Read obolo I Ubọọn̄ 8 Bible Online

I Ubọọn̄ 8 - obolo bible

I Ubọọn̄ 8

¹Ogwu ubọọn̄ Solomọn onenigwen otutuuk ebi ugane Ijeren, mè otutuuk ebi ibot otoko, mè ebi ibot owot iman geelek me Ijeren, ititiin̄ me isi kan̄ me Jeruselem ibe enesi eben okop inyan̄a-ibot Okumugwem me ama kè Debit, òrere Sayọn, esa enetap me Uwu Mbuban.

²Otutuuk ebirieen̄ Ijeren enenititiin̄ me isi ogwu ubọọn̄ Solomọn me ibot mgbọ ijọk Uwu Nlak, me onyan̄ Etanim,[5] òrere òso onyan̄ jaaba me acha.

³Mgbọ otutuuk ebi ugane Ijeren enube iso, ebi ngwugwa eneniben okop inyan̄a-ibot ya.

⁴Ebi ngwugwa mè ebi otoko kè Libai eben okop inyan̄a-ibot Okumugwem ya, melek Atanga Chinichini, melek otutuuk nroon̄ ikwaan̄ òkup mbuban ekisa irọ ikwaan̄ me emen Atanga Chinichini ya, isa ikije.

⁵Ogwu ubọọn̄ Solomọn mè otutuuk ebi Ijeren ìtititiin̄ melek kan̄ ekekije me isi okop inyan̄a-ibot ya, mè ikigwu owuwa arọọn̄ mè eriembuuk echi kpekọt iriọọn̄ otu ifuk, kpebekọkọt si ifuk otu ifuk, isa ikigwa ngwugwa.

⁶Ebi ngwugwa cha eneniben okop inyan̄a-ibot Okumugwem ya isa iniyik me irek kan̄ me irak uwop ebi mbem emen inyọn̄ cha me emen ere mbuban eyi emen emen ya, òrere Ere Òkup Mbuban Ichit me Uwu Mbuban.

⁷Uwop ebi mbem emen inyọn̄ iba cha ìyayat iwele ichit ere okop inyan̄a-ibot ya okupbe, mè ikana ichit okop ya melek ogbugboon̄ ekisa iben.

⁸Ogbugboon̄ chi îjọn̄ọ enenen ire lek ekikup me Ere Mbuban imun̄ ibot kiban̄ me isi ere mbuban eyi emen emen ya. Ire, kpekikup me ofifi ere imun̄ ibot ogbugboon̄ cha, ilọ me lek Ere Mbuban. Ogbugboon̄ cha òwa me ere ya mege inire chereyi.

⁹Kpunu inu geege òkup me emen okop inyan̄a-ibot ya, ilọ me lek okpọkọ ewuuk iba echi Mosis otapbe me emen me agba lek ogoon̄ Orebu, ere Okumugwem onyan̄abe ibot melek ebi Ijeren mgbọ ema enan̄abe me Ijipiti isibi.

¹⁰Mgbọ yaage ebi ngwugwa enan̄abe me Ere Mbuban ya isibi, oduku inyọn̄ oduduku ichit emen Uwu Mbuban Okumugwem.

¹¹Ebi ngwugwa kpeyaka ikọt ikup irọ ikwaan̄ kiban̄ mije oduku inyọn̄ ya, bak me lek, ujamgbugbo Okumugwem ìninin̄ ijot emen Uwu Mbuban Okumugwem ya.

¹²Solomọn onenibe, “Okumugwem, owu otumu ibe ke owu òboluk me emen uga udun.

¹³Mgbọ keyi, me atikọ, nra inama nga uja Uwu Mbuban inyi owu, ere owu oboluk isi ire mgbọ geelek.”

¹⁴Ike otutuuk ebi Ijeren ekekebe me ere ya, ogwu ubọọn̄ onenikana isi ikpọ ema, mè inigbana ema,

¹⁵mè ibe ema, “Itọn̄ ikup inyi Okumugwem, Awaji ebi Ijeren, ogwu òsa ubọk kan̄ gaalek irọ inu îsabe otu kan̄ gaalek ichieek use inyi nte n̄a Debit iso. Mije îre ọmọ otumu ibe,

¹⁶‘Karake nsan̄abe ebi n̄a, ebi Ijeren, isibi me Ijipiti, ǹkagobo ama geege me otutuuk otoko ebi Ijeren ere ebenama Uwu Mbuban inyi Erieen̄ n̄a. Ire, ngobo Debit ibe ikpulu ebi n̄a Ijeren.’

