Read obolo I Ubọọn̄ 4 Bible Online

I Ubọọn̄ 4 - obolo bible

I Ubọọn̄ 4

¹Ogwu ubọọn̄ Solomọn onenikikpulu otutuuk Ijeren.

²Erieen̄ ebi ibot ikwaan̄ kan̄ ire echi: Ajariya gwun̄ kè Jadọk ore ogwu ngwugwa;

³Eliyorefu mè Ayija bọn kè Sisia ere ebi uti ikpa uwu oyerebet; Jiosefat gwun̄ kè Ayiludu ore ogwu òkige mfufuk;

⁴Benaya gwun̄ kè Jeyoyada ore ogwu ibot ebi akọn̄; Jadọk mè Abiata ere ebi ngwugwa;

⁵Ajariya gwun̄ kè Netan ore ogwu ibot ebi ibot mkpulu me agan̄ me agan̄; Jabudu gwun̄ kè Netan ore ogwu ngwugwa, mè ire si ogwu nteme inyi ogwu ubọọn̄;

⁶Ayisari ore ogwu òkikpọ chieen̄ me lek uwu ogwu ubọọn̄; Adoniram gwun̄ kè Abida ore ogwu òkikpọ chieen̄ me lek ebi ikwaan̄ òbọp.

⁷Solomọn onenito akọp mè ebi ibot mkpulu iba ibe ekekpulu otutuuk Ijeren, inyi eketitiin̄ inorie me ubọk ebi Ijeren esa ekekpọ owot ogwu ubọọn̄ melek otutuuk ebi uwu kan̄. Ogwu ibot mkpulu ge ìkikpọ ogwu ubọọn̄ owot onyan̄ ge me acha.

⁸Erieen̄ ebi ibot mkpulu cha ìre: Ben-Uru me agan̄ ijọn̄ ogoon̄ ogoon̄ ebi otoko kè Iferem;

⁹Ben-Dekeri me agan̄ Makaji mè Sayalibim mè Bet Semes mè Elọn Bet Yanan;

¹⁰Ben-Esedi me agan̄ Arubot mè Soko mè otutuuk ijọn̄ ebi Eferi;

¹¹Ben-Abinadap me otutuuk agan̄ Nafat Doru (ọmọ odo Tafat gwun̄ enenwaan̄ kè Solomọn me lek nwa);

¹²Bayana gwun̄ kè Ayiludu me agan̄ Tayanak mè Megido, mè otutuuk Bet San eyi òkup iriaak Jeretan eyi òkup me osiki Jesereli, bene me Bet San re Eben Meyola, mè isaba itet Jokimeyam;

¹³Ben-Geba me agan̄ Ramot me Giliadi mè asabọn ama kè Jairi gwun̄ kè Manasi òkup me Giliadi, mè agan̄ Arigobu òkup me Basan, òkakaan̄ akọp ama ile gweregwen enamabe mgban ikana, mè itap olọkọrọ ekwe me otunchit;

¹⁴Ayinadap gwun̄ kè Ido me agan̄ Mayanayim;

¹⁵Ayimaji me agan̄ Nafitali (ọmọ odo Basemat gwun̄ enenwaan̄ kè Solomọn me lek nwa);

¹⁶Bayana gwun̄ kè Usai me agan̄ Ase mè Alot;

¹⁷Jiosefat gwun̄ kè Paruwa me agan̄ Isaka;

¹⁸Simei gwun̄ kè Ela me agan̄ Benjamin;

¹⁹Geberi gwun̄ kè Uri me agan̄ Giliadi, òrere ido kè Siyon ogwu ubọọn̄ ebi Amọ mè ido kè Ôgu ogwu ubọọn̄ Basan me adasi mgbọ. Ọmọ ore ogwu ibot mkpulu ge gaalek òkikpulu otutuuk ido ya.

²⁰Ebi Juda mè ebi Ijeren ewa kubọk achiaan̄ agba awaji. Ema ekekirie inorie, mè ikinwọ miin̄, mè ikibele ejit.

