Read obolo I Ubọọn̄ 15 Bible Online

I Ubọọn̄ 15 - obolo bible

I Ubọọn̄ 15

¹Me òso akọp mè acha jeeta me mkpulu kè Jerobuwam gwun̄ kè Nebat, Abija onenikana ubọọn̄ me Juda,

²mè inikup me Jeruselem ikpulu acha ita. Erieen̄ ogwu uga ìre Maaka, gwun̄ enenwaan̄ kè Abisalọm.[9]

³Abija orọrọ si otutuuk ijo inu cha nte kan̄ orọbe, ìkasa otutuuk ejit kan̄ ìnyi Okumugwem Awaji kan̄, ike Debit nte nte kan̄ orọbe.

⁴Ire, mije kè Debit, Okumugwem Awaji kan̄ otetele ibe gwun̄ enerieen̄ kan̄ ge inikikpulu me irek kan̄, inyi mkpukan̄ mkpulu kan̄ me Jeruselem ikaniin̄.

⁵Okumugwem ìrọ inu yi, mije, Debit îrọ inu ònenen me chieen̄ Okumugwem. Me otutuuk ugwem kan̄, ìkatele mgbọ geege isusun̄ otutuuk ikan̄ Okumugwem onyibe ọmọ, ilọ me lek inu ògbaan̄ me lek kè Uraya ogwu Et.

⁶Akọn̄ òkukup me etete kè Reyobuwam melek kè Jerobuwam okpọkpọ ikup si otutuuk ukot mkpulu kè Abija.

⁷Otutuuk ofifi inu òrọrọ me ukot mkpulu kè Abija, mè otutuuk inu geelek îrọbe, mîge otutuuk itap me emen ikpa mfufuk echi ebi ubọọn̄ Juda. Akọn̄ okukup me etete kè Abija melek kè Jerobuwam.

⁸Abija onenikwu ifo igọọk ebi nte nte kan̄, efufuun̄ ọmọ me ama kè Debit. Asa ogwu gwun̄ onenikana ubọọn̄ me irek kan̄.

⁹Me òso akọp acha iba me lek mkpulu kè Jerobuwam ogwu ubọọn̄ Ijeren, Asa onenikana ogwu ubọọn̄ Juda,

¹⁰mè ikup me Jeruselem ikpulu akọp acha ini. Erieen̄ nga ogwu ute ìre Maaka, gwun̄ enenwaan̄ kè Abisalọm.

¹¹Asa onenirọ inu ònenen me chieen̄ Okumugwem, kubọk Debit ogwu ute orọbe.

¹²Asa orerieen̄ otutuuk ebirieen̄ ebi òje oyet isi yọk cha isan̄a me lek ijọn̄ ya, mè ijijaka otutuuk mkpọmfaka cha ebi nte nte kan̄ erọbe isan̄a.

¹³Îsan̄a si Maaka nga ogwu ute me irek nwa ogwu ubọọn̄ eyi îrebe, mije îgwuun̄be uti yọk Asera inyi lek kan̄. Asa ochocho mkpọmfaka ya ito, mè isa isi itap ukan̄ iwọp me iteke Kidọrọn.

¹⁴Ire, Asa ìkagbugbọ isi-ijọn̄ cha ìsan̄a. Ubọk geelek si, îsa otutuuk ejit kan̄ inyi Okumugwem me otutuuk usen ugwem kan̄.

¹⁵Asa onenikpulu otutuuk nroon̄ ikwaan̄ alata okuket mè echi alata araran̄ echi nte kan̄ ofakabe itap me ubọk Awaji, melek echi ọmọ me lek kan̄ ofakabe itap me ubọk Awaji, isa initap me emen Uwu Mbuban Okumugwem.

¹⁶Akọn̄ okukup me etete kè Asa melek kè Basa ogwu ubọọn̄ Ijeren otutuuk ukot mkpulu kiban̄.

¹⁷Basa ogwu ubọọn̄ Ijeren onenijibi akọn̄ inin̄ Juda, mè isinama mgban ikana ama Rama, isa ikwek ido kè Asa ogwu ubọọn̄ Juda, inyi ebi ene ekakọt ìnan̄a isibi, mè ekakọkọt si ìraka ìnin̄.

¹⁸Asa onenikpulu otutuuk nroon̄ ikwaan̄ alata okuket mè echi alata araran̄ òsisik me ere isun̄-inu me Uwu Mbuban Okumugwem, mè echi òkup me uwu ogwu ubọọn̄ isa ikana itap me ubọk ebi ikwaan̄ kan̄, mè iria ema ifo Damasikọs, isi lek kè Ben-Adadi ogwu ubọọn̄ Aram, òrere gwun̄ kè Tabirimọn, gwun̄ kè Ejiyọn.

