Read obolo I Ubọọn̄ 6 Bible Online

I Ubọọn̄ 6 - obolo bible

I Ubọọn̄ 6

¹Me òso efit acha ini mè jeeta karake ebi Ijeren enan̄abe isibi me Ijipiti, me òso acha ini me lek mkpulu kè Solomọn me Ijeren, me onyan̄ Jifu,[1] òrere òso onyan̄ iba me acha, Solomọn obebene ikwaan̄ inanama Uwu Mbuban inyi Okumugwem.

²Uwu Mbuban ogwu ubọọn̄ Solomọn onamabe inyi Okumugwem, ujọn̄ọ kan̄ me emen ìre akọp mè ejit go, uwele kan̄ ore ejit go, ubene kan̄ onire ejit jaaba mè agbagba otubọk ini.

³Irak oyet òkup me agan̄ isi Uwu Mbuban ya, ujọn̄ọ kan̄ ìre ejit go, òrere ìkike melek uwele Uwu Mbuban ya.

⁴Nruruk îtaakbe me lek uwu ya ìgbagba inwan me agan̄ oyet, mè iniwele me agan̄ emen.

⁵Înama owuwa agwut agba oyet inyọn̄ ita igọm me lek akpalek uwu ya ikat ikana me akpalek uwu-ile ya, mè ere mbuban eyi emen emen. Sa me ikeya ke îtap owuwa agwut ikana uwu ya.

⁶Agwut agba oyet echi agan̄ ijọn̄, uwele kan̄ ìre ejit ge mè agbagba otubọk iba. Echi òtoon̄ me inyọn̄ kecha ore ejit ge mè agbagba otubọk ini me uwele, sà echi òso inyọn̄ ita ore ejit ge mè agbagba otubọk gweregwen me uwele. Sa me ikeyi ke înama okwukwek ikat ikana otutuuk akpalek uwu ya me ntut agan̄ oyet, inyi ebi ene ekakichak ubọk me lek akpalek uwu ya me lek kan̄.

⁷Mgbọ ekinama uwu ya, ewuuk esabe ikinama ìre gaalek echi ebabala isan̄a me ere ibak ewuuk, mè iben inu. Eya orọ, kpenọ ida abaracha, mè ida otut, mè ida ofifi nroon̄ ikwaan̄ geege esabe okwukwut irom me ere ya otutuuk mgbọ ekinama uwu ya.

⁸Isotu ekisa ije inin̄ agwut agba oyet echi agan̄ ijọn̄[2] cha ìkup inyi agan̄ osiki Uwu Mbuban ya. Mêneninene otitop ije isi echi etete mè echi òso inyọn̄ ita.

⁹Ogwu ubọọn̄ Solomọn oneninama uwu ya isan̄a, mè inisa ogbugboon̄ uti olik mè uwot uti olik itoon̄ inyọn̄ ichit.

¹⁰Înama agwut agba oyet inyọn̄ ita ikana otutuuk uwu ya, ubene agwut agba oyet cha ge ge ìre ejit ge mè agbagba otubọk iba. Esa ogbugboon̄ uti olik igọbọ agwut agba oyet cha ikam me lek Uwu Mbuban ya.

¹¹Okumugwem onenitumu ikọ melek kè Solomọn ibe,

¹²“Uwu Mbuban yi okinama, ire owu okirọ orọmijọn̄ n̄a, mè ikisun̄ ikan n̄a, mè ikirọ ida n̄a, mè ikirọ otutuuk ikọ ntọbe, mâsa me lek kwun̄ irọ otutuuk use nchieekbe Debit nte kwun̄ iso,

¹³mè iluk me uwu yi me etete ebi Ijeren, m̀kpajuuk ebi n̄a ebi Ijeren itele.”

¹⁴Solomọn oneninama Uwu Mbuban ya, mè inama isan̄a.

¹⁵Ìsa uwot uti olik igbaka ichit akpalek uwu ya me agan̄ emen, ibene me ijọn̄ isi ire ebek, mè isa si igbaka me inyọn̄ uwu me agan̄ emen, mè inisa uwot uti alaga inwan̄ ichit otutuuk ijọn̄.

¹⁶Inenisa uwot uti olik igbaka, kubọk agwut, eyi uwele kan̄ orebe ejit go, me agan̄ udun̄ udun̄ me emen uwu ya, ibene me ijọn̄ ire ebek, isa irọ ere mbuban eyi emen emen, òrere Ere Òkup Mbuban Ichit.

¹⁷Agan̄ òrere uwu-ile me emen uwu ya ìkup me isi ere mbuban eyi emen emen ya, ujọn̄ọ kan̄ ìre akọp ejit.

¹⁸Otutuuk akpalek emen uwu ya, esa uwot olik uwot olik igbaka ichit, mè itibi ogbokot melek ajakajak òchichili ibook ijot lek. Uwot olik ebalabe cha gaalek ke chieen̄ ene okimun̄, kpekimọọn̄ ewuuk esabe inama akpalek uwu ya.

