Read obolo I Ubọọn̄ 18 Bible Online

I Ubọọn̄ 18 - obolo bible

I Ubọọn̄ 18

¹Mgbọ mgbọ orakabe enenen, me òso acha ita me lek una ibot ya, Okumugwem onenitumu inyi Ilaija ibe, “Sa lek kwun̄ si jeen̄ Eyabu, ke mânirọ ibe ibot irep igwook me lek ijọn̄ yi.”

²Ilaija oneninan̄a isi isisi isa lek kan̄ ijeen̄ Eyabu. Me ike mgbọ ya, akan̄ ya înye enenen me Sameria.

³Eyabu oneniria ikwaan̄ igwen Obidaya ogwu òkikpọ chieen̄ me lek uwu ogwu ubọọn̄. (Obidaya ìre ene ogwu òkakaan̄ ukpook Okumugwem me emen enenen.

⁴Mgbọ Jeseben okikpan̄ ebi nriran Okumugwem, Obidaya ìkpukpulu efit ebi nriran Okumugwem isi itaak me emen ǹkororok, akọp ene go go me ǹkororok ge, mè ikinyi ema inorie mè mudim.)

⁵Eyabu oneniria Obidaya ibe, “Je kana otutuuk ido yi, si kpọ-nu emen ogbuuruk mè iteke geelek, mè ìre îkaan̄ ere mêkọtbe imun̄ mbubet inyi inyinya mè inyinya mgbidim ukot kiji, inyi eji ekakpan̄ anam kiji geege mije una inorie.”

⁶Ema enenidọmọ ido ya me etete kiban̄, Eyabu oninin̄ agan̄ ge, Obidaya oninin̄ agan̄ keyilọ.

⁷Obidaya òkije me oniin̄, Ilaija ochichichini ọmọ. Obidaya otetet chieen̄ iriọọn̄ Ilaija isi, mè igele igwook ikana isi ichit me ijọn̄, mè inibe, “Nte uwu n̄a Ilaija, ìre owu ire ogwu?”

⁸Ilaija ofọfọọk ọmọ ibe, “Iin̄, îre emi. Si tumu nyi nte uwu kwun̄ ibe ke Ilaija ire ogwu me ere keyi.”

⁹Obidaya onenibe ọmọ, “Ìre kpasi ijo inu ke nrọ, eyi owu obonikana emi ogwu usun̄ kwun̄ itap me ubọk kè Eyabu ibe ikpan̄?

¹⁰“Kè lek ugwem Okumugwem, kpunu ido mè ìre ama ubọọn̄ geege eyi nte uwu n̄a ìkaria ene ìsi ibe esi eweek owu. Ido geelek mè ìre ama ubọọn̄ geelek òbebe ke ema kpemun̄ owu, îra itet ibe enyan̄a ibot ibe kpemun̄ owu.

¹¹Eya ke owu onibe emi ǹsi ǹlook nte uwu n̄a ibe ke Ilaija òwa me ere keyi!

¹²Emi nsiraan̄ ukot ije inan̄a me lek kwun̄, Ekwukwu Okumugwem mônenisa owu inan̄a, m̀kpariọọn̄ ere mosabe owu isi. Emi mânenisi ikpa inyi Eyabu, Eyabu mônunu, ìkpoyaka inimun̄ owu, môkpakpan̄ emi. Ire, emi ogwu usun̄ kwun̄ ǹkitọtọbọ ebum inyi Okumugwem karake ijija n̄a.

¹³Nte uwu n̄a, ìre òkanọ inu nrọbe mgbọ Jeseben okikpan̄ ebi nriran Okumugwem? M̀kpukpulu efit ebi nriran Okumugwem isi ilet me emen ǹkororok, akọp ene go go me ǹkororok ge, mè ikinyi ema inorie mè mudim.

¹⁴Eya ke owu onibe mè ǹsi ǹtumu ǹnyi nte uwu n̄a ibe ke Ilaija òwa me ere keyi! Ìbokpakpan̄ emi!”

¹⁵Ilaija onenibe ọmọ, “Kè lek ugwem Okumugwem Ogwukaan̄ Inyọn̄ mè Ijọn̄ ogwu nkisi ikwaan̄ inyi, m̀basasa lek n̄a ijeen̄ Eyabu cherekeyi.”

¹⁶Obidaya onanan̄a ije isi imun̄ Eyabu, mè itumu inyi, Eyabu onanan̄a inu inichichini Ilaija.

¹⁷Mgbọ Eyabu omun̄be Ilaija, ibebe ọmọ, “Ìre chieen̄ kwun̄ ire eyi, owu ogwu òtap ufialek me Ijeren?”