¹⁹Asa ìbe etumu enyi ogwu ubọọn̄ Aram ibe, “Emi melek kwun̄ mîkaan̄ mgbaan̄-nchieek, kubọk nte n̄a melek nte kwun̄ si ekaan̄be. Kpọ alata okuket mè alata araran̄ ire echi nriabe ijet owu. Nye lek gwak mgbaan̄-nchieek kwun̄ melek kè Basa ogwu ubọọn̄ Ijeren, inyi inan̄a ifo, mè ijuuk emi itele.”

²⁰Ogwu ubọọn̄ Ben-Adadi ochechieek melek kè Asa, mè iniria ebi ibot akọn̄ kan̄ ibe esi etim akọn̄ me lek ebi Ijeren. Ema esisi, mè itim ikpan̄ ama Ijọn̄, mè Dan, mè Aben Bet Maaka, mè otutuuk ijọn̄ Kineret, mè otutuuk agan̄ Nafitali.

²¹Mgbọ Basa onọbe inu yi òrọrọ, itetele inanama Rama, mè igwu ikom ifo Tirija.

²²Ogwu ubọọn̄ Asa onenigween̄ otutuuk ebi Juda inyi ida, ene geege ìkasik. Otutuuk ene esisibi isi Rama isi ikpulu otutuuk ewuuk mè uti cha geelek Basa okisa inama mgban ama ya. Ogwu ubọọn̄ Asa onenisa ewuuk cha melek uti cha inama Geba òkup me agan̄ Benjamin, mè inama si Mijipa.

²³Otutuuk ofifi inu òrọrọ me ukot mkpulu kè Asa, mè otutuuk unye ikwaan̄ îrọbe, mè otutuuk ama înamabe, mîge otutuuk itap me emen ikpa mfufuk echi ebi ubọọn̄ Juda. Ire, me ukan kan̄, orukan̄ onenifiak ọmọ me ukot, mè itap ọmọ akọọk.

²⁴Asa onenikwu ifo igọọk ebi nte nte kan̄, ebeben ọmọ ifuun̄ me agba lek ebi nte kan̄ me ama kè Debit ogwu ute. Jiosefat ogwu gwun̄ onenikana ubọọn̄ me irek kan̄.

²⁵Me òso acha iba me lek mkpulu kè Asa ogwu ubọọn̄ Juda, Nadabu gwun̄ kè Jerobuwam onenikana ogwu ubọọn̄ Ijeren, mè ikpulu acha iba gaalek.

²⁶Nadabu orọrọ ijo inu me chieen̄ Okumugwem enenen. Îrọ ijo ugwem yaage ogwu ute orọbe, eyi îrọbe inyi ebi Ijeren erọ ijo inu.

²⁷Basa gwun̄ kè Ayija, ogwu otoko kè Isaka, ototo okpin inyi Nadabu. Me mgbọ Nadabu mè otutuuk ebi akọn̄ Ijeren ekikpa mbin akọn̄ ikana ama Gibeton me ido Filisia, Basa okpakpan̄ Nadabu me ere ya.

²⁸Basa ìkpan̄ Nadabu me òso acha ita me lek mkpulu kè Asa ogwu ubọọn̄ Juda, mè inikana ogwu ubọọn̄ Ijeren me irek kan̄.

²⁹Mgbọ yaage îbenebe ikikpulu, ikpakpan̄ otutuuk ebi owot iman kè Jerobuwam inọọn̄, kubọk ene ge ikeyi ìkasik, ike Okumugwem otumube inan̄a me otu ogwu ikwaan̄ kan̄ Ayija ogwu Silo.

³⁰Inu yi ìrọ mije owuwa ijo inu Jerobuwam orọbe, mè mije îrọbe si inyi otutuuk ebi Ijeren erọ ijo inu, mè isa me ikeya irọ inyi Okumugwem, Awaji ebi Ijeren inaan̄ ejit.

³¹Otutuuk ofifi inu òrọrọ me ukot mkpulu kè Nadabu, mè inu îrọbe, mîge otutuuk itap me emen ikpa mfufuk echi ebi ubọọn̄ Ijeren.

³²Akọn̄ okukup me etete kè Asa melek Basa ogwu ubọọn̄ Ijeren me otutuuk ukot mkpulu kiban̄.

³³Me òso acha ita me lek mkpulu kè Asa ogwu ubọọn̄ Juda, Basa gwun̄ kè Ayija onenikana ogwu ubọọn̄ otutuuk Ijeren, mè ikup me Tirija ebi Ijeren ikpulu akọp acha iba mè ini.

³⁴Basa orọrọ ijo inu me chieen̄ Okumugwem enenen. Îrọ ijo ugwem yaage Jerobuwam orọbe, eyi îrọbe inyi ebi Ijeren erọ ijo inu.