Read obolo I Ubọọn̄ 22 Bible Online

I Ubọọn̄ 22 - obolo bible

I Ubọọn̄ 22

¹Ebi Aram mè ebi Ijeren mîkup acha ita, kpetim akọn̄.

²Ire, me òso acha ita ya, Jiosefat ogwu ubọọn̄ Juda onenije isi imun̄ Eyabu ogwu ubọọn̄ Ijeren.

³Ogwu ubọọn̄ Ijeren onenitumu inyi ebi ibot ikwaan̄ kan̄ ibe, “Ìre enyi mîriọọn̄ ibe ke ama Ramot òkup me agan̄ Giliadi ìre eyi kiji? Ire, eji ekpọkpọ iriaan̄ ere, kpesi itet ibọkọ me ubọk ebi Aram.”

⁴Inenido Jiosefat ibe, “Ìre owu môgọọk emi isi itim akọn̄ me lek ebi Ramot òkup me Giliadi?” Jiosefat ofọfọọk ogwu ubọọn̄ Ijeren ibe, “Iin̄ ma! Emi melek kwun̄ ìre ge, ebi n̄a si melek ebi kwun̄ ìre ge, inyinya akọn̄ n̄a melek inyinya akọn̄ kwun̄ ìre ge.”

⁵Ire, Jiosefat onenitumu inyi ogwu ubọọn̄ Ijeren ibe, “Dasi week-nu nkeek Okumugwem òfo me lek.”

⁶Ogwu ubọọn̄ Ijeren onenititiin̄ ebi nriran òsoso efit ene ini, mè inido ema ibe, “Ìre ǹsi akọn̄ me lek ebi Ramot òkup me Giliadi, sà ìre nkasi?” Ema efọfọọk ibe, “Ogwu ubọọn̄ si, ke Ogwukaan̄-ene môyaka ama ya itap owu me ubọk.”

⁷Ire, Jiosefat onenido ibe, “Ìre kpunu ogwu nriran Okumugwem si me ere yi, ogwu eji mêkọtbe ido ikọ me otu?”

⁸Ogwu ubọọn̄ Ijeren ofọfọọk Jiosefat ibe, “Îkaan̄ si ogwu enerieen̄ ge ogwu eji mêkọtbe ido ida Okumugwem inan̄a me otu kan̄. Ire, emi ǹchacha ene ya, mije, ìkakiben ata nriran ìnyi emi, ìkire ijo ijo mgbọ geelek. Erieen̄ kan̄ ìre Mikaya gwun̄ kè Imila.” Jiosefat onenifọọk ibe, “Ogwu ubọọn̄, katumu ikeya.”

⁹Ogwu ubọọn̄ Ijeren onenigwen ogwu ibot ikwaan̄ kan̄ ge iria ibe, “Si sa Mikaya gwun̄ kè Imila na mgbọ keyi mgbọ keyi.”

¹⁰Me ike mgbọ ya, Eyabu ogwu ubọọn̄ Ijeren mè Jiosefat ogwu ubọọn̄ Juda mîtap ofọnti ubọọn̄ kiban̄, mè isiki ikweek irek, kpa ogwu me inyọn̄ ogboon̄ ubọọn̄ kan̄, me ere igen̄ akpa òkup me otunchit ama Sameria. Ebi nriran ekekiben nriran me isi kiban̄ me ere ya.

¹¹Ogwu nriran ge ekigwen Jedikaya gwun̄ kè Kenayana osasa okwukwut irọ owuwa iko ibot anam, mè ikitumu ibe, “Okumugwem ìtumu ibe ikeyi: ‘Iko chi ke owu obosa igoon̄ ebi Aram igwook, mege owu môkpan̄be otutuuk kiban̄ isan̄a.’ ”

¹²Otutuuk ebi nriran kechilọ ekekiben nriran, mè ikitumu si inu yaage ibe, “Ogwu ubọọn̄, si Ramot me Giliadi si tim kpan̄, ke Okumugwem môkana ama ya itap owu me ubọk.”