¹⁷“Nte n̄a Debit îben me ejit inanama Uwu Mbuban ere ebekimin Erieen̄ Okumugwem, Awaji ebi Ijeren.

¹⁸Ire, Okumugwem otutumu inyi nte n̄a Debit ibe, ‘Eyi owu obenbe me ejit inanama Uwu Mbuban ere ebekimin Erieen̄ n̄a, owu orọ ijaan̄, mije, òbeben inu ya me ejit kwun̄.

¹⁹Ubọk geelek, ìkare owu obonama Uwu Mbuban ya. Gwun̄ kwun̄, ogwu ònan̄a me akpalek kwun̄ isibi, îre ọmọ oboninama Uwu Mbuban ere ebekimin Erieen̄ n̄a.’

²⁰“Okumugwem îrọ otu use kan̄ iso. Emi nnibọkọ irek ubọọn̄ kè Debit nte n̄a, mè isiki ikweek irek me inyọn̄ ogboon̄ ubọọn̄ Ijeren, ike Okumugwem otumube. Nra inama Uwu Mbuban ere ebekimin Erieen̄ Okumugwem, Awaji ebi Ijeren.

²¹Nsun̄ irek me emen uwu ya inyi okop ya, eyi inyan̄a-ibot Okumugwem okupbe me emen, eyi òrere inyan̄a-ibot înyan̄abe melek ebi nte nte kiji mgbọ îsan̄abe ema isibi me Ijipiti.”

²²Solomọn onenikeke me isi ntook ngwugwa Okumugwem, mè isi otutuuk ebi Ijeren ìtititiin̄ me ere ya, mè ibene ubọk iba kan̄ ifo inyọn̄,

²³mè iriaak uriaak ibe: “Jei Okumugwem, Awaji ebi Ijeren, me emen inyọn̄ mè ìre me linyọn̄, kpunu awaji òbet lek kwun̄, owu ogwu òkirọ inyan̄a-ibot kwun̄ iso, mè ikikaan̄ imumechieen̄ mgbọ geelek me lek ebi ikwaan̄ kwun̄ ebi ìkije me oniin̄ kwun̄ me otutuuk ejit kiban̄.

²⁴Owu orọ otu use kwun̄ ochieekbe ogwu usun̄ kwun̄ Debit nte n̄a iso. Owu òsasa otu kwun̄ gaalek ichieek use ya, mè inisa si ubọk kwun̄ gaalek irọ iso, ike îkupbe me cherekeyi.

²⁵“Mgbọ yi, Okumugwem, Awaji ebi Ijeren, rọ use eyi ochieekbe ogwu usun̄ kwun̄ Debit nte n̄a so, kubọk otumube inyi ọmọ ibe, ‘Owu òkponan ene ogwu òbosiki ikweek me inyọn̄ ogboon̄ ubọọn̄ ikikpulu Ijeren me isi n̄a, ire gaalek ke bọn kwun̄ ebirieen̄ mêgbala chieen̄ ikiluk ata ugwem me isi n̄a, kubọk owu orọbe.’

²⁶Eya orọ, jei Awaji ebi Ijeren, soso rọ ibe otu ikọ kwun̄, eyi owu otumube inyi ogwu usun̄ kwun̄ Debit nte n̄a irọ iso.

²⁷“Ìre Awaji môniluk me linyọn̄ ni? Ikerere emen inyọn̄ ere òbebene ichit, ìkpokọt ita owu. Ire ikeya, ìre Uwu Mbuban keyi nnamabe ìbojeje ita owu?

²⁸Ubọk geelek si, nye lek gban̄ utọn̄ me lek uriaak mè mbeek emi ogwu usun̄ kwun̄ nkibeek, jei Okumugwem Awaji n̄a. Nye lek nọ ito melek uriaak ogwu usun̄ kwun̄ okupbe me isi kwun̄ ikiriaak cherekeyi.