¹⁸Ilaija ofọfọọk ibe, “Emi ǹkatap ufialek me Ijeren. Îre owu mè uwu nte kè kwun̄ etap ufialek me Ijeren. Enyi mîjit isusun̄ otutuuk inu Okumugwem onyibe me ikan, mè ikana igọọk ebi kè mkpọmfaka Baali.

¹⁹Mgbọ keyi, ria ikwaan̄ gwen otutuuk ebi Ijeren, ibe esibi enu enechichini melek n̄a me inyọn̄ ogoon̄ Kamen. Ìsa si efit ebi nriran Baali ini mè akọp go cha, mè efit ebi nriran Asera ini cha, ebi ìkigọọk Jeseben igbaan̄ irie inorie me inyọn̄ ikasi, ìgbaalek ìnu.”

²⁰Eyabu oneniria etip igween̄ otutuuk ebi Ijeren, ema melek otutuuk ebi nriran cha esisibi inu inititiin̄ me inyọn̄ ogoon̄ Kamen.

²¹Ilaija onenikeke me isi ebi ido, mè inido ema ibe, “Ìre enyi ebekiket ukot melek ejit iba iba kinyi ikeyi isi ire mgbọ owa? Ire Okumugwem ore Awaji, ìtọbọ ebum ìnyi, ire, ire Baali ore Awaji, ìtọbọ ebum ìnyi.” Ire, otutuuk ebi ido Ijeren ekpọkpọ iriaan̄ otu, kpesan̄a amọn.

²²Ilaija onenibe ema, “Emi gaalek nre ogwu nriran Okumugwem òsisik, ire, Baali îkaan̄ efit ebi nriran ini mè akọp go.

²³Ìnyi eji eriembuuk iba. Enyi ebi nriran, ìgobo ge ìnyi lek kinyi, mè ìgwu, mè ìbak, mè ìkpulu ìtoon̄ me inyọn̄ iye, ire, ikatap ukan̄ me lek. Emi si mâgwu eyi n̄a, mè ibak, mè ikpulu itoon̄ me inyọn̄ iye, ire, m̀kpatap ukan̄ me lek.

²⁴Enyi ìgwen erieen̄ awaji kinyi, emi si mâgwen erieen̄ Okumugwem. Awaji geelek òraria ukan̄ itap me lek ngwugwa, ọmọ ore Awaji me atikọ.” Otutuuk ene echechieek igwook ibe, “Iin̄, ikọ ya îtop.”

²⁵Ilaija onenitumu inyi ebi nriran Baali ibe, “Ìdasi ìgobo eriembuuk ge eyi kinyi, mije ke îre enyi ewa, mè ìbala, mè ìgwen erieen̄ awaji kinyi. Ire, ikatap ukan̄ me lek.”

²⁶Ema enenigwu eriembuuk eyi enyibe ema, mè ibala, mè ikitaan̄ ukpo igween̄ Baali ibene me ewelegwe mege ire ejit ikarek ikibe, “Jei, Baali, na chieek ogwen kiji!” Ire, kpenọ ida, kpunu ufọọk-otu geege. Ema ekekijop okwa, mè ikiraan̄ iwulu ikana ntook ngwugwa ema enamabe.

²⁷Me ejit ikarek, Ilaija okekirọ ema inu ochak, mè ikibe ema, “Ìbene ida ìtaan̄ ukpo, mije, ọmọ ìre awaji. Usini mgbọ, ekiket îjot ọmọ ejit, mè ìre ìkitap efuuk, mè ìre ìkup me oniin̄ ije. Usini mgbọ, ìkilalaak. Ìnye lek ìtimi.”

²⁸Ema ekekitaan̄ ukpo unye unye, mè ikisa oge ikeen̄ lek kiban̄ ibak, mè ikisa si otunwa ichiin̄ lek kiban̄ igwak, kubọk ema ekiwuuk lek ikirọ, mege eje okekigbuk ema me lek.

²⁹Ema ekpọkpọ itet lek inye ikiraan̄ ikana ikiben nriran kiban̄ unye unye ikeya mege iraka ejit ikarek, ire mgbọ ekigwa ngwugwa eyi agan̄ ikakwun̄. Kpenọ ida, kpunu ufọọk-otu geege, kpukpunu ubọk geege.

³⁰Ilaija onenitumu inyi otutuuk ebi ene ibe, “Ìna me ere keyi!” Otutuuk ene ejeje igọọk ọmọ. Ikpọkpọk inama ntook ngwugwa Okumugwem ògbugbugbọ igwook me ere ya.

³¹Ilaija oneniteen̄ akọp mè ewuuk iba, òkekeke inyi otu ifuk otoko bọn kè Jekọp, ogwu Okumugwem otumube inyi ibe, “Ijeren obonire erieen̄ kwun̄.”

³²Inenisa ewuuk cha inama ntook ngwugwa inyi erieen̄ Okumugwem, mè irọkọ udọn̄ môkọtbe ita akọp mè iko mun̄ go ikana ntook ya.

