Read obolo I Ubọọn̄ 9 Bible Online

I Ubọọn̄ 9 - obolo bible

I Ubọọn̄ 9

¹Mgbọ Solomọn onamabe Uwu Mbuban Okumugwem mè uwu ogwu ubọọn̄ isan̄a, mè irọ otutuuk inu îbenbe me ejit irọrọ iso,

²Okumugwem onenikana isibi me isi kan̄ òso mgbọ iba me emen ilaak, ike îkanabe isibi me isi kan̄ me Gibiọn,

³mè initumu inyi ọmọ ibe, “Nra inọ uriaak kwun̄ mè mbeek kwun̄ obeekbe me isi n̄a. Nra irọ Uwu Mbuban yi owu onamabe ikup mbuban, òrere ere ebekimin Erieen̄ n̄a isi ire mgbọ geelek. Chieen̄ n̄a mè ejit n̄a ìbokukup me lek mgbọ geelek.

⁴“Eyi kwun̄, ire owu oluk ugwem òtatat me isi n̄a me otutuuk ejit kwun̄, mè ikirọ atikọ kubọk Debit nte kwun̄ orọbe, mè ikirọ otutuuk ida n̄a, mè ikirọ orọmijọn̄ n̄a, mè ikisun̄ otutuuk ikan n̄a,

⁵mârọ inyi irek ubọọn̄ kwun̄ me Ijeren ikeke inye ire mgbọ geelek, kubọk nchieekbe nte kwun̄ use ibe, ‘Owu òkponan ene ogwu òbosiki ikweek me inyọn̄ ogboon̄ ubọọn̄ ikikpulu Ijeren.’

⁶“Ire, ire owu mè bọn kwun̄ inan̄a itele emi, kpeyaka ikirọ ikọ ntọbe, kpeyaka ikirọ orọmijọn̄ n̄a echi nnyibe enyi, kpan̄asi ikeya, eyaka ikikana igọọk ebi kè ofifi awaji, mè ikitọbọ ebum inyi ema,

⁷emi mâfieek ebi Ijeren isan̄a me inyọn̄ ijọn̄ ya nnyibe ema. Mâjit si Uwu Mbuban yi eyi nrọbe ibe ikup mbuban kubọk ere ebekimin Erieen̄ n̄a. Ido Ijeren mônenikana inu otutuuk ebi ife geelek ebekisa ito urọk, mè ikisa ito mbele.

⁸Uwu Mbuban yi, òbebene isi ichep me inyọn̄ mgbọ keyi, môgbugbọ igwook. Ene geelek òboje iraka, mè ibene chieen̄ imun̄, môriki, mè ichak, mè itumu ibe, ‘Ìre keke orọ Okumugwem orọbe ojelek inu òkup ikeyi me lek ido yi melek Uwu Mbuban yi?’

⁹Ebi ene mêkekitumu ibe, ‘Îre mije ema ejitbe Okumugwem Awaji kiban̄ ogwu òsasan̄a ebi nte nte kiban̄ isibi me Ijipiti itele, mè ikana isi ikigọọk ebi kè ofifi awaji, mè ikitọbọ ebum inyi ema, mè ikisi ikwaan̄ inyi ema, îre eya orọ Okumugwem Awaji kiban̄ osabe otutuuk ufialek chi ijet ema.’ ”

¹⁰Me òta akọp acha iba mgbọ Solomọn onamabe uwu iba cha, Uwu Mbuban Okumugwem mè uwu ogwu ubọọn̄,

¹¹ogwu ubọọn̄ Solomọn onenisa akọp ama iba me Galili iche inyi Iram ogwu ubọọn̄ Taya kubọk mkpukpe otutuuk uti olik mè uti alaga inwan̄ mè alata araran̄ Iram oriabe ijet ọmọ, me otu ifuk geelek ọmọ oweekbe, me lek ikwaan̄ cha.

¹²Iram oneninan̄a me Taya inu inikpọ ama cha Solomọn onyibe ọmọ, ire, ìkabele ejit me lek ama cha.

¹³Inenido Solomọn ibe, “Ìre kpasi ama ire echi onyibe emi, ngwan̄ n̄a?” Igwegwen ama cha ibe ìre inyọn̄ ijọn̄ Kabun, eyi òsisibi ama ikakupge me lek inu geege. Ikeya ke ekigwen ama cha mege inire chereyi.