²⁹Tele mè chieen̄ kwun̄ ikup, eririeen̄ mè ikarek, me lek Uwu Mbuban yi eyi owu otumube ibe, ‘Erieen̄ n̄a môkup me ere ya.’ Nye lek kinọ uriaak geelek emi ogwu usun̄ kwun̄ mâkiriaak ikana isi ikpọ ere keyi.

³⁰Nọ uriaak geelek emi ogwu usun̄ kwun̄, mè ìre ebi kwun̄ ebi Ijeren, mêkiriaak ikana isi ikikpọ ere keyi. Nye lek kup me emen inyọn̄ ere okiluk nọ, mè tele nyi eji.

³¹“Ikaan̄ ogwu irọ ogwu ngwan̄ ilọ, etetet ibe inyan̄a ibot, ire ene ya inu ininyan̄a ibot me isi ntook ngwugwa kwun̄, me Uwu Mbuban yi,

³²kup me emen inyọn̄ nọ, mè sibi oyerebet nyi ebi usun̄ kwun̄. Ogwu oyerebet otipbe, tip oyerebet, mè kana mkpukpe ijo ubọk ikwaan̄ kan̄ chit ọmọ me ibot. Ogwu ubọk otanabe, nwọn oyerebet, mè rọ inyi inu ije ijaan̄ me lek kan̄, mije ata irọrọ kan̄.

³³“Ire ebi ochicha itim akọn̄ ikpan̄ ebi kwun̄ Ijeren mije ema erọbe owu ilọ, ema enenigwu ikom inu me lek kwun̄, mè igwen erieen̄ kwun̄, mè iriaak uriaak, mè ibeek mbeek me emen Uwu Mbuban yi,

³⁴nye lek kup me emen inyọn̄ nọ ema ida, mè tele nrọ-nlọ ebi kwun̄ Ijeren nyi ema, mè yaka sa ema ka na me inyọn̄ ijọn̄ ya eyi owu onyibe ebi nte nte kiban̄.

³⁵“Ire akpa isinyọn̄ igon ichit, ibot ìkayaka ìrep, mije ebi kwun̄ erọbe owu ilọ, ema isibene isi ikpọ ere keyi, mè igwen erieen̄ kwun̄, mè igwu ikom me emen nrọ-nlọ kiban̄, mije osusut owu osulube ema,

³⁶soso kup me emen inyọn̄ nọ ema ida, mè tele nrọ-nlọ ebi usun̄ kwun̄ ebi Ijeren nyi ema. Jeen̄ ema ata oniin̄ ema ebeluk ugwem, mè yaka ria ibot gwook me lek ijọn̄ kwun̄ eyi onyibe ebi kwun̄ me ìrot.

³⁷“Mgbọ geelek akan̄ isinin̄ me lek ijọn̄ yi, mè ìre ùrioon̄, mè ìre esese chieen̄ orukan̄ mfut uko, mè ìre akaka ituuk, mè ìre akaka ikike ojijaka inu me uko, mè ìyaka ire ebi ochicha ejibi akọn̄ inikpa mbin ikana ama kiban̄ geelek, mè ìyaka ire chieen̄ ùrioon̄ geelek, mè ìre orukan̄ onu me lek kiban̄,

³⁸ire ene geelek me etete ebi kwun̄ Ijeren, ogwu òrọriọọn̄ inu òkisisaak ọmọ me ejit, iriaak uriaak, mè ibeek mbeek, mè ibene ubọk iba kan̄ ifo inyọn̄ inyi agan̄ Uwu Mbuban keyi,

³⁹nye lek kup me emen inyọn̄ ere owu okiluk nọ, mè tele nyi ema, mè rọ inu ògbegbe irọrọ. Rọ inu me lek ene geelek kpọ me lek irọrọ kan̄, mije, owu oriọọn̄ ejit kan̄. Owu gaalek oriọọn̄ ejit otutuuk ebilene.

⁴⁰Rọ inu yi, inyi ema esa me ikeyi eketet owu ukpook me lek me otutuuk ugwem kiban̄ me inyọn̄ ijọn̄ yi eyi owu onyibe ebi nte nte kiji.