³³Inenigwook iye me onineen̄ me inyọn̄ ntook ya, mè inigwu eriembuuk ya, mè ibala, mè ikpulu igwook me inyọn̄ iye cha, mè initumu ibe, “Ìchibi òjot òjot ugọn̄ mun̄ ini ìsa ìnigwook me lek anam ngwugwa me inyọn̄ iye òkup me inyọn̄ ntook ya.” Echichibi igwook.

³⁴Ibebe ema, “Ìkpọk ìchibi ìgwook òso mgbọ iba.” Echichibi igwook òso mgbọ iba. Ilaija obebe, “Ìkpọk ìchibi ìgwook òso mgbọ ita.” Echichibi igwook òso mgbọ ita.

³⁵Mun̄ ogbọgbọọk inan̄a me inyọn̄ ntook ya igwook me ijọn̄, mè ijot emen udọn̄ ya ikat ikana ntook ya.

³⁶Me mgbọ ngwugwa agan̄ ikakwun̄, Ilaija ogwu nriran ojeje isi lek ntook ngwugwa ya, mè iriaak uriaak ibe, “Jei, Okumugwem, Awaji kè Ebereyam, mè Ajiki, mè Ijeren, rọ inyi ebi ene eriọọn̄ cherekeyi, ibe ke owu ore Awaji me Ijeren, ke emi ìre ogwu ikwaan̄ kwun̄, mè eriọọn̄ ibe ke îre sa me ikọ otu kwun̄ ke nkirọ otutuuk inu chi geelek.

³⁷Jei, Okumugwem, nọ emi ida, mè fọọk emi otu, inyi ife chi eriọọn̄ ibe ke owu Okumugwem ore Awaji, ke owu òkiweek irọrọ inyi ema ekpọk egwu ejit ekom enu me lek kwun̄.”

³⁸Mgbọ yaage, ukan̄ Okumugwem onanan̄a me inyọn̄ igwook me lek ngwugwa ya, mè itaka anam ngwugwa ya, mè iye, mè ewuuk cha, mè achiaan̄ òkup me ijọn̄, mè ilaka mun̄ òkup me emen udọn̄ ya ichat isan̄a kpai.

³⁹Otutuuk ene cha emumun̄, mè irurọrọn̄ọ inyana me ijọn̄ ikana isi ichit, mè ikitumu ibe, “Okumugwem, ọmọ ore Awaji! Okumugwem, ọmọ ore Awaji!”

⁴⁰Ilaija onyinyi ida ibe, “Ìtet ebi nriran Baali cha, ikatele ene geege me lek kiban̄ inwọnọ!” Etetet ema. Ilaija osasa ema ikwala isibi ifo emen iteke Kison, mè ikpan̄ otutuuk kiban̄ me ere ya.

⁴¹Ilaija onenitumu inyi Eyabu ibe, “Je si rie inorie, mè nwọ miin̄, mije, ida unye otu ibot òkigbugbut.”

⁴²Eyabu ojeje ibosi irie inorie mè inwọ miin̄. Ire, Ilaija onenene ifo inyọn̄ ibot ogoon̄ Kamen, mè isiki ikweek me ijọn̄, mè ikana isi kan̄ ichit me agbagba akpatukot iba kan̄.

⁴³Inenitumu inyi gwun̄ uwu kan̄ ibe, “Je si bene chieen̄ kpọ-nu agan̄ okwaan̄.” Gwun̄ uwu kan̄ osisi ikpọ, mè igwu ikom initumu inyi ibe, “Ǹkamun̄ inu geege me agan̄ ya.” Ilaija îtumu ikeya inyi gwun̄ uwu kan̄ mgbọ jaaba ibe, “Gwu kom si kpọ.”

⁴⁴Òso mgbọ jaaba, gwun̄ uwu kan̄ ya onenilook Ilaija ibe, “Mmun̄ sọntiik oduku inyọn̄ òsip ikup kubọk akajit ubọk ene okinan̄a isibi me agan̄ emen okwaan̄ ile.” Ilaija obebe, “Si tumu nyi Eyabu ibe igwat lek inin̄ uji akọn̄ kan̄, mè ilibi ifo, inyi ibot ikarep ìkwek ogwugwu.”

⁴⁵Ìkafiin̄, isinyọn̄ oduduku ichit, oduku inyọn̄ odudun ere, unye efet ojijibi, unye otu ibot obebene ikirep, Eyabu olilibi me emen uji akọn̄ kan̄ ifo Jesereli.

⁴⁶Unye Okumugwem oninin̄ ijot emen kè Ilaija, Ilaija okpukpulu ofọnti inyọn̄ kan̄ igba, mè isa fanti ibọp ikam, mè ilibi isi iraka Eyabu, mè idasi kan̄ isi ire Jesereli.