Read obolo I Ubọọn̄ 16 Bible Online

I Ubọọn̄ 16 - obolo bible

I Ubọọn̄ 16

¹Okumugwem onenitumu ikọ inyi Jewu gwun̄ kè Anani òfo me lek kè Basa ibe:

²“Emi m̀mọnọ owu me inyọn̄ otiton, mè inibene owu isa irọ ogwu mkpulu inyi ebi n̄a Ijeren, ire, owu oyayaka inikiluk mbet ijo ugwem Jerobuwam olukbe, mè irọ inyi ebi n̄a Ijeren erọ ijo inu, mè esa ijo inu kiban̄ etap emi unaan̄-ejit me ejit.

³Eya orọ, m̀bajijijaka owu Basa, mè ijijaka si uwu kwun̄ igbaalek. Ike nrọbe me lek uwu kè Jerobuwam gwun̄ kè Nebat, ikeya si ke mbarọ me lek uwu kwun̄.

⁴Ogwu owot iman kè Basa ikwu me emen ama, ibo obogwak itaka. Ogwu ikwu me oron uko, ebi kè unọn òwulu me inyọn̄ ebetọk igwak itaka.”

⁵Otutuuk ofifi inu òrọrọ me ukot mkpulu kè Basa, mè inu îrọbe, melek akọn̄ echi îtimbe, mîge otutuuk itap me emen ikpa mfufuk echi ebi ubọọn̄ Ijeren.

⁶Basa onenikwu ifo igọọk ebi nte nte kan̄, ebeben ifuun̄ me Tirija. Ela ogwu gwun̄ onenikana ubọọn̄ me irek kan̄.

⁷Sabum Basa onikwu, Okumugwem îria etip inan̄a me otu ogwu nriran Jewu gwun̄ kè Anani ijet ọmọ melek uwu kan̄ mije otutuuk ijo inu Basa orọbe me isi Okumugwem, mè irọ inyi Okumugwem inaan̄ ejit bak me lek îrọbe ijo ugwem kubọk ebi uwu kè Jerobuwam erọbe. Mije keyi ke Basa ojijaka uwu kè Jerobuwam isan̄a kpai.

⁸Me òso akọp acha iba mè gweregwen me lek mkpulu kè Asa ogwu ubọọn̄ Juda, Ela gwun̄ kè Basa onenikana ogwu ubọọn̄ Ijeren, mè ikup me Tirija ikpulu acha iba.

⁹Ogwu ikwaan̄ kan̄ ge ekigwen Jimiri, ogwu òkikpọ chieen̄ me lek ìkike iba me lek uji akọn̄ kan̄, ototo okpin inyi ọmọ. Me ike mgbọ ya, Ela ìkup me Tirija ikinwọ miin̄ isa me uwu kè Arija ogwu òkikpọ chieen̄ me lek uwu ogwu ubọọn̄ me Tirija.

¹⁰Jimiri onenikana inin̄ uwu ya, mè inigon ọmọ ito me ijọn̄, ikwukwu. Inu yi ìrọ me òso akọp acha iba mè jaaba me lek mkpulu kè Asa ogwu ubọọn̄ Juda. Jimiri onenikana ogwu ubọọn̄ me irek kan̄.

¹¹Mgbọ yaage Jimiri onenebe inyọn̄ ogboon̄ ubọọn̄ ikweek ikikpulu, ikpakpan̄ otutuuk ebi owot iman kè Basa isan̄a, ìkatele kubọk gwun̄ enerieen̄ ge ikeyi me ògat ugwem, mè ìre gwun̄ owot, mè ìre unene owot iman ya.

¹²Ikeyi ke Jimiri ojijaka otutuuk owot iman kè Basa isan̄a, igọọk me ikọ Okumugwem otumube òfo me lek kè Basa inan̄a me otu ogwu nriran Jewu.

¹³Inu yi ìrọ mije ijo inu kè Basa melek echi kè Ela ogwu gwun̄, melek mije ema erọbe ibe ebi Ijeren erọ ijo inu, igbaalek ten̄ten̄ mkpọmfaka kiban̄ cha ema ekitọbọ ebum inyi, isa ikirọ ejit inaan̄ Okumugwem, Awaji ebi Ijeren.

¹⁴Otutuuk ofifi inu òrọrọ me ukot mkpulu kè Ela, mè inu îrọbe, mîge otutuuk itap me emen ikpa mfufuk echi ebi ubọọn̄ Ijeren.

¹⁵Me òso akọp acha iba mè jaaba me lek mkpulu kè Asa ogwu ubọọn̄ Juda, Jimiri onenikana ogwu ubọọn̄ Ijeren, mè ikup me Tirija ikpulu usen jaaba gaalek. Me ike mgbọ ya, ebi akọn̄ Ijeren ekikpa mbin akọn̄ ikana ama Gibeton me ido Filisia.

¹⁶Mgbọ ebi akọn̄ Ijeren ekupbe me ere ya inọ ibe ke Jimiri îto okpin inyi ogwu ubọọn̄, mè ikpan̄ si ogwu ubọọn̄, ema ekukup usen yaage me ere akọn̄ ya isa Omiri, ogwu ibot akọn̄, irọ ogwu ubọọn̄ ebi Ijeren.

