Read obolo I Ubọọn̄ 19 Bible Online

I Ubọọn̄ 19 - obolo bible

I Ubọọn̄ 19

¹Eyabu onenikpa otutuuk inu Ilaija orọbe inyi Jeseben ogwu nwa, mè ikpa si ubọk Ilaija osabe oge akọn̄ ikpan̄ otutuuk ebi nriran Baali isan̄a.

²Jeseben oneniria etip isi lek kè Ilaija ibe, “Kè ebi kè awaji esulu emi ekpan̄, ire ǹkasan̄a ugwem kwun̄ sabum ike mgbọ keyi iyakwut, kubọk owu osan̄abe ugwem ebi nriran cha.”

³Ukpook otetet Ilaija, ililibi iweek ebek ugwem kan̄. Mgbọ îrebe ama Bieseba me ido Juda, itetele gwun̄ uwu kan̄ me ere ya,

⁴mè inije ije egwe ge igbaalek inin̄ emen èwê ọmọ gaalek, mè inire lek gwun̄ uti burum ge, mè isiki ikweek me irak iriaak uriaak iweek mkpa, ikibe, “Inyọn̄ îjot emi! Mgbọ keyi, kpan̄asi mbet keyi, Okumugwem, na mọnọ ugwem n̄a, ke ǹkanwọn ìgak ebi nte nte n̄a ebi ìkwakwaan̄ ita.”

⁵Inenisiki ilaak me irak uti ya, ilaak obeben. Me ekakpọge chieen̄, ogwu osat ge onunu, mè inichak ọmọ ubọk me lek, mè ibe ọmọ, “Nan̄a keke, mè rie inorie.”

⁶Ibobolo chieen̄, mè imun̄ owut unin̄i fituru ge ewọpbe me inyọn̄ mbubuuk ukan̄ oyikbe me agan̄ ibot kan̄, mè imun̄ si sọn̄ ogbokot mudim ge me ere ya. Irerie inorie ya, mè inwọ mudim ya, mè ikpọk isiki ilaak.

⁷Ogwu osat Okumugwem okpọkpọk inu òso mgbọ iba inichak ọmọ ubọk me lek si, mè itumu inyi ibe, “Nan̄a keke, mè rie inorie, ke ije ya oboje îjọn̄ọ enenen.”

⁸Inanan̄a ikeke, mè irie inorie, mè inwọ si mudim. Inenisa me efuuk inorie ya otapbe ọmọ me emen ije ije akọp egwe ini mè akọp eririeen̄ ini, mè inisi ire ogoon̄ Orebu, òrere ogoon̄ Awaji.

⁹Mgbọ Ilaija orebe lek ogoon̄ ya, ininin̄ emen ǹkororok ge me ere ya ilaak iwele egwe. Okumugwem onenido ọmọ ibe, “Ilaija, òkirọ keke me ere keyi?”

¹⁰Ilaija ofọfọọk ibe, “Jei, Okumugwem Awaji Ogwukaan̄ Inyọn̄ mè Ijọn̄, ulọk kwun̄ îmin emi me ejit enenen. Ire, ebi Ijeren mîtele inyan̄a-ibot kwun̄, mè igbugbọ ntook ngwugwa kwun̄ cha igwook, mè isa oge akọn̄ ikpan̄ ebi nriran kwun̄ isan̄a. Emi gaalek nyaka inisik. Mgbọ keyi, ema ekiweek si ikpakpan̄ emi.”

¹¹Okumugwem onenibe ọmọ, “Nan̄a me emen ǹkororok ya sibi, mè nene si keke me inyọn̄ ogoon̄ ya me isi Okumugwem.” Okumugwem onenije iraka me ere ya, uga unye efet owuwut itoon̄ me inyọn̄ ogoon̄ ya, mè itọbọ lek ogoon̄ ya ikpọk isan, mè igbugbọ ewuuk itọọn̄ igwook ikana ere sa me unye Okumugwem. Ire, Okumugwem ìkakup me emen efet ya. Unye efet ya iwuwut iraka, ijọn̄ osisisik unye unye, ire, Okumugwem ìkakup me emen sikisik-ijọn̄ ya.