¹⁹Solomọn onenibala ere mbuban eyi emen emen òkup me agan̄ udun̄ udun̄ me emen Uwu Mbuban ya, mè iniben okop inyan̄a-ibot Okumugwem iyik me ere ya.

²⁰Ere mbuban eyi emen emen ya, ujọn̄ọ kan̄ mè uwele kan̄ mè ubene kan̄ ìre ìkike, òrere akọp ejit. Esasa atalek alata araran̄ ichọkọ ichit otutuuk emen, mè inisa uwot olik ichit lek ntook ngwugwa.

²¹Solomọn onenisa atalek alata araran̄ ichọkọ ichit akpalek otutuuk emen Uwu Mbuban ya, mè inisa mkpọn esabe alata araran̄ ichọkọ ichit lek igbaka isaba ikwek isi ere mbuban eyi emen emen ya esabe si alata araran̄ ichọkọ ichit otutuuk lek.

²²Ikeyi ke Solomọn osa alata araran̄ ichọkọ ichit otutuuk emen uwu ya, mè isa si ichọkọ ichit lek ntook ngwugwa òkup me ere mbuban eyi emen emen ya.

²³Solomọn onenisa uti olifu irom ebi mbem emen inyọn̄ iba itap me emen ere mbuban eyi emen emen ya. Ubene kiban̄ ge ge ìre ejit iba mè agbagba otubọk ini.

²⁴Uwele uwop ogwu mbem emen inyọn̄ ge ìre ejit ge mè agbagba otubọk iba, uwop eyi òso iba kan̄ si ìre ejit ge mè agbagba otubọk iba. Nan̄a me otu utọn̄ uwop kan̄ ge saba toon̄ me otu utọn̄ uwop keyilọ ìre ejit iba mè agbagba otubọk ini.

²⁵Uwop ogwu mbem emen inyọn̄ eyi òso iba ìre si ejit iba mè agbagba otubọk ini, mije, ema iba cha ìre ìkike me ubene mè umin.

²⁶Ubene ebi mbem emen inyọn̄ cha ge ge ìre ejit iba mè agbagba otubọk ini.

²⁷Solomọn oneniben ebi mbem emen inyọn̄ cha iyik me emen agwut agan̄ emen emen, uwop kiban̄ ìsasan iwele. Uwop eyi ge owele isi ichak me agba uwu agan̄ ge, eyi keyilọ owewele si isi ichak me agba uwu agan̄ keyilọ. Uwop kiban̄ echi irak onenigbaan̄ ichọk me etete emen agwut ya.

²⁸Isasa alata araran̄ ichọkọ ichit otutuuk lek ebi mbem emen inyọn̄ cha.

²⁹Mîkọ ebi mbem emen inyọn̄ mè uti asaak mè ajakajak òchichili ibook ijot lek akpalek otutuuk agwut eyi emen emen ya melek uwu-ile ya.

³⁰Otutuuk ijọn̄ emen ere mbuban eyi emen emen ya, mè emen uwu-ile ya, esasa alata araran̄ ichọkọ ichit.

³¹Solomọn onenisa uwot uti olifu irọ afọn̄ mgbugbak iba itap me isotu ere mbuban eyi emen emen ya. Ubọk afọn̄ ya melek ebek afọn̄ ya ìbet lek otu okop òkaan̄ agan̄ go.

³²Erọrọkọ ebi mbem emen inyọn̄ melek uti asaak melek ajakajak òchichili ibook ijot lek afọn̄ iba cha esabe uti olifu irọ. Enenisa alata araran̄ isulu ikam ichit lek otutuuk ebi mbem emen inyọn̄ cha melek uti asaak cha.

³³Ubọk yaage si ke esa uwot uti olifu irọ ubọk afọn̄, òkaan̄ agan̄ ini, itap me uga isotu ekisa ije inin̄ emen uwu-ile ya,

³⁴mè inisa uti alaga inwan̄ irọ afọn̄ iba òkaan̄ mgbugbak iba iba, echi òkigbagba iyak me lek m̀gba kiban̄.

³⁵Mîrọkọ ebi mbem emen inyọn̄ melek uti asaak melek ajakajak òchichili ibook me lek afọn̄ cha, mè isa alata araran̄ ebọn̄be ifet ichọkọ ichit lek otutuuk.

³⁶Mînama oyet egep eyi emen emen me lek uwu ya, mè iniwak mgban ikana. Esa ewuuk ebabala melek uti olik inama mgban ya. Ike enamabe mgban ya ìre ikeyi: isitoon̄ onineen̄ ewuuk ita, mîra itoon̄ onineen̄ uti olik ge.

³⁷Etọbọ ọdọ uwu ya me òso acha ini me lek mkpulu kè Solomọn, me emen onyan̄ Jifu, òrere òso onyan̄ iba me acha.

³⁸Me emen onyan̄ Bun,[3] òrere òso onyan̄ jeeta me acha, me òso akọp mè acha ge eyi mkpulu kè Solomọn ke enama Uwu Mbuban ya isan̄a, igbaalek otutuuk inu òje me lek, kubọk etọbe. Esa acha jaaba inama Uwu Mbuban ya isan̄a.