¹⁷Omiri melek otutuuk ebi akọn̄ Ijeren eneniyat ubọk itele Gibeton, mè inikpa mbin akọn̄ ikana Tirija, ama ibot Ijeren.

¹⁸Mgbọ Jimiri omun̄be ibe ke mênibọkọ Tirija, isisi inin̄ uwu mgban akọn̄ òkup me lek uwu ogwu ubọọn̄, mè itap ukan̄ itaka uwu ya, ukan̄ ya otataka ọmọ si igbaalek. Ikwukwu.

¹⁹Inu yi ìrọ mije ijo inu Jimiri orọbe, mè irọ inu òfefieek me chieen̄ Okumugwem, igbaalek îrọbe ijo ugwem yaage Jerobuwam orọbe, mè irọ inyi ebi Ijeren erọ ijo inu.

²⁰Otutuuk ofifi inu òrọrọ me ukot mkpulu kè Jimiri, mè otitọt mkpan̄-ene îtọtbe, mè irọ si, mîge otutuuk itap me emen ikpa mfufuk echi ebi ubọọn̄ Ijeren.

²¹Ebi Ijeren echeche lek irek iba, okpọkọ ekeke inyi Tibini gwun̄ kè Ginat, ibe inire ogwu ubọọn̄ inyi ema, sà okpọkọ keyilọ ekeke inyi Omiri.

²²Ebi ìkeke inyi Omiri eneninye lek igak ebi ìkeke inyi Tibini gwun̄ kè Ginat. Ekpakpan̄ Tibini, Omiri okakana ogwu ubọọn̄.

²³Me òso akọp acha ita mè ge me lek mkpulu kè Asa ogwu ubọọn̄ Juda, Omiri onenikana ogwu ubọọn̄ Ijeren, mè ikpulu akọp mè acha iba. Me Tirija ke îkup ikpulu acha gweregwen me lek akọp mè acha iba cha.

²⁴Omiri ofufuk obop ikpoko alata okuket gweregwen isa ilep ogoon̄ Sameria me ubọk kè Semeri, mè ininama ama ge me inyọn̄, mè igwen ama ya Sameria igọọk me erieen̄ adasi ogwukaan̄ ogoon̄ ya.

²⁵Ire, Omiri onenirọ inu òfefieek enenen me chieen̄ Okumugwem, mè irọ ijo inu iwa igak otutuuk ebi ìdadasi ikpulu me isi kan̄.

²⁶Omiri îrọ otutuuk ijo ugwem cha Jerobuwam gwun̄ kè Nebat orọbe, melek ijo inu îrọbe, eyi îrọbe inyi ebi Ijeren erọ ijo inu, igbaalek ten̄ten̄ mkpọmfaka kiban̄ cha ema ekitọbọ ebum inyi, isa ikirọ ejit inaan̄ Okumugwem, Awaji ebi Ijeren.

²⁷Otutuuk ofifi inu òrọrọ me ukot mkpulu kè Omiri, mè inu îrọbe, melek akọn̄ echi îtimbe, mîge otutuuk itap me emen ikpa mfufuk echi ebi ubọọn̄ Ijeren.

²⁸Omiri onenikwu ifo igọọk ebi nte nte kan̄, ebeben ifuun̄ me Sameria. Eyabu ogwu gwun̄ onenikana ubọọn̄ me irek kan̄.

²⁹Me òso akọp acha ita mè jeeta me lek mkpulu kè Asa ogwu ubọọn̄ Juda, Eyabu gwun̄ kè Omiri onenikana ogwu ubọọn̄ Ijeren, mè ikup me Sameria ikpulu Ijeren akọp acha iba mè iba.

³⁰Eyabu gwun̄ kè Omiri îrọ inu òfefieek enenen me chieen̄ Okumugwem, mè irọ ijo inu iwa igak otutuuk ebi ìdadasi ikpulu me isi kan̄.

³¹Eyabu îrọ ijo ugwem yaage Jerobuwam gwun̄ kè Nebat orọbe, ire, eya ìkajot ọmọ owot. Eyi òfefieek ichit, isisi ido Jeseben gwun̄ kè Etiban ogwu ubọọn̄ Sidọn me lek nwa, mè igọọk ikisi ikwaan̄ inyi Baali, mè ikitọbọ ebum inyi.

³²Eyabu îgwuun̄ ntook ngwugwa me emen isi yọk înamabe inyi Baali me Sameria.

³³Eyabu îgwuun̄ si uti yọk Asera, mè irọ ijo inu isa itap Okumugwem, Awaji ebi Ijeren, unaan̄-ejit me ejit iwa igak otutuuk ebi ubọọn̄ Ijeren ìdadasi ikpulu me isi kan̄.

³⁴Îre me ukot kè Eyabu ke Iyen ogwu Beten okpọk inama Jeriko. Mgbọ Iyen okitọbọ ọdọ ama ya, Abiram, adasi gwun̄ enerieen̄ kan̄ okwukwu. Mgbọ îkigwuun̄ ebi kè otunchit ama ya, Segubu, ogwu gwun̄ enerieen̄ ogwu uchit-owot, okwukwu. Inu chi ìmọnọ irek igọọk me lek ikọ Okumugwem otumube inan̄a me otu kè Josuwa gwun̄ kè Nun.