Read obolo I Ubọọn̄ 14 Bible Online

I Ubọọn̄ 14 - obolo bible

I Ubọọn̄ 14

¹Me ike mgbọ ya, Abija gwun̄ kè Jerobuwam onenikifiak orukan̄.

²Jerobuwam onenitumu inyi ogwu nwa ibe, “Ngwa, nwene lek kwun̄, inyi ekariọọn̄ ibe ke owu ìre nwa kè Jerobuwam, mè nan̄a je si Silo, ere Ayija ogwu nriran okiluk. Îre ọmọ otumu inyi emi ibe ke mâre ogwu ubọọn̄ òbokikpulu ebi ife chi.

³Mọnọ akọp owut fituru, mè nchicha inen mè inen, mè ogbokot aran̄ akwọọk ge, sa kaan̄ me ubọk si. Osimun̄ ọmọ, môkpa inu òborọ gwun̄ yi inyi owu.”

⁴Nwa kè Jerobuwam onenirọ si ikeya, mè inan̄a ije isi uwu kè Ayija me Silo. Me ike mgbọ ya, chieen̄ kè Ayija ìkayaka ìkimọọn̄ inu mije ukan.

⁵Ire, Okumugwem îwuuk lek itumu inyi Ayija ibe, “Kpọ, nwa kè Jerobuwam òkinu ibonido iriọọn̄ inu ofolek ogwu gwun̄ enerieen̄ òkup me ijọn̄ orukan̄. Isinu, ikeyi mè ikeyi ke obofọọk. Isinire, môfiaan̄ irọ kubọk ọmọ ìre ofifi ene.”

⁶Mgbọ Ayija onọbe ida ukot ogwu enenwaan̄ ya me isotu, itutumu ibe, “Nwa kè Jerobuwam, nin̄ na. Ofiaan̄ keyi ye? Etip ebe emi ǹlook owu ìre ijo etip.

⁷Gwu kom si tumu nyi Jerobuwam nlom kwun̄ ibe ke Okumugwem, Awaji ebi Ijeren ìtumu ibe ikeyi: ‘Emi ngobo owu me etete ebi ene, mè ibene owu ifo inyọn̄ ibe owu ònore ogwu òbokikpulu ebi n̄a Ijeren.

⁸Ngwaka mkpulu isan̄a me ubọk owot iman kè Debit, mè inisa ikana inyi owu. Ire, owu òkayaka ìnikup kubọk ogwu usun̄ n̄a Debit. Debit ìkirọrọ otutuuk ikọ ntọbe, mè ikisa me otutuuk ejit igọọk emi, mè ikirọ gaalek inu ònenen me chieen̄ n̄a.

⁹Owu onenirọ ijo inu enenen igak otutuuk ebi ìdadasi ikup me isi kwun̄. Owu osisi irọ ofifi awaji echi esabe ekwe itọkọ, mè isa me ikeya irọ inyi ejit inaan̄ emi enenen, mè itọp emi ifiin̄ me udun̄ kwun̄.

¹⁰“ ‘Mije inu yi, mâtap ùrioon̄ me emen uwu kè Jerobuwam. M̀bakpakpan̄ bọn ebirieen̄ isan̄a kpai me uwu kè Jerobuwam, mè ìre usun̄ mè ìre bọn owot, me etete otutuuk ebi Ijeren. M̀bachachan uwu kè Jerobuwam ifiin̄ isan̄a kpai kubọk ekichan ifin ikike ifiin̄.

¹¹Ogwu owot iman kè Jerobuwam ikwu me emen ama, ibo obogwak itaka. Ogwu ikwu me oron uko, ebi kè unọn òwulu me inyọn̄ ebetọk igwak itaka. Emi Okumugwem ntumu!’

¹²“Eyi kwun̄, gwu kom fo. Ukot kwun̄ isijak me ijọn̄ ama kinyi, gwun̄ kwun̄ enerieen̄ ya ìbokwukwu.

¹³Otutuuk ebi Ijeren mêfieek ejit inyi, mè iben ifuun̄. Îre ọmọ gaalek me etete bọn kè Jerobuwam obonin̄ udọn̄-ufuun̄, mije, îre ọmọ gaalek me uwu kè Jerobuwam ke Okumugwem, Awaji ebi Ijeren, omun̄ ata ugwem me emen.

¹⁴“Okumugwem môsan̄a ayaya ogwu ubọọn̄ ge isibi inyi lek kan̄, ogwu òbonikikpulu Ijeren, mè inijijaka owot iman kè Jerobuwam isan̄a. Cherekeyi ore usen ya! Mgbọ keyi ore mgbọ ya!