¹²Sikisik-ijọn̄ ya iraraka, ukan̄ onunu. Ire, Okumugwem ìkakup me emen ukan̄ ya. Ukan̄ ya iraraka, sọntiik ida ge òkitaan̄ ususuk onunu.

¹³Mgbọ yaage Ilaija onọbe sọntiik ida ya, isasa ofọnti inyọn̄ kan̄ ikana ichit isi, mè inan̄a isibi inikeke me otu ǹkororok ya. Ida ge onenitumu inyi ọmọ ibe, “Ilaija, òkirọ keke me ere keyi?”

¹⁴Ilaija ofọfọọk ibe, “Jei, Okumugwem Awaji Ogwukaan̄ Inyọn̄ mè Ijọn̄, ulọk kwun̄ îmin emi me ejit enenen. Ire, ebi Ijeren mîtele inyan̄a-ibot kwun̄, mè igbugbọ ntook ngwugwa kwun̄ cha igwook, mè isa oge akọn̄ ikpan̄ ebi nriran kwun̄ isan̄a. Emi gaalek nyaka inisik. Mgbọ keyi, ema ekiweek si ikpakpan̄ emi.”

¹⁵Okumugwem onenitumu inyi Ilaija ibe, “Gwu kom je me oniin̄ ojebe inu, mè je si emen èwê Damasikọs. Osire Damasikọs, tọkọ Ajayen aran̄ me ibot, inyi ọmọ inire ogwu ubọọn̄ Aram.

¹⁶Tọkọ si Jewu gwun̄ kè Nimsi aran̄ me ibot, inyi inire ogwu ubọọn̄ Ijeren, mè tọkọ si Ilaisia gwun̄ kè Safat ogwu Eben Meyola aran̄ me ibot, inyi inire ogwu nriran me irek kwun̄.

¹⁷Sa me ikeyi, ogwu inwọnọ me otu oge akọn̄ kè Ajayen, Jewu môkpan̄. Ogwu inwọnọ me otu oge akọn̄ kè Jewu, Ilaisia môkpan̄.

¹⁸Ire, mâtele obop ene jaaba inyi lek n̄a me Ijeren, òrere ebi kpetọbọ ekpe inyi Baali, kpechachak si otu kiban̄ me lek mkpọmfaka Baali cha.”

¹⁹Ilaija oneninan̄a me ere ya ije, mè isi imun̄ Ilaisia gwun̄ kè Safat me ere îkisa akọp mè mgbugbak eriembuuk iba ibak ijọn̄ me uko. Ọmọ me lek kan̄ okisa mgbugbak eyi òso akọp mè iba ya ikibak ijọn̄. Ilaija ojeje igọọk, mè isa ofọnti inyọn̄ kan̄ itọp ijeen̄ ọmọ me lek.

²⁰Ilaisia ojujuuk eriembuuk cha itele, mè ilibi igọọk Ilaija, mè itumu inyi ibe, “Tele mè ǹsi ǹtumu ǹnyi nte n̄a mè nga n̄a ibe eriọọn̄ ubọk ekup, sabum mânigọọk owu ije.” Ilaija obebe ọmọ, “Gwu kom! Ìre keke ke nrọ inyi owu?”

²¹Ilaisia otetele Ilaija, mè igwu ikom isi itet eriembuuk cha ikpan̄, mè isa uti nroon̄ ikwaan̄ uko cha isọk ukan̄ isa item anam eriembuuk cha, mè isa iche inyi ebi ene, ema etataka. Ijọk ya itata, inanan̄a igọọk Ilaija, mè inikisi ikwaan̄ inyi.