²¹Solomọn onenikikpulu otutuuk ido òkup ibene me lek okwaan̄ Yuferetis isi ire ijọn̄ ebi Filisia, mè isi igwook me otubọk okike ijọn̄ ebi Ijipiti. Otutuuk ebi ido chi ekekitip otitip mkpulu isa ijet Solomọn, mè ikup me irak mkpulu kan̄ otutuuk ugwem kan̄.

²²Inu ekisa ikpọ Solomọn mè ebi uwu kan̄ owot me egwe usen ge ìre obop iko atalek akpa ekọkọk go, mè akọp obop iko akpa echi kpemalek ikọk iriọk,

²³mè akọp eriembuuk egwookbe imiin̄ ufuk me uwu, mè akọp eriembuuk iba egwookbe imiin̄ ufuk me ijọn̄ urie anam, mè efit arọọn̄ mè ebot, igbaalek ebi kè atọ, mè ogaan̄, mè uman anam, mè unọn ekpukpobe imiin̄ ufuk.

²⁴Solomọn okikpulu otutuuk ido òkup me usaba okwaan̄ Yuferetis, ibene me Tifisa isi ire Gaja, mè ikikpulu otutuuk ebi ubọọn̄ ìkikpulu me agan̄ usaba okwaan̄ Yuferetis, mè ikaan̄ esuuk melek otutuuk ido ògbagban ikana ọmọ okokop.

²⁵Ebi Juda mè ebi Ijeren, bene me Dan si re Bieseba, eluluk me utelelek me otutuuk ukot kè Solomọn, kpa ototun̄ ukan̄ mè uko gerep kiban̄ mè uko figi kiban̄.

²⁶Solomọn okakaan̄ akọp obop ogọ inyinya ini inyi uji akọn̄ kan̄, mè ikaan̄ si ebi akọn̄ inyọn̄ inyinya, akọp mè obop ene iba.

²⁷Akọp mè ebi ibot mkpulu iba cha ogwu ubọọn̄ Solomọn otobe ekekikpọ ọmọ owot, mè ikikpọ si owot otutuuk ebi ichen kan̄ geelek. Ebi ibot mkpulu cha ekikpọ ọmọ owot onyan̄ ge ge, kpa ogwu mè onyan̄ eyi kan̄. Ema ekekimun̄ ibe ke inu geege ìkanan me uwu ogwu ubọọn̄.

²⁸Ema mîkisa si akpa balì mè mbubet ijet ebi kè inyinya akọn̄ melek inyinya ije. Ogwu ikup, ìkisa echi kan̄ isi me ere edọmọbe inyi ọmọ.

²⁹Awaji oneninyi Solomọn iriọọn̄-inu, mè ngobo-ntet ogbogbo, mè iriọọn̄-lek eyi kpebekọt itọ, kubọk achiaan̄ òkup me agba awaji.

³⁰Iriọọn̄-inu kè Solomọn ogagak iriọọn̄-inu otutuuk ebi ìriọọn̄ inu agan̄ mbum-ura, mè igak si otutuuk iriọọn̄-inu ebi Ijipiti.

³¹Solomọn orọriọọn̄ inu igak otutuuk ofifi ebilene geelek, mè iriọọn̄ inu igak Etan ogwu Ejira, mè Eyiman, mè Kalikolu, mè Darida bọn kè Mayolu. Erieen̄ kan̄ okekitaan̄ etip ikana otutuuk ido ògbagban ikana ema okokop.

³²Solomọn ototo obop urọk ita, mè ikọt si obop okwa mè okwa go.

³³Îto urọk ofolek uti, ibene me lek uti olik oron Lebanọn ire lek mbubet isop òkitibi isibi me akpalek uwu. Îsa inu geelek itumu ikọ ikween̄-inu, ibene me lek ebi kè anam oron ire lek ebi kè ofut mè inu òkinyinyọnọ me ijọn̄ mè ebi kè irin̄.

³⁴Ebi ene ekekinan̄a me otutuuk ido geelek inu inikigban̄ iriọọn̄-inu kè Solomọn. Ebi ubọọn̄ otutuuk linyọn̄ isinọ inu ofolek iriọọn̄-inu kan̄, mîra ikiria ebi kiban̄ inan̄a me agan̄ geelek ibe enu enegban̄.