Read obolo I Ubọọn̄ 2 Bible Online

I Ubọọn̄ 2 - obolo bible

I Ubọọn̄ 2

¹Mgbọ usen mkpa kè Debit ogbetbe, Debit oneninyi Solomọn ogwu gwun̄ nteme kechi ibe,

²“Usen mkpa n̄a òkigbet, ike îkupbe inyi otutuuk ene me linyọn̄. Eya orọ, nye lek, mè kirọ inu kubọk enerieen̄.

³Mun̄ ibe ke owu okirọ inu Okumugwem okiweek. Kije me oniin̄ kan̄. Kirọ orọmijọn̄ kan̄, mè ikọ geelek îtọbe, mè kisun̄ si ikan kan̄ mè inu geelek ònan̄a me ida kan̄, kubọk egebe me Ikan kè Mosis, inyi inu geelek owu môrọbe ikije ijaan̄, mè òkokaan̄ nnwọn-isi me ere geelek owu môsibe.

⁴Sa me ikeyi, Okumugwem mônenirọ use kan̄ iso, eyi îchieekbe emi ibe, ‘Ire bọn owot iman kwun̄ igbala chieen̄ me ugwem kiban̄, mè isa me otutuuk ejit kiban̄ mè otutuuk efuuk kiban̄ ikirọ atikọ me isi n̄a, owu òkponan ene ogwu òbosiki ikweek me inyọn̄ ogboon̄ ubọọn̄ ikikpulu Ijeren.’

⁵“Mgbọ keyi, owu me lek kwun̄ oriọọn̄ inu Jowabu, ogwu ogwu uga orebe Seruya orọbe emi, eyi îtetbe ebi ibot akọn̄ Ijeren ene iba, Abina gwun̄ kè Neri mè Amasa gwun̄ kè Jeteri, ikpan̄ me agam, mè isa me ikeya ifiat eje ene me mgbọ esuuk kubọk ìyaka ire mgbọ akọn̄. Eje ene iba chi îken fanti akọn̄ kan̄ òkup ọmọ me ebon, mè iken si ikpukot òkup ọmọ me ukot.

⁶Sa iriọọn̄-inu kwun̄ rọ inu melek kan̄. Kachieek ibe isa isọọn̄ ibot ikwu ifo ama ekwukwu me esuuk.

⁷“Ire, kaan̄ ata ejit me lek bọn ebirieen̄ kè Bajilai ogwu Giliadi, mè tele inyi ema ekup me otu ifuk ebi ìbekigọọk irie inorie me inyọn̄ ikasi inorie kwun̄. Mije, ema ekekeke inye melek n̄a mgbọ nlibibe ekot ugwem inan̄a me lek kè Abusolọm ngwan̄ kwun̄.

⁸“Ofifi si, kpọ Simei gwun̄ kè Gera ogwu otoko kè Benjamin ònan̄a me ama Bayurim ire ogwa melek kwun̄. Îfieek otu igbo emi ijo ijo me usen nkije iraka isi Mayanayim. Usen înube agba okwaan̄ Jodan inimun̄ emi, nnyan̄a ibot me erieen̄ Okumugwem inyi ibe ke m̀kabakpan̄ ọmọ.

⁹Ire, mgbọ yi, kamọnọ ọmọ kubọk ogwu ubọk otanabe. Owu ìre gwun̄ òriọọn̄ inu. Owu oriọọn̄ inu oborọ melek kan̄. Rọ inyi eje kan̄ igbuk, mè ọmọ isa isọọn̄ ibot kan̄ ikwu ifo ama ekwukwu.”

¹⁰Debit onenikwu ifo igọọk ebi nte nte kan̄, ebeben ọmọ ifuun̄ me ama kè Debit.

¹¹Debit îkpulu Ijeren akọp acha ini. Ìkup me Eburọn ikpulu acha jaaba, mè inikup me Jeruselem ikpulu akọp acha ita mè ita.

¹²Solomọn onenikana ikweek me inyọn̄ ogboon̄ ubọọn̄ ogwu ute Debit ikikpulu. Mkpulu kan̄ okekeke inye enenen.

¹³Adonija, ogwu ogwu uga orebe Agit, onenije isi lek kè Batiseba, nga kè Solomọn. Batiseba onenido ọmọ ibe, “Inunu onube, ìre ònu me esuuk?” Ifọfọọk ibe, “Iin̄, ǹnu me esuuk,”

¹⁴mè initumu si ibe, “Nkaan̄ inu mbatumu inyi owu.” Batiseba obebe ọmọ, “Tumu ma.”

¹⁵“Owu oriọọn̄ ijaan̄ ibe ke irek mkpulu yi ìkup inyi emi, ke chieen̄ otutuuk ebi Ijeren ìkup me lek n̄a kubọk ogwu òbonire ogwu ubọọn̄ kiban̄. Ire, irek mkpulu oneninwene ikana inirọn̄ inyi ngwan̄ n̄a enerieen̄. Inu yi ìnire ọmọ lek inan̄a me ubọk Okumugwem.