¹⁴Otutuuk alata araran̄ Iram oriabe ijet ogwu ubọọn̄ Solomọn me lek ikwaan̄ cha îwa iraka obop kilo alata araran̄ ini.

¹⁵Eyi ìre mfufuk ikwaan̄ òbọp echi ogwu ubọọn̄ Solomọn osabe ebi ene isi mgbọ înamabe Uwu Mbuban mè uwu ubọọn̄ kan̄, mè itọm agan̄ mbum-ura ama Jeruselem, mè inama mgban ikana ama Jeruselem, mè ikpọk inama ama Asọru, mè Megido, mè Gejeri.

¹⁶Sabum mgbọ keyi, ogwu Fero, òrere ogwu ubọọn̄ ido Ijipiti îtim akọn̄ ibọkọ Gejeri, mè itap ukan̄ iwọp, mè ikpan̄ ebi Kenan ebikaan̄ ama ya isan̄a, mè isa ama ya iche inyi gwun̄ kan̄ enenwaan̄, òrere nwa kè Solomọn, kubọk uche usen ijọk ibat-olom.

¹⁷Solomọn onenikpọk inama Gejeri. Solomọn înama si Bet Oron agan̄ osiki,

¹⁸mè Bayalat, mè Tamara[6] me emen èwê, me okike ijọn̄ kan̄.

¹⁹Înama si otutuuk ama isun̄-inorie, mè ama ere îkisun̄ uji akọn̄ kan̄, mè ama ere ebi ìkikọp inyinya akọn̄ ekiluk, mè otutuuk inu geelek îweekbe inanama me Jeruselem, mè Lebanọn, mè otutuuk ere îkikpulu.

²⁰Îkaan̄ si ebi kpere bọn owot Ijeren ebi ìsisik, mè ikiluk si me inyọn̄ ijọn̄ ya. Ema ìre ebi Amọ, mè ebi Et, mè ebi Pereji, mè ebi Ifi, mè ebi Jebus.

²¹Bọn ebi ife chi ebi ìsisik me inyọn̄ ijọn̄ ya, ebi ebi Ijeren kpekpan̄ isan̄a kubọk inu oniin̄ akọn̄, ema ke Solomọn okpulu isa ikirọ ikwaan̄ òbọp cha mege inire cherekeyi.

²²Ire, Solomọn ìkasa ogwu Ijeren geege ìrọ usun̄. Kpan̄asi ikeya, ema ere ebi ìkitim akọn̄, mè ebi ibot ikwaan̄ kan̄, mè ebi ibot mkpulu kan̄, mè ebi ibot akọn̄ kan̄, mè ebi ibot uji akọn̄ kan̄, mè ebi ibot ebi ìkikọp uji akọn̄.

²³Ema si ere ebi ibot ikwaan̄ me lek otutuuk ikwaan̄ cha geelek Solomọn orọbe. Ema, efit ene go mè akọp go, ke îto ibe ekekpọ chieen̄ me lek ebi ìkirọ ikwaan̄ cha.

²⁴Mgbọ gwun̄ enenwaan̄ kè ogwu Fero, òrere nwa kè Solomọn, onan̄abe me ama kè Debit ikana inin̄ aya uwu ubọọn̄ Solomọn onamabe inyi ọmọ isan̄a, mgbọ ya ke Solomọn otọm ijọn̄ agan̄ mbum-ura ama Jeruselem ya ibene ichak.

²⁵Solomọn ìkigwa ngwugwa ewọwọp mè ngwugwa esuuk me inyọn̄ ntook ngwugwa înamabe inyi Okumugwem mgbọ ita me acha, mè ikiwọp si nsensi me inyọn̄ ntook òkup me isi Okumugwem. Ikeya ke înama Uwu Mbuban ya isan̄a.

²⁶Solomọn înama owuwa uji ile me Esiọn Geberi, me agba lek Elat me ido Edọm, me agba okwaan̄ Anyiaan̄.

²⁷Iram oraria ebi kan̄, ebi ikwaan̄ uji ile, ebi ìrọriọọn̄ okwaan̄, ibe enegọọk ebi ikwaan̄ kè Solomọn egbaan̄ ekesi ikwaan̄ me emen uji ile cha.

²⁸Ebi ikwaan̄ uji ile cha enenikọp isi Ofiri isi inyam ewe, mè isa akọp mè obop kilo alata araran̄ ini ika ijet Solomọn.