⁴¹“Ire ogwu ichen, ogwu ìkare ene ge me lek ebi kwun̄ ebi Ijeren, inan̄a me ujọn̄ọ ere inu mije erieen̄ kwun̄,

⁴²mije ebi ene kpebelọlọ inọnọ etip ikpele erieen̄ kwun̄, mè ikpele unye kwun̄, mè nke nke ikpele ikwaan̄ echi owu okirọ; ire ogwu ichen òkup ikeya inu iniriaak uriaak ikana isi ikikpọ Uwu Mbuban yi,

⁴³soso kup me emen inyọn̄ ere owu okiluk nọ uriaak kan̄, mè rọ inu geelek îbeekbe owu, inyi otutuuk ebi linyọn̄ esa me ikeya eriọọn̄ erieen̄ kwun̄, mè eketet ukpook kwun̄, kubọk ebi kwun̄ Ijeren ekitet ukpook kwun̄. Ene ya mônenisa me ikeya iriọọn̄ si ibe ke Erieen̄ kwun̄ òwa me lek uwu yi nnamabe.

⁴⁴“Ire ebi kwun̄ isibi isi itim akọn̄ me lek ebi ochicha kiban̄ ubọk owu oriabe ema, mè ikiriaak uriaak igwen owu, Okumugwem, ibene isi ikikpọ ama yi eyi owu ogobobe, melek Uwu Mbuban yi nnamabe inyi Erieen̄ kwun̄,

⁴⁵nye lek kup me emen inyọn̄ nọ uriaak kiban̄ mè mbeek kiban̄, mè rọ inu ema eweekbe nyi ema.

⁴⁶“Ire ema irọ owu ilọ, (mije, kpunu ogwu ìkakirọ ìlọ), owu onanaan̄ ejit me lek kiban̄, mè ikana ema itap me ubọk ebi ochicha, ebi ochicha enenikpulu ema me usun̄ akọn̄ isa ifo ido kiban̄, mè ìre ere ujọn̄ọ ere mè ìre mgbet mgbet ere,

⁴⁷ema enenikup me ido ya ekpulube ema isi igwook inwene ejit, mè inigwu ikom, mè ikup me ido ya ibeek owu mbeek ibe, ‘Eji mîrọ owu ijo inu, eji mîje owu ilọ, mè irọ owu inu ikpak;’

⁴⁸mè inikup me ido ebi ochicha kiban̄, ebi ìkpukpulu ema me usun̄ akọn̄ ifo, mè inigwu ikom inu me lek kwun̄ me otutuuk ejit kiban̄ mè efuuk kiban̄, mè iniriaak uriaak ikikpọ agan̄ ido kiban̄ eyi owu onyibe ebi nte nte kiban̄, melek ama ya eyi owu ogobobe inyi lek kwun̄, mè Uwu Mbuban yi nnamabe inyi Erieen̄ kwun̄;

⁴⁹soso kup me emen inyọn̄ ere owu okiluk nọ uriaak kiban̄ mè mbeek kiban̄, mè rọ inu ema eweekbe nyi ema.

⁵⁰Tele ijo inu ebi kwun̄ erọbe owu nyi ema, mè tele si inu ikpak geelek erọbe owu nyi ema, mè rọ inyi ebi ìkpukpulu ema me usun̄ akọn̄ ekaan̄ ejit nsan me lek kiban̄;

⁵¹mije, ema ìre ebi kwun̄ ebi owu ogobobe inyi lek kwun̄, ebi owu osan̄abe isibi me emen otin̄ ekisa ikala oporolo me Ijipiti.

⁵²“Soso kasan̄a chieen̄ me lek mbeek ogwu usun̄ kwun̄, mè mbeek ebi kwun̄ Ijeren. Soso, nọ ida kiban̄ mgbọ geelek ema ekigwen owu.

⁵³Mije, owu osan̄a ema me etete otutuuk ido geelek òkup me linyọn̄ yi isun̄ esese inyi lek kwun̄, inyi ema enere ìrot kwun̄, kubọk owu otumube inan̄a me otu ogwu usun̄ kwun̄ Mosis, mgbọ owu, Ogwukaan̄-ene Okumugwem, osan̄abe ebi nte nte kiji isibi me Ijipiti.”

⁵⁴Mgbọ Solomọn oriaakbe otutuuk uriaak chi isan̄a inyi Okumugwem, mè ibeek mbeek chi isan̄a, inanan̄a ikeke me isi ntook ngwugwa Okumugwem, ere îtọbọbe ekpe mè ibene ubọk iba kan̄ ifo inyọn̄ otutuuk mgbọ ya.