¹⁶Mgbọ yi, îkaan̄ mbeek ge mbabeek me ubọk kwun̄. Soso kajit emi.” Batiseba obebe ọmọ, “Beek ma.”

¹⁷Inenitumu ibe, “Nye lek si riaak ogwu ubọọn̄ Solomọn ibe inyi emi Abisagi ogwu enenwaan̄ Sunem ya me lek nwa. Nriọọn̄ ibe ke ìkpojit mbeek geelek owu môbeekbe ọmọ.”

¹⁸Batiseba onenifọọk ibe, “Înwọn! Emi mâsa ikọ kwun̄ isi ikpa inyi ogwu ubọọn̄.”

¹⁹Batiseba onenije isi lek ogwu ubọọn̄ Solomọn ibosa ikọ kè Adonija isi ikpa inyi. Ogwu ubọọn̄ onanan̄a ikeke ije ikweek ọmọ, mè igele igwook me isi kan̄, mè igwu ikom isi isiki ikweek me inyọn̄ ogboon̄ ubọọn̄ kan̄, mè ibe esa ikasi ubọọn̄ si ejet nga ogwu ubọọn̄. Batiseba osisiki ikweek irek me agan̄ ubọk ulom kan̄.

²⁰Batiseba onenibe ogwu ubọọn̄, “Îkaan̄ gwun̄ inu ge mweekbe ibebeek owu, soso kajit emi.” Ogwu ubọọn̄ ofọfọọk ibe, “Beek, nga n̄a, ke m̀kpajit owu.”

²¹Ogwu uga onenibe, “Tele mè esa Abisagi ogwu enenwaan̄ Sunem enyi Adonija ngwan̄ kwun̄ me lek nwa.”

²²Ogwu ubọọn̄ Solomọn ofọfọọk ogwu uga ibe, “Òjeje inibeek ibe emi ǹsa Abisagi ogwu Sunem ǹnyi Adonija? Beek si ibe emi ǹkana irek mkpulu yi ǹnyi Adonija mije îrebe ngwan̄ n̄a ugane. Iin̄, owu môkọt ibe emi ǹkana irek mkpulu yi ǹnyi ọmọ, mè ǹnyi Abiata ogwu ngwugwa, mè ǹnyi si Jowabu, ogwu ogwu uga orebe Seruya!”

²³Ogwu ubọọn̄ Solomọn oneninyan̄a ibot me erieen̄ Okumugwem ibe, “Kè Awaji isulu emi osusut, mè itoon̄ urot, ire Adonija ìkasa ugwem kan̄ ìkpe me ibot inu yi îkido.

²⁴Mgbọ keyi, kè lek ugwem Okumugwem, ogwu òsusun̄ emi me inyọn̄ ogboon̄ ubọọn̄ kè Debit nte n̄a, mè inyi emi uwu ubọọn̄ kubọk îchieekbe use, me cherekeyi, Adonija ìbokwukwu!”

²⁵Ogwu ubọọn̄ Solomọn oneninyi Benaya gwun̄ kè Jeyoyada ida, isisi ifieek Adonija ikpan̄.

²⁶Ogwu ubọọn̄ onenitumu inyi Abiata ogwu ngwugwa ibe, “Gwu kom fo Anatọt ama kinyi. Owu ogbe mkpa si, ire, ǹkabakpan̄ owu mgbọ keyi, mije, îre owu okiben okop inyan̄a-ibot Ogwukaan̄-ene Okumugwem isa ikije me isi kè nte n̄a Debit, mè igọọk ọmọ ibọkọ si ufialek me otutuuk mgbọ îkupbe me ufialek.”

²⁷Solomọn onenisan̄a Abiata me ọgbọn̄ ebi ngwugwa Okumugwem. Inu yi onenirọ ikọ Okumugwem otumube me Silo ibak uwu kè Ilai iso.

²⁸Mgbọ Jowabu onọbe etip inu cha òrọrọ, ililibi isi Atanga Okumugwem, mè isi ikat iko echi òkup me lek ntook ngwugwa ikaan̄. Jowabu ìkeke inyi Adonija, ìkakeke ìnyi Abusolọm.

²⁹Enenikpa inyi ogwu ubọọn̄ Solomọn ibe ke Jowabu îlibi isi Atanga Okumugwem, ke ìkup me agba lek ntook ngwugwa. Solomọn onyinyi Benaya gwun̄ kè Jeyoyada ida ibe, “Je si fieek ọmọ kpan̄!”

³⁰Benaya osisi inin̄ emen Atanga Okumugwem, mè isi itumu inyi Jowabu ibe, “Ogwu ubọọn̄ ìbe owu òsibi ònu!” Ire, Jowabu ofọfọọk ibe, “In̄-in̄, m̀bakup me ere keyi ikwu.” Benaya ogwugwu ikom isi ikpa inu Jowabu ofọọkbe ọmọ inyi ogwu ubọọn̄.

