Read obolo I Ubọọn̄ 5 Bible Online

I Ubọọn̄ 5 - obolo bible

I Ubọọn̄ 5

¹Mgbọ Iram ogwu ubọọn̄ Taya onọbe ibe ke mîtọkọ Solomọn aran̄ me ibot isa irọ ubọọn̄ me irek ogwu ute Debit, inenisan̄a ebi otuchieen̄ ikwaan̄ kan̄ iria isi lek kè Solomọn, mije, ọmọ melek kè Debit mîre unene otutuuk mgbọ Debit orebe ubọọn̄.

²Solomọn oneniyaka iria etip ijet Iram ibe ikeyi:

³“Owu oriọọn̄ ibe ke Debit nte n̄a ìkakọt ìnama Uwu Mbuban ere ebekimin Erieen̄ Okumugwem Awaji kan̄, mije akọn̄ òwawa ikana ọmọ me ijọn̄. Ìkakọt ìnama uwu ya mege Okumugwem orọbe ibe ọmọ itim ikpan̄ otutuuk ebi ochicha kan̄.

⁴Ire, me mgbọ keyi, Okumugwem Awaji n̄a îrọ inyi ǹkaan̄ utelelek me agan̄ geelek. Ǹkakaan̄ ebi ochicha, kpunu si ùrioon̄ geege.

⁵Eya orọ, emi ǹkiweek inanama Uwu Mbuban ere ebekimin Erieen̄ Okumugwem Awaji n̄a, kubọk Okumugwem otumube inyi nte n̄a Debit ibe, ‘Gwun̄ kwun̄ ogwu mâbenebe itoon̄ me inyọn̄ ogboon̄ ubọọn̄ me irek kwun̄, ọmọ oboninama Uwu Mbuban ere ebekimin Erieen̄ n̄a.’

⁶“Mgbọ keyi, soso, nyi ida ibe ebak uti olik Lebanọn enyi emi. Ebi n̄a mè ebi kwun̄ mêgbaan̄ ubọk isi ikwaan̄. Inu geelek otumube ifieek ibe emi m̀kpe ebi kwun̄ me ubọk ikwaan̄ kiban̄, mâkpe inyi owu. Owu oriọọn̄ ibe ke kpunu ene geege me etete kiji òrọriọọn̄ icho uti kubọk enyi ebi Sidọn!”

⁷Mgbọ Iram obọkọbe etip kè Solomọn, ibebele ejit enenen, mè inibe, “Itọn̄ ikup inyi Okumugwem chereyi, mije înyibe Debit gwun̄ enerieen̄ òriọọn̄ inu ibe inikikpulu ikpele ido òkup ikeyi.”

⁸Iram onenisan̄a etip iria ijet Solomọn ibe: “Nra ibọkọ etip oriabe ijet emi. Mârọ otutuuk inu oweekbe, mâchon uti olik, igbaalek uti alaga inwan̄ inyi owu ike odobe.

⁹Ebi n̄a mêchon uti cha me oron Lebanọn, mè ikpulu igwook me okwaan̄, emi mâneninyi ida ibe ebọp ema egwook me isi mun̄, inyi ikite, mè esa enetọn̄ọ egwook me ere geelek owu môlookbe ibe esa enegwook. Ebi kwun̄ mênenikpulu. Inu mweekbe me ubọk kwun̄ ìre, mè owu òkonyi emi mè ebi uwu n̄a inorie.”

¹⁰Sa me ikeyi ke Iram onyi Solomọn otutuuk uti olik mè uti alaga inwan̄ ike îweekbe.

¹¹Solomọn onenikiria ego iko akpa wit mè efit obop iko ini, melek efit obop iko atalek aran̄ olifu echichimi ini, ijet Iram me acha me acha, ibe isa ikikpọ owot kan̄ mè ebi uwu kan̄.

¹²Okumugwem onyinyi Solomọn iriọọn̄-inu ike îchieekbe ọmọ use. Iram melek kè Solomọn egbagbaan̄ ikirọ inu me esuuk, ema ene iba enenigbaan̄ ikaan̄ mgbaan̄-nchieek.

¹³Ogwu ubọọn̄ Solomọn oneniteen̄ akọp obop ene ita me etete otutuuk ebi Ijeren, ebi ìbokisa isi unye ikwaan̄,

¹⁴mè inikiria ema isibi, me ukpa me ukpa isi Lebanọn. Ukpa ge, òrere akọp obop ene, ekikup onyan̄ ge me Lebanọn, mè ikika inisiki efuuk onyan̄ iba me uwu kiban̄. Adoniram ore ogwu ibot ebi ikwaan̄ òbọp chi.

¹⁵Solomọn ìria akọp obop ene jeeta isi me inyọn̄ orioon̄ ibe ekesi ebak ewuuk, mè iria akọp obop ene jaaba ibe ekesi ebeme ewuuk cha,

¹⁶mè iria si obop ebi ibot ikwaan̄ kan̄ ita mè efit ita ibe ekesi ekpọ chieen̄ me lek ikwaan̄, mè eketọ ikwaan̄ enyi ebi ikwaan̄ cha.

¹⁷Ogwu ubọọn̄ onyinyi ida, ebabak ikpele okpukpuk ewuuk, mè ewuuk unye otu ewe, mè echi ebabala, inyi mêsabe itọbọ ọdọ Uwu Mbuban.

¹⁸Ebi usọ ikwaan̄ ubọk kè Solomọn mè Iram mè ebi Gebali egbagbaan̄ ubọk ibala uti cha, mè irọkọ ewuuk cha, inyi mêsabe inama Uwu Mbuban.