⁵⁵Inenikeke, mè inibene ida igbana otutuuk Ijeren ìtititiin̄ me ere ya ibe,

⁵⁶“Itọn̄ ikup inyi Okumugwem ogwu ònyinyi ebi kan̄ Ijeren utelelek ike îchieekbe use. Me otutuuk ata use kan̄ geelek îchieekbe inan̄a me otu ogwu usun̄ kan̄ Mosis, geege ikeyi ìkalọ irọrọ iso.

⁵⁷Okumugwem Awaji kiji, kup melek kiji kubọk okupbe melek ebi nte nte kiji. Soso katele eji, mè kajijit si eji.

⁵⁸Gwu ejit kiji kom na me lek kwun̄, inyi eji ekeje me oniin̄ kwun̄, mè ekerọ ikọ owu otọbe, mè ekerọ orọmijọn̄ kwun̄, mè ekesun̄ ikan kwun̄ cha onyibe ebi nte kiji.

⁵⁹Soso, tele ibe ikọ mbeek n̄a chi mbeekbe me isi Okumugwem ibia me isi kwun̄, Okumugwem Awaji kiji, ikarek mè eririeen̄, inyi owu òrọ inu òkup ogwu usun̄ kwun̄ melek ebi kwun̄ Ijeren me uyọt, me usen me usen.

⁶⁰Sa me ikeya, ebi ido geelek me linyọn̄ mêneniriọọn̄ ibe ke Okumugwem ore Awaji, ke kpunu ofifi.

⁶¹Enyi ebi eyi Awaji, ìsa otutuuk ejit kinyi ìnyi Okumugwem Awaji kiji gaalek, mè ìkiluk ugwem ìkpọ me lek orọmijọn̄ kan̄, mè ìkirọ ikọ îtọbe, kubọk enyi ekirọ me cherekeyi.”

⁶²Ogwu ubọọn̄ melek otutuuk ebi Ijeren enenigwa owuwa ngwugwa me isi Okumugwem.

⁶³Solomọn ìgwu akọp obop eriembuuk iba mè obop iba, mè igwu si efit mè akọp obop arọọn̄ mè ebot iba isa igwa ngwugwa esuuk inyi Okumugwem. Ikeyi ke ogwu ubọọn̄ melek otutuuk ebi Ijeren esa ifaka Uwu Mbuban Okumugwem ya itap me ubọk Okumugwem.

⁶⁴Usen ya, Solomọn îgbama si lek emen oyet egep òkup me agan̄ isi Uwu Mbuban Okumugwem, inyi ikup me mbuban, mè inigwa ngwugwa echi ewọwọp, mè echi akpa, mè echi okpọn̄ esabe igwa ngwugwa esuuk. Ìrọ ikeya, mije, ntook ngwugwa ekwe òkup me isi Okumugwem misip, ìkakọt iben otutuuk ngwugwa ewọwọp, mè echi akpa, mè echi okpọn̄ ngwugwa esuuk cha.

⁶⁵Solomọn melek otutuuk ebi Ijeren enenirie ijọk Uwu Nlak me mgbọ ya me isi Okumugwem Awaji kiban̄. Ema mîwa enenen. Ema enan̄a me otutuuk ere, ibene me Lebo Amat me agan̄ inyọn̄ isi igwook me lek oka okolo Ijipiti me agan̄ osiki. Ema otutuuk ekup me isi Okumugwem Awaji kiji otuuk kè usen jaaba me adasi kan̄, mè inikpọk irie ijọk yi si ofifi usen jaaba igbaalek. Otutuuk usen ijọk yi onenire akọp mè usen ini.

⁶⁶Me ofit iwele kan̄, òrere òso egwe jeeta me lek ijọk òso iba ya, Solomọn oraria otutuuk ebi ife cha ifon. Ema otutuuk enenigbana ogwu ubọọn̄, mè ikije ifon uwu kiban̄ melek uga ubelejit mè uga unwọọn̄ mije otutuuk ata inu geelek Okumugwem orọbe inyi ogwu usun̄ kan̄ Debit mè ebi kan̄ ebi Ijeren.