³¹Ogwu ubọọn̄ otutumu inyi Benaya ibe, “Ire ikeya, rọ ike îtumube. Fieek ọmọ kpan̄, mè ben fuun̄, inyi emi mè uwu nte n̄a enwọnọ mkpukpe eje ebi kpelọ inu geege echi Jowabu ofiin̄be.

³²Okumugwem môyaka eje kan̄ itoon̄ ọmọ me ibot, mije îsabe oge akọn̄ ikpan̄ ene iba, Abina gwun̄ kè Neri òre ogwu ibot ebi akọn̄ Ijeren, mè Amasa gwun̄ kè Jeteri òre ogwu ibot ebi akọn̄ Juda, ebi ìrere ata ife igak ọmọ, ebi kperọ inu geege ilọ, me nte n̄a ikariọọn̄ge.

³³Kè eje kiban̄ ibia me ibot kè Jowabu mè ibot ebi owot iman kan̄ ire mgbọ geelek. Ire, kè esuuk Okumugwem ibia melek kè Debit mè ebi owot iman kan̄, mè uwu kan̄, mè ogboon̄ ubọọn̄ kan̄ mege ire mgbọ geelek.”

³⁴Ikeyi ke Benaya gwun̄ kè Jeyoyada onigwu ikom isi, mè isi ikep Jowabu ito, mè ikpan̄ ọmọ, ebeben isi ifuun̄ me ere uwu kan̄ me emen èwê.

³⁵Ogwu ubọọn̄ onenisa Benaya gwun̄ kè Jeyoyada ito me ibot ebi akọn̄ me irek kè Jowabu, mè inisan̄a Jadọk ito kubọk ogwu ngwugwa me irek kè Abiata.

³⁶Ogwu ubọọn̄ oneniria etip igwen Simei, mè inibe ọmọ, “Na nama uwu me Jeruselem nyi lek kwun̄, mè ka na luk me ere keyi, mè kanan̄a ìsi ofifi ere geege.

³⁷Usen geelek owu otelebe ere keyi, mè isaba iteke Kidọrọn, kpọkpọ riọọn̄ ibe ke owu òbokwukwu. Ire okwu, eje kwun̄ ìbotoon̄ owu me ibot.”

³⁸Simei ofọfọọk ogwu ubọọn̄ ibe, “Inu owu ogwukaan̄ n̄a ogwu ubọọn̄ otumube îjaan̄. Emi ogwu usun̄ kwun̄ mârọ si ike owu otumube.” Simei obabia me Jeruselem ijọn̄ọ mgbọ.

³⁹Ire, mgbọ acha ita orakabe, ebi usun̄ iba kè Simei enanan̄a ilibi isi lek kè Akis gwun̄ kè Maaka, ogwu ubọọn̄ ebi Gat. Enenikpa inyi Simei ibe, “Kpọ ebi usun̄ kwun̄ iba ire ebilọ me Gat.”

⁴⁰Mgbọ Simei obọkọbe etip ya, inenene inyọn̄ inyinya akpan kan̄, mè ikọp isi Gat isi lek kè Akis isi iweek ebi usun̄ kan̄. Imumun̄ ebi usun̄ kan̄ cha, mè isa ema inan̄a me Gat igwu ikom ika inu Jeruselem.

⁴¹Enenikpa inyi Solomọn ibe ke Simei înan̄a me Jeruselem isi Gat, mè igwu ikom ika.

⁴²Ogwu ubọọn̄ oneniria ikwaan̄ igwen Simei, mè ibe ọmọ, “Ke m̀be ǹtetet owu ibe owu òsa me erieen̄ Okumugwem ònyan̄a ibot ònyi emi, mè itaba owu ubọk me utọn̄ ibe, ‘Usen geelek owu mônan̄abe me ere keyi ije isi ofifi ere, ke owu òbokwukwu?’ Owu obebe emi ke inu emi ntumube înwọn, ke owu môrọ si ikeya.

⁴³Ìre keke orọ mè owu okasun̄ inyan̄a-ibot ya onyan̄abe inyi Okumugwem, mè okarọ si inu nnyibe owu ida ibe owu òrọ?”

⁴⁴Ogwu ubọọn̄ onenitumu inyi Simei ibe, “Me emen ejit kwun̄, owu oriọọn̄ otutuuk ijo inu owu orọbe nte n̄a Debit. Mgbọ keyi, Okumugwem môyaka ijo kwun̄ ikpe owu.

⁴⁵Ire, Okumugwem ìbogbagbana emi ogwu ubọọn̄ Solomọn. Irek ubọọn̄ kè Debit ìbokekeke inye me isi Okumugwem ire mgbọ geelek.”

⁴⁶Ogwu ubọọn̄ oneninyi Benaya gwun̄ kè Jeyoyada ida ibe isi ikpan̄ Simei. Benaya osisi ifieek Simei ito me ijọn̄, ikwukwu. Mkpulu Ijeren onenikeke inye me ubọk kè Solomọn.