si ìre ogwu nriran kubọk owu orebe. Îre ogwu osat onu initumu inyi emi, sa me ida Okumugwem, ibe, ‘Si sa ogwu enerieen̄ ya na me uwu kwun̄, inyi inirie inorie, mè inwọ mudim.’ ” Ire, ìfafiaan̄ ogwu enerieen̄ ya.

¹⁹Ogwu ikwaan̄ Awaji ya onenigwu ikom igọọk ọmọ isi uwu kan̄, mè irie inorie mè inwọ mudim.

²⁰Mgbọ ema ekweekbe irek me lek ikasi ikirie inorie, Okumugwem onenitumu ikọ inyi ogwu nriran ogwu ugane ya, ogwu òsisi isa ogwu ene ya igwu ikom inu.

²¹Inenitaan̄ ukpo itumu inyi ogwu ikwaan̄ Awaji ya ònan̄a me Juda ibe, “Okumugwem ìtumu ibe ikeyi, ‘Owu okpaka ibot inyi ida ikọ Okumugwem, òkagban̄ utọn̄ me lek ikọ Okumugwem Awaji kwun̄ otọbe inyi owu.

²²Owu ogwu ikom isi ere mbe owu okasi, mè irie inorie, mè inwọ mudim me ere mbe owu okarie inorie, mè okanwọ mudim. Eya orọ, kpebefuun̄ nkwukwu kwun̄ me udọn̄-ufuun̄ ere efuun̄be ebi nte nte kwun̄.’ ”

²³Mgbọ ogwu ikwaan̄ Awaji ya oriebe inorie mè inwọ mudim isan̄a, ogwu nriran ogwu ugane ya, ogwu òsasa ọmọ igwu ikom inu ya, onenitoon̄ inu ikweek irek me inyọn̄ inyinya akpan kan̄ inyi, inenene ikikọp.

²⁴Mgbọ îkilibi ije, egbe àtat ge onanan̄a isibi ikweek ọmọ, mè ikpan̄ ọmọ ito me lek oniin̄. Nkwukwu kan̄ olalaak inyana me eden̄ oniin̄. Inyinya ya melek egbe àtat ya ekekeke igba.

²⁵Ebi ene ejeje iraka, mè imun̄ nkwukwu ene ya onyanabe me eden̄ oniin̄, melek egbe àtat ya okekebe igba, mè iben isi ikpa inyi ebi ene me ama ere ogwu nriran ogwu ugane ya olukbe.

²⁶Mgbọ ogwu nriran òsisi isa ọmọ me oniin̄ igwu ikom inu ya onọbe inu ya orọrọ, inenibe, “Ogwu ikwaan̄ Awaji ya òkpakpaka ibot inyi ikọ Okumugwem ke îre. Okumugwem îria egbe àtat inyi inichim ọmọ ikpan̄ me oniin̄, ike Okumugwem owuukbe lek itumu inyi ọmọ.”

²⁷Ogwu nriran ya onenitumu inyi bọn ebirieen̄ kan̄ ibe etoon̄ inu ikweek irek me inyọn̄ inyinya kan̄ enyi ọmọ, etotoon̄ inyi.

²⁸Ililibi isi imun̄ nkwukwu ogwu ikwaan̄ Awaji ya olaakbe inyana me eden̄ oniin̄, mè imun̄ inyinya akpan ya melek egbe àtat ya ekekebe igba. Egbe àtat ya ìkataka nkwukwu ene ya, ìkayaka ìchichim si inyinya akpan ya ìkpan̄.

²⁹Ogwu nriran ogwu ugane ya oneniben nkwukwu ogwu ikwaan̄ Awaji ya itoon̄ me inyọn̄ inyinya akpan kan̄, mè isa igwu ikom ika inu ama kiban̄, efefieek ejit inyi, mè iben ifuun̄.

³⁰Efuun̄ ogwu ikwaan̄ Awaji ya me udọn̄-ufuun̄ ogwu nriran ogwu ugane ya, mè ifieek ejit inyi, mè ikito ito ibe, “Jei, ngwan̄ n̄a!”

³¹Mgbọ îfuun̄be ogwu ikwaan̄ Awaji ya isan̄a, inenitumu inyi bọn ebirieen̄ kan̄ ibe, “Nsikwu, ìfuun̄ emi me emen udọn̄-ufuun̄ ere efuun̄be ogwu ikwaan̄ Awaji yi, ìmaan̄ ukwuuk n̄a me agba lek ukwuuk kan̄.

³²Mije, otutuuk inu cha îsabe me ida Okumugwem itumu ikeme ntook ngwugwa òkup me Beten, mè itumu si ikeme otutuuk isi-ijọn̄ òkup me ama geelek me Sameria ìborọrọ iso.”

³³Ubọk geelek inu chi orọbe, Jerobuwam ìkanwene ugwem kan̄. Ikpọkpọ ikigobo si ebi ikike isa ikirọ ebi ngwugwa, inyi ekesi ikwaan̄ me isi-ijọn̄ cha. Ogwu iweek irere ogwu ngwugwa, îra iken ene ya aran̄, mè ifaka ikwaan̄ itap me ubọk, inyi ikisi ikwaan̄ me isi-ijọn̄ cha.

³⁴Inu yi onenikana ikpele ijo inu me uwu kè Jerobuwam, mè ikpan̄ otutuuk ebi owot iman kan̄ isan̄a, mè itutuku erieen̄ kiban̄ isan̄a kpai me linyọn̄.