¹⁵Okumugwem môsulu ebi Ijeren osusut, ìbosisik ema kubọk ukot mun̄ okisisik anyiaan̄ me emen mun̄. Ìbojijibi ebi Ijeren isan̄a me inyọn̄ ata ijọn̄ yi înyibe ebi nte nte kiban̄, mè itọọn̄ ema iyiyala igwook me usaba okwaan̄ Yuferetis, mije ema esi igwugwuun̄ uti yọk Asera iso ere geelek, mè isa me ikeya irọ ibe ejit inaan̄ Okumugwem.

¹⁶Okumugwem môjijit Ijeren mije ijo inu Jerobuwam orọbe, mè echi îrọbe ibe ebi Ijeren erọ.”

¹⁷Nwa kè Jerobuwam onanan̄a ikeke ije ifo ama kiban̄, Tirija. Monisasaba ukot inin̄ uwu, gwun̄ kan̄ ya okwukwu.

¹⁸Efufuun̄ gwun̄ ya, otutuuk ebi Ijeren efefieek ejit inyi, ike Okumugwem otumube inan̄a me otu ogwu ikwaan̄ kan̄, ogwu nriran Ayija.

¹⁹Otutuuk ofifi inu òrọrọ me ukot mkpulu kè Jerobuwam, kubọk akọn̄ îtimbe, mè ubọk mkpulu kan̄, mîge otutuuk itap me emen ikpa mfufuk echi ebi ubọọn̄ Ijeren.

²⁰Jerobuwam ìkpulu ebi Ijeren akọp acha iba mè iba, mè inikwu ifo igọọk ebi nte nte kan̄. Nadabu, ogwu gwun̄ enerieen̄, onenikana ogwu ubọọn̄ me irek kan̄.

²¹Reyobuwam gwun̄ enerieen̄ kè Solomọn ore ogwu ubọọn̄ me Juda. Ọmọ ìre akọp acha ini mè ge mgbọ îkanabe ubọọn̄, mè ikpulu akọp mè acha jaaba me Jeruselem, ama Okumugwem ogobobe me otutuuk ama ile òkup me Ijeren isa irọ ere ebekimin erieen̄ kan̄. Nga kè Reyobuwam ìre ogwu Amọn, ogwu ekigwen Nayama.

²²Me ukot mkpulu kè Reyobuwam, ebi Juda mîrọ ijo inu òfefieek enenen me isi Okumugwem. Ijo inu cha ema erọbe înaan̄ Okumugwem ejit enenen igak otutuuk inu ebi nte nte kiban̄ erọbe.

²³Ema mînama owuwa isi-ijọn̄, mè igwugwuun̄ ewuuk mfaka ikana ere, mè igwugwuun̄ si uti yọk Asera me ubene ubene orioon̄ geelek, mè irak uti ile geelek agọọk kan̄ osanbe isibi.

²⁴Ebirieen̄ ebi òje oyet isi yọk òwa si me lek ijọn̄ ya ejotbe. Ebi ido Juda mîrọ si ojelek mbuban inu cha echi ebi ido cha erọbe eyi Okumugwem obakbe me lek irieen̄ ema isan̄a me lek ijọn̄ ya mgbọ ebi Ijeren ekinu.

²⁵Me òso acha go me lek mkpulu ogwu ubọọn̄ Reyobuwam, Sisak, ogwu ubọọn̄ Ijipiti ojijibi akọn̄ initim me Jeruselem,

²⁶mè ikpulu otutuuk inu ubọọn̄ òkup me Uwu Mbuban Okumugwem, mè ikpulu si echi òkup me uwu ogwu ubọọn̄. Îkpulu otutuuk inu geelek, igbaalek otutuuk agbọ alata araran̄ echi Solomọn orọbe igwook.

²⁷Ogwu ubọọn̄ Reyobuwam onenisa ekwe irom agbọ igwook me irek echi oka cha, mè inidọmọ ema itaak me ubọk ebi ibot ikwaan̄ ìkibem otunchit uwu ogwu ubọọn̄.

²⁸Mgbọ geelek ogwu ubọọn̄ isije inin̄ Uwu Mbuban Okumugwem, ebi ìkibem ere mîra iben agbọ cha ikaan̄ isa igọọk ọmọ ije. Isirọ isan̄a, mîra iyaka isa isi isun̄ me uwu isun̄-inu ebi mbem.

²⁹Otutuuk ofifi inu òrọrọ me ukot mkpulu kè Reyobuwam, mè otutuuk inu geelek îrọbe, mîge otutuuk itap me emen ikpa mfufuk echi ebi ubọọn̄ Juda.

³⁰Akọn̄ ìkukup me etete kè Reyobuwam melek kè Jerobuwam otutuuk ukot mkpulu kè Reyobuwam.

³¹Reyobuwam onenikwu ifo igọọk ebi nte nte kan̄, ebeben ifuun̄ me agba lek ebi nte nte kan̄ me ama kè Debit. Erieen̄ ogwu uga ìre Nayama, ogwu Amọn. Abija ogwu gwun̄ onenikana ubọọn̄ me irek kan̄.