¹³Ogwu osat eriabe ibe isi igwen Mikaya otutumu inyi Mikaya ibe, “Kpọ, otutuuk ebi nriran kechilọ ekiben otu nriran yaage ibe ke inu môje ijaan̄ me lek ogwu ubọọn̄. Mun̄ ibe ke ikọ kwun̄ îlibi si ìkike melek ikọ kiban̄. Osire, tumu inu òbobele ogwu ubọọn̄ ejit.”

¹⁴Ire, Mikaya ofọfọọk ọmọ ibe, “Kè lek ugwem Okumugwem! Ikọ geelek Okumugwem obe emi ǹtumu, eya ke mbatumu.”

¹⁵Mgbọ Mikaya onube inire, Eyabu ogwu ubọọn̄ onenido ọmọ ibe, “Mikaya, tumu-nu! Ìre eji esi etim akọn̄ me lek ama Ramot me Giliadi, sà ìre ekasi?” Mikaya ofọfọọk ọmọ ibe, “Ogwu ubọọn̄, si tim kpan̄, ke Okumugwem môkana ama ya itap owu me ubọk.”

¹⁶Ogwu ubọọn̄ onenibe ọmọ, “Ìre mgbọ inen ke mbakitumu inyi owu ibe, osikitumu ikọ me erieen̄ Okumugwem inyi emi, kitumu atikọ gaalek?”

¹⁷Mikaya onenifọọk ibe, “Mmun̄ otutuuk ebi Ijeren eyiyalabe ichit inyọn̄ owuwa ogoon̄ kubọk arọọn̄ ikakaan̄ge ogwu òkikpukpo. Okumugwem onenitumu ibe, ‘Ife chi kpekaan̄ ogwu ibot. Tele mè ema egwu ekom, ogwu ikup, ifo uwu kan̄ me esuuk.’ ”

¹⁸Ogwu ubọọn̄ Ijeren otutumu inyi Jiosefat ibe, “Ke ntumu inyi owu! Ene yi ìkakiben ata nriran ìbak emi mgbọ geege, ìkire ijo ijo mgbọ geelek!”

¹⁹Mikaya okekitumu ifo isi ibe, “Eya orọ, gban̄ ikọ Okumugwem: Mmun̄ Okumugwem osikibe ikweek irek me inyọn̄ ogboon̄ ubọọn̄ kan̄, melek urum ebi osat emen inyọn̄ ekekebe ikana ọmọ me agan̄ ulom mè agan̄ ujit.

²⁰Okumugwem okekido ibe, ‘Ekene obosi ileke Eyabu, inyi ijibi akọn̄ isi itim me lek Ramot me Giliadi, mè isi ikwu me ere ya?’ “Bọkọbọkọ otu oninin̄, ge itọt ikeyi, ogwugwulọ òtọt ikilọ.

²¹Me òta kan̄, erumun̄ ge oneninan̄a isibi ikeke me isi Okumugwem, mè itumu ibe, ‘Emi mâsi ileke ọmọ.’

²²“Okumugwem onenido erumun̄ ya ibe, ‘Òborọrọ?’ “Erumun̄ ya ofọfọọk ibe, ‘Mâsi, mè ikana erumun̄ ofiaan̄ me otu otutuuk ebi nriran kan̄.’ “Okumugwem obebe ọmọ, ‘Ire ikeya, owu môkọt ileke ọmọ me atikọ. Si, mè rọ ikeya.’

²³“Eya orọ, mgbọ keyi, Okumugwem îtap erumun̄ ofiaan̄ me otu otutuuk ebi nriran kwun̄ chi. Okumugwem îtumu ifieek ibe ke jakajaka okup inyi owu.”

²⁴Jedikaya gwun̄ kè Kenayana ojeje inin̄ lek kè Mikaya, mè itap ọmọ ada me isi, mè ido ibe, “Ìre mgbọ owa ke Ekwukwu Okumugwem ojuuk emi itele, mè iyaka inikitumu ikọ inyi owu?”

²⁵Mikaya ofọfọọk ọmọ ibe, “Owu môriọọn̄ me usen ya, mgbọ owu môlibibe isi ilet lek me agwut eyi emen emen.”

²⁶Ogwu ubọọn̄ Ijeren onyinyi ida ibe, “Ìtet Mikaya ìsa ìgwu ìkom ìjet Amọn ogwu ibot ama, mè Jowas gwun̄ ogwu ubọọn̄,

²⁷mè itumu inyi ibe ke ogwu ubọọn̄ ìbe ikeyi: ‘Ìtap ene yi me mkpọn, mè ìkinyi ọmọ fituru udun̄ ubọk melek mudim udun̄ ubọk gaalek mege mâkabe me utelelek.’ ”

²⁸Mikaya otutumu inyi ogwu ubọọn̄ ibe, “Ire oka me utelelek, me atikọ, riọọn̄ ibe ke ìkare Okumugwem otumu ikọ yi inan̄a me otu n̄a,” mè inibe si, “Enyi otutuuk ebi ìkup me ere yi, ìtap iman̄ me lek ikọ yi ntumube!”

²⁹Eyabu, ogwu ubọọn̄ Ijeren, melek Jiosefat, ogwu ubọọn̄ Juda, eneninan̄a isi akọn̄ me ama Ramot me agan̄ Giliadi.

³⁰Ogwu ubọọn̄ Ijeren onenitumu inyi Jiosefat ibe, “Emi mânwene lek sabum ǹnin̄ isi akọn̄ ya. Ire, owu tap ofọnti ubọọn̄ kwun̄.” Ogwu ubọọn̄ Ijeren onwenwene lek kubọk ke ọmọ ìkare ogwu ubọọn̄, mè inan̄a isi itim akọn̄ ya.

³¹Sabum akọn̄ ya obenebe, ogwu ubọọn̄ Aram înyi akọp ebi ibot akọn̄ ita mè iba kan̄ ebi ìkikọp me uji akọn̄ ida ibe, “Ikatim akọn̄ me lek ene geelek, mè ìre ebi asasa, mè ìre ebi ilile. Ìtim akọn̄ me lek ogwu ubọọn̄ Ijeren gaalek.”

³²Mgbọ ebi ibot akọn̄ cha ìkikọp uji akọn̄ emun̄be Jiosefat, ema ebebe ke ìkpolọlọ ogwu ubọọn̄ Ijeren ire ogwa, mè ikana isi ikweek ọmọ ibetim ọmọ akọn̄ me lek. Ire, Jiosefat otataan̄ ukpo.

³³Mgbọ ebi ibot uji akọn̄ cha emun̄be ibe ke ìkare ogwu ubọọn̄ Ijeren, ema egwugwu ikom, kpeyaka igọọk ọmọ.

³⁴Me ekakpọge chieen̄, ogwu akọn̄ Aram ge obebene ogbaan̄ kan̄, mè ikpọkpọ isook oraan̄ itap me etete ene. Oraan̄ ya okpọkpọ isi itet Eyabu ogwu ubọọn̄ Ijeren, mè igwọt itibi agbagba ofọnti akọn̄ kan̄. Ogwu ubọọn̄ Eyabu otutumu inyi ogwu òkikọp uji akọn̄ kan̄ ibe, “Gwu uji kana, mè kọp emi sibi me isi akọn̄, ke mben unan.”

³⁵Mîtim akọn̄ otutuuk egwe usen ya. Otutuuk mgbọ ya, ebebieen̄ ogwu ubọọn̄ ikaan̄ me emen uji akọn̄ kan̄ iyaka isi ikpọ agan̄ ebi akọn̄ Aram ekupbe. Eje ònan̄a me lek unan kan̄ okekigbọọk igwook me emen uji akọn̄ ya. Me agan̄ ikakwun̄ usen ya, ikwukwu.

³⁶Mgbọ ura obonim me usen ya, eneninyi ida ikana me etete ebi akọn̄ ibe, “Ogwu ikaan̄ ama kan̄, ifo! Ogwu ikaan̄ ido kan̄, ifo!”

³⁷Ogwu ubọọn̄ Eyabu okwukwu, ebeben isa ika inu Sameria, mè inifuun̄ me ere ya,

³⁸mè inisa uji akọn̄ kan̄ isi igwọk me emen òkpuku mun̄ ge me Sameria, ere ebi òje oyet ekiniken mun̄. Ebi kè ibo enunu inilaka eje kan̄. Eya onenirọ ikọ Okumugwem otumube iso.

³⁹Otutuuk ofifi inu òrọrọ me ukot mkpulu kè Eyabu, mè inu îrọbe, mè uwu ubọọn̄ înamabe, mè isa oduuk eniin̄ ibala, mè otutuuk ama ile înamabe, mîge otutuuk itap me emen ikpa mfufuk echi ebi ubọọn̄ Ijeren.

⁴⁰Eyabu onenikwu ifo igọọk ebi nte nte kan̄. Ayajaya ogwu gwun̄ onenikana ubọọn̄ me irek kan̄.

⁴¹Me òso acha ini Eyabu orebe ogwu ubọọn̄ Ijeren, ke Jiosefat gwun̄ kè Asa okana ogwu ubọọn̄ Juda.

⁴²Jiosefat ìre akọp acha ita mè go mgbọ îkanabe ogwu ubọọn̄, mè ikup me Jeruselem ikpulu akọp acha iba mè go. Erieen̄ ogwu uga ìre Ajuba, gwun̄ kè Siliyi.

⁴³Jiosefat ìje me akpat ukot ogwu ute Asa, ìkatele mgbọ geege. Sa me ikeya, îrọ inu òtatat me chieen̄ Okumugwem. Ire, ìkagbugbọ isi-ijọn̄ cha. Ebi ene ekpọkpọ ikisi igwa si ngwugwa, mè ikiwọp nsensi me isi-ijọn̄ cha.

⁴⁴Jiosefat îrọ esuuk melek ogwu ubọọn̄ Ijeren.

⁴⁵Otutuuk ofifi inu òrọrọ me ukot mkpulu kè Jiosefat, mè ukot usọ akọn̄ kan̄ me akọn̄ geelek îtimbe, mîge otutuuk itap me emen ikpa mfufuk echi ebi ubọọn̄ Juda.

⁴⁶Otutuuk ebirieen̄ ebi òje oyet isi yọk cha ebi ìsisik karake ukot kè Asa ogwu ute, ìrerieen̄ ema otutuuk isan̄a kpai me lek ijọn̄ ya.

⁴⁷Me ike mgbọ ya, kpunu ogwu ubọọn̄ òkikpulu me Edọm, ogwu otuchieen̄ gaalek ke eto ibe ikikpulu.

⁴⁸Jiosefat oneninama owuwa uji ile òkisi inyam ewe me Tasis, inyi ekesi Ofiri esi esa alata araran̄ ejet ọmọ. Ire, uji cha orerek me Esiọn Geberi, kpeyaka isi Ofiri.

⁴⁹Me ike mgbọ ya, Ayajaya gwun̄ kè Eyabu onenitumu inyi Jiosefat ibe, “Tele mè ebi ikwaan̄ n̄a mè ebi ikwaan̄ kwun̄ egbaan̄ ekesi ewe ya.” Ire, Jiosefat ìkachieek.

⁵⁰Jiosefat onenikwu ifo igọọk ebi nte nte kan̄, ebeben isi ifuun̄ me agba lek ebi nte kan̄ me ama kè Debit ogwu ute. Jeyoram ogwu gwun̄ onenikana ogwu ubọọn̄ me irek kan̄.

⁵¹Me òso akọp mè acha jaaba me ukot mkpulu kè Jiosefat ogwu ubọọn̄ Juda, Ayajaya gwun̄ kè Eyabu onenikana ogwu ubọọn̄ Ijeren me Sameria, mè ikpulu ido Ijeren acha iba.

⁵²Ire, irọrọ ijo inu me chieen̄ Okumugwem, mè irọ ijo ugwem yaage nte kan̄ mè nga kan̄ erọbe, mè irọ si ijo ugwem yaage Jerobuwam gwun̄ kè Nebat orọbe, eyi îrọbe inyi ebi Ijeren erọ ijo inu.

⁵³Îkisi ikwaan̄ inyi Baali, mè ikitọbọ ebum inyi, mè isa me ikeya irọ ejit inaan̄ Okumugwem, Awaji ebi Ijeren, kubọk ogwu